ཨ་ཕ་གསེར་གྱི་ཕོར་བའི་རྐང་སྤོལ་འགྲན་ཚོགས་སྒང་ཏོག་ཏུ་འཚོག་མུས་ཡིན་འདུག

འདི་ལོའི་ཨ་ཕ་གསེར་གྱི་ཕོར་བ་རྐང་སྤོལ་འགྲན་ཚོགས་ཁྲོད་རྒྱ་བལ་གཉིས་དང་། ཨ་རི། ཧྥ་རན་སི་སོགས་ནས་རང་ལོ་བཞི་བཅུ་ཡན་གྱི་རུ་ཁག་ཉི་ཤུས་མཉམ་ཞུགས་གནང་སྟེ་ད་ལྟ་རྩེད་འགྲན་བྱེད་མུས་ཡིན་འདུག

APFA gold cup participants in Paljor stadium , Gangtok, Sikkim(Photo/APFA)

ཟླ་འདིའི་ཕྱི་ཚེས་ ༡༦ ནས་ ༣༠ བར་པཱ་ལགས་རྐང་རྩེད་སྤོ་ལོའི་ཚོགས་པའི་གོ་སྒྲིག་འོག རང་ལོ་བཞི་བཅུ་ཡན་གྱི་ཨ་ཕ་གསེར་གྱི་ཕོར་བ་རྐང་སྤོལ་འགྲན་སྡུར་ཐེངས་གཉིས་པ་དེ་རྒྱ་གར་བྱང་ཤར་འབྲས་ལྗོངས་སྒང་ཏོག་གི་དཔལ་འབྱོར་རྩེད་ཐང་དུ་འཚོག་མུས་ཡིན་ཞིང་། འདི་ལོའི་རྩེད་འགྲན་ཁྲོད་རྒྱ་བལ་གཉིས་གཙོས་ཨ་རི་དང་། ཧྥ་རན་སི་ནས་རང་ལོ་ ༤༠ ཡན་གྱི་སྐྱེས་པའི་རུ་ཁག་ཉི་ཤུ་ཡིས་མཉམ་ཞུགས་གནང་མུས་ཡིན་འདུག་ལ། འདི་ལོའི་ཨ་ཕ་རྐང་སྤོལ་འགྲན་ཚོགས་ཀྱི་ཨང་དང་པོར་ཧིན་སྒོར་འབུམ་གཅིག་དང་ཕྱེད་ཀ ཨང་གཉིས་པར་ཧིན་སྒོར་འབུམ་གཅིག་གི་བྱ་དགའ་གནང་རྒྱུ་ཡིན་འདུག

དེའི་ཐད་པཱ་ལགས་རྐང་རྩེད་སྤོ་ལོའི་ཚོགས་པའི་ཚོགས་གཙོ་ཚེ་རིང་ཡེ་ཤེས་ལགས་ཀྱིས་ཁ་པར་བརྒྱུད་འདི་གའི་གསར་འགོད་པར། འདི་ལོར་འབྲས་ལྗོངས་དེ་རྒྱ་གར་གྱི་མངའ་སྡེ་ཆགས་ནས་མི་ལོ་ལྔ་བཅུ་ལོན་པའི་དུས་དྲན་ཞིག་དང་། ༧གོང་ས་རྒྱལ་བ་རིན་པོ་ཆེ་མཆོག་དགུང་ལོ་དགུ་བཅུར་ཕེབས་པའི་སྐུའི་གོ་སྟོན་སྲུང་གཙི། དེ་བཞིན་ད་བར་རྒྱ་གར་ལྷོ་ཕྱོགས་དང་། བྱང་ཕྱོགས་ཀྱི་གཞིས་ཆགས་ཁག་ཏུ་རྐང་སྤོལ་སོགས་ཀྱི་འགྲན་ཚོགས་རིམ་པ་འཚོགས་ཡོད་ཀྱང་། རྒྱ་གར་བྱང་ཤར་ཁུལ་དུ་རྩེད་འགྲན་དེ་འདྲ་ཚོགས་མེད་པས། འདི་ལོར་ཨ་ཕ་རྐང་སྤོལ་འགྲན་ཚོགས་དེ་འབྲས་ལྗོངས་སུ་འཚོགས་པ་ཡིན། དེ་བཞིན་འདི་ལོའི་རྩེད་འགྲན་སླད་རུ་ཁག་ཉི་ཤུ་དང་། རུ་ཁག་རེར་རྩེད་འགྲན་པ་སོགས་མི་གྲངས་ཉི་ཤུ་རེ་ཡོད། ཅེས་བརྗོད་བྱུང་།

ཡང་ཁོང་གིས། ཨ་ཕ་གསེར་གྱི་རྐང་སྤོལ་འགྲན་ཚོགས་ཚོགས་དོན་ནི། བཙན་བྱོལ་བོད་མིའི་མི་འབོར་ཁྲོད་མི་འབོར་མང་ཤོས་ནི་ལོ་ན་བཞི་བཅུ་ཡན་ཆགས་ཀྱི་ཡོད་ཀྱང་། དེ་དག་གི་འཕྲོད་བསྟེན་ཆེད་ནད་པ་ཆགས་ཚར་བའི་རྗེས་ལ་རོགས་རམ་སོགས་ཡོད་ནའང་། ང་ཚོའི་སྤྱི་ཚོགས་ནང་མ་ན་གོང་དུ་དམིགས་བསལ་ལས་གཞི་གང་ཡང་མི་འདུག་པས། ང་ཚོས་ལོ་ན་བཞི་བཅུ་ཡན་གྱི་འཕྲོད་བསྟེན་ལ་དམིགས་སུ་བཀར་ནས་གོ་སྒྲིག་བྱས་པ་ཞིག་ཡིན། དེ་བཞིན་རྩེད་འགྲན་པ་མང་ཆེ་བ་ནང་གི་ཨ་ཕ་ཡིན་སྟབས། རྩེད་འགྲན་གྱི་མིང་དུའང་ཨ་ཕ་གསེར་གྱི་ཕོར་བ་ཞེས་བཏགས་པ་ཡིན། ཨ་ཕ་ནི་༧གོང་ས་རྒྱལ་བ་རིན་པོ་ཆེ་མཆོག་གི་ཡབ་ཆེན་དང་། རང་གཞན་ཚང་མའི་ཨ་ཕར་གོ ཞེས་བརྗོད་བྱུང་།

ད་ལྟ་རང་ལོ་བཞི་བཅུ་ཡན་གྱི་སྐྱེས་པའི་རུ་ཁག་ཉི་ཤུ་དེ་སྡེ་ཚན་ལྔ་རུ་ཕྱེ་ནས། རིམ་བསྡུར་རྩེད་འགྲན་( league match) ཁྲོད་ཉུང་མཐར་འགྲན་རིམ་བཞི་ལ་ཞུགས་ཆོག་ཅིང་། དེ་ལས་རྣམ་པར་རྒྱལ་ཚེ་འགྲན་རིམ་གྱི་འགྲོ་ལུགས་བཞིན་བརྒྱད་རྩོད་དང་། བཞི་རྩོད། རྟིང་རྩོད་བཅས་སུ་རིམ་གྱིས་ཞུགས་ཆོག་ཀྱང་། གལ་ཏེ་བརྒྱད་རྩོད་དང་བཞི་རྩོད་སོགས་ནས་འགྲན་ཕམ་བྱུང་ཚེ་རྩེད་འགྲན་ཕྱི་མ་དག་ལ་ཞུགས་མི་ཆོག་པ་རེད།

བཙན་བྱོལ་བོད་མིའི་སྤྱི་ཚོགས་ཁྲོད་བོད་རྒྱལ་ཡོངས་རྩེད་རིགས་ཚོགས་པའི་ཁོངས་སུ་གྲགས་ཆེ་བའི་རྒྱལ་ཡུམ་ཆེན་མོའི་རྗེས་དྲན་རྐང་སྤོལ་འགྲན་ཚོགས་དང་། བོད་ཀྱི་བུད་མེད་ཀྱི་རྐང་སྤོལ་རྩེད་འགྲན་སོགས་རྐང་སྤོལ་དང་སིལ་སྤོལ་གྱི་རྩེད་འགྲན་ཁག་ཅིག་ཡོད་ཅིང་། འདས་ལོ་ནས་ཨ་ཕ་གསེར་གྱི་ཕོར་བའི་རྐང་སྤོལ་རྩེད་འགྲན་ཞེས་པ་འདི་ཡང་གསར་དུ་མགོ་འཛུགས་གནང་ཡོད་ཅིང་། རྐང་སྤོལ་རྩེད་འགྲན་ནི་བོད་ཀྱི་སྤྱི་ཚོགས་ནང་གི་ལོ་ ༤༠ བརྒལ་བའི་མི་རབས་ཀྱི་འཕྲོད་བསྟེན་ཡར་རྒྱས་གཏང་རྒྱུར་དམིགས་ནས་འཚོག་གི་ཡོད་ཅིང་། འདི་ལོར་འབྲས་ལྗོངས་ཀྱི་སྒང་ཏོག་ཁུལ་དུ་འཚོག་མུས་ཡིན་པ་རེད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།