༧སྐུའི་གོ་སྟོན་གྱི་གཞུང་འབྲེལ་དྲ་ཚིགས་དབུ་འབྱེད་གནང་།

སྲིད་སྐྱོང་མཆོག་གིས་རྒྱ་ནག་གཞུང་གིས་༧སྐུའི་གོ་སྟོན་ལ་དོ་སྣང་ཆེན་པོས་བལྟས་ནས་བསྡད་ཡོད་པས།  མང་ཚོགས་ཀྱིས་གོ་སྟོན་དང་འབྲེལ་བའི་གནས་ཚུལ་རིགས་བོད་མིའི་སྒྲིག་འཛུགས་ཀྱི་གཞུང་འབྲེལ་དྲ་ཚིགས་ (ghoton.net) ཞེས་པ་ནས་གཟིགས་པ་ལས་སྤྱི་ཚོགས་དྲ་ལམ་གྱི་གནས་ཚུལ་ཁག་ལ་མགོ་མི་འཁོར་རྒྱུ་གལ་ཆེན་པོ་ཡིན་སྐོར་གསུངས་སོང་།

དེ་རིང་དབུས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ལྷག་པ་ཚེ་རིང་ཚོགས་ཁང་དུ་༧སྐུའི་གོ་སྟོན་གྱི་གཞུང་འབྲེལ་དྲ་ཚིགས་དབུ་འབྱེད་གནང་བ་དང་འབྲེལ་གསར་འགོད་གསལ་བསྒྲགས་ཤིག་སྤེལ་སོང་བ་དང་། གསར་འགོད་ལྷན་ཚོགས་དེའི་ཐོག་སྲིད་སྐྱོང་སྤེན་པ་ཚེ་རིང་མཆོག་དང་། དབུས་གོ་སྟོན་གོ་སྒྲིག་ཚོགས་ཆུང་གི་ཚོགས་གཙོ་བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས། ཚོགས་གཞོན་དཔལ་འབྱོར་དྲུང་ཆེ་ཚེ་རིང་དོན་གྲུབ་ལགས། ཚོགས་མི་ཕྱི་དྲིལ་དྲུང་འཕར་རྣམ་རྒྱལ་ཚེ་དབང་ལགས་བཅས་ཀྱིས་མཉམ་ཞུགས་གནང་སོང་། 

སྐབས་དེར་སྲིད་སྐྱོང་སྤེན་པ་ཚེ་རིང་མཆོག་གིས། ད་ལན་༧གོང་ས་རྒྱལ་བ་རིན་པོ་ཆེ་མཆོག་གི་གོ་སྟོན་སྲུང་གཙི་བྱས་པ་བརྒྱུད། ༧གོང་ས་རྒྱལ་བ་རིན་པོ་ཆེ་མཆོག་གི་དགོངས་གཞི་དང་། མཛད་པ་འཕྲིན་ལས་སོགས་ཁྱབ་འགྱུར་དུ་འགྲོ་དགོས་དུས། ང་ཚོས་ཕྱག་རྟགས་དབུལ་རྒྱུའི་ཁྲོད་༧གོང་ས་རྒྱལ་བ་རིན་པོ་ཆེ་མཆོག་གི་གསུང་དུམ་དག་བཏོན་ནས། དེ་དག་ལ་བོད་ཀྱི་རི་མོས་བརྒྱན་ཏེ། ནང་ལ་རྒྱན་བཞིན་དུ་དཔྱང་རྒྱུ་ཡོད་པ་ཞིག་དང་། གསུང་དུམ་རྣམས་ཉིན་ལྟར་མཐོང་ནས་བསམ་བློ་གཏང་རྒྱུ་ཡོད་པའི་རིགས་གང་མང་མང་དབུལ་རྒྱུའི་ཐབས་ཤེས་བྱེད་ཀྱི་ཡིན། ཞེས་དང་། ངས་ནན་ཏན་གྱིས་ཞུ་འདོད་པ་ཞིག་ལ་སྐུའི་གོ་སྟོན་སྲུང་གཙི་ཡི་ལས་རིམ་དེ་དག་བོད་པའི་སྤྱི་ཚོགས་གཅིག་པུའི་ནང་སྲུང་གཙི་བྱས་པ་ཁོ་ན་མ་ཡིན་པར། ༧གོང་ས་རྒྱལ་བ་རིན་པོ་ཆེ་མཆོག་གི་རླབས་ཆེན་གྱི་མཛད་འཕྲིན་རྣམས་རྒྱ་ཁྱབ་དུ་འགྲོ་དགོས་ན། བོད་པའི་སྤྱི་ཚོགས་ཀྱི་ཕྱི་ལ་ཐོན་ནས་དཔེར་ན། སློབ་གྲྭ་ཁག་ཏུ་ལས་རིམ་ཞིག་ཡོད་ཚེ། རྒྱ་གར་གྱི་སློབ་གྲྭ་ཁག་ལྷན་དུ་ལས་རིམ་ག་རེ་བསྒྲིག་རྒྱུ་ཡོད་མེད་ཐོག་དགོངས་པ་བཞེས་ཐུབ་པ་ཡིན་ན། རང་བཞིན་གྱིས་སྐུའི་གོ་སྟོན་སྲུང་གཙི་དེ་གཞི་རྒྱ་ཇེ་ཆེར་འགྲོ་ཡི་རེད།  ཅེས་གསུངས་སོང་། 

ཡང་སྲིད་སྐྱོང་མཆོག་གིས། རེ་འདུན་ཞུ་རྒྱུ་ཞིག་ལ་སྐུའི་གོ་སྟོན་གྱི་གཞུང་འབྲེལ་དྲ་རྒྱ་ལས་ག་རེ་ཕབ་ལེན་གནང་བ་ཡིན་ནའང་། དྲ་ཚིགས་ཀྱི་ནང་དུ་ཚོན་མདོག་སོགས་ག་རེ་ཡོད་ན་དེ་བཞིན་བཞག་རོགས་གནང་། དེ་མིན་ཡང་ཁག་ཅིག་གིས་དྲ་ཚིགས་ནང་ནས་རི་མོ་དེ་མར་བཏོན་ནས། དེར་བཟོ་བལྟ་ཞེ་དྲགས་བརྒྱབ།  སོ་སོས་བཟོས་པ་ཡིན་ན་གནས་ཚུལ་ཁ་ཁག་རེད། དེ་མིན་གཞུང་འབྲེལ་གྱིས་གང་བཟོས་པ་དེ་ག་རང་བེད་སྤྱོད་གཏང་དགོས་ཀྱི་ཡོད་རེད་ལ། ཚོན་མདོག་ཀྱང་དེ་དག་རང་བེད་སྤྱོད་གཏང་དགོས་པ་རེད། མི་མང་གིས་སྐུའི་གོ་སྟོན་སྲུང་གཙི་བྱས་པ་ལ་རོགས་གང་འདྲ་བྱ་དགོས་མིན་ལས། གཅིག་འགྲིག་གི་མི་འདུག་ལབ་བསྡད་པ་དེ་གཞུང་འབྲེལ་གྱིས་བཟོས་བཞག་པ་ཕབ་ལེན་ཏག་ཏག་མ་བྱས་པ་ལ་བརྟེན་ནས་ཡོང་བསྡད་ཀྱི་འདུག ང་ཚོ་དང་རྒྱལ་སྤྱིའི་སྤྱི་ཚོགས་ཀྱིས་ཤེས་དགོས་པ་ཞིག་ལ་༧གོང་ས་རྒྱལ་བ་རིན་པོ་ཆེ་མཆོག་དགུང་ལོ་དགུ་བཅུ་ཕེབས་པ་དེར་རྒྱ་ནག་གཞུང་གིས་དོ་སྣང་ཆེན་པོས་བལྟས་བསྡད་ཡོད་རེད། གནས་ཚུལ་བྱུང་རིམ་ལ་བལྟས་ན་བོད་པའི་སྤྱི་ཚོགས་ནང་དཀྲུག་ཤིང་བརྒྱག་རྒྱུ་ཞིག་མགོ་བཙུགས་ཚར་འདུག་པས། རྒྱ་ནག་གཞུང་གིས་བོད་པའི་སྤྱི་ཚོགས་དཀྲུག་རྒྱུ་དེ་ཤུགས་ཆེ་རུ་གཏོང་བ་ལས་ཤུགས་ཆུང་དུ་མི་འགྲོ་བས། མང་ཚོགས་ཀྱིས་གནས་ཚུལ་གྱི་དངོས་ཡོད་གཟིགས་དགོས་ན་དྲ་ཚིགས་འདི་ལ་གཟིགས་ན་ཤེས་པ་ལས། སྤྱི་ཚོགས་དྲ་ལམ་དུ་ཡར་མར་བཤད་བསྡད་པ་དེ། ང་ཚོའི་སྤྱི་ཚོགས་དཀྲུག་རྒྱུར་ལས་ཀ་བྱེད་མུས་ཡིན་པ་རེད། ཅེས་གསུངས་སོང་། 

ཡང་སྲིང་སྐྱོང་མཆོག་གིས་ཉེ་ལམ་ཨ་རིའི་སྤྱི་མཐུན་ཚོགས་པའི་གྲོས་ཚོགས་འཐུས་མི་སྐུ་ཞབས་མཱ་ཡེ་ཀལ་མེ་ཁོལ་ (Michael McCaul) མཆོག་དང་། དམངས་གཙོ་ཚོགས་པའི་གྲོས་ཚོགས་འཐུས་མི་སྐུ་ཞབས་ཇེམ་མེག་གྷ་ཝིན་ (Jim McGovern) མཆོག་རྣམ་གཉིས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་དགུ་བཅུར་ཕེབས་པའི་འཁྲུངས་སྐར་ཉིན་མོ་དེ་བྱམས་བརྩེའི་ཉིན་མོར་སྲུང་གཙི་ཞུ་རྒྱུའི་གྲོས་ཆོད་ཅིག་བཏོན་ཡོད་ཅིང་། མི་འགྱངས་བར་ཨ་རིའི་གྲོས་ཚོགས་འོག་མིའི་འཐུས་མི་ཇོ་ཊིལ་སན་མཆོག་གིས་སྣེ་ཁྲིད་པའི་གྲོས་ཚོགས་འཐུས་མི་ཁག་ཅིག་གིས་ཨ་རིའི་གྲོས་ཚོགས་སུ་བོད་དོན་དང་འབྲེལ་བའི་ཁྲིམས་འཆར་ཞིག་དབུལ་རྒྱུ་ཡིན་སྐོར་དང་། རྒྱ་ནག་གཞུང་གིས་འདས་པའི་ལོ་མང་རིང་ནས་གནད་དོན་གཙོ་བོ་གསུམ་དང་འབྲེལ་ནས། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ཀྱི་གནད་དོན་དང་། སྐུ་ཕྲེང་བཅོ་ལྔ་པའི་ཡང་སྲིད་ཀྱི་བདག་དབང་རྩོད་མུས་ཡིན་སྐོར་སོགས་གསུངས་སོང་། 

ཟླ་འདིའི་ཕྱི་ཚེས་ ༢༩ ཉིན་ནས་བོད་ཀྱི་ཆོས་བརྒྱུད་ཆེན་མོ་ལྔ་དང་གཡུང་དྲུང་བོན་དང་བཅས་པའི་བསྟན་བདག་བླ་ཆེན་རྣམས་ཀྱིས་དབུས་སྐུ་ཚབ་རྣམས་བཞུགས་སྒར་དུ་ཞབས་སོར་འཁོད་རྒྱུ་དང་། ཟླ་འདིའི་ཕྱི་ཚེས་ ༣༠ ཉིན་བོད་ལྗོངས་མདོ་སྨད་ཆོལ་ཁའི་སྐུའི་གོ་སྟོན་སྲུང་གཙི། ཕྱི་ཟླ་ ༧ ཚེས་ ༡ ཉིན་གནས་ཆུང་ཆོས་རྒྱལ་ཆེན་པོ་སྤྱན་འདྲེན། ཕྱི་ཟླ་ ༧ ཚེས ༢ ནས་༤ བར་བཙན་བྱོལ་བོད་མིའི་ཆོས་ཚོགས་ཐེངས་ལྔ་པ་འཚོག་རྒྱུ་ཡིན་ཞིང་། ཚོགས་ཆེན་དེའི་ཐོག་སྐྱབས་རྗེ་དགའ་ལྡན་ཁྲི་ཆེན་རིན་པོ་ཆེ་མཆོག་དང་། སྐྱབས་རྗེ་སྨན་རི་ཁྲི་འཛིན་རིན་པོ་ཆེ་མཆོག སྨན་གླིང་མཁན་ཆེན་རིན་པོ་ཆེ་མཆོག འབྲི་གུང་སྐྱབས་མགོན་རིན་པོ་ཆེ་མཆོག སྐྱབས་རྗེ་སྟག་ལུང་ཞབས་དྲུང་རིན་པོ་ཆེ་མཆོག་དང་། སྐྱབས་རྗེ་སྟག་ལུང་མ་སྤྲུལ་རིན་པོ་ཆེ། སྐྱབས་རྗེ་ཇོ་ནང་རྒྱལ་ཚབ་རིན་པོ་ཆེ་མཆོག ས་སྐྱ་གོང་མ་ཁྲི་འཛིན་ཞེ་གསུམ་པ་མཆོག་སོགས་ཆིབས་བསྒྱུར་བསྐྱང་རྒྱུ་ཡིན་འདུག 

དེ་བཞིན་སྐུའི་གོ་སྟོན་གྱི་གཞུང་འབྲེལ་དྲ་ཚིགས་ལྟར་ན། འདི་ལོའི་ཕྱི་ཟླ་ ༧ ཚེས་ ༥ ཉིན་བོད་ཀྱི་ལྷ་རྗེ་མི་སྡེ་ཡོངས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་ཚེ་དཔག་མེད་དྭངས་མ་བཅུད་འདྲེན་གྱི་སྒོ་ནས་བརྟན་བཞུགས་བསྟར་འབུལ་དང་། ཕྱི་ཟླ་ ༧ ཚེས་ ༦ ཉིན་༧གོང་ས་རྒྱལ་བ་རིན་པོ་ཆེ་མཆོག་གི་འཁྲུངས་ལྷ་དབྱར་གསོལ་དང་། ༸སྐུའི་གོ་སྟོན་དངོས་གཞི་བྱམས་བརྩེའི་ལོ་ཞེས་པའི་ལོ་འཁོར་གཞུང་འབྲེལ་མཛད་སྒོ་དབུ་འཛུགས་ཞུ་རྒྱུ། དེ་བཞིན་ཕྱི་ཟླ་ ༧ ཚེས་ ༧ ནས་༩ བར་བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་གོ་སྟོན་ལས་རིམ་དང་། ༧གོང་ས་རྒྱལ་བ་རིན་པོ་ཆེ་མཆོག་གི་གོ་སྟོན་དགའ་སྟོན་ལ་ཆེད་བཅར་ཞུས་པའི་རྒྱལ་སྤྱིའི་སྒྱུ་རྩལ་བ་རྣམས་ཀྱིས་ཡུལ་ལུང་སོ་སོའི་རིག་གཞུང་སྒྱུ་རྩལ་གཟིགས་འབུལ་ཞུ་རྒྱུ་ཡིན་པའི་ཁར། གོ་སྟོན་གྱི་གཞུང་འབྲེལ་མཛད་སྒོའི་ཐོག་རྒྱ་གར་དབུས་གཞུང་གི་ལས་བྱེད་དང་། འབྲས་ལྗོངས་ཀྱི་སྤྱི་ཁྱབ་བློན་ཆེན་པུ་རམ་སིང་རྟ་དམག་མཆོག་དང་ལས་བྱེད། ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་དང་ལས་བྱེད་སོགས་ཕེབས་རྒྱུ་ཡིན་འདུག 

འདས་ལོའི་ཕྱི་ཟླ་ ༡༢ ཚེས་ ༢ ཉིན་བོད་མིའི་སྒྲིག་འཛུགས་ཀྱི་དབུས་གོ་སྟོན་གོ་སྒྲིག་ཚོགས་ཆུང་གིས་གསལ་བསྒྲགས་ཤིག་སྤེལ་བའི་ཁྲོད།  བོད་མིའི་སྒྲིག་འཛུགས་ཀྱིས་ཕྱི་ལོ་ ༢༠༢༥  ཟླ་ ༧  པ་ནས་ལོ་འཁོར་གཅིག་རིང་བྱམས་བརྩེའི་ལོ་ཞེས་སྲུང་གཙི་ཞུ་རྒྱུ་དང་། ལོ་འཁོར་མོའི་རིང་བཞུགས་སྒར་དྷ་རམ་ས་ལ་གཙོ་བོར་གྱུར་བའི་རྒྱལ་སྤྱིའི་ཁྱོན་ཡོངས་སུ་གོ་སྟོན་དང་འབྲེལ་བའི་མཛད་རིམ་སྣ་མང་གྲ་སྒྲིག་གནང་གི་ཡོད་འདུག འདི་ལོར་བྱམས་བརྩེའི་ལོ་སྲུང་གཙི་དང་འབྲེལ་ནས་འཛམ་གླིང་ཁྱོན་ཡོངས་སུ་རིག་གཞུང་འཁྲབ་སྟོན་དང་། འགྲེམས་སྟོན། གློག་བརྙན་དུས་སྟོན་དང་ཤེས་རིག་བགྲོ་གླེང་། རིན་མེད་སྨན་བཅོས་བརྟག་དཔྱད། ཆོས་ལུགས་ཀྱི་བྱེད་སྒོད་དང་ཆོས་ལུགས་མཐུན་འབྲེལ་དང་འབྲེལ་བའི་བགྲོ་གླེང་སོགས་གོ་སྒྲིག་གནང་རྒྱུ་ཡིན་འདུག 

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།