༧གོང་ས་མཆོག་ལ་དྭགས་ཀྱི་ཟངས་དཀར་ཡུལ་དུ་ཞབས་སོར་བདེ་བར་བཀོད།

དེ་རིང་ཕྱི་ཚེས་ ༢༡ ཉིན་གྱི་ཞོགས་པར་༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་གླེ་ནས་ཐད་འཕུར་གནམ་གྲུའི་ནང་ལ་དྭགས་ཟངས་དཀར་དུ་ཞབས་སོར་བདེ་བར་འཁོད་གནང་མཛད་འདུག

དེ་རིང་ཕྱི་ཚེས་ ༢༡ ཉིན་གྱི་ཞོགས་པ་ཆུ་ཚོད་ ༧།༣༠ ཙམ་ལ་༧གོང་ས་རྒྱལ་བ་རིན་པོ་ཆེ་མཆོག་ཟངས་དཀར་དུ་ཞབས་སོར་བདེ་བར་འཁོད་གནང་མཛད་དེ། དཀར་ཤ་ཕོ་བྲང་དང་ནཱ་ལེནྡྲ་རིག་གཞུང་སློབ་གཉེར་ཁང་དབུ་འབྱེད་དང་རབ་གནས་བཀའ་དྲིན་བསྐྱངས། དེ་ནས་ཚོགས་ཆེན་འདུ་ཁང་གི་བཞུགས་ཁྲིར་༸ཞབས་སོར་འཁོད་མཚམས། དཀར་དགོན་དབུ་ཆོས་ལགས་ནས་མཎྜལ་རྟེན་གསུམ་འདེགས་འབུལ་ཞུས་པ་དང་། སྐབས་དེར་ཤར་པ་ཆོས་རྗེ་མཆོག་དང་། རྣམ་གྲྭ་མཁན་རིན་པོ་ཆེ་མཆོག ཁྲིག་རྩེ་རིན་པོ་ཆེ་མཆོག ལྷ་རྒྱལ་རིན་པོ་ཆེའི་ཡང་སྲིད། དཀྱིལ་ཁང་རིན་པོ་ཆེ་མཆོག ལ་དྭགས་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་བཀྲ་ཤིས་རྒྱལ་མཚན་མཆོག གར་གྷལ་རྫོང་གི་རྫོང་དཔོན། ནང་པ་ཚོགས་པ་དང་དགོན་པ་ཚོགས་པའི་ཚོགས་གཙོ་སོགས་ཀྱིས་གཙོས་མཁན་བླ་སྤྲུལ་དང་། དཔོན་རིགས་སོགས་སྟོང་ཕྲག་བརྒལ་བ་ཆེད་བཅར་ཞུས་ཡོད་འདུག

དཀར་དགོན་དབྱར་གྱི་རིག་གཞུང་ཆེན་མོའི་ཚོགས་གཙོ་དགེ་བཤེས་བློ་བཟང་ཚེ་བརྟན་ལགས་ཀྱིས་ཕེབས་བསུའི་གསུང་བཤད་གནང་བ་དང་འབྲེལ། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ཉག་ཅིག་ལ་བརྟེན་ནས་ལ་དྭགས་ཡུལ་དུ་དབྱར་ཆོས་ཀྱི་ལམ་སྲོལ་ཚུགས་པ་དང་། དབྱར་ཆོས་དང་འབྲེལ་ནས་བཀའ་བསྟན་མཆོད་ཁང་དུ་སྒྲིག་གཤོམ་བྱེད་པ་ཙམ་མ་ཡིན་པར་སློབ་སྦྱོང་བྱེད་ཐུབ་པར་འབད་བརྩོན་གནང་མུས་ཡིན་པའི་སྐོར་དང་། དཀར་དགོན་དབྱར་ཆོས་འདི་བཞིན་ལ་དྭགས་ཀྱི་དབྱར་ཆོས་ཐེངས་བཅུ་པ་ཡིན་པ་སྙན་སེང་ཞུས་ཏེ། ༧མགོན་པོ་གང་ཉིད་མཆོག་སླར་ཡང་ཟངས་དཀར་ཁུལ་དུ་ཆིབས་བསྒྱུར་བཀའ་དྲིན་བསྐྱངས་པར་བཀའ་དྲིན་བླ་མེད་དུ་ཆེ་ཞེས་ཞུས།

དེ་ནས་གར་གྷལ་རྫོང་དཔོན་ལགས་ཀྱིས་༧གོང་ས་མཆོག་གིས་ལམ་སྟོན་གནང་བའི་བྱམས་བརྩེའི་བཀའ་སློབ་ནི་དེང་གི་འཛམ་གླིང་ལ་ཧ་ཅང་དགོས་ངེས་ཅན་ཆགས་ཡོད་པ་དང་། ༧མགོན་པོ་གང་ཉིད་མཆོག་ནི་བྱམས་བརྩེའི་བདག་ཉིད་ཆེན་པོ་ཞིག་ཡིན་པས་ཟངས་དཀར་ཁུལ་དུ་ཆིབས་བསྒྱུར་བཀའ་དྲིན་བསྐྱངས་བ་ནི་ཐོབ་དཀའ་བའི་གོ་སྐབས་རྩ་ཆེན་ཞིག་ཡིན་པ་སོགས་ཕེབས་བསུའི་གསུང་བཤད་གནང་རྗེས་སློབ་ཕྲུག་ཁག་ཅིག་གིས་བདེ་སྐྱིད་དང་དེའི་རྒྱུ་ཡི་སྐོར་ལ་རྟགས་བསལ་གཟིགས་འབུལ་ཞུས།

དེའི་རྗེས་༧གོང་ས་རྒྱལ་བ་རིན་པོ་ཆེ་མཆོག་ནས་བླང་དོར་བཀའ་སློབ་གནང་སྐབས། བོད་ལ་ཉམས་ཉེས་ཆེན་པོ་བྱུང་སྟེ་བསྟན་པའི་མེ་རོ་རྒྱ་གར་དུ་བཟུང་བ་དང་། འདིར་སངས་རྒྱས་ཀྱི་བསྟན་པའི་འགྲོ་སྟངས་ལ་ཡུལ་བ་ཚོས་ཀྱང་དོ་སྣང་ཡག་པོ་བྱེད་ཀྱི་འདུག ང་ཚོས་བསྟན་པའི་མེ་རོ་གསོ་ཐབས་བྱེད་བཞིན་ཡོད། ང་ཚོ་བཙན་བྱོལ་བ་བྱས་ནས་བསྡད་ཡོད་ཀྱང་། བོད་ཀྱི་ཆོས་དང་རིག་གཞུང་ལ་གཅེས་ཞེན་ཆེན་པོའི་ཐོག་ནས་བདག་པོ་བརྒྱབ་ཡོད་ཅིང་། དེ་ང་ཚོས་མུ་མཐུད་ནས་བྱེད་བཞིན་ཡོད། ངོས་རང་ལ་ཆ་བཞག་ན་དཔེ་ཆར་བལྟས་ཤིང་གྲྭ་སར་འགྲིམས། སྨོན་ལམ་དམ་བཅའ་བཞག་པ་སོགས་གང་ལྟར་རིགས་པའི་འགྲོ་སྟངས་ཆུང་ཆུང་སྐབས་ནས་བསླབ་ཟིན་པ་དེ་ནི་ཧ་ཅང་ཕན་ཐོགས་ཆེན་པོ་འདུག ངོས་ལ་རྟགས་བསལ་སློབ་མཁན་གྱི་དགེ་རྒན་གཙོ་བོ་གཅིག་དེ་སོག་པོ་ཞིག་ཡིན། ངོས་ཀྱིས་ལྷ་སའི་སྨོན་ལམ་ལ་དམ་བཅའ་བཞག་པ་རེད། དེ་བཞིན་གདན་ས་ཚོར་གྲྭ་སྐོར་དུ་ཕྱིན་པ་རེད། དངོས་གནས་རིགས་པའི་ལམ་ནས་དཔྱད་པ་བྱེད་པ་དེས་བློ་བསྐྱེད་ཡོང་བ་ལ་ཧ་ཅང་ཕན་ཐོགས་འདུག ངོས་རང་གྲོང་གསེབ་ཀྱི་ཕྲུ་གུ་ཞིག་ཕ་ཡུལ་ནས་ལྷ་སར་ཡོང་ནས་རིགས་ལམ་སྦྱང་བས་དེ་ནི་མིའི་རྣམ་དཔྱོད་ཡང་དག་པ་ཞིག་བེད་སྤྱོད་བྱེད་པ་ལ་ཧ་ཅང་ཡག་པོ་འདུག ང་ཚོའི་དགེ་འདུན་པ་སྐྱབས་བཅོལ་ཏུ་ཡོད་མཁན་ཚོས་ག་ཚོད་ཐུབ་ཐུབ་ཀྱིས་ཚད་མའི་ལམ་ནས་དཔྱད་པ་བྱ་རྒྱུ་ནི་གལ་ཆེན་པོ་འདུག ཞེས་གསུངས་པའི་ཕྱིར་ཞེས་ལུང་དྲངས་པ་གཅིག་པུ་མ་ཡིན་པར་རིགས་པའི་ལམ་ནས་དཔྱད་པ་བྱས་ཏེ་རིགས་པ་དང་ལྡན་པ་ཞིག་ཁས་བླངས། རིགས་པ་དང་མི་ལྡན་པ་དེ་ལུང་དོན་བཞག་དགོས་སམ། དགོངས་པ་གཞན་དུ་ཇི་ལྟར་བཀྲལ་དགོས་པ་ལ་བསམ་བློ་བཏང་ནས་བྱེད་དགོས། རིགས་པའི་ལམ་ནས་འགྲོ་རྒྱུ་གཙོ་བོ་བྱས་ན་ཧ་ཅང་ཡག་པོ་འདུག ང་ཚོ་སྐྱབས་བཅོལ་བ་ཆགས་ནས་རྒྱ་གར་དུ་ཚོགས་སྡེ་ཆུང་ཆུང་ཞིག་ཡོད་པ་རེད། ཡིན་ནའང་། ང་ཚོས་ག་ཚོད་ཐུབ་ཐུབ་ཀྱིས་རིགས་པའི་ལམ་ནས་བསམ་བློ་བཏང་ནས་དཔྱད་པ་བྱེད་པའི་ལམ་ལུགས་མུ་མཐུད་ནས་བཟུང་བསྡད་ཡོད། འདིར་ཆ་བཞག་ན་དངོས་གནས་དུས་ཚོད་གཉན་འཕྲེང་ཅན་འདི་ལ་ང་ཚོའི་ལོ་སྟོང་ཕྲག་རིང་གི་རིགས་ལམ་གྱིས་དཔྱད་པ་བྱེད་པ་འདི་མུ་མཐུད་དུ་བཟུང་སྡོད་པ་བཀའ་དྲིན་ཆེན་པོ་རེད་ལ། ཧ་ཅང་གལ་ཆེན་པོ་རེད། ཐུགས་རྗེ་ཆེ། ཞེས་བཀའ་སློབ་བསྩལ།

སྤྱིར་བཏང་ཕྱི་ཚེས་ ༡༩ ཉིན་ལ་དྭགས་ཟངས་དཀར་ལ་ཆིབས་བསྒྱུར་བསྐྱང་གཏན་ཁེལ་ཡོད་ཀྱང་གནམ་གཤིས་ལེགས་པོ་མེད་པའི་རྐྱེན་གྱིས་ཆིབས་བསྒྱུར་གནང་ཐུབ་མེད་པ་དང་། ཁ་སང་ཕྱི་ཚེས་ ༢༠ ཉིན་གླེའི་ཞི་བའི་ཚལ་ཕོ་བྲང་ནས་མཁའ་ལམ་བརྒྱུད་ཟངས་དཀར་ཕྱོགས་སུ་ཕེབས་ཡོད་ཀྱང་། གནམ་གཤིས་མི་ལེགས་པའི་རྐྱེན་གྱིས་ལམ་དཀྱིལ་ཙམ་ནས་ཕྱིར་གླེ་ལ་ཕེབས་དགོས་བྱུང་འདུག

འདི་ག་བོད་ཀྱི་དུས་བབ་གསར་འགོད་པ་ཟངས་དཀར་དུ་ཉིན་ཤས་གོང་ནས་འབྱོར་ཟིན་ཡོད་པས། ཁ་སང་ཟངས་དཀར་ཕྱོགས་ཀྱི་དད་ལྡན་སེར་སྐྱ་མི་མང་སྟོང་ཕྲག་དུ་མས་གཞུང་ལམ་གཡས་གཡོན་དུ་བང་སྒྲིག་ནས་ཕེབས་བསུར་གྲ་སྒྲིག་གང་ལེགས་གནང་འདུག་ཀྱང་། ལམ་དཀྱིལ་ནས་ཕྱིར་ཕེབས་དགོས་བྱུང་བ་གོ་ཐོས་བྱུང་མཚམས་ང་ཚོའི་བསོད་ནམས་ཀྱིས་ཁྱོག་གི་མེད་པ་འདྲ་ཟེར་ནས་བློ་ཕམ་ངང་སྒྲོལ་མ་སོགས་གསུང་འདོན་གནང་སྟེ་རེ་སྒུག་ཆེན་པོ་ཞུས་སོང་། སྟབས་ལེགས་ནས་དེ་རིང་ཞོགས་པར་ཟངས་དཀར་ཡུལ་དུ་ཆིབས་ཞབས་བདེ་བར་བཀོད་གནང་མཛད་པ་དང་། ད་ལྟའི་མཛད་འཆར་ལྟར་ན།  ཕྱི་ཚེས་ ༢༡ ནས་ཚེས་ ༢༥ བར་དུ་ཟངས་དཀར་དུ་མཛད་འཕྲིན་སྐྱོང་རྒྱུ་དང་། ཕྱི་ཚེས་ ༢༦་ཉིན་ཕྱིར་གླེ་རུ་ཆིབས་བསྒྱུར་བཀའ་དྲིན་སྐྱོང་འཆར་ཡོད་འདུག

བསྟན་འཛིན་ཉི་སྒྲོན་གྱིས་དགའ་ལྡན་ཕོ་བྲང་གི་གནས་ཚུལ་སོགས་ནས་བཏུས།