༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་སུ་ཕེབས་རྒྱུ་ཡིན་འདུག

འདི་ལོའི་ཕྱི་ཟླ་ ༧ པའི་ནང་༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་དང་ཟངས་དཀར་ཁུལ་དུ་ཕེབས་རྒྱུ་ཡིན་འདུག 

ལོ་ལྟར་༧གོང་ས་རྒྱལ་བ་རིན་པོ་ཆེ་མཆོག་ཆར་དུས་སུ་ལ་དྭགས་སུ་ཕེབས་ཀྱི་ཡོད་པ་ལྟར། འདི་ལོའི་ཕྱི་ཟླ་ ༧ ཚེས་ ༡༢ ཉིན་༧མགོན་པོ་གང་ཉིད་མཆོག་ལ་དྭགས་སུ་ཕེབས་ནས། ཉུང་མཐར་ཡང་ཟླ་བ་གཅིག་ལྷག་རིང་བཞུགས་བཞག་མཛད་རྒྱུ་ཡིན་པ་མ་ཟད། ཕྱི་ཟླ་ ༧ པའི་ཟླ་མཇུག་ཏུ་ཟངས་དཀར་ཁུལ་དུ་མཛད་འཕྲིན་བསྐྱང་རྒྱུ་ཡིན་འདུག 

གནད་དོན་དེ་དང་འབྲེལ་ནས། དགའ་ལྡན་ཕོ་བྲང་གི་དྲུང་ཆེ་བསྟན་འཛིན་སྟག་ལྷ་ལགས་ཀྱིས་ལ་དྭགས་ནང་ཚོགས་ཀྱི་ཚོགས་གཙོ་སྐུ་ཞབས་ཚེ་རིང་རྡོ་རྗེ་ལགས་སུ་འཕྲིན་ཡིག་ཅིག་བསྐུར་བའི་ནང་། ངས་སྤྲོ་སེམས་འཁོལ་བའི་ངང་ནས་འདི་ལོའི་དབྱར་དུས་སུ་༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་སུ་ཕེབས་རྒྱུ་ཡིན་པ་གཏན་འཁེལ་བྱེད་ཀྱི་ཡོད། འདི་ལོའི་ཕྱི་ཟླ་ ༧ ཚེས་ ༡༢ ཏེ་རེས་གཟའ་སྤེན་པའི་ཉིན་༧མགོན་པོ་གང་ཉིད་ལ་དྭགས་སུ་ཞབས་སོར་འཁོད་ཀྱི་ཡོད་ལ། མཛད་འཆར་ཁག་མགོ་མ་བཙུགས་པའི་གོང་དུ་ཉིན་ཤས་རིང་སྐུ་ངལ་གསོས་ནས་བཞུགས་རྒྱུ་དང་། ཕྱི་ཟླ་ ༧ པའི་ཟླ་མཇུག་ཏུ་ཉིན་ཤས་རིང་ཟངས་དཀར་དུ་ཕེབས་རྒྱུ་ཡིན། ཞེས་གསལ་འདུག 

འདས་ལོའི་ཕྱི་ཟླ་ ༤ ཚེས་ ༡༠ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ལ་དྭགས་མཁར་ཤ་དགོན་པར་དབྱར་ཆོས་ཆེན་མོ་ལ་སོགས་པའི་མཛད་རིམ་མང་དག་ཅིག་བསྐྱངས་གཏན་ཁེལ་ཡོད་པ་དང་བསྟུན། འདས་ལོར་ཟངས་དཀར་དུའང་ཕེབས་པའི་བཀའ་བཞེས་གནང་ཡོད་ཀྱང་། འདས་ལོར་ཨ་རིར་ཞབས་པུས་སྨན་བཅོས་ཀྱི་སླད་དུ་ཕེབས་ནས། ལ་དྭགས་དང་ཟངས་དཀར་སོགས་སུ་ཕེབས་ཐུབ་མེད་པ་རེད། 

དགའ་ལྡན་ཕོ་བྲང་ཡིག་ཚང་གི་དྲ་རྒྱར་གསལ་བའི་༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཆར་ཁྲོད། ཟླ་འདིའི་ཕྱི་ཚེས་ ༣༠ ཉིན་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ཕེབས་པའི་གོ་སྟོན་དང་བསྟུན་བོད་ལྗོངས་མདོ་སྨད་ཆོལ་ཁའི་གཞིས་བྱེས་མི་མང་ཡོངས་ནས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བརྟན་བཞུགས་བསྟར་འབུལ་དང་། ཕྱི་ཟླ་ ༧ ཚེས་ ༥ ཉིན་དབུས་བོད་མིའི་སྒྲིག་འཛུགས་བཀའ་ཤག་གིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་བརྟན་བཞུགས་བསྟར་འབུལ། དེ་བཞིན་ཕྱི་ཟླ་ ༧ ཚེས་ ༦ ཉིན་དབུས་བོད་མིའི་སྒྲིག་འཛུགས་བཀའ་ཤག་གིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་གོ་སྒྲིག་ཞུས་པའི་མགོན་པོ་གང་ཉིད་མཆོག་དགུང་གྲངས་དགུ་བཅུར་ཕེབས་པའི་སྐུའི་འཁྲུངས་སྐར་མཛད་སྒོར་ཆིབས་བསྒྱུར་བསྐྱང་རྒྱུ་ཡིན་འདུག 

གསར་འགོད་པ། དཔལ་ལྡན།རྩོམ་སྒྲིག་བྱེད་མཁན། སྐལ་བཟང་སྦྱིན་པ།