༧རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་གིས་བོད་མིའི་རྣམས་ཀྱི་འཆམ་མཐུན་གཏོར་བཤིག་ཆེན་པོ་འགྲོ་མུས་ཡིན་པས་དེ་ནི་སེམས་ཁྲལ་བྱ་དགོས་པ་ཞིག་ཡིན་སྐོར་སོགས་གསུངས་འདུག
དེ་རིང་༧རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་ཕྱི་ལུགས་ལྟར་དགུང་གྲངས་ ༤༠ ཕེབས་པའི་འཁྲུངས་སྐར་ཡིན་པ་ལྟར། དེ་རིང་འབྲས་ལྗོངས་མངའ་སྡེའི་གདན་ས་རུམ་བཏེག་བཤད་སྒྲུབ་ཆོས་འཁོར་གླིང་དུ། རིན་པོ་ཆེ་མཆོག་གི་འཁྲུངས་སྐར་སྲུང་གཙིའི་མཛད་སྒོ་ཞིག་འཚོགས་ཡོད་ཅིང་། མཛད་སྒོའི་ཐོག་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པེ་རེམ་སིན་ཏཱ་མཱང་ (Prem Singh Tamang) མཆོག་དང་ཆོས་རིག་བློན་ཆེན་བསོད་ནམས་བླ་མ་མཆོག དེ་བཞིན་༸སྐྱབས་རྗེ་ཟུར་མང་གར་དབང་རིན་པོ་ཆེ་མཆོག་སོགས་གཙོ་བོར་གྱུར་བའི་དད་ལྡན་སེར་སྐྱ་མང་ཚོགས་བརྒྱ་ཕྲག་བརྒལ་བ་ལྷན་འཛོམས་བྱུང་ཡོད་འདུག་ལ། མཛད་སྒོའི་སྟེང་༧རྒྱལ་དབང་ཀརྨ་པ་མཆོག་ནས་དྲ་ལམ་ཐད་གཏོང་བརྒྱུད་ནས་བཀའ་སློབ་ཅིག་གནང་བའི་ཁྲོད། ནང་ཁུལ་གྱི་མཐུན་སྒྲིལ་དང་འཆམ་མཐུན་ལ་གཏོར་བཤིག་ཆེན་པོ་འགྲོ་མུས་ཡིན་སྟབས། བོད་མི་རྣམས་ཕན་ཚུན་མཐུན་སྒྲིལ་བྱ་རྒྱུ་དེ་ཧ་ཅང་གལ་ཆེན་ཡིན་སྐོར་སོགས་གསུངས་འདུག
༧རྒྱལ་དབང་ཀརྨ་པ་མཆོག་ནས། དེང་སང་དུས་ཚོད་འདིར་འཛམ་གླིང་སྤྱིའི་གནས་སྟངས་ལ་བལྟས་ཚེ་ཧ་ཅང་འཁྲུག་ཆ་དོད་པོ་དང་འགྱུར་བ་འགྲོ་བཞིན་འདུག ག་ས་གང་དུ་དམག་འཁྲུག་དང་རྙོག་གྲ་ལངས་བསྡད་པའི་དུས་ཚོད་ཞིག་ཆགས་འདུག དེ་བཞིན་ང་ཚོ་བོད་ལ་ཆ་བཞག་ནའང་། བཙན་བྱོལ་དུ་ཡོད་བསྡད་པའི་བོད་པའི་སྤྱི་ཚོགས་འདི་ཡང་སྔར་དང་མི་འདྲ་བར་ཟང་ཟིང་དང་ཉ་ཉོག་མང་དུ་འགྲོ་བཞིན་འདུག སྔོན་མ་ང་རང་རྒྱ་གར་དུ་ཡོད་དུས་འདི་ལྟའི་རྙོག་གྲ་ཞེ་དྲགས་ཡོད་པ་མ་རེད། ང་རང་རྒྱ་གར་དུ་མ་བསླེབས་ནས་ལོ་མང་པོ་འགྲོ་བཞིན་ཡོད་པ་དེའི་ནང་དུ། འགྱུར་བ་མང་པོ་ཕྱིན་ཏེ་ནང་ཁུལ་གྱི་མཐུན་སྒྲིལ་དང་འཆམ་མཐུན་ལ་གཏོར་བཤིག་ཆེན་པོ་ཞིག་འགྲོ་བསྡད་བཞིན་འདུག དེ་ཡང་ང་ཚོས་སེམས་ཁྲལ་ལངས་དགོས་པ་ཞིག་རེད་འདུག དེའི་ཐོག་ཏུ་༧གོང་ས་རྒྱལ་བ་རིན་པོ་ཆེ་མཆོག་ད་ལོ་ཕྱི་ལུགས་ལྟར་ན་དགུང་གྲངས་ ༩༠ དང་བོད་ལུགས་ཀྱི་དགུང་གྲངས་ ༩༡ ལ་ཕེབས་ཡོད་པ་རེད། དེའི་ཐོག་ཕྱོགས་གཅིག་ནས་ང་ཚོའི་སྐལ་བ་བཟང་བ་བསམ་པ་ཞིག་རེད། ཕལ་ཆེར་རྒྱལ་དབང་སྐུ་ཕྲེང་རིམ་བྱོན་ལས་སྐུ་ཚེ་རིང་ཤོས་གྲས་སུ་ཕེབས་བསྡད་ཡོད། ང་ཚོས་དགའ་བ་དང་རྗེས་སུ་ཡི་རངས་སྐྱེ་དགོས་པ་ཞིག་ཡོང་བསྡད་ཀྱི་འདུག ཅེས་གསུངས་སོང་།
ཡང་༧རྒྱལ་དབང་ཀརྨ་པ་མཆོག་ནས། ཕྱོགས་གཞན་ཞིག་ནས་བསམ་བློ་བཏང་ན་༧གོང་ས་མཆོག་གི་མཛད་པ་འཕྲིན་ལས་དང་གསུང་བཤད་སོགས་སྔོན་མ་བཞིན་གནང་ཐུབ་ཀྱི་མེད་པ་ང་ཚོས་མཁྱེན་གསལ་རེད། དེ་འདྲའི་གནས་སྟངས་མཇལ་ཡོང་སྐབས་མ་འོངས་པའི་ཐོག་གང་ཅིའི་ཐད་ནས་སེམས་ཁུར་ཡོང་དགོས་པ་ཞིག་འདུག སེམས་ཁྲལ་ལངས་པ་གཅིག་པུས་ཀྱང་ཕན་ཐོགས་ཀྱི་མི་འདུག ང་ཚོ་མི་རེ་ངོ་རེ་ངོས་ནས་སེམས་ཤུགས་བསྐྱེད་དགོས་པ་དང་། འགན་འཁུར་དགོས་པའི་དུས་ཚོད་ཞིག་སླེབས་འདུག དེང་སང་དེ་འདྲའི་བསམ་བློ་འཁོར་མཁན་ཉུང་ཉུང་ཆགས་མེད་འགྲོ་བསམ་གྱི་འདུག གཅིག་བྱས་ན་སོ་སོས་མཐོང་རྒྱ་ཐོས་རྒྱ་མེད་པས་མ་མཐོང་བ་ཡིན་རྒྱུ་རེད་མ་གཏོགས། གཞན་བསམ་བློ་གཏོང་ཐུབ་མཁན་དང་འགན་འཁུར་ཐུབ་མཁན་ཞེ་དྲགས་མེད་བསྡད་པའི་དཀའ་ངལ་ཞིག་ཡོང་བསྡད་ཀྱི་འདུག ད་ལྟ་༧གོང་ས་རྒྱལ་བ་རིན་པོ་མཆོག་སྐུ་འཚོ་ཞིང་བཞུགས་པའི་སྐབས་སུ་ང་ཚོ་ཚང་མར་བློ་མ་བདེ་བ་དང་སེམས་ཁྲལ་ལངས་དགོས་པ་ཞིག་ཡོང་གི་ཡོད་ན། ཉིན་གཅིག་ཞིང་གཞན་དུ་གཤེགས་ཆོག་པའི་སྐབས་སུ་ག་འདྲ་ཆགས་མིན་བཤད་དཀའ་བ་ཞིག་རེད། དེའི་རྒྱུ་མཚན་གྱིས་ང་ཚོ་དགོངས་པ་རྒྱ་ཆེན་པོ་བཞེས་དགོས་པ་ཞིག་རེད། སོ་སོའི་མིག་མདུན་གྱི་གནས་སྟངས་ཙམ་མིན་པར་ཕུགས་རྒྱང་རིང་པོར་ཡག་ཤོས་བྱུང་ན་ལོ་བརྒྱ་ཕྲག་གི་གནས་སྟངས་ཐོག་ཐུགས་བསམ་བཞེས་དགོས་པ་དང་། དེའི་ཆེད་དུ་དམིགས་འདུན་བཅངས་དགོས་པ་གལ་ཆེན་པོ་རེད་བསམ་གྱི་འདུག དེ་རིང་ངའི་སྐྱེས་སྐར་དང་བསྟུན་ནས་འདི་འདྲའི་བསམ་འཆར་ཞིག་ཞུ་འདོད་བྱུང་། གཞན་དམིགས་བསལ་གང་ཡང་ཞུ་རྒྱུ་མི་འདུག ཅེས་གསུངས་སོང་།
དེ་བཞིན་དེ་རིང་བོད་མི་གཙོ་བོ་གྱུར་བའི་དད་ལྡན་མང་ཚོགས་རྣམས་ཀྱིས་དྲ་ལམ་ཁག་ཏུ་༧རྒྱལ་དབང་ཀརྨ་པ་མཆོག་གི་སྐུ་པར་བཞག་ནས་འཁྲུངས་སྐར་སྲུང་གཙིའི་འཚམས་འདྲི་དང་ཁ་གཡང་འབོད་ཀྱིན་ཡོད་པ་མ་ཟད། འདི་གའི་གསར་འགོད་པའི་འབྲེལ་ཡོད་བོད་ནང་གི་བོད་མི་ཁག་ཅིག་གིས། ཨ་བུ་དགའ་དགའ་སྐུ་ཚེ་བརྟན་ཞེས་བྲིས་ནས་འཁྲུངས་སྐར་སྲུང་གཙི་བྱེད་ཀྱིན་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
