བོད་ནང་གི་ཛ་དྲག་གི་གནས་སྟངས་ལ་གཟིགས་ཞིབ་དགོས་པའི་རེ་སྐུལ་ཞུས། 

བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་ཟླ་བ་བཀྲ་ཤིས་ལགས་ཀྱིས་ཞི་ཅིན་ཕིན་གྱིས་དབང་ཆ་བཟུང་རྗེས་བོད་མི་མང་པོར་གང་བྱུང་ནག་ཉེས་གཡོགས་ནས་འཛིན་བཟུང་བཀག་ཉར་དང་བོད་ཀྱི་ངོ་བོ་ཤུལ་མེད་བཟོ་བའི་སྲིད་ཇུས་ལག་བསྟར་བྱས་དང་བྱེད་མུས་ཡིན་སྐོར་སོགས་བརྗོད་བྱུང་། 

དེ་རིང་ཕྱི་ཟླ་ ༦ ཚེས་ ༢༦ ཉིན་རྒྱལ་སྤྱིའི་ཁྱོན་ཡོངས་སུ་མནར་གཅོད་འགོག་པའི་ཉིན་མོར་སྲུང་གཙི་བྱེད་ཀྱི་ཡོད་པ་ལྟར། དེ་རིང་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་བསྒྲགས་གཏམ་ཞིག་སྤེལ་ཏེ། རྒྱ་ནག་གཞུང་གིས་བོད་ནང་གི་བོད་མི་རྣམས་ལ་དོན་མེད་མནར་གཅོད་གཏོང་མཚམས་འཇོག་དགོས་པའི་ཁར། རྒྱལ་སྤྱིའི་སྤྱི་ཚོགས་ཀྱིས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ཐད་ལ་གཟིགས་ཞིབ་གནང་དགོས་པའི་རེ་སྐུལ་ཞུས་སོང་།

གནད་དོན་དེའི་ཐད་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་ཟླ་བ་བཀྲ་ཤིས་ལགས་ཀྱིས་འདི་གའི་གསར་འགོད་པར་ཁ་པར་བརྒྱུད། དེ་རིང་རྒྱལ་སྤྱི་རང་བཞིན་ལྡན་པའི་མནར་གཅོད་འགོག་པའི་ཉིན་མོར། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ངོས་ནས་དུས་དྲན་སྲུང་གཙི་བྱ་དགོས་པ་ཞིག་ཆགས་ཡོད། ལོ་ལྟར་དེ་རིང་གི་ཉིན་མོ་དེ་སྲུང་གཙི་རྣམ་པ་འདྲ་མིན་གྱི་ཐོག་ནས་ལས་འགུལ་རབ་དང་རིམ་པ་སྤེལ་བཞིན་ཡོད་སྟབས།  དེ་རིང་དབྱིན་བོད་གཉིས་ཀྱི་ཐོག་ནས་བསྒྲགས་གཏམ་ཞིག་སྤེལ་ཡོད། བསྒྲགས་གཏམ་དེའི་ནང་གཙོ་ཆེ་ཤོས་ནི་འདས་པའི་ལོ་ངོ་བདུན་ཅུ་ལྷག་རིང་དང་། ལྷག་པར་ཞི་ཅིན་ཕིན་གྱིས་དབང་ཆ་བཟུང་རྗེས། འདས་པའི་དུས་སྐབས་ནང་གཞིས་ལུས་རྒྱ་ཆེ་མི་མང་དང་།  ལྷག་པར་ཆབ་སྲིད་བཙོན་པ། འགྲོ་བ་མི་ཐོབ་ཐང་ཐོག་ལས་འགུལ་སྤེལ་མཁན་རྣམས་ལ། རྒྱ་ནག་གཞུང་གིས་འཇུ་བཟུང་དང་བཀག་ཉར་བྱས་པ་མ་ཟད། དཀའ་ངལ་དང་སྡུག་སྦྱོང་མནར་གཅོད་གང་འདྲ་མྱོང་གི་ཡོད་མེད་སོགས་དང་འབྲེལ། ང་ཚོས་གཞིས་ལུས་རྒྱ་ཆེ་མི་མང་རྣམས་དཀའ་ངལ་ལས་མྱུར་དུ་གྲོལ་ཆེད། རྒྱལ་སྤྱིའི་སྤྱི་ཚོགས་དང་མཉམ་འབྲེལ་རྒྱལ་ཚོགས་སོགས་ལ་འབོད་སྐུལ་ཞུས་ཡོད། ཅེས་བརྗོད་བྱུང་། 

ཡང་ཁོང་གིས་འདས་པའི་མི་ལོ་གསུམ་རིང་གི་བོད་ནང་གི་ཛ་དྲག་གི་གནས་སྟངས་དང་འབྲེལ་ནས། འདས་པའི་ལོ་གསུམ་གྱི་གནས་ཚུལ་ཁྲོད་བོད་ནང་དུ་ཆེས་ཛ་དྲག་ཆེ་ཤོས་ནི། རྒྱ་ནག་གཞུང་གིས་བཙན་འཛུལ་བྱས་པའི་གྲངས་ཉུང་མི་རིགས་ལྔ་བཅུ་ལྔ་དྲུག་གི་མི་རིགས་རང་རང་གི་ངོ་བོ་དང་རིག་གཞུང་ཤུལ་མེད་བཟོ་ཐབས་ཀྱི་སྲིད་ཇུས་ཤིག་ལག་ལེན་དུ་བསྟར་མུས་ཡིན་པ་དེ་རེད།  ད་ལྟའི་དུས་སྐབས་འདིར་གདོང་ལེན་བྱེད་པའི་དཀའ་ངལ་ཆེ་ཤོས་ནི། ཀྲུང་ཧཱ་མི་རིགས་སྤྱི་མཐུན་ཚོགས་པའི་ལྟ་གྲུབ་དང་ཆོས་ལུགས་དཀའ་ངལ་ཅན་དུ་གྱུར་བའི་སྲིད་བྱུས་གཉིས་ཡིན། ཀྲུང་ཧཱ་མི་རིགས་སམ་ཀྲུང་གོ་ཅན་ཟེར་བའི་ཚིག་ཐོག་ནས་འགྲེལ་བརྗོད་འདྲ་མིན་བྱས་མིན་ལ་མ་ལྟོས་པར་། རྒྱ་མི་རིགས་ཀྱི་ངོ་བོ་དང་། རྒྱ་མི་རིགས་ཀྱི་རྣམ་པ་དང་སྤྱི་ཚོགས་ཅན་དུ་བསྒྱུར་རྒྱུའི་ཆེད།  གྲངས་ཉུང་མི་རིགས་རྣམས་ལ་སྲིད་ཇུས་ཤིག་གཏིང་ཡོད།  ཅེས་དང་།  རྒྱ་ནག་གཞུང་གིས་བོད་ནང་དུ་རྣམ་པ་འདྲ་མིན་གྱི་ཐོག་ནས་བོད་མིའི་ངོ་བོ་དང་། རིག་གཞུང་། ཆོས་རིག་སོགས་རྩ་མེད་དུ་བཏང་དང་གཏོང་མུས་ཡིན་པས། ད་ལྟ་བོད་ནང་གི་གནས་བབ་ཧ་ཅང་ཛ་དྲག་ཅན་དུ་གྱུར་མུས་ཡིན་སྐོར་སོགས་བརྗོད་བྱུང་། 

དེ་བཞིན་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་བསྒྲགས་གཏམ་ཁྲོད། རྒྱ་ནག་གཞུང་གིས་བཙན་ཤེད་ཀྱི་འོག་ནས་བོད་མི་རྣམས་གང་བྱུང་འཛིན་བཟུང་བཀག་ཉར་དང་། སྡུག་སྦྱོང་མནར་གཅོད་བཏང་དང་གཏོང་མུས་ཡིན་པའི་ཁར། རྒྱ་ནག་གཞུང་གིས་མངོན་གསལ་དོད་པོའི་ཐོག་ནས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་དང་། ལྷ་མོ། དེ་བཞིན་མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་མཆོག་སོགས་ལ་ནག་ཉེས་གཡོགས་ནས་དམར་གསོད་བཏང་ཡོད་སྐོར་སོགས་གསལ་འདུག

བློ་བཟང་སྒྲོལ་མ། རྩོམ་སྒྲིག་བྱེད་མཁན། དཔལ་ལྡན།