ཟངས་དཀར་གྱི་ཚོགས་པ་གསུམ་གྱིས་བརྟན་བཞུགས་བསྟར་འབུལ་ཞུས།

༧གོང་ས་མཆོག་ནས་ངོས་ཀྱིས་ཆོས་རབ་ཏུ་རྣམ་འབྱེད་ཀྱི་ཤེས་རབ་དེ་བླ་མ་གོང་མ་རྣམ་དང་བསྡུར་ན་ཚན་རིག་དང་མཐུན་པའི་རྣམ་དཔྱོད་ཐོག་ནས་འགྲེལ་བཤད་རྒྱག་གི་ཡོད་ཅེས་བཀའ་སློབ་བསྩལ།

དེ་རིང་ལ་དྭགས་ཟངས་དཀར་དཔའ་ལྡུམ་གྲུ་འཛིན་ཕོ་བྲང་གི་དུས་འཁོར་གསུང་ཆོས་ཐང་ཆེན་དུ། ཟངས་དཀར་ནང་ཚོགས་དང་། ཟངས་དཀར་དགོན་ཚོགས། དཀར་ཤ་དབྱར་ཆོས་གོ་སྒྲིག་ཚོགས་ཆུང་གསུམ་གྱིས་༧གོང་ས་རྒྱལ་བ་རིན་པོ་ཆེ་མཆོག་ལ་གནས་བརྟན་ཕྱག་མཆོད་ཀྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་སོང་།

༧གོང་ས་རྒྱལ་བ་རིན་པོ་ཆེ་མཆོག་ནས། ལྷ་ལྡན་སྨོན་ལམ་ཆེན་མོའི་དཀྱིལ་འཁོར་འཁྲིས་སུ་ངོས་ཀྱིས་དམ་བཅའ་བཞག་ཡིན། དངོས་གནས་དྲང་གནས་བསྟན་པའི་ཞབས་འདེགས་གང་ཕན་ཅི་ཕན་བསྒྲུབས་ཡོད། ངོས་རང་རྒྱ་ནག་ལ་ཕྱིན་ཏེ་མའོ་ཙེ་ཏུང་དང་ངེད་གཉིས་ཧ་ཅང་འཆམ་པོ་ཡོད། མའོ་ཙེ་ཏུང་གིས་ཆོས་ཞེས་པ་དེ་དུག་རེད་ཅེས་ངོས་རང་ལ་བཤད་བྱུང་། ངོས་ཀྱི་བསམ་བློའི་ནང་མའོ་ཙེ་ཏུང་གླེན་པ་རེད་དྲན་སོང་། སྤྱིར་ཆོས་དང་ཆོས་དད་ཚང་མ་ཡག་པོ་རེད། ལྷག་པར་དུ་ང་ཚོའི་ནང་པ་སངས་རྒྱས་པའི་ཆོས་དེ་འདུལ་བ་ཟུང་འབྲེལ་རེད། དེང་སང་ཚན་རིག་པ་མང་པོ་ཞིག་གིས་ངོས་ཀྱི་འགྲམ་དུ་ཡོང་ནས་སེམས་ཁམས་རིག་པའི་སྐོར་འདྲི་མཁན་མང་པོ་ཡོང་གི་འདུག ང་ཚོའི་བོད་ལ་སེམས་ཁམས་རིག་པ་དང་འབྲེལ་བའི་ཐོག་ནས་སངས་རྒྱས་ཀྱི་ཆོས་ལ་དད་པ་བྱས་པ་རྒྱུ་མཚན་ལྡན་པ་ཞིག་དང་། བསམ་བློ་བཏང་ན་གཏོང་རྒྱུ་ཡོད་བསྡད་པ་ཞིག་རེད། རྒྱ་མིས་བཤད་པ་བཞིན་རྨོངས་དད་གང་ཡང་མ་རེད། རྒྱུ་མཚན་ལྡན་པའི་ཐོག་ནས་དད་མོས་སྐྱེ་རྒྱུ་ཡོད་པ་ཞིག་རེད། ངོས་རང་ལ་ཆ་བཞག་ན་ཆུང་ཆུང་སྐབས་ནས་དགེ་བའི་བཤེས་གཉེན་ཀྱི་སྐུ་གསུང་ཐུགས་ཀྱི་ཡོན་ཏན་སེམས་ལ་དྲན་དུས། དངོས་གནས་དྲང་གནས་སྙིང་ཁོངས་རུས་པའི་གཏིང་ནས་སྐྱབས་སུ་མཆི་བའི་བློ་ཡོང་གི་འདུག དེ་དག་ནི་གཞུང་ནས་བཤད་པའི་རྒྱུ་མཚན་ལྡན་པ་དང་རིག་པ་ལྡན་པའི་ཐོག་ནས་སོ་སོའི་བླ་མར་དད་པ་བྱས་པ་རེད། ཅེས་གསུངས་སོང་།

༧མགོན་པོ་གང་ཉིད་མཆོག་ནས། དེ་རིང་འདིར་ཆ་བཞག་ནའང་དེང་དུས་ཀྱི་སྐྱེ་བོ་མང་པོ་ཞིག་འདུ་འཛོམས་བྱས་འདུག ཁྱེད་ཚོའི་ལྷག་བསམ་རྩེ་གཅིག་གིས་ངོས་རང་ལ་དད་མོས་རྩེ་གཅིག་སྐྱེ་བ་རེད། ངོས་ལ་ཆ་བཞག་ནའང་ལོ་བརྒྱ་དང་སུམ་ཅུ་སོ་གྲངས་ཤིག་སྡོད་རྒྱུ་ཡིན། ལྷའི་ལུང་བསྟན་དང་ངོས་རང་གི་རྨི་ལམ་གྱི་མཚན་མའི་ཐོག་ནས་ཧ་ཅང་གསལ་བོ་འདུག ངོས་ཀྱིས་ད་ལྟ་བར་དུ་ཧུར་ཐག་བྱས་པ་ཡིན། བོད་སྤྱི་མཐུན་གྱི་སངས་རྒྱས་བསྟན་པ་ཙམ་མ་ཟད། འཛམ་བུ་གླིང་ཁྱོན་ཡོངས་སུ་འཚེ་བ་མེད་པ་དང་ཞི་བའི་ལམ་སྤུས་དག་པོ་ཡོང་བར་རྩེ་གཅིག་ཏུ་སྨོན་ལམ་བརྒྱབ་སྟེ་འབད་བརྩོན་བྱེད་བཞིན་ཡོད། དེ་འདྲ་བྱས་ཏེ་ད་ལྟ་བར་དུ་ཕྱིན་པ་རེད། གང་ལྟར་ཡུལ་ལྷ་གཞི་བདག་ཚོས་ཀྱང་ཧ་ཅང་དགའ་བོ་བྱས་ཡོང་གི་འདུག ཡི་ཤུ་ཆོས་སོགས་ཀྱིས་གང་ལྟར་འཇིག་རྟེན་བཀོད་པ་པོ་ཁས་བླངས་ཀྱང་མ་བླངས་རུང་། བདེ་བ་འདོད་པ་དང་སྡུག་བསྔལ་མི་འདོད་པ་གཅིག་གྱུར་རེེད། དགའ་དད་སྤྲོ་གསུམ་གྱི་ཐོག་ནས་ངོས་རང་ལ་རྒྱབ་སྐྱོར་བྱེད་བཞིན་ཡོད་པ་རེད། སྐབས་སུ་བབ་པ་དེ་རིང་གནས་འདིར་ང་ཚོ་མང་པོ་ཞིག་འཛོམས་ཏེ་སྙིང་ཁོངས་རུས་པའི་གཏིང་ནས་སྨོན་ལམ་ཡག་པོ་རྒྱོབས། སྐབས་སུ་བབ་པ་ངོས་རང་དགེ་སློང་བསྟན་འཛིན་རྒྱ་མཚོ་མུ་མཐུད་དུ་ལོ་སུམ་ཅུ་བཞི་བཅུ་ཙམ་བསྡད་དེ། ངོས་ཀྱི་མི་ཚེ་ལོ་བརྒྱ་དང་སུམ་ཅུ་སོ་གྲངས་ཤིག་ཕལ་ཆེར་བསྡད་རྒྱུ་རེད། ད་ལྟ་བར་དུ་ངོས་ཀྱིས་བསྟན་པའི་ཞབས་འདེགས་རླབས་ཆེན་པོ་བསྒྲུབས་ཡོད། ཅེས་གསུངས་སོང་།

ཡང་༧གོང་ས་མཆོག་ནས། ངོས་ཀྱིས་ཚན་རིག་པ་དང་མཉམ་དུ་གྲོགས་པོ་བསྒྲིགས་ཏེ་ཆོས་རབ་ཏུ་རྣམ་འབྱེད་ཤེས་རབ་ཀྱི་ཐོག་ནས་འགྲེལ་བཤད་རྒྱག་རྒྱུ་དེ་བླ་མ་གོང་མ་རྣམ་དང་བསྡུར་ན། ངོས་ཀྱིས་ཚན་རིག་གི་རྣམ་དཔྱོད་དང་མཐུན་པའི་ཐོག་ནས་ནང་ཆོས་ལ་འགྲེལ་བཤད་རྒྱག་གི་ཡོད། ཚན་རིག་པ་མང་པོ་ཞིག་གིས་ཧ་ཅང་དགའ་བོ་བྱེད་ཀྱི་འདུག ང་ཚོ་ཚང་མར་སྟོན་པ་བཅོམ་ལྡན་འདས་དངོས་གནས་དྲང་གནས་གཞན་དང་མི་འདྲ་བའི་བཀའ་དྲིན་ཆེན་པོ་རེད། བཅོམ་ལྡན་འདས་ཀྱིས་ཆོས་གསུངས་པ་ཀླུ་སྒྲུབ་དང་ཐོགས་མེད་སོགས་བརྒྱུད་དེ། བོད་གངས་ཅན་གྱི་ལྗོངས་སུ་དངོས་གནས་དྲང་གནས་ཀྱི་མཁས་པའི་གཙུག་རྒྱན་འགྲན་ཟླ་བྲལ་བ་མང་པོས་བསྟན་པའི་རྒྱུན་བཟུང་བ་རེད། ང་ཚོའི་མི་རབས་འདིའི་བར་དུ་སངས་རྒྱས་ཀྱི་བསྟན་པ་འདི་འཛམ་བུ་གླིང་གཞན་མི་འདྲ་བར་བདག་པོ་བརྒྱབ་འདུག ད་དུང་ཡང་ཡོངས་སུ་རྫོགས་པའི་རྒྱལ་བའི་བསྟན་པ་དེ་ཉམས་པ་སོར་ཆུད་དང་། མི་ཉམས་གོང་འཕེལ་བྱས་ཏེ་འཛམ་བུ་གླིང་གི་སྐྱེ་འགྲོ་མང་པོ་ཞིག་ལ་ཕན་ཐོགས་ཡོང་ཐུབ་པར་ཚང་མས་ཐུགས་སྨོན་གནང་རོགས། ངོས་ཀྱིས་སྨོན་ལམ་རྒྱག་གི་ཡིན། ཞེས་གསུངས་སོང་།

དེ་རིང་སྔ་དྲོ་༧གོང་ས་རྒྱལ་བ་རིན་པོ་ཆེ་མཆོག་ནས་ཟངས་དཀར་དཔའ་ལྡུམ་གྲུ་འཛིན་ཕོ་བྲང་དུ་གསར་བཞེངས་བྱས་བའི་མཆོད་རྟེན་བྱ་རུང་ཁ་ཤོར་གྱི་རྨང་རྡོ་དབུ་འབྱེད་ཀྱི་རབ་གནས་མཛད་ཡོད་འདུག མཛད་འཆར་ལྟར་ན། ཟླ་འདིའི་ཕྱི་ཚེས་ ༢༥ ཉིན་ཟངས་དཀར་དཀར་ཤ་ཕོ་བྲང་དུ། ཟངས་དཀར་ནང་པའི་ཚོགས་པ་དང་། ཟངས་དཀར་དགོན་པ་ཚོགས་པ། དེ་བཞིན་དཀར་ཤ་དབྱར་ཆོས་ཆེན་མོ་གོ་སྒྲིག་ཚོགས་ཆུང་བཅས་ནས་ཇི་ལྟར་གསོལ་བ་བཏབ་པ་ལྟར་༸གོང་ས་རྒྱལ་བ་རིན་པོ་ཆེན་པོ་ཆེ་མཆོག་ནས་རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་གྱི་ཆོས་འབྲེལ་བཀའ་དྲིན་སྩལ་རྒྱུ་ཡིན་འདུག

གསར་འགོད་པ། བྱམས་པ་ཚེ་རིང་། བློ་བཟང་སྒྲོལ་མ། རྩོམ་སྒྲིག་བྱེད་མཁན། པདྨ་མཚོ།