བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཨོ་གླིང་ནང་གཞུང་འབྲེལ་འཚམས་གཟིགས་གནང་བཞིན་པ་དང་བསྟུན། འཛམ་གླིང་རྒྱལ་ཁབ་བདུན་གྱིས་༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ཀྱི་གནད་དོན་ལ་ཕྱི་ནས་ཐེ་ཇུས་བྱེད་མི་ཆོག་པའི་བསྒྲགས་གཏམ་སྤེལ་བར་དགའ་བསུ་ཞུས།
དབྱིན་ཇི་གཙོ་བྱས་པའི་ཡུ་རོབ་མཐུན་ཚོགས་ཀྱི་འགྲོ་བ་མིའི་ཐོབ་ཐང་གི་དམིགས་བསལ་སྐུ་ཚབ་རྒྱལ་ཁབ་བདུན་གྱིས། ༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ཀྱི་གནད་དོན་ལ་ཕྱི་ནས་ཐེ་ཇུས་བྱེད་པར་དགག་པ་ཡོད་པའི་ཡོངས་ཁྱབ་བསྒྲགས་གཏམ་སྤེལ་འདུག་པར་བརྟེན། དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཨེག་སི་སྤྱི་ཚོགས་དྲ་ལམ་དུ་གནས་ཚུལ་ཞིག་སྤེལ་ཏེ། ཡུ་རོབ་མཐུན་ཚོགས་ཀྱི་འགྲོ་བ་མིའི་ཐོབ་ཐང་གི་དམིགས་བསལ་སྐུ་ཚབ་རྒྱལ་ཁབ་ཚོས་མཉམ་འབྲེལ་བསྒྲགས་གཏམ་སྤེལ་བར་དགའ་བསུ་ཞུས་འདུག
དེ་ཡང་ཟླ་འདིའི་ཕྱི་ཚེས་ ༦ ཉིན་ཡུ་རོབ་རྒྱལ་ཁབ་ཧྥ་རན་སི་དང་འཇར་མན། ནེ་ཐི་ལན་ཌི། ལི་ཐོ་ནེ་ཡ། ཨའེ་སི་ཊོ་ནེ་ཡ། དབྱིན་ཡུལ་དང་ཨ་སི་ལན་ཌི་བཅས་རྒྱལ་ཁབ་བདུན་གྱིས། དུས་རབས་ཉེར་གཅིག་པའི་བླ་ན་མེད་པའི་སྟོན་པ་ཆེན་པོ་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་དང་འབྲེལ་བའི་གནད་དོན་དང་དེའི་ཐོག་ལ་ཕྱི་ནས་ཐེ་ཇུས་བྱེད་པར་དགག་པ་ཡོད་པའི་ཁར། བོད་མི་མང་གི་ཆོས་ལུགས་དད་མོས་རང་དབང་སོགས་ལ་རྒྱབ་སྐྱོར་ཡོད་པའི་ལངས་ཕྱོགས་གསལ་འདོན་བྱས་ཡོད་འདུག
དེ་བཞིན། ཟླ་འདིའི་ཕྱི་ཚེས་ ༣ ཉིན་རྒྱ་གར་དབུས་མངའ་སྡེ་མཐུན་ཚོགས་ཀྱི་བློན་ཆེན་ཀེ་རན་རཱ་ཇི་ཇའོ་ལགས་ཀྱིས། ༧གོང་ས་མཆོག་གི་ཡང་སྲིད་ངོས་འཛིན་བྱེད་པའི་འགན་དབང་དེ་༧གོང་ས་མཆོག་སྐུ་སྒེར་ཁོ་ནར་ཡོད་ཅེས་བརྗོད་པ་དང་། རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ། རྒྱ་ནག་གིས་༧གོང་ས་མཆོག་གི་ཡང་སྲིད་ལ་ཐེ་ཇུས་བྱེད་པར་དགག་པ་བརྒྱབ་ཡོད་ཅེས་བསྒྲགས་ཡོད་པ་མ་ཟད། རྒྱ་གར་ནི་༧གོང་ས་མཆོག་གི་ཡང་སྲིད་རྒྱུད་མཐུད་ཕེབས་ངེས་ཡིན་པའི་ཐུགས་ཐག་ལ་རྒྱབ་སྐྱོར་བྱེད་མཁན་ཐོག་མར་གྱུར་ཡོད་པའི་གནས་ཚུལ་ཐོན་ཡོད། འོན་ཀྱང་། ཕྱི་ཚེས་ ༤ གྱི་ཕྱི་དྲོར་རྒྱ་ནག་གཞུང་གིས་རྒྱ་གར་གཞུང་ལ་༧གོང་ས་མཆོག་གི་ཡང་སྲིད་དང་བོད་ཀྱི་གནད་དོན་ཐོག་ལག་པ་འཆང་མི་ཉན་པའི་ཉེན་བརྡ་བཏང་ཡོད། ཕྱི་ཚེས་ ༥ ཉིན་རྒྱ་གར་ཕྱི་སྲིད་ལས་ཁུངས་མགྲིན་ཚབ་པས། ང་ཚོས་༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་རྒྱུད་མཐུད་ཕེབས་ངེས་ཡིན་པའི་གནད་དོན་དང་འབྲེལ་བའི་གནས་ཚུལ་ཁག་ཅིག་མཐོང་བྱུང་། རྒྱ་གར་གཞུང་གིས་ཆོས་ལུགས་དད་མོས་སོགས་དང་འབྲེལ་བའི་གནད་དོན་ཐོག་སྐད་ཆ་དང་ལངས་ཕྱོགས་གང་ཡང་འཛིན་གྱི་མེད་ཅེས་བརྗོད་ཡོད།
ཟླ་འདིའི་ཕྱི་ཚེས་ ༦ ༧གོང་ས་མཆོག་གི་འཁྲུངས་སྐར་ཉིན་ཨ་རུ་ན་ཅལ་མངའ་སྡེ་སྤྱི་ཁྱབ་བློན་པདྨ་མཁའ་འགྲོ་ལགས་ཀྱིས། ཨ་རུ་ན་ཅལ་མངའ་སྡེ་གཞུང་མང་གཉིས་ཀྱིས་༧གོང་ས་མཆོག་གི་ཡང་སྲིད་རྒྱུད་མཐུད་ཕེབས་ངེས་ཡིན་པའི་ཐུགས་ཐག་ལ་རྒྱབ་སྐྱོར་ཞུ་རྒྱུ་ཡིན་པ་ཡོངས་བསྒྲགས་བྱས་ཡོད།
ཟླ་འདིའི་ཕྱི་ཚེས་ ༢ ཉིན་དྷ་སར་འཚོགས་པའི་བོད་མིའི་ཆོས་ཚོགས་ཐེངས་བཅོ་ལྔ་བའི་སྟེང་༧གོང་ས་རྒྱལ་བ་རིན་པོ་ཆེ་མཆོག་ནས། ཡང་སྲིད་ངོས་འཛིན་གྱི་བྱེད་སྒོའི་འགན་འཁུར་གཙོ་བོ་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་རྣམས་ལ་ཡོད་པ་དང་། ཁོ་ཚོས་བོད་བརྒྱུད་ནང་བསྟན་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པའི་དབུས། ༧རྒྱལ་དབང་སྐུ་ཕྲེང་ན་རིམ་དང་ལུས་དང་གྲིབ་བཞིན་འགྲོགས་པའི་དམ་ལྡན་ཆོས་སྲུང་ཁག་ལ་སྐབས་བསྟུན་ལམ་སྟོན་ཞུས་ཏེ་ཡང་སྤྲུལ་རྩད་གཅོད་ངོས་འཛིན་སྔོན་སྲོལ་བཞིན་བྱ་རྒྱུ་ལས། གཞན་སུས་ཀྱང་ཐེ་བྱུས་མི་ཆོག་པའི་གནས་བབ་ལ་འགྱུར་བ་གང་ཡང་མེད། ཅེས་གསུངས་ཡོད།
གསར་འགོད་པ། སྐལ་བཟང་སྦྱིན་པ།
