གོ་སྟོན་སྐབས་མཉེན་ཆས་རྫུན་མ་བཟོས་ཏེ་བཙན་བྱོལ་བོད་མིར་འཇབ་རྒོལ་བྱས་ཡོད།

འདི་ལོའི་༧སྐུའི་གོ་སྟོན་སྐབས་རྒྱ་ནག་གཞུང་གིས་ཆེད་གཉེར་ནེག་སི་སི་ཡིས་༧གོང་ས་མཆོག་གི་མཚན་ཐོག་ནས་མཉེན་ཆས་རྫུན་མ་བཟོས་ཏེ་བཙན་བྱོལ་བོད་མིའི་དྲ་གནས་ཁག་ཏུ་སིམ་འཛུལ་བྱས་ཏེ་གནས་ཚུལ་རིགས་རྐུ་འཁྱེར་བྱས་ཡོད་པའི་གནས་ཚུལ་ཐོན།

ཁ་སང་ཕྱི་ཚེས ༢༤ ཉིན་དྲ་ལམ་འཇབ་རྒོལ་སྐོར་གྱི་ཞིབ་འཇུག་གསར་འགྱུར་དྲ་བ་(The Hacker News)ཡིས་གནས་ཚུལ་སྤེལ་བ་ལྟར་ན། འདི་ལོའི་༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ལྟར་དགུང་གྲངས་དགུ་བཅུར་ཕེབས་པའི་སྐུའི་འཁྲུངས་སྐར་དང་བསྟུན། རྒྱ་ནག་ནེག་སི་སི་ (China-nexus cyber ) ཡིས་༧གོང་ས་རྒྱལ་བ་རིན་པོ་ཆ་ེམཆོག་གི་མཚན་ཐོག་ནས་མཉེན་ཆས་རྫུན་མ་བཟོས་ཏེ། བཙན་བྱོལ་བོད་མིའི་ཚོགས་སྡེ་ཁག་གི་ལས་དོན་ལ་གསང་བའི་མྱུལ་ཞིབ་བྱས་ཡོད་པའི་གནས་ཚུལ་ཐོན་འདུག

གནད་དོན་དེའི་ཐད་རྒྱ་གར་གྱི་དྲ་ལམ་བདེ་འཇགས་ཀྱི་ཆེད་མཁས་པ་དང་ཉམས་ཞིབ་པ་སུལ་གྷིབ་སིང་( Sudeep Singh) ལགས་ཀྱིས། དྲ་ལམ་ནས་གསང་བའི་འཇབ་རྒོལ་བྱེད་མཁན་དེ་དག་གིས། ནད་འབུ་ཅན་གྱི་དྲ་ཐག་བརྒྱུད་ནས་ཁྲིམས་མཐུན་གྱི་དྲ་ཚིགས་ཁག་ཏུ་སིམ་འཛུལ་བྱས་ཏེ། སིམ་འཛུལ་བྱས་ཟིན་པའི་དྲ་ལམ་ཁག་ཏུ་(Gh0st RAT) ཟེར་བ་དང་། PhantomNet (aka SManager) སོགས་ནང་འཇུག་བྱས་ཏེ། དྲ་ལམ་ནས་འཇབ་རྒོལ་དང་ཚོགས་སྒེར་ཁག་གི་ལས་དོན་ལ་གསང་ཉུལ་བྱས་ཡོད་སྐོར་སོགས་བརྗོོད་འདུག

དེ་བཞིན་གནས་ཚུལ་དེའི་ནང་གསར་དུ་ཤེས་རྟོགས་བྱུང་བའི་འཇབ་རྒོལ་ཞིག་ནི་ཉེ་ལམ་༧སྐུའི་གོ་སྟོན་སྐབས་tibetfund[.]org/90thbirthday” ཞེས་པའི་འབྲེལ་ཐག་དེ་ (“thedalailama90.niccenter[.]net”) བརྗེ་བསྒྱུར་བྱས་ནས་སིམ་འཛུལ་བྱས་ཡོད་པ་མ་ཟད། ཐོག་མའི་དྲ་ངོས་དེར་ཏཱ་ལའི་བླ་མར་འཕྲིན་ཡིག་ཕྲིས་ཞེས་པར་གསང་འཕྲིན་བསྐུར་སའི་གདམ་ཀ་ཞིག་བསྣན་ནས། གསང་བའི་ངང་ནས་༧གོང་ས་རྒྱལ་བ་རིན་པོ་ཆེ་མཆོག་དང་འབྲེལ་བའི་གནས་ཚུལ་དང་མི་སྒེར་གྱི་གནས་ཚུལ་རིགས་རྐུ་འཁྱེར་བྱས་ཡོད་པ་ཤེས་རྟོགས་བྱུང་ཡོད་འདུག་ལ། དྲ་ལམ་ནས་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་གོ་སྟོན་དང་འབྲེལ་བའི་གནས་ཚུལ་ཁག་ལ་ལོག་འགྲེལ་མང་པོ་བྱེད་ཐབས་བྱས་ཡོད་འདུག

རྒྱ་ནག་གཞུང་གིས་དུས་ནས་དུས་སུ་དབུས་བོད་མིའི་སྒྲིག་འཛུགས་དང་གཞུང་ཁོངས་མིན་པའི་ཚོགས་པ་ཁག་གི་དྲ་རྒྱ་སོགས་སུ་སིམ་འཛུལ་སོགས་བྱེད་ཐབས་ལ་འབད་ཀྱི་ཡོད་པ་ལྟར། ཕྱི་ལོ་ ༢༠༢༣ ནས་ ༢༠༢༤ ཟླ ༨ བར་རྒྱ་ནག་གཞུང་གིས་དྲ་ལམ་ནས་དབུས་བོད་མིའི་སྒྲིག་འཛུགས་ཀྱི་ཡིག་ཆ་རྐུ་ཁྱེར་བྱས་པའི་གནས་ཚུལ་ཐོན་ཡོད་པ་མ་ཟད། དེ་སྔོན་ཝ་ཚི་ཨབ་(whatapp) བརྒྱུད་ནས་དྲ་ཐག་ཅིག་འགྲེམས་སྤེལ་བྱས་པ་བརྒྱུད། དབུས་བོད་མིའི་སྒྲིག་འཛུགས་ཀྱི་དྲ་རྒྱ་དང་། དགའ་ལྡན་ཕོ་བྲང་། བོད་མི་མང་སྤྱི་འཐུས་ལྷན་ཚོགས་ཀྱི་དྲ་ལམ་སོགས་སུ་སིམ་འཛུལ་བྱས་ཡོད་སྐོར་གྱི་གནས་ཚུལ་ཐོན་ཡོད་པ་རེད།

ཕྱི་ལོ་ ༢༠༢༤ ལོར་འདི་ག་བོད་ཀྱི་དུས་བབ་གསར་ཁང་གི་དྲ་ལམ་ཁག་ཏུ་དྲ་འབུས་སིམ་འཛུལ་བྱས་ཏེ། འདི་གའི་གསར་ཁང་གི་མིང་ཐོག་ནས་གཞུང་ཁོངས་མ་ཡིན་པའི་ཚོགས་སྡེ་ཁག་ལ་གང་བྱུང་འཕྲིན་ཡིག་བསྐུར་བའི་གནས་ཚུལ་ཐོན་ཡོད་པ་མ་ཟད། གསར་ཁང་གིས་ཆེད་གཉེར་ངོ་དེབ་ཏུའང་རྒྱ་ནག་གཞུང་དང་འབྲེལ་བའི་གསར་འགྱུར་དང་། ལྷག་པར་དུ་རྒྱ་ནག་གཞུང་གིས་བོད་ནང་དྲག་གནོན་བྱེད་མུས་ཡིན་པའི་གནས་ཚུལ་རིགས་སྤེལ་རྗེས། གང་བྱུང་ནག་གསུབ་བཏང་བའི་གནས་ཚུལ་ཐེངས་མང་བྱུང་སོང་།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།