༸རྒྱལ་བའི་གོ་སྟོན་དང་། ཞི་ཅིན་ཕིང་གིས་རྒྱ་གཞུང་པཎ་ཆེན་གྱི་མཇལ་ཞུ་དང་ལེན།

རྩོམ་པ་པོ། བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་ཕན་ཐོགས།

རྩོམ་ཁུངས། བོད་ཀྱི་དུས་བབ།

ཕྱི་ཟླ་ ༧ ཚེས་ ༦ ཉིན་ནི་༸གོང་ས་༸རྒྱལ་བ་རིན་པོ་ཆེ་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཕྱི་ལུགས་དགུང་ལོ་དགུ་བཅུར་ཕེབས་པའི་གོ་སྟོན་ལ་འཁེལ་ཡོད་པ་དང་། སྐུའི་གོ་སྟོན་གྱི་ཟླ་བ་གཅིག་སྔོན་ལ་རྒྱ་ནག་གི་ཀྲུའུ་ཞིའམ་དམར་ཤོག་དྲུང་ཆེ་ཞི་ཅིན་ཕིང་ (习近平) ནས་རྒྱ་གཞུང་གིས་ངོས་འཛིན་བྱས་པའི་༸པཎ་ཆེན་རྒྱལ་མཚན་ནོར་བུ་དང་ཐུག་འཕྲད་བྱས་ཡོད། རྒྱ་ནག་གི་གཞུང་འབྲེལ་གསར་ཁང་ཁག་ཏུ་བཀོད་པར་“ཞི་ཅིན་ཕིང་ནས་པཎ་ཆེན་ཨ་ཏི་ནི་ཆོས་ཀྱི་རྒྱལ་པོའི་མཇལ་ཞུ་ལ་དང་ལེན་གནང་ཡོད་ཟེར།” 1 མཇལ་ཞུ་ཟེར་བའི་ཡིག་འབྲུ་གཉིས་ཧ་ཅང་གི་མངོན་གསལ་དོད་པོ་ཞིག་འདུག དེས་རྒྱ་ནག་གཞུང་གིས་ཆབ་སྲིད་ཀྱི་བརྡ་ཞིག་གཏང་ཡོད་པ་ནི་རྒྱ་ནག་གི་དབང་ཤུགས་དང་མཐོ་ས་གོང་མའི་དབང་ཆས་དམའ་ས་ཆོས་ལུགས་ལ་ཚོད་འཛིན་དང་ཁ་སྒྱུར་བྱེད་ཀྱི་ཡོད་པ་བཏོན་ཡོད།

《新华社》ཞི་ཅིན་ཕིང་ནས་༸པཎ་ཆེན་ཨ་ཏི་ནི་ཆོས་ཀྱི་རྒྱལ་པོའི་མཇལ་ཞུ་ལ་དང་ལེན་གནང་ཡོད་ཟེར། དེ་ནི་ཕྱི་ལོ་ ༢༠༡༥ ཟླ་ ༦ ཚེས་བཅུའི་རྗེས་སུ་ཞི་ཅིན་ཕིང་དང་རྒྱལ་མཚན་ནོར་བུ་གཉིས་ཡང་བསྐྱར་ཐུགས་འཕྲད་བྱས་པ་དེ་ཆགས་ཡོད།

དེ་སྔོན་རྒྱ་ནག་ནང་གི་གསར་འགྱུར་བརྒྱུད་ལམ་ཁག་ལ་གཞིགས་ན། མའོ་ཙེ་ཏུང་ (毛泽东) དང་ཏིང་ཞོ་ཕིང་ (邓小平) རྒྱ་ནག་གུང་ཁྲན་ཏང་གི་འགོ་འཁྲིད་རྒན་གྲས་ཁོང་གཉིས་ཀྱིས་༸པཎ་ཆེན་རིན་པོ་ཆེ་སྐུ་ཕྲེང་བཅུ་པ་མཆོག་དང་མཇལ་འཕྲད་སྐབས་ཐུགས་འཕྲད་ཟེར་བ་བེད་སྤྱོད་བྱས་འདུག་པ་མ་ཟད། 2 ཕྱི་ལོ་ ༡༩༩༦ ལོར་ཅང་ཙེ་མིང་ (江泽民) དང་ལོ་ན་ཕྲ་བའི་རྒྱལ་མཚན་ནོར་བུ་གཉིས་ཐུགས་སྐབས་ཡང་ཐུགས་འཕྲད་ཟེར་བའི་ཡིག་འབྲུ་གཉིས་དེ་བེད་སྤྱོད་བྱས་འདུག 3 འོན་ཀྱང་ད་རེས་ཞི་ཅིན་ཕིང་དང་རྒྱལ་མཚན་ནོར་བུ་གཉིས་ཐུགས་སྐབས་མཇལ་ཞུ་ཟེར་བའི་ཡིག་འབྲུ་གཉིས་བེད་སྤྱོད་བྱས་པ་དང་། གཞན་ཧང་སང་དགོས་པ་ཞིག་ལ་ཞི་ཅིན་ཕིང་དང་གཤམ་འོག་བོད་ཀྱི་དཔོན་རིགས་བར་ཐུགས་སྐབས་“ཞི་ཅིན་ཕིང་གིས་ལྷ་སར་མཛའ་ཞིང་བརྩེ་བས་བོད་ལ་བཅའ་སྡོད་དམག་དཔུང་དཔོན་དང་དམག་མིར་ཐུགས་འཕྲད་གནང་ཡོད་ཟེར།”4 དེ་མཚུངས་ཞི་ཅིན་ཕིང་དང་བོད་མི་དཀྱུས་མ་ཐུགས་པའི་སྐབས་སུ་“བོད་ཀྱི་མི་རིགས་ཁག་གི་ལས་བྱེད་དང་མང་ཚོགས་རྣམས་ལ་འཚམས་འདྲི་ཞུས་ཡོད་ཟེར།”5 ཞི་ཅིན་ཕིང་དང་རྒྱལ་མཚན་ནོར་བུ་ཐུགས་འཕྲད་སྐབས་གཞི་ནས་མཇལ་ཞུ་ཟེར་བ་ཡིག་འབྲུ་གཉིས་བེད་སྤྱོད་བྱས་འདུག

ག་རེ་བྱས་ནས་ཞི་ཅིན་ཕིང་དང་རྒྱ་གཞུང་གིས་བོད་བརྒྱུད་ནང་བསྟན་གྱི་ཕྱི་ངོས་མཚོན་པའི་རྒྱལ་མཚན་ནོར་བུར་ཐུག་སྐབས་མཇལ་ཞུ་ཟེར་བ་བེད་སྤྱོད་བྱས་པ་རེད་དམ། དེས་རྒྱ་གཞུང་གི་ཆབ་སྲིད་ཀྱིས་སྔོན་བརྡ་ཞིག་བཏང་ཡོད་པ་ནི་རྒྱ་ནག་གི་དཔོན་པོ་བོད་ཀྱི་ནང་བསྟན་གྱི་མགོ་ཐོག་ཏུ་སྡོད་པ། མཐོ་ས་གོང་མའི་དབང་ཆས་དམའ་ས་ཆོས་ལུགས་ལ་ཚོད་འཛིན་དང་ཁ་ལོ་སྒྱུར་གྱི་ཡོད་པ་མངོན་ཆེད་རེད།

《环球网》ཕྱི་ལོ་ ༡༩༥༤ ཟླ་ ༩ པར་མའོ་ཙེ་ཏུང་གིས་པེ་ཅིང་དུ་བོད་ཀྱི་ཆོས་ལུགས་དབུ་འཁྲིད་༸ཏཱ་ལའི་བླ་མ་༸བསྟན་འཛིན་རྒྱལ་མཚོ་དང་༸པཎ་ཆེན་ཨ་ཏི་ནི་༸ཆོས་ཀྱི་རྒྱལ་མཚན་གཉིས་དང་ཐུག་འཕྲད་གནང་བ།

《中国西藏网》ཕྱི་ལོ་ ༡༩༩༦ ཟླ་ ༡ ཚེས་ ༡༢ ཉིན་ཅང་ཙེ་མིང་གིས་རྒྱལ་མཚན་ནོར་བུ་དང་གདན་ས་བཀྲིས་ལྷུན་པོའི་སྐུ་ཚབ་ཚོགས་པ་དང་ཐུག་འཕྲད་གནང་བ།

རྒྱ་ནག་གི་གསེར་བུམ་དཀྲུག་པ་ཟེར་བ་ནི་ཆབ་སྲིད་ཀྱི་ལག་ཆ་ཙམ་རེད།

རྒྱ་ནག་གུང་ཁྲན་ཏང་གི་སྲིད་གཞུང་ནི་ལྷ་མེད་སྨྲ་བ་དང་ཆོས་དུག་རེད་ཟེར་བའི་ལྟ་ཚུལ་དང་ཆོས་མེད་པ་བཟོ་ཐབས་བྱེད་མཁན་ཞིག་རེད། དེས་བོད་ཀྱི་ལོ་ངོ་སྟོང་ཕྲག་ལྡན་པའི་བླ་སྤྲུལ་ཡང་སྲིད་ཐོག་ཐེ་ཇུས་བྱས་པ་དེ་ནི་གད་མོ་སློང་བའི་སྐད་ཆ་ཞིག་རེད། ཨ་རིའི་རླུང་འཕྲིན་ཁང་གི་རྒྱ་སྐད་སྡེ་ཚན་ནས་དེ་སྔོན་”གསང་གཏོལ་དུས་ཚོད། ༸པཎ་ཆེན་རིན་པོ་ཆེའི་ཡང་སྲིད་འཚོལ་བ།“ཞེས་པའི་དམིགས་གསལ་ལེ་ཚན་ནང་རྒྱ་ནག་གཞུང་གིས་བོད་ཀྱི་ནང་བསྟན་གྱི་ཡང་སྲིད་ལམ་ལུགས་སུ་ཚོད་འཛིན་བྱས་ནས་རྒྱལ་མཚན་ནོར་བུ་ངོས་འཛིན་བྱས་པའི་བརྒྱུད་རིམ་གསལ་སྟོན་བྱས་ཡོད།6 ལོ་སྔོན་མར་ YOUTUBE ཞེས་པའི་དྲྭ་ཚིགས་ཀྱི་བརྒྱུད་ལམ་王局拍案ཟེར་བས་ཨ་ཀྱཱ་རིན་པོ་ཆེར་བཅའ་འདྲི་ཞུས་པའི་ལེ་ཚན་དེས་རྒྱ་གཞུང་གི་བྱ་ངན་དེ་རྒྱ་རིགས་ཁྲོད་ཁ་གསལ་ངོ་སྤྲོད་ཤུགས་ཆེན་བྱུང་ཡོད། དེའི་ཁྲོད་ཨ་ཀྱཱ་རིན་པོ་ཆེ་མཆོག་ནས་ལྷ་ལྡན་གཙུག་ལག་ཁང་དུ་རྒྱ་ནག་གཞུང་གིས་གསེར་བུམ་དཀྲུག་ནས་བོད་ཀྱི་ནང་བསྟན་གྱི་བླ་སྤྲུལ་ཡང་སྲིད་ལ་ལག་རྩེད་བྱས་པའི་བརྒྱུད་རིམ་གཟིགས་གནང་ཡོད་པའི་སྐོར་བརྗོད་ཡོད།7

དེའི་ནང་རྒྱ་མི་ཝང་ཀྲི་ཨན་(王志安)ཟེར་བས་རིན་པོ་ཆེ་མཆོག་ལ་བཅའ་འདྲི་ཞུས་པའི་ལེ་ཚན་དེ་ཨ་ཀྱཱ་རིན་པོ་ཆེ་མཆོག་གི་རང་རྣམ་《逆风顺水》ཞེས་པའི་ནང་དེ་སྔོན་ནས་གསལ་སྟོན་གནང་ཡོད། རིན་པོ་ཆེས་ཕྱག་བྲིས་གནང་དོན་”ངས་བསམ་པར་ཁོ་རང་གིས་གསེར་བུམ་དཀྲུག་དཀྲུག་བཏང་ནས་མཐར་དེའི་ནང་གི་བྱང་བུ་ཞིག་མར་རང་འགུལ་གྱིས་ཐོན་ཡོང་གི་རེད་བསམ་བྱུང། བསམ་ཡུལ་ལས་འདས་པར་ཁོ་རང་གིས་བྱང་བུ་གསུམ་ལ་རེག་ཙམ་བྱས་ནས་དེའི་ནང་གི་བྱང་བུ་གཅིག་ལེན་རྗེས་དབུས་ཀྱི་དམིགས་གསལ་སྐུ་ཚབ་པ་ལོ་ཀན་(罗干)ལ་སྤྲད་སོང། ལོ་ཀན་གྱིས་དབུ་ལྕོག་ལྕོག་གནང་ནས་ར་སྤྲོད་བྱས་པའི་རྣམ་འགྱུར་བསྟན་སོང། སྤོ་མེས་རིན་པོ་ཆེས་བྱང་བུ་དེ་རྒྱལ་མཚན་ནོར་བུར་སྤྲད། དེ་ནས་རྒྱལ་མཚན་ནོར་བུས་སྐད་ཤུགས་ཆེན་པོས་ལྷ་རི་རྒྱལ་མཚན་ནོར་བུ་ལ་རྒྱན་ཐོབ་སོང་ཞེས་ཁྱབ་བསྒྲགས་བྱས།“8 སྐབས་དེ་དུས་ཀྱི་རྒྱ་ནག་ཆོས་ལུགས་ལྷན་ཁང་གི་འགན་འཛིན་གཡས་ཞཱོ་ཝན་(叶小文)གྱིས་ཨཱཀྱ་རིན་པོ་ཆེ་དང་འཇམ་དབྱངས་བཞད་པ་རིན་པོ་ཆེ་རྣམ་པ་གཉིས་ལ་ཞུས་པར་”ཁྱེད་གཉིས་ཀྱི་བྱང་བུ་གསུམ་གྱི་ཐོག་བྲིས་པའི་མིང་མཐོང་བྱུང་ངམ། ཁུག་མ་གསེར་པོ་གསུམ་དེ་ཡང་མཐོང་ཡོད་ཀྱི་རེད། རེད་བས། དེ་ཚོ་ཚང་མ་ཆིང་རྒྱལ་རབས་ཀྱི་ལུགས་སྲོལ་ནང་བཞིན་རེད། བྱང་བུ་གཅིག་གི་ནང་དུ་ང་ཚོས་སྲིང་བལ་ཏོག་ཙམ་བཅུག་པ་ཡིན། བརྟན་པོ་ཡོང་ཆེད་ཡིན། ཁྱེད་ཚོས་དོ་སྣང་བྱུང་སོང་ངམ། ངའི་བྱང་བུ་དེ་ཏོག་ཙམ་མཐོ་བ་ཡོད། ང་ཚོས་བྱང་བུའི་ནང་དུ་སྲིང་བལ་ཏོག་ཙམ་བཅུག་ཡོད། བྱང་བུ་དེ་བུམ་པའི་ནང་ནས་ཏོག་ཙམ་མཐོ་བ་ཡོང་ཆེད་དང་ཡང་སྤྲུལ་དངོས་དེར་རྒྱན་འཁེལ་ཆེད་ཡིན་ཟེར།“9 བྱས་ཙང་རྒྱ་གཞུང་གསེར་བུམ་དཀྲུག་པ་ཟེར་བ་ནི་ཁོ་ཚོས་ལྐོར་ཏུ་ཚུལ་མིན་བྱེད་པའི་ལག་ཆ་ཙམ་རེད།

རྒྱ་གཞུང་ནས་གོང་མའི་དབང་ཆ་ལག་རྩེད་བྱས་ནས་བོད་ཐོག་མན་ཆིང་གིས་ལུགས་སྲོལ་ཟེར་བ་བསྐྱར་ལོག་བྱས།

སྔོན་ལ་ལུང་འདྲེན་ཞུས་པའི་ནང་གཡས་ཞཱོ་ཝན་གྱིས་གསེར་བུམ་དཀྲུག་པ་ཚང་མ་ཆིང་རྒྱལ་རབས་ཀྱི་ལུགས་སྲོལ་རེད་ཟེར་བ་དང་། ད་དུང་གསེར་བུམ་དཀྲུག་ཚར་བའི་ཉིན་གཉིས་པར་ལི་ཐེ་དབྱིང་(李铁映)གིས་རྒྱལ་མཚན་ནོར་བུར་རྒྱ་བོད་ཡིག་གཉིས་བཀོད་པའི་གསེར་ཐམ་(金印)དང་གསེར་གླེགས།(金册)ད་དུང་ཅང་ཙེ་མིན་གིས་བྲིས་པའི་རྒྱལ་སྐྱོང་དམངས་ཕན་ཟེར་བའི་སྒོ་བྱང་ཆེན་པོ་ཞིག་གནང་ཡོད། བརྒྱུད་རིམ་ཆ་ཚང་བརྙན་འཕྲིན་ནང་འཁྲབ་པའི་གནའ་དུས་གོང་མའི་ཁྲི་འདོན་མཛད་སྒོ་བཞིན། དེ་ནི་མན་ཇུ་གོང་མའི་ལུགས་སྲོལ་ནང་བཞིན་ཡིན་ཟེར། ང་ཚོ་བོད་ཀྱི་ནང་བསྟན་དང་མན་ཇུ་གོང་མའི་དབར་གྱི་དངོས་ཡོད་མཆོད་ཡོན་འབྲེལ་བ་གང་འདྲ་ཡིན་མིན་མི་གླེང་བར། མན་ཇུ་བཙན་རྒྱལ་མགོ་རྟིང་སློག་ནས་ཀྲུང་གོ་གསར་པ་ཟེར་བས་བཀས་བཀོད་རྒྱུད་འཛིན་གྱི་ཁ་གཅོད་(封建盖子) ལམ་ལུགས་དེ་གཏོར་ཚར་ཟེར། འོན་ཀྱང་བོད་ཐོག་མན་ཇུའི་ལུགས་སྲོལ་ཟེར་བ་བསྐྱར་ལོག་བྱས། དེ་འདྲའི་ཁ་ཞེ་མི་མཚུངས་པ་དངོས་གནས་བསྟན་བཤིག་ཚ་པོ།

བོད་མིའི་ངག་རྒྱུན་ནང་མཇལ་ཁ་ཞུས་པ་ཟེར་བའི་མིང་ཚིག་དེ་དད་པ་བྱེད་སའི་ཡུལ་བླ་མ་སྐྱེས་ཆེན་དམ་པའི་ཐོག་བེད་སྤྱོད་བྱེད་ཀྱི་ཡོད། འོན་ཀྱང་ཞི་ཅིན་ཕིང་ནས་༸པཎ་ཆེན་ཨ་ཏི་ནི་ཆོས་ཀྱི་རྒྱལ་པོའི་མཇལ་ཞུ་ལ་དང་ལེན་གནང་ཡོད་ཟེར་བ་དེས་རྒྱ་གཞུང་གིས་ཆབ་སྲིད་ཀྱི་བརྡ་ཞིག་བཏང་ཡོད་པ་ནི་རྒྱ་ནག་གིས་དཔོན་པོ་བོད་ཀྱི་ནང་བསྟན་གྱི་མགོ་ཐོག་ཏུ་སྡོད་ཐབས་བྱས་ཡོད་པ་སྟེ། མཐོ་ས་གོང་མའི་དབང་ཆས་དམའ་ས་ཆོས་ལུགས་ལ་ཚོད་འཛིན་དང་ཁ་ལོ་སྒྱུར་གྱི་ཡོད་པ་གསལ་ཆེད་རེད། དམའ་ས་ཆོས་ལུགས་ནས་ཅི་གསུང་བཀའ་སྒྲུབ་བྱེད་དགོས། དེ་ཡང་མི་ཚོས་ཞི་ཅིན་ཕིན་ལ་གོང་མ་ཞི་ཞེས་ཟུར་ཟ་བྱས་པ་དང་མ་གྲོས་གཅིག་མཐུན་ཆགས་འདུག

ཞི་ཅིན་ཕིང་ནས་པཎ་ཆེན་གྱི་མཇལ་ཞུ་ལ་དང་ལེན་གནང་ཟེར་བ་དོན་དངོས་ཐོག་༸གོང་ས་མཆོག་ལ་དབང་ཤུགས་ངོམས་པ་ཙམ་རེད།

འོ་ན་ཅིའི་ཕྱིར་ཞི་ཅིན་ཕིང་གིས་ལོ་ངོ་བཅུ་ཙམ་རྗེས་སུ་གློ་བུར་དུ་རྒྱ་གཞུང་གིས་༸པཎ་ཆེན་རྒྱལ་མཚན་ནོར་བུའི་མཇལ་ཞུ་ལ་དང་ལེན་བྱས་ཡོད་དམ། ཕྱི་ཟླ་ ༧ ཚེས་ ༦ ཉིན་ནི་༸གོང་ས་༸རྒྱལ་བ་རིན་པོ་ཆེ་སྐུ་ཕྲེང་བཅུ་བཞི་པ་ཆེན་པོ་མཆོག་ཕྱི་ལུགས་ཀྱི་དགུང་ལོ་དགུ་བཅུ་ཕེབས་པའི་གོ་སྟོན་སྲུང་བརྩི་ཞུ་གི་ཡོད། དེ་ནི་བོད་མིའི་སྤྱི་ཚོགས་དང་བོད་དོན་རྒྱབ་བསྐྱོར་བ། བོད་ཀྱི་ནང་བསྟན་གྱི་རྗེས་འབྲང་པ། ༸གོང་ས་མཆོག་ལ་དགའ་མོས་གནང་མཁན་ཚང་མའི་ཁྱད་འཕགས་ཅན་གྱི་དུས་ཚིགས་ཤིག་ཡིན་པ་མ་ཟད། ༸རྒྱལ་བའི་སྐུའི་ཡང་སྲིད་ཕེབས་ཕྱོགས་ཀྱི་གནད་དོན་ཡང་འཛམ་བུ་གླིང་ཚང་མས་སེམས་ཁུར་ཆེ་ཤོས་བྱེད་སའི་གནད་དོན་ཞིག་ཆགས་ཡོད། གང་ཡིན་ཟེར་ན། ཕྱི་ལོ་ ༢༠༡༡ ལོའི་ཟླ་༩ པའི་ཆོས་ལུགས་ཚོགས་ཆེན་ཐེངས་བཅུ་གཅིག་པའི་སྟེང་༸གོང་ས་མཆོག་ནས་བཀའ་ཡིག་ཕེབས་ནས་འབྱུང་འགྱུར་༸ཏཱ་ལའི་བླ་མའི་སྐུ་ཕྲེང་རྒྱུན་མཐུན་མིན་”ངོས་རང་རྗེ་དགེ་འདུན་གྲུབ་ཀྱི་དགུང་གྲངས་ཙམ་དུ་སོན་སྐབས་ཆོས་ལུགས་ཆོས་བརྒྱུད་བླ་ཆེན་ཁག་དང་། བོད་མིས་མཚོན། འབྲེལ་ཡོད་དད་ལྡན་མང་ཚོགས་ལ་གོ་བསྡུར་གྱིས་༸རྒྱལ་དབང་སྐུ་ཕྲེང་རྒྱུན་མཐུད་དགོས་མིན་བསྐྱར་ཞིབ་དང་ཐག་གཅོད་བྱེད་འཆར་ཡིན།”ཞེས་གསལ་བསྒྲགས་བསྐྱངས་ཡོད།

ད་ལོ་ནི་༸སྐུ་མདུན་དགུང་གྲངས་༩༠ ཕེབས་པ་དང་། ཕྱི་ཟླ་ ༧ ཚེས་ ༢ ནས་ཆོས་ལུགས་ཚོགས་ཆེན་ཐེངས་བཅོ་ལྔ་པ་འཚོགས་ཡོད། བྱས་ཙང་ཞི་ཅིན་ཕིང་ནས་དུས་ཚོད་འདི་འདྲ་གལ་ཆེན་གྱི་སྐབས་སུ་རྒྱ་གཞུང་གི་༸པཎ་ཆེན་རྒྱལ་མཚན་ནོར་བུའི་མཇལ་ཞུ་ལ་དང་ལེན་གནང་ཡོད་ཟེར་བ་དེས་མདུང་རྩེ་གཏད་ས་ནི༸གོང་ས་མཆོག་ཡིན་པ་མངོན་གསལ་དོད་པོ་རེད། ཚང་མའི་རེ་བ་བཞིན་༸གོང་ས་མཆོག་ནས་ཀྱང་གོ་སྟོན་དང་བསྟུན་༸ཏཱ་ལའི་བླ་མའི་སྐུ་ཕྲེང་རྒྱུན་མཐུན་གནང་རྒྱུ་དང་༸སྐུ་ཕྲེང་བཅོ་ལྔ་པ་རང་དབང་ཅན་གྱི་རྒྱལ་ཁབ་ནང་འཁྲུངས་ཀྱི་ཡོད་པའི་བཀའ་ཕེབས་སོང་། བོད་མིའི་ཆོས་ཚོགས་ཐེངས་བཅོ་ལྔ་པར་ཚོགས་ཞུགས་ཆོས་ལུགས་ཆོས་བརྒྱུད་རིས་མེད་ཀྱི་དབུ་ཁྲིད་བླ་ཆེན་རྣམ་པ་དང་། སྐུ་ཚབ། ཚོགས་བཅར་བ་བཅས་སྤྱི་མགྲིན་ནས་ཐུགས་རྗེ་བཀའ་དྲིན་བླ་ལྷག་ཏུ་ཆེ་ཞུས་བ་དང་སྦྲགས། ཆོས་ཚོགས་སུ་གཤམ་གསལ་དོན་གནད་ཁག་ལ་སྤྱི་མོས་བྱུང་བ་སྟེ།“སྐུ་ཕྲེང་རྒྱུན་མཐུད་ཇི་ལྟར་བྱ་རྒྱུ་བོད་བརྒྱུད་ནང་བསྟན་གྱི་ཆོས་ཕྱོགས་ཀྱི་བྱེད་སྒོ་ཞིག་ཡིན་སྟབས། རྒྱ་ནག་དམར་གཞུང་གིས་ཆབ་སྲིད་དགོས་མཁོ་ཁོ་ནར་དམིགས་ནས་༸རྒྱལ་བའི་སྐུ་ཕྲེང་རིམ་བྱོན་ཕེབས་ཕྱོགས་ཐད་ཇུས་ངན་སྣ་ཚོགས་གཤོམ་སྒྲོགས་བྱས་དང་བྱེད་བཞིན་པར་དགག་པ་མཐའ་གཅིག་ཏུ་བྱ་རྒྱུ་མ་ཟད། དུས་ནམ་ཡང་ངོས་ལེན་བྱེད་ཐབས་མེད།”ཅེས་ནན་བརྗོད་གནང་འདུག 10

རྒྱ་གཞུང་གིས་རྒྱལ་མཚན་ནོར་བུ་བེད་སྤྱོད་ནས་༸རྒྱལ་བའི་ཡང་སྲིད་རྫུན་མ་བཟོ་རྩིས་བྱེད་ཀྱི་ཡོད།

རྒྱ་ནག་གི་དམག་མིས་བོད་ཡུལ་བཙན་འཛུལ་བྱས་པ་ནས་བཟུང་། རྒྱ་གཞུང་གིས་ཐབས་བརྒྱ་ཇུས་སྟོང་གིས་བོད་དང་བོད་མི་ཁ་འཐོར་གྱི་ལས་གཞི་མང་པོ་ཞིག་སྤེལ་ཡོད། དེའི་ནང་༸པཎ་ཆེན་རིན་པོ་ཆེ་བེད་སྤྱོད་བྱས་སྟེ་༸རྒྱལ་བ རིན་པོ་ཆེར་ཚོད་འཛིན་བྱེད་པའི་དམིགས་ཡུལ་སྒྲུབ་ཐབས་དང་།11 སྐུའི་གཅེན་པོ་དམ་པ་རྒྱལ་ལོ་དོན་གྲུབ་མཆོག་གི་རང་རྣམ་ཀ་ལིམ་པོང་གི་ཐུག་པ་ལས་བཟོ་བ་《噶伦堡的制面师》ཞེས་པའི་ནང་”རྒྱ་གཞུང་གི་བྱེད་སྟངས་འདི་ནི་༸པན་ཆེན་རིན་པོ་ཆེའི་གནས་བབ་མཐོ་རུ་བཏང་ནས་ཁོང་དང་༸ཏཱ་ལའི་བླ་མ་གཉིས་འདྲ་མཉམ་བཟོས་ཏེ་ཁོང་གཉིས་དབར་འགྲན་རྩོད་བཟོ་ཐབས་བྱེད་ཀྱི་ཡོད་ཟེར།“12 དེང་སྐབས་རྒྱ་ནག་ནང་༸ཏཱ་ལའི་བླ་མ་དང་༸པཎ་ཆེན་བླ་མ་གཉིས་ལས་སུ་ཡི་གོ་གནས་མཐོ་བ་ཡོད་དམ། དོན་དངོས་ཐོག་དབང་འཛིན་པ་སུ་རེད་དམ། （“达赖” 和 “班禅” 到底哪个地位更高，谁才是真正的掌权者？) ཞེས་པ་སོགས་ཀྱི་རྩོམ་ཡིག་མང་པོ་ཞིག་སྤེལ་ཏེ་ཁོང་རྣམ་གཉིས་ཀྱི་མཚན་གནས་ལ་འཁྱོག་བཤད་བྱེད་ཀྱི་འདུག རྩོམ་ཡིག་དེ་ཚོའི་ནང་༸པཎ་ཆེན་དང་༸ཏཱ་ལའི་བླ་མ་གཉིས་གདན་ཐོབ་གཅིག་མཚུངས་རེད། ༸པཎ་ཆེན་རིན་པོ་ཆེ་ཏཱ་ལའི་བླ་མ་དང་བསྡུར་ན་ཅུང་ཙམ་ལྷག་པ་ཡོད། ༸པཎ་ཆེན་དང་ཏཱ་ལའི་བླ་མ་གཉིས་ཀྱི་གནས་བབ་ཐོག་སྟོབས་ཤུགས་འདྲ་མཚུངས་རེད་ཟེར་བའི་ནང་དོན་རྐྱང་རྐྱ་བཀོད་འདུག 13 དོན་དངོས་ཐོག་རྒྱ་གཞུང་གིས་སྔ་ས་ནས་བོད་ཀྱི་གཞུང་ས་དགའ་ལྡན་ཕོ་བྲང་གི་ཆོས་སྲིད་གཉིས་ཀྱི་དབུ་འཁྲིད་ཡང་ན་བདག་པོ་དེ་༸རྒྱལ་བ་རིམ་བྱོན་ཡིན་པའི་དངོས་ཡོད་ཀྱི་གནས་སྟངས་དེ་ཧ་ཅང་གི་གསལ་པོ་ཤེས་ཀྱི་ཡོད། བྱས་ཙང་ཧཱ་ལུང་(贺龙)གིས་སྙན་ཐོའི་ནང་བྲིས་པར་”༸ཏཱ་ལའི་བླ་མ་ནི་སྲིད་གཞུང་གི་འགོ་འཁྲིད་མཐོ་ཤོས་རེད། ༸པཎ་ཆེན་གྱི་དགོན་པ་ཁ་ཤས་བདག་པོ་སྐྱོན་གྱི་ཡོད། འོན་ཀྱང་ཆོས་ལུགས་ཐད་ཤུགས་རྐྱེན་གཅིག་པ་ཡོད། ཁོང་གི་སྲིད་དབང་༸ཏཱ་ལའི་དབུ་ཁྲིད་འོག་རེད་ཟེར།”14

༸རྒྱལ་བ་རིན་པོ་ཆེ་ནི་བོད་ཀྱི་གཞུང་ས་དགའ་ལྡན་ཕོ་བྲང་གི་ཆོས་སྲིད་གཉིས་ཀྱི་དབུ་འཁྲིད་ཡང་ན་བདག་པོ་ཡིན་པས་༸པཎ་ཆེན་རིན་པོ་ཆེ་ནས་ཁོང་དང་བསྡུར་ཐབས་མེད། དེ་ནི་བདེན་པ་རེད། འོན་ཀྱང་རྒྱ་ནག་གཞུང་གིས་ཆབ་སྲིད་དགོས་མཁོའི་ཆེད་ཆབ་སྲིད་ཀྱི་སྐུ་དབང་སྦས་ཐབས་དང་རྒྱལ་མཚན་ནོར་བུའི་གནས་བབ་མཐོ་རུ་གཏོང་ཐབས། དེ་ནས་༸སྐུའི་ཤུགས་རྐྱེན་གནོན་ཐབས་ཡང་ན་འགེབ་ཐབས་བྱེད་བཞིན་ཡོད། ༸ཏཱ་ལའི་བླ་མ་དང་༸པཎ་ཆེན་བླ་མ་གཉིས་དགེ་ལུགས་པའི་ཆོས་བརྒྱུད་ཀྱི་ཡང་སྲིད་ཁོངས་གཏོགས་ཀྱི་གལ་ཆེ་ཤོས་གྲས་ཡིན། ཆོས་ཕྱོགས་ཀྱི་དད་སེམས་ཕར་བཞག་ནས་འཇིག་རྟེན་ལུགས་ཀྱི་ཕྱོགས་ནས་བཤད་ན། ༸པཎ་ཆེན་བླ་མའི་ཡང་སྤྲུལ་ལམ་ལུགས་ནི་༸ཏཱ་ལའི་བླ་མའི་ཡང་སྲིད་ལམ་ལུགས་ལས་ཕྱིས་མཆེད་པ་ཞིག་རེད། གལ་སྲིད་༸ཏཱ་ལའི་བླ་མས་བོད་ཀྱི་ཆོས་སྲིད་གཉིས་ཀྱི་དབུ་འཁྲིད་གནང་མེད་ཚེ་༸པཎ་ཆེན་བླ་མའི་ཡང་སྲིད་ལམ་ལུགས་གང་ཡང་བྱུང་མེད། ད་ཐེངས་རྒྱ་ནག་གི་གཞུང་འབྲེལ་གསར་ཁང་ཁག་ཏུ་བཀོད་པར་ཞི་ཅིན་ཕིང་ནས་རྒྱལ་མཚན་ནོར་བུའི་མཇལ་ཞུ་ལ་དང་ལེན་གནང་ཡོད་ཟེར། གཅིག་ནས་རྒྱལ་མཚན་ནོར་བུ་གལ་ཆེན་ཡིན་པ་མངོན་ཆེད་དང་ཁོའི་གནས་བབ་མཐོ་རུ་གཏོང་ཆེད་ཡིན། གཉིས་ནས་རྒྱ་ནག་གུང་ཁྲན་ཏང་ཡང་ན་འགོ་ཁྲིད་བོད་ཀྱི་ནང་བསྟན་ལས་མཐོ་བ་ཡོད་པ་དང་། དེང་སྐབས་རྒྱ་ནག་ནང་བོད་ཀྱི་ནང་བསྟན་གྱི་བླ་མ་མཐོ་ཤོས་ཡིན་ཟེར་བའི་རྒྱལ་མཚན་ནོར་བུར་ཚུར་མཇལ་ཁ་སྤྲད་པའི་དབང་ཤུགས་མཚོན་ཆེད་རེད།

འོ་ན་རྒྱ་གཞུང་གིས་བཤད་པ་བཞིན་༸པཎ་ཆེན་ཟེར་བའི་རྒྱལ་མཚན་ནོར་བུ་དང་༸རྒྱལ་བ་རིན་པོ་ཆེ་གཉིས་འདྲ་མཉམ་གྱི་གནས་བབ། ཡང་ན་རྒྱལ་མཚན་ནོར་བུ་༸རྒྱལ་བ་རིན་པོ་ཆེ་ལས་དབང་ཚད་ཆེ་བ་ཡོད་ཚུལ་སྒྲུབ་ཀྱི་ཡོད་ན། ༸རྒྱལ་བ་རིན་པོ་ཆེ་དང་ཞི་ཅིན་ཕིང་གཉིས་ཐུག་འཕྲད་བྱེད་པའི་དུས་ཤིག་བྱུང་ཚེ་རིན་པོ་ཆེ་མཆོག་གིས་ཕར་ཞི་ཅིང་ཕིན་ལ་མཇལ་ཁ་ཞུ་དགོས་སམ། རྒྱ་གཞུང་གིས་བྱེད་སྟངས་འདི་ནི་ཞི་ཅིན་ཕིང་བོད་ཀྱི་ནང་བསྟན་གྱི་དབུ་བླ་༸རྒྱལ་བ་རིན་པོ་ཆེ་ལས་གོ་གནས་མཐོ་བ་ཡོད་པ་དང་རྒྱ་ནག་གིས་དཔོན་པོ་བོད་ཀྱི་ནང་བསྟན་གྱི་མགོ་ཐོག་ཏུ་སྡོད་པ། ད་དུང་རྒྱ་གཞུང་གིས་རྒྱལ་མཚན་ནོར་བུ་བེད་སྤྱོད་བྱས་ཏེ་༸རྒྱལ་བའི་ཡང་སྲིད་ཐོག་ཐེ་ཇུས་བྱེད་མི་སྲིད་དམ། རྒྱ་གཞུང་གིས་མངོན་གསལ་དོད་པོས་བཤད་མེད་ཀྱང་ཁོ་ཚོའི་དངོས་ཡོད་བསམ་ཚུལ་དེ་འདྲ་ཞིག་རེད།

རྒྱལ་མཚན་ནོར་བུ་ནི་རྒྱ་ནག་གཞུང་གིས་དབང་ཤུགས་ཀྱིས་བདམས་པའི་པཎ་ཆེན་རྫུན་མ་རེད། ཁོ་ནི་རྒྱ་གཞུང་གིས་༸རྒྱལ་བ་རིན་པོ་ཆེར་ཚོད་འཛིན་དང་བོད་མིར་རྒྱ་གཞུང་གི་བལྟ་བ་སྤེལ་མཁན་བོད་མིའི་ཀླད་པ་བཀྲུ་བྱེད་ཀྱི་ཆབ་སྲིད་ལག་ཆ་ཙམ་རེད། རྒྱ་གཞུང་གིས་ལངས་ཕྱོགས་མངོན་སྟོན་བྱེད་པར་རྒྱ་མཚན་ནོར་བུ་བེད་སྤྱོད་བྱས་ནས་༸རྒྱལ་བའི་ཡང་སྲིད་ཐོག་ཐེ་ཇུས་བྱ་རྒྱུ་དེ་རེད། རྒྱ་གཞུང་གིས་གསེར་བུམ་དཀྲུག་པ་དང་བོད་བརྒྱུད་ནང་བསྟན་བླ་སྤྲུལ་གྱི་ཡང་སྲིད་ངོས་འཛིན་དོ་དམ་བྱ་ཐབས་ཟེར་བ་བེད་སྤྱོད་ནས། རྒྱལ་མཚན་ནོར་བུའི་ལག་པ་བརྒྱུད་ནས་རྒྱ་ནག་ནང་༸རྒྱལ་བའི་སྐུའི་ཡང་སྲིད་ཟེར་བ་ཞིག་གདམ་སྲིད། རྒྱ་གཞུང་གིས་རྩིས་དེ་འདྲ་ཞིག་རྒྱབ་བཞིན་ཡོད་པ་རེད།

ཟུར་ལྟའི་དཔྱད་གཞིའི་ཡིག་ཆ་ཁག

1 習近平接受班禪額爾德尼·確吉傑佈拜見

http://www.news.cn/politics/leaders/20250606/bf06d53043f2444bb1d995b0db5e38fc/c.html

2 已經進京見過毛澤東達賴爲何還要叛逃?

https://m.huanqiu.com/article/9CaKrnJlFLs

3第十一世班禪額爾德尼·確吉傑佈十年大事記

http://www.tibet.cn/cn/cloud/xszqkk/zgxz/2006/1/201712/t20171219_5276096.html

4 習近平在西藏考察時強調全麵貫徹新時代黨的治藏方略譜冩雪域高原長治久安和高質量髮展新篇章

http://www.xinhuanet.com/politics/leaders/2021-07/23/c_1127687414.htm

5 習近平在西藏考察時強調全麵貫徹新時代黨的治藏方略譜冩雪域高原長治久安和高質量髮展新篇章

http://www.xinhuanet.com/politics/leaders/2021-07/23/c_1127687414.htm

6解密時刻：尋找班禪喇嘛轉世靈童