དྷ་ས་ཁུལ་གྱི་ཁང་རྙིང་དག་ལ་ཀ་བ་ཡོད་མེད་སོགས་ཞིབ་འཇུག་གནང་གལ་ཆེ་སྐོར་བརྗོད་སོང་།

དྷ་རམ་ས་ལའི་ས་ཡོམ་གྱི་འཇིག་པ་ལས་གཡོལ་སླད་ང་ཚོས་ཆེད་ལས་རང་བཞིན་ཅན་གྱི་མི་སྣས་ཆེད་འཛུགས་བྱས་པའི་ཁང་པ་བཟོ་སྐྲུན་དང་ཁང་པ་རྙིང་པ་དག་ལ་ཀ་བ་གསར་འཛུགས་དང་ཇེ་བརྟན་བསྐྲུན་ཐབས་བྱ་དགོས་སྐོར་སོགས་བརྗོད་བྱུང་།

དེ་རིང་ཉིན་རྒྱབ་ཆུ་ཚོད་ ༢ པའི་སྟེང་སྙན་གྲགས་བཟོ་བཀོད་ཁང་ (Studio Nyandak) དང་། དྷ་ས་བོད་ཀྱི་དཔེ་མཛོད་ཁང་གཉིས་ཟུང་འབྲེལ་ཐོག དཔེ་མཛོད་ཁང་གི་ཚོགས་ཁང་དུ། དྷ་རམ་ས་ལའི་ས་ཡོམ་སྐོར་ཉམས་ཞིབ་གནང་བའི་ལྷན་ཚོགས་ཤིག་སྐོང་ཚོགས་གནང་སོང་། སྐབས་དེར་དྷ་སར་ཡོད་པའི་སྙན་གྲགས་བཟོ་བཀོད་ཁང་གི་ཨར་ལས་འཛུགས་སྐྲུན་འཆར་འགོད་པ་བདེ་ཆེན་མཚོ་རྒྱལ་ལགས་དང་། ཨར་ལས་འཛུགས་སྐྲུན་འཆར་འགོད་པ་བསྟན་འཛིན་ཆོས་དབྱངས་ལགས། ནེའུ་ཡོག་ཏུ་ཡོད་པའི་ཨར་ལས་འཛུགས་སྐྲུན་འཆར་འགོད་པ་པཱོལ་ (Paul Laroque) ལགས། ཁང་བཟོའི་འཆར་འགོད་པ་མཱ་རི་ཡ་ཊ་ (Marieta Núñez García) ལགས། ཉམས་ཞིབ་པ་དང་འབུམ་རམས་པ་ཇཱ་ཝི་ཡར་ (Dr. Javier Ortega Heras) ལགས། སྙན་གྲགས་བཟོ་བཀོད་ཁང་གསར་འཛུགས་གནང་མཁན་བསྟན་འཛིན་སྙན་གྲགས་ལགས། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། བཟོ་བཀོད་ཁང་གི་ལས་བྱེད་དང་དོ་དབྱིངས་ཅན་གྱི་མི་མང་བཅས་འཛོམས་འདུག

དྷ་ས་ཁུལ་དུ་ས་ཡོམ་གྱི་འཇིག་པ་ཡོང་ཉེན་ཡོད་པའི་གནད་དོན་དང་འབྲེལ་ནས་བདེ་ཆེན་མཚོ་རྒྱལ་ལགས་ཀྱིས་འདི་གའི་གསར་འགོད་པར། ཕྱི་ལོ་ ༡༩༠༥ ལོར་དྷ་སའི་ཉེ་འདབས་སུ་ཆགས་པའི་ཀང་རཱ་ཁུལ་དུ་ས་ཡོམ་གྱི་གོད་ཆག་ཆེན་པོ་ཞིག་བྱུང་ཡོད་པ་མ་ཟད། ད་བར་དྷ་སའི་ཁུལ་དུ་ཚད་རིམ་ཉུང་བའི་ས་ཡོམ་ཁག་ཅིག་བྱུང་དང་འབྱུང་མུས་ཡིན་ཡང་། ཀང་རཱར་བྱུང་བའི་ས་ཡོམ་གྱི་གོད་ཆག་བཞིན་བྱུང་མེད། འོན་ཀྱང་། ས་ཁམས་ཆེད་མཁས་པ་མང་པོ་ཞིག་གིས་འབྱུང་འགྱུར་མི་ལོ་ ༥༠ ནས་ ༡༠༠ བར་དྷ་སའི་ཁུལ་དུ་ས་ཡོམ་གྱི་གོད་ཆག་ཆེན་པོ་ཞིག་ཡོང་རྒྱུའི་ཚོད་དཔག་བྱེད་ཀྱི་ཡོད་སྟབས། ང་ཚོས་ས་ཡོམ་གྱི་གོད་ཆག་ལས་གཡོལ་སླད་སྔོན་ཚུད་ནས་དོགས་གཟོན་དང་། དྷ་ས་ནི་གཡང་གཟར་གྱི་ས་ཁུལ་ཞིག་ཡིན་པ་མ་ཟད། འདིར་འཛུགས་སྐྲུན་བྱས་པའི་ཁང་རྩེག་མང་པོ་ཞིག་ནི་ཨར་འདམ་གྱིས་བཟོས་པ་ཡིན་སྟབས་ས་ཡོམ་གྱི་འཇིག་པ་ཤུགས་ཆེན་ཡོང་ཉེན་ཡོད་པས། ང་ཚོས་ས་ཡོམ་གྱི་འཇིག་པ་དེ་དག་ལས་གཡོལ་སླད། ཆེད་ལས་རང་བཞིན་ཅན་གྱི་མི་སྣས་ཆེད་འཛུགས་བྱས་པའི་ཁང་པ་བཟོ་སྐྲུན་དང་། ཁང་པ་རྙིང་པ་དག་ལ་ཀ་བ་གསར་འཛུགས་དང་། ཇེ་བརྟན། སྲ་བརྟན་འཛུགས་ཐབས་བྱ་དགོས་སྐོར་སོགས་བརྗོད་བྱུང་།

སྙན་གྲགས་བཟོ་བཀོད་ཁང་གི་ལས་བྱེད་ཨར་ལས་འཛུགས་སྐྲུན་འཆར་འགོད་པ་བསྟན་འཛིན་ཆོས་དབྱངས་ལགས་ཀྱིས། དེ་རིང་ང་ཚོའི་བརྗོད་གཞི་འདི་གཙོ་བོ་དྷ་རམ་ས་ལའི་ས་ཡོམ་གྱི་འགོག་ཤུགས་(Seismic Resilience in Dharamsala) ཀྱི་སྐོར་ལ་རེད། དྷ་རམ་ས་ལར་འདི་ཕྱི་ལོ་ ༡༩༠༥ ལོར་ས་ཡོམ་ཆེན་པོ་ཞིག་བརྒྱབ་པ་རེད། དེ་ལ་ང་ཚོས་སྔོན་དཔགས་བྱས་ནས་ལོ་བརྒྱ་དང་གཉིས་བརྒྱ་བར་ས་ཡོམ་ཤུགས་ཆེན་པོ་ཞིག་རྒྱག་སྲིད་པའི་ཉེན་ཁ་ཆེན་པོ་ཡོད། དེ་འདྲ་ཡིན་དུས་ང་རང་ཚོ་རང་ངོས་ནས་གྲ་སྒྲིག་བྱ་རྒྱུ་དེ་ང་ཚོའི་ལས་འགན་རེད། དེ་ལ་ང་ཚོས་གོ་རྟོགས་ཀྱི་ལས་རིམ་སྤེལ་བ་དང་ང་ཚོ་གནས་སྡོད་བྱེད་པའི་ཁང་པ་ལ་བསྐྱར་བཟོ་བྱེད་ཐུབ་ཀྱི་རེད། ང་ཚོར་ཁང་པའི་བཟོ་བཀོད་མི་འདྲ་བ་མང་པོ་ཡོད་པ་ལྟར། ཀ་བ་དང་གདུང་མ་ལའང་ས་ཕག་དང་ཤིང་སོགས་རྒྱུ་ཆ་འདྲ་མིན་གྱིས་བཟོས་པ་ཡོད་པར་བརྟེན། རྒྱུ་ཆ་དེ་དག་ལ་བསྐྱར་བཟོའི་ཐབས་ལམ་མང་པོ་ཡོད། ཅེས་དང་། ཁང་པའི་བཟོ་བཀོད་དེ་ས་ཡོམ་གྱི་ཉེན་ཁ་ལས་གཡོལ་ཐབས་སུ་ཐབས་ལམ་མི་འདྲ་བ་མང་པོ་ཡོད་པ་ལྟར་གཅིག་ (Rapid visual screening method) རེད། དཔེར་ན་ང་ཚོས་ཁང་པ་གཅིག་བརྟན་པོ་ཡོད་མེད་བལྟ་ན། ཧ་ལས་པ་ཁག་པོ་དང་དུས་ཚོད་མང་པོ་དང་འགྲོ་སོང་མང་པོ་འགྲོ་ཡི་རེད། དེའི་ཚབ་ལ་ང་ཚོས་དེའི་ཐོག་ཏོག་ཙམ་ཤེས་མཁན་ཞིག་བཙལ་ན་(Rapid visual screening method) བྱེད་ཀྱི་རེད། འདི་ལོར་ང་ཚོས་བོད་ཁྱིམ་སློབ་གྲྭ་ལ་ཁང་པ་བཞི་བཅུ་ལྷག་ཞིབ་བཤེར་བྱས་རེད། དེ་ལ་ང་ཚོས་(Rapid visual screening method) བྱེད་ནས་ཁང་པ་གང་ཉེན་ཁ་ཡོད་པ་དང་གང་མེད་པ་རྣམས་ཤེས་རྟོགས་བྱུང་རེད། ཅེས་བརྗོད་བྱུང་།

ཨ་རི་ཕེ་ཌལ་མཐོ་སློབ་ (Pratt   Institute school of Architecture)དགེ་རྒན་ཆེན་མོ་པོལ་ལ་རོ་ཁི་(Paul Laroque) ལགས་ཀྱིས། བརྟན་ལྷིང་ཅན་གྱི་ཁང་པའི་བཟོ་བཀོད་དང་། འཛུགས་སྐྲུན་གྱི་རྩ་བའི་རྨང་གཞི། ས་ཡོམ་གྱི་གནས་སྟངས་ལ་ཁང་པའི་བཟོ་སྐྲུན་ཇི་ལྟར་བྱེད་དགོས་པའི་རྒྱབ་ལྗོངས་ཀྱི་གལ་གནད་ཁག་ངོ་སྤྲོད་གནང་བ་མ་ཟད།  རྒྱ་གར་དྷ་རམ་ས་ལ་ཁུལ་གྱི་ཁྱབ་ཆེ་བའི་འཛུགས་སྐྲུན་བཟོ་བཀོད་ཀྱི་རིགས་དང་། རྡོའི་བཟོ་བཀོད་ཀྱི་ཁྱད་ཆོས་ལྡན་པའི་ཐོག་ནས་ས་ཡོམ་གནས་སྟངས་ཇི་ལྟར་གདོང་ལེན་བྱེད་ཕྱོགས། དེ་བཞིན་ས་ཡོམ་གྱི་ཤུགས་རྐྱེན་གྱིས་ཁང་པའི་འཛུགས་སྐྲུན་བཟོ་བཀོད་ལ་ཤུགས་རྐྱེན་ཇི་ལྟར་ཐེབས་ཚུལ་སྐོར་འགྲེལ་བཤད་དང་དྲི་བ་དྲིས་ལན་གནང་སོང་།

ཡུ་རོབ་རྒྱལ་ཁབ་སི་པན་ནས་ཡིན་པའི་འབུམ་རམས་པ་ཧ་ཝ་ཡར་འོ་ཊི་གྷ་ཧེ་ར་སི་ (Javier Ortega Heras) ལགས་ཀྱིས། ས་ཡོམ་གྱི་གོད་ཆག་ཁྲོད་ཉེན་ཁ་ཆེ་ཞིང་ཁང་པའི་བཟོ་བཀོད་ལ་བདེ་འཇགས་སྲུང་སྐྱོབ་ཀྱི་འཛུགས་སྐྲུན་མེད་པའི་གནས་སྟངས་སྐོར་ལ་གཏམ་བཤད་གནང་སྐབས། ཁང་པ་ཚང་མར་ས་ཡོམ་བྱུང་སྐབས་ཉེན་ཁ་ཡོད་ཀྱང་། ད་ལྟ་ང་ཚོས་རྗོད་ཀྱིན་པ་ནི་ཁང་པ་བཟོ་སྐྲུན་གྱི་རྒྱུ་ཆའི་སྐོར་ཡིན། དམིགས་བསལ་ཁང་པ་འཛུགས་སྐྲུན་བྱེད་སྐབས་བདེ་འཇགས་སྲུང་སྐྱོབ་ཀྱི་འཆར་འགོད་མེད་པ་དེས་ས་ཡོམ་སྐབས་ཁང་པར་རྡིབ་སྐྱོན་འབྱུང་བའི་ཉེན་ཁ་ཆེ་བ་ཡོད། དྷ་རམ་ས་ལ་ནི་ས་ཡོམ་གྱི་གོད་ཆག་ཁྲོད་ཉེན་ཁ་ཆེ་བའི་ས་ཁུལ་ཞིག་ཡིན། ཁང་པ་འཛུགས་སྐྲུན་བྱེད་པར་ས་ཡོམ་གྱི་གནོད་འགོག་དང་འཛུགས་སྐྲུན་བསྐྱར་བཅོས་ཀྱི་རིམ་པ་གཉིས་ཡོད། འདས་པའི་ལོ་རྒྱུས་ནང་མང་པོ་ཞིག་གིས་ས་ཡོམ་སྔོན་འགོག་བྱེད་ཐབས་འདི་དག་བེད་སྤྱོད་བྱེད་ཀྱི་མེད། འོན་ཀྱང་། ས་ཡོམ་མང་པོ་རྒྱག་སུའི་ཁུལ་དུ་གནའ་བོའི་ས་ཡོམ་སྔོན་འགོག་གི་བྱེད་ཐབས་སྤྱོད་ཀྱི་ཡོད། ཁོ་ཚོས་ཁང་པའི་བཟོ་བཀོད་གང་ལ་གནོད་སྐྱོན་ཚབས་ཆེན་བྱུང་ཡོད་མེད་ལ་བལྟས་ཏེ། གནོད་སྐྱོན་ཆུང་བའི་ཁང་པའི་བཟོ་བཀོད་རིགས་བེད་སྤྱོད་མང་པོ་གཏོང་གི་ཡོད། ང་ཚོ་མང་པོ་ཞིག་གིས་ས་ཡོམ་ཁྲོད་ཁང་པར་གཏོར་སྐྱོན་ཐེབས་རྗེས་འཛུགས་སྐྲུན་བསྐྱར་བཅོས་བྱེད་ཀྱི་ཡོད། འོན་ཀྱང་། ས་ཡོམ་ནི་དུས་རྒྱུན་དུ་འབྱུང་གི་མེད་པས། ང་ཚོ་མང་པོ་ཞིག་གིས་ས་ཡོམ་གྱི་ཉེན་གཡོལ་ཆེད་ཁང་པའི་བཟོ་བཀོད་དང་རྒྱུ་ཆར་དོ་སྣང་བྱ་རྒྱུ་བརྗེད་འགྲོ་ཡི་ཡོད། དེར་བརྟེན། ས་ཡོམ་དང་འབྲེལ་ནས་ཁང་པའི་བཟོ་བཀོད་དང་འཛུགས་སྐྲུན་གྱི་རྒྱུ་ཆ་སོགས་ནི་ང་ཚོའི་བདེ་འཇགས་དང་ཐད་ཀར་འབྲེལ་བ་ཡོད་པས་གལ་ཆེན་ཡིན་ཞེས་བརྗོད་སོང་།

FENEC ཁང་བཟོ་འཆར་བཀོད་བཟོ་རིག་པ་ (Architectural Engineer) མ་རི་ཊ་ནུ་ནེ་སི་ (Marieta Núñez García) ལགས་ཀྱིས། ཤིང་གི་བཟོ་བཀོད་ལ་ལས་ཀ་བྱེད་པའི་ཁྱད་ཆོས་དང་། ས་གནས་ཀྱི་ཤུལ་བཞག་རིག་གནས་ལ་ས་གནས་ཀྱི་ཤིང་བཟོའི་གལ་གནད། དེ་དག་སྲུང་སྐྱོབ་བྱེད་པའི་ཐབས་ལམ་སྐོར་འགྲེལ་བཤད་གནང་སོང་། དེ་བཞིན་ད་ལྟའི་ཤིང་བཟོའི་བཟོ་བཀོད་ས་གནས་དེ་གའི་དངོས་པོའི་ཁྱད་ཆོས་སྟོན་པའི་ཆེད་དུ་གཏོར་བརླག་མི་བྱེད་པའི་ཚོད་ལྟའི་ཐབས་ལམ་མི་འདྲ་བ་སྟོན་གྱི་ཡོད་སྐོར་སོགས་བརྗོད་སོང་།

བློ་བཟང་སྒྲོལ་མ། བསྟན་འཛིན་ཉི་སྒྲོན། གསར་འགོད་པ་བསྟན་འཛིན་ཕུར་བུ།