རྒྱ་ནག་གི་ཁྲིམས་རྩོད་པ་རིན་ཆན་ནིའུ་ལགས་ཀྱིས་ད་ལྟའི་ཆར་རྒྱ་ནག་གི་ཁྲིམས་ལུགས་ཀྱི་དབང་ཆ་དང་དམིགས་བསལ་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ཐད་ནས་རིག་གནས་གསར་བརྗེའི་དུས་སྐབས་དང་འདྲ་བའི་གནས་སུ་གྱར་ཡོད་སྐོར་བརྗོད་འདུག
ཟླ་འདིའི་ཕྱི་ཚེས་ ༧ ཉིན་ཌི་གྷར་ཌིན་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གི་འགྲོ་བ་མིའི་ཐོབ་ཐང་གི་ཁྲིམས་རྩོད་པ་གྲགས་ཅན་རིན་ཆན་ནིའུ་ལགས་ཀྱིས། རྒྱ་ནག་ནང་གི་འགྲོ་བ་མིའི་ཐོབ་ཐང་གི་ཁྲིམས་ལུགས་ཀྱི་ཁོར་ཡུག་སྔར་ལས་ཉམས་ཆག་ཏུ་ཕྱིན་ཡོད་པ་དང་། དམིགས་བསལ་གྱིས་ཏོག་དབྱིབས་ནད་ཡམས་བྱུང་རྗེས་རིམ་བཞིན་བསྐྱར་ལོག་བརྒྱབ་སྟེ། ད་ལྟའི་ཆར་རྒྱ་ནག་གི་ཁྲིམས་ལུགས་ཀྱི་དབང་ཆ་དང་དམིགས་བསལ་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ཐད་ནས་རིག་གནས་གསར་བརྗེའི་དུས་སྐབས་དང་འདྲ་བའི་གནས་སུ་གྱར་ཡོད་སྐོར་དང་། ད་ལྟ་རྒྱ་ནག་གཞུང་གི་དྲག་གནོན་འོག་སྤྱི་དམངས་ཀྱི་ཁེ་དབང་སྲུང་སྐྱོབ་བྱེད་མཁན་ཁྲིམས་རྩོད་པ་མཐོང་ཇེ་དཀོན་དུ་འགྲོ་བཞིན་ཡོད་སྐོར་བརྗོད་འདུག
ཁྲིམས་རྩོད་པར་དྲག་གནོན་བྱས་པའི་ཆེས་མུན་ནག་གི་ལོ་རྒྱུས་སུ་གྲགས་པའི་དུས་ཚེས་ཏེ། ༧༠༩ ནི་ཕྱི་ལོ་ ༢༠༡༥ ཟླ་ ༧ ཚེས་ ༨ ཉིན་རྒྱ་ནག་རྒྱལ་ས་པེ་ཅིན་དུ་གནས་སྡོད་འགྲོ་བ་མིའི་ཐོབ་ཐང་གི་ཁྲིམས་རྩོད་པ་གྲགས་ཅན་ལྕམ་ཝུའུ་ཡས་(Wang Yu)ལགས་མཚན་གུང་ཙམ་ལ་རང་ཁྱིམ་ནས་ཉེན་རྟོག་པས་བཙན་འཁྲིད་བྱས་པ་ནས་བཟུང་། རྒྱ་ནག་དམར་གཞུང་གིས་ཁྲིམས་རྩོད་པ་དང་ལས་འགུལ་བ་རྣམས་དམིགས་འབེན་དུ་བཟུང་སྟེ་འཛིན་བཟུང་བཙོན་འཇུག་གི་བྱེད་ཐབས་དྲག་པོ་ལག་བསྟར་བྱས་ཡོད་པ་དང་། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚོགས་པ་ཁག་གི་གྲངས་ཐོ་ལྟར་ན། རྒྱལ་ཁབ་ཀྱི་བདག་དབང་མགོ་རྟིང་སློག་རྩིས་བྱས་པའི་ཉེས་མིང་འོག རྒྱ་ནག་གཞུང་གིས་ཁྲིམས་རྩོད་པ་དང་ལས་འགུལ་བ་ ༣༠༠ ལྷག་འཛིན་བཟུང་དང་བཀག་སྡོམ་འོག་བཞག་ཡོད་པ་དང་། རིན་ཆན་ནིའུ་ལགས་ནི་དེའི་གྲས་ཀྱི་གཅིག་ཡིན་འདུག
རིན་ཆན་ནིའུ་ལགས་ཀྱིས་བཀག་ཉར་འོག་ཡོད་པའི་རྒྱ་ནག་གི་བུད་མེད་ཀྱི་ཐོབ་ཐང་སྲུང་སྐྱོབ་པ་ཀྲོ་ཝེ་ལགས་ཀྱི་ཁྲིམས་རྩོད་པ་བྱས་པ་དང་། དེ་བཞིན་ཧོང་ཀོང་གི་དམངས་གཙོའི་ལས་འགུལ་བ་དང་ཆོས་འཁོར་རྩ་རླུང་སྒོམ་སྒྲུབ་པ་སོགས་ཀྱི་ཐོབ་ཐང་ལ་སྲུང་སྐྱོབ་བྱས་རྐྱེན། རྒྱ་ནག་ཀྲིན་ཀྲུའུ་གྲོང་ཁྱེར་ཉེན་རྟོག་པས་རྒྱལ་ཁབ་ཀྱི་བདག་དབང་མགོ་རྟིང་སློག་རྩིས་བྱེད་ཀྱི་ཡོད་པའི་ཉེས་མིང་འོག་སྔ་གཞུག་ཏུ་འཛིན་བཟུང་བཀག་ཉར་བྱས་མྱོང་ཡོད་པ་མ་ཟད། ཁྲིམས་རྩོད་པའི་ལག་ཁྱེར་གཞུང་བཞེས་བཏང་བ་སོགས་ཀྱི་བཀག་སྡོམ་བྱས་པར་བརྟེན། ཕྱི་ལོ་ ༢༠༡༦ ཟླ་ ༧ ཚེས་ ༩ ཉིན་རྒྱ་ནག་གི་མིང་གྲགས་ཡོད་པའི་ཁྲིམས་རྩོད་པ་ཚུད་པའི་སྤྱི་དམངས་ཁྲིམས་རྩོད་པ་ ༡༠༤ ཡིས་མཉམ་རུབ་ཐོག་དོན་ཚན་གསུམ་ཅན་གྱི་གསལ་བསྒྲགས་ཤིག་བྱས་པའི་ནང་། གཅིག ཀྲིན་ཀྲུའུ་གྲོང་ཁྱེར་ཉེན་རྟོག་པས་ཁྲིམས་འགལ་ཐོག་རིན་ཆན་ནིའུ་འཛིན་བཟུང་བྱས་པའི་བྱ་སྤྱོད་ལ་སྐྱོན་བརྗོད་དྲག་པོ་ཡོད། གཉིས། ཀྲིན་ཀྲུའུ་གྲོང་ཁྱེར་ཉེན་རྟོག་པས་འཕྲལ་དུ་ཆ་རྐྱེན་མེད་པའི་ཐོག་ནས་རིན་ཆན་ནིའུ་ཀློད་གྲོལ་གཏོང་དགོས། གསུམ། ཁྲིམས་རྩོད་པ་རིན་ཆན་ནིའུ་ཡི་ཆེད་དུ་ཁྲིམས་ཀྱི་རོགས་སྐྱོར་ཆ་ཚང་མཁོ་སྤྲོད་བྱས་ཏེ། ཁྲིམས་རྩོད་པའི་ཁེ་དབང་དང་སྤྱི་དམངས་ཀྱི་སྨྲ་བརྗོད་རང་དབང་ལ་སྲུང་སྐྱོབ་བྱེད་པར་ཆོད་སེམས་བརྟན་པོ་ཡོད་ཅེས་བརྗོད་ཡོད་པ་རེད།
ཉི་སྒྲོན་གྱིས་གནས་ཚུལ་ཕྱོགས་བསྡུས་བྱས།
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
![Hungary's Laszlo Krasznahorkai poses for photographers in London [File: Matt Dunham/AP]](https://tibettimes.net/wp-content/uploads/2025/10/Screenshot-2025-10-10-at-2.23.17-PM-360x180.png)
