བོད་ཀྱི་ཁོར་ཡུག་སྲུང་སྐྱོབ་པ་མཚོ་སྔོན་ཚེ་རིང་ལགས་ཀློད་གྲོལ་བཏང་།

བོད་ཀྱི་ཁོར་ཡུག་སྲུང་སྐྱོབ་པ་མཚོ་སྔོན་ཚེ་རིང་ལགས་ཀྱི་བཙོན་འཇུག་དུས་ཡུན་ཟླ་བརྒྱད་མ་ཚང་གོང་ནས་ཀློད་གློལ་བཏང་ཡོད་ཀྱང་། ཁོང་གི་འགྲོ་འདུག་གི་རང་དབང་ལ་ད་དུང་ཡང་དམ་དྲག་བྱེད་བཞིན་ཡོད་འདུག

དེ་རིང་འདི་གའི་གསར་འགོད་པར་ཁུངས་ལྡན་གནས་ཚུལ་འབྱོར་བ་ལྟར་ན། ཟླ་འདིའི་ཕྱི་ཚེས་ ༨ ཉིན་བོད་རྔ་བ་ཁུལ་ཁྱུང་མཆུ་རྫོང་ཚ་རུ་མ་སྡེ་བའི་ཡུལ་མི་གཞོན་སྐྱེས་མཚོ་སྔོན་ཚེ་རིང་ལགས་ཀྱི་བཙོན་འཇུག་དུས་ཡུན་མ་ཚང་གོང་ནས་ཀློད་གྲོལ་བཏང་ཡོད་ཀྱང་། ད་ལྟ་ཁོང་གི་འགྲོ་འདུག་གི་རང་དབང་ལ་དམ་དྲག་ཡོད་ཅིང་། དམིགས་བསལ་གྱི་མི་མང་འདུ་འཛོམས་དང་སྤྱིར་བཏང་གི་འདུ་འཛོམས་གཉེན་སྟོན་སོགས་སུའང་མཉམ་ཞུགས་བྱེད་མི་ཆོག་པར་བཟོས་ཡོད་འདུག

གནས་ཚུལ་མཁོ་སྤྲོད་པས་བརྗོད་པ་ལྟར་ན། ཟླ་འདིའི་ཕྱི་ཚེས་ ༨ ཉིན་མཚོ་སྔོན་ཚེ་རིང་ལགས་ཀློད་གྲོལ་བཏང་བ་དང་ཚ་རུ་མ་སྡེ་བའི་ཡུལ་མི་ཚོས་མཚོ་སྔོན་ཚེ་རིང་ལགས་སུ་བསུ་བའི་ཚུལ་དུ་འཛོམས་ཏེ་དགའ་སྟོན་ཞིག་བྱས་ཡོད་ཀྱང་། ཕྱིས་སུ་ས་གནས་ཉེན་རྟོག་པ་ཡོང་ནས་འདུ་འཛོམས་བྱེད་མི་ཆོག་སྐོར་བཤད་ཡོད་པ་མ་ཟད། མཚོ་སྔོན་ཚེ་རིང་འདུ་འཛོམས་ནང་ཞུགས་མི་ཆོག་སྐོར་བསྐྱར་དུ་གླེང་ཡོད་འདུག

འདི་གའི་གསར་ཁང་ལ་འབྱོར་བའི་གནས་ཚུལ་ལྟར་ན། འདས་ལོའི་ཕྱི་ཟླ་ ༡༠ ཚེས་ ༢༧ ཉིན་བོད་རྔ་བ་ཁུལ་ཁྱུང་མཆུ་རྫོང་ཁྲིམས་ཁང་གིས་བོད་ཀྱི་ཁོར་ཡུག་སྲུང་སྐྱོབ་པ་ན་གཞོན་མཚོ་སྔོན་ཚེ་རིང་ལགས་སུ། སྒེར་གྱི་འཁོན་སེམས་འཁུར་ཏེ་སྤྱི་ཚོགས་ལ་རྙོག་ཟིང་བསླངས་བའི་ཉེས་མིང་འོག་ཟླ་བརྒྱད་ཀྱི་བཙོན་འཇུག་ཁྲིམས་ཐག་བཅད་ཡོད་ཀྱང་། མཚོ་སྔོན་ཚེ་རིང་ལགས་ཀྱིས་ནག་ཉེས་ངོས་ལེན་བྱས་མེད་པ་རེད་འདུག

འདས་ལོའི་ཕྱི་ཟླ་ ༡༠ ཚེས་ ༢༢ ཉིན་ཁྱུང་མཆུ་རྫོང་ཉེན་རྟོག་པས། མཚོ་སྔོན་ཚེ་རིང་ཚུད་པའི་ཚ་རུ་མ་སྡེ་བའི་ཡུལ་མི་འགའ་རྫོང་ཐོག་ཏུ་འབོད་འགུག་གིས་འདྲི་རྩད་བྱས་རྗེས། ཁོང་ཚོ་ཚང་མ་ཕྱིར་ཀློག་གྲོལ་བཏང་ཡོད་ཀྱང་། སྐབས་དེར་མཚོ་སྔོན་ཚེ་རིང་ལགས་ཀྱི་འཛིན་བཟུང་བཀག་ཉར་འོག་བཅུག་ཡོད་པ་མ་ཟད། སྐབས་དེར་ཁོང་གི་སྤྱི་ཚོགས་བརྒྱུད་ལམ་མགྱོགས་འཕྲིན་ (Kuaishou) དང་དེའི་སྟེང་དུ་སྤེལ་བའི་ཞུ་གཏུག་གི་བརྙན་དང་སྐད་འཕྲིན་སོགས་བཀག་སྡོམ་བྱས་ཏེ་མཐོང་རྒྱུ་མེད་པར་བཟོས་ཡོད།

འདས་ལོའི་ཕྱི་ཟླ་ ༡༠ ཚེས་ ༡༥ ཉིན་མཚོ་སྔོན་ཚེ་རིང་ལགས་ཀྱིས། རང་ཉིད་ཀྱི་མགྱོགས་འཕྲིན་ (Kuaishou) སྟེང་སྐར་མ་ལྔ་མ་ཟིན་ཙམ་གྱི་གཏུག་བཤེར་བརྙན་ཞིག་སྤེལ་ཏེ། ཕྱི་ལོམ་ ༢༠༢༣  ཟླ་ ༥ ནས་བཟུང་ཨན་ཧྭི་འཛུགས་སྐྲུན་ཚད་ཡོད་སྤྱི་གཉེར་ཁང་ (安徽先河建筑工程又很公司) གིས། སི་ཁྲོན་ཞིང་ཆེན་རྔ་བ་ཁུལ་ཁྱུང་མཆུ་རྫོང་གི་ཚ་རུ་མ་སྡེ་བའི་གཞུང་ལམ་གསར་བཟོའི་སྐབས་སུ། ཁྲིམས་འགལ་གྱིས་ལམ་འགྲམ་རྡང་ཆུ་གཙང་པོའི་ཆུ་གཞུང་སྔོག་འདོན་བྱས་ཏེ་རྡོ་བྱེ་དབོར་འདྲེན་བྱས་ཡོད་སྟབས། དེས་གཙང་བོ་དང་ཡུལ་དངོས་སྐྱེ་ཁམས་ཁོར་ཡུག་ལ་གནོད་སྐྱོན་ཚབས་ཆེན་ཐེབས་ཡོད་པ་མ་ཟད། ས་གནས་མི་མང་དང་སྒོ་ཕྱུགས་སེམས་ཅན་སོགས་ཀྱི་འཚོ་གནས་ལའང་ཉེན་ཁ་ཆེན་པོ་བཟོ་ཡི་ཡོད་པ་སོགས་གླེང་སློང་ཁ་གསལ་བྱས་ཡོད།

ཚ་རུ་མ་ཡུལ་ཚོའི་བོད་མི་ཚོས་ས་གནས་སུ་གནོད་སྐྱོན་ཐེབས་པའི་འདྲ་པར་དང་། གློག་བརྙན་སོགས་མཁོ་སྤྲོད་བྱས་པའི་ཐོག་ནས་ཚ་རུ་མའི་སྲིད་གཞུང་དང་། ཁྱུང་མཆུ་རྫོང་སྒྲིག་ཁྲིམས་ལྷན་ཁང་། ཁྱུང་མཆུ་རྫོང་གི་སྐྱེ་ཁམས་ཁོར་ཁུག་ལྷན་ཁང་། ཁྱུང་མཆུ་རྫོང་གི་ཆུ་དོན་ལྷན་ཁང་། རྔ་བ་ཁུལ་གྱི་ཆུ་དོན་ལྷན་ཁང་། རྔ་བ་ཁུལ་གྱི་སྐྱེ་ཁམས་ཁོར་ཡུག་དང་འབྲེལ་ཡོད་ཀྱི་ལྷན་ཁང་སོགས་ལ་གཏུག་བཤེར་བྱས་ཡོད་ཀྱང་། འབྲེལ་ཡོད་ལས་ཁུངས་གཅིག་གིས་ཀྱང་ལན་འདེབས་བྱས་མེད་པ་རེད་ལ། ཕྱི་ལོ་ ༢༠༢༣ ཟླ་  ༩ ནང་ཚ་རུ་མའི་ཡུལ་མི་ཚོས་ཨན་ཧྭི་འཛུགས་སྐྲུན་ཚད་ཡོད་སྤྱི་གཉེར་ཁང་ཐོག་མར་གཏུག་བཤེར་བྱས་ཤིང་། སྐབས་དེར་ཁྱུང་མཆུ་རྫོང་སྐྱེ་ཁམས་ཁོར་ཡུག་ལྷན་ཁང་གིས་གནོད་སྐྱོན་ཐེབས་ཡུལ་དུ་བརྟག་དཔྱད་བྱས་ཡོད་ཀྱང་། བརྟག་དཔྱད་དང་ཐག་གཅོད་བྱས་པའི་མཇུག་འབྲས་སོགས་གང་ཡང་བསྒྲགས་མེད་པ་རེད།  ཕྱི་ལོ་ ༢༠༢༣ ལོའི་ཟླ་ ༡༠ ནས་ ༡༢ བར་ཚ་རུ་མའི་བོད་མི་ཚོས་རྔ་བ་ཁུལ་ཆུ་དོན་ལས་ཁུངས་ལ་ཐག་གཅོད་མཇུག་འབྲས་སྐོར་ནས་གསལ་བཤད་ལན་འདེབས་ཡོང་བའི་ཞུ་སྐུལ་བྱས་ཀྱང་མཇུག་འབྲས་བརྡ་ལན་གང་ཡང་བྱུང་མེད་པ་རེད།

འདི་གའི་གསར་འགོད་པས་རྒྱུས་ལོན་བྱས་པ་ལྟར་ན། ཚ་རུ་མ་སྡེ་བའི་རྡོ་བྱེ་སྔོག་འདོན་བྱས་པའི་གནད་དོན་དེ་ནི། རྔ་བ་ཁུལ་དང་གཞུང་རིམ་པའི་འཛུགས་སྐྲུན་ལས་འཆར་ཁྲོད་ནས་བྱུང་བ་ཞིག་ཡིན་པས། ཨན་ཧྭི་འཛུགས་སྐྲུན་ཚད་ཡོད་སྤྱི་གཉེར་ཁང་གིས་ཁྲིམས་འགལ་ཐོག་ཚ་རུ་མའི་རྡོ་བྱེ་སྔོག་འདོན་བྱས་པ་བདེན་ནའང་། ཚ་རུ་མ་ཡུལ་མིའི་གཏུག་བཤེར་ལ་གྲུབ་འབྲས་ཐོན་ཁག་པོ་ཆགས་ཡོད་པ་མ་ཟད། ཨན་ཧྭི་འཛུགས་སྐྲུན་ཚད་ཡོད་སྤྱི་གཉེར་ཁང་གིས་ས་ཁུལ་དེར་རྡོ་བྱེ་ཙམ་མིན་པའི་གཏེར་ཁ་གཞན་ཞིག་སྔོག་འདོན་བྱེད་བཞིན་ཡོད་པར་དོགས་གཞི་བྱས་ཡོད།

མཚོ་སྔོན་ཚེ་རིང་ལགས་ནི་ད་ལྟ་རང་ལོ་ ༣༠ ཡིན་ཞིང་། ཕ་ཕུར་ཁོ་དང་མ་དབང་སྒྲོན་གཉིས་ཀྱི་བུ་གཅིག་པུ་དེ་ཡིན་ལ། ཕ་ཕུར་ཁོ་ནི་ལོ་ ༦༠ ཡས་མས་ཙམ་དང་མ་དབང་སྒྲོན་ནི་ལོ་ལྔ་བཅུའི་ནང་ཙམ་ཡིན།  མཚོ་སྔོན་ཚེ་རིང་ནི་དུས་རྒྱུན་སྤྱི་པའི་ལས་དོན་ཐོག་འགན་འཁུར་ཆེན་པོ་ལེན་མཁན་ཞིག་ཡིན་འདུག

གསར་འགོད་པ། སྐལ་བཟང་སྦྱིན་པ།