འདི་ལོའི་སྟོབས་ཆེན་རྒྱལ་ཁབ་ལྔ་ཡི་ཚོགས་ཆེན་ཐོག་རྒྱ་ནག་གི་མགོ་ཁྲིད་ཞི་དང་ཨུ་རུ་སུའི་མགོ་ཁྲིད་པུ་ཊིན་གཉིས་ཀྱིས་མཉམ་ཞུགས་བྱ་རྒྱུ་མིན་པ་རེད།
Brazil, as the current rotating chair of BRICS, is hosting its regular 17th summit in Rio de Janeiro on July 6-7. photo:India Today
ཕྱི་ཟླ་ ༧ ཚེས་ ༦ དང་ ༧ བཅས་ཉིན་གྲངས་གཉིས་རིང་ལྷོ་ཨ་མེ་རི་ཁའི་བྷི་ར་ཛིལ་རྒྱལ་ཁབ་ཀྱི་གོ་སྒྲིག་འོག འདི་ལོའི་དཔལ་འབྱོར་ཡར་རྒྱས་འགྲོ་མུས་ཡིན་པའི་སྟོབས་ཆེན་རྒྱལ་ཁབ་ལྔ་(BRICS Summit) ཡི་ཚོགས་འདུ་ཐེངས་བཅུ་བདུན་པ་དེ། བྷི་ར་ཛིལ་གྱི་རྒྱལ་ས་རིའོ་ (Rio De Janeiro) ཁུལ་དུ་འཚོག་རྒྱུ་ཡིན་ཞིང་། ཚོགས་ཆེན་དེའི་ཐོག་བྷིག་སི་ (BRICS) མཐུན་ཚོགས་ཀྱི་ཚོགས་མི་རྒྱལ་ཁབ་དག་གི་མགོ་ཁྲིད་ཚོས་མཉམ་ཞུགས་བྱ་རྒྱུ་ཡིན་ཡང་། རྒྱ་ནག་གི་མགོ་ཁྲིད་ཞི་དང་ཨུ་རུ་སུའི་མགོ་ཁྲིད་པུ་ཊིན་གཉིས་ཀྱིས་མཉམ་ཞུགས་བྱ་རྒྱུ་མིན་པ་རེད།
ད་ལན་གྱི་སྟོབས་ཆེན་རྒྱལ་ཁབ་ལྔ་ཡི་ཚོགས་ཆེན་དེའི་ཐོག བྷ་རི་ཛིལ་གྱིས་དཔལ་འབྱོར་འཕེལ་རྒྱས་གཏོང་རྒྱུ་དང་གོ་ལའི་དབང་འཛིན་བསྐྱར་གསོ། གོ་ལའི་ལྷོ་ཕྱོགས་ཀྱི་རྒྱལ་ཁབ་བར་མཐུན་སྒྲིལ་ཡར་སྐྱེད་སོགས་མཚོན་པའི། སྲིད་འབྱོར་གཉིས་ཀྱི་ཐོག་ནས་རྒྱལ་ཁབ་ཕན་ཚུན་བར་གྱི་དཀའ་ངལ་ལ་གདོང་ལེན་དང་མཉམ་འབྲེལ་གྱི་ནུས་པ་མཉམ་བསྐྱེད་བྱེད་ཐབས་བྱ་རྒྱུ་ཡིན་པའི་མུར། ཞིང་ལས་དང་། འཛུགས་སྐྲུན། ཚོང་ལས་རྒྱ་སྐྱེད། མ་འཇོག་སོགས་ཚུད་པའི་ཚོང་དོན་ལ་མཉམ་ལས་བྱ་རྒྱུ་དང་། དེ་བཞིན་སློབ་མ་བརྗེ་ལེན་སོགས་ཀྱི་ཐོག་ནས་རིག་གཞུང་བརྗེ་ལེན། ད་ལྟ་གོ་ལར་འབྱུང་མུས་ཡིན་པའི་ནད་ཡམས་དང་། གནམ་གཤིས་འགྱུར་ལྡོག་སོགས་ཀྱི་དཀའ་ངལ་ལ་གདོང་ལེན། དེ་བཞིན་ཨ་རི་གཙོས་ནུབ་ཕྱོགས་རྒྱལ་ཁབ་ཁག་ཏུ་དབང་ཤུགས་སྐྱེད་པར་འགོག་རྒོལ་བྱ་རྒྱུ་བཅས་ཡིན་འདུག
ད་ལན་རྒྱ་ནག་གི་མགོ་ཁྲིད་ཞི་ཅིན་ཕིན་གློ་བུར་དུ་ཚོགས་ཆེན་དེར་མཉམ་ཞུགས་བྱ་རྒྱུ་མིན་ལུགས་བསྒྲགས་ཏེ། ཁོའི་ཚབ་ཏུ་རྒྱ་ནག་གི་སྲིད་བློན་ལི་ཆང་ ( Li Qiang ) གིས་མཉམ་ཞུགས་བྱ་རྒྱུ་ཡིན་པའི་གསལ་བསྒྲགས་སྤེལ་འདུག གནད་དོན་དེ་དང་འབྲེལ་ནས་རྒྱ་ནག་ཕྱི་སྲིད་བློན་ཆེན་ལས་ཁུངས་ཀྱི་མགྲིན་ཚབ་པ་ཀོའོ་ཇ་ཡེ་ཀུན་(Guo Jiakun) ཟེར་བས། རྒྱ་ནག་དང་བྷི་ར་ཛིལ་རྒྱལ་ཁབ་གཉིས་ནི་འཛམ་གླིང་གི་རྒྱལ་ཁབ་ཆེ་གྲས་དང་། གོ་ལའི་ལྷོ་རྒྱུད་ཀྱི་ཚབ་མཚོན་རྒྱལ་ཁབ་གཉིས་སུ་གྱུར་ཡོད་སྟབས། རྒྱ་ནག་གིས་བྷི་ར་ཛིལ་གྱིས་སྣེ་འཁྲིད་པའི་ཚོགས་ཆེན་ལ་མཉམ་ཞུགས་ཀྱིས་མཉམ་ལས་ཀྱི་ནུས་པ་བསྐྱེད་རྒྱུ་ཡིན། ཞེས་བཤད་འདུག དེ་བཞིན་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱས་པའི་གནད་དོན་དང་འབྲེལ་རྒྱལ་སྤྱིའི་ཁྲིམས་ཁང་གིས་པུ་ཊིན་འཛིན་བཟུང་བྱ་རྒྱུའི་མིང་འོག་ཏུ་བཅུག་ཡོད་པའི་དབང་གིས། ཐེངས་འདིའི་ཚོགས་ཆེན་ལ་དྲ་ལམ་ནས་མཉམ་ཞུགས་བྱ་རྒྱུ་ཡིན་འདུག
གོ་ལའི་དཔལ་འབྱོར་དང་རྒྱལ་ཁབ་སོ་སོའི་དཔལ་འབྱོར་འཕེལ་རྒྱས་སུ་དམིགས་པའི་ལྷན་ཚོགས་དེ་ཕྱི་ལོ་ ༢༠༠༩ ལོར་ཐོག་མར་རྒྱ་གར་དང་རྒྱ་ནག བྷ་ར་ཛིལ། ཨུ་རུ་སུ། ལྷོ་ཨ་ཧྥི་རི་ཀ་བཅས་ཀྱིས་གསར་འཛུགས་བྱས་ཡོད་པ་དང་། འདི་ལོའི་ལྷན་ཚོགས་ཐོག་ཚོགས་མི་རྒྱལ་ཁབ་ཁག་གི་མགོ་ཁྲིད་གཙོས་ཨི་རན་དང་། ཨ་ཧྥི་རི་ཁའི་ཨི་ཐོ་བྷི་ཡ། ཨིན་ཌོ་ནེ་ཤི་ཡ། ཨ་རབ་སྤྱི་མཐུན་རྒྱལ་ཁབ་བཅས་ཀྱི་མགོ་ཁྲིད་སོགས་ཀྱིས་མཉམ་ཞུགས་བྱ་རྒྱུ་ཡིན་འདུག་ལ། ལྷན་ཚོགས་དེས་ད་བར་ཚོགས་ཆེན་ཐེངས་བཅུ་དྲུག་འཚོགས་ཟིན་ཡོད་ཅིང་། ཕྱི་ལོ་ ༢༠༢༦ ལོར་རྒྱ་གར་གྱིས་ལྷན་ཚོགས་དེའི་ཚོགས་གཙོ་བྱ་རྒྱུ་ཡིན་འདུག
བསྟན་འཛིན་ཉི་སྒྲོན། རྩོམ་སྒྲིག་བྱེད་མཁན། དཔལ་ལྡན།
