བོད་རྔ་བ་རྫོང་ཨ་འདུས་སྡེ་བའི་གླུ་བ་དཔལ་ཆུང་ལགས་དང་ཨ་འདུས་དགོན་པའི་དགེ་འདུན་པ་ཚེ་དབང་དོན་གོ་ལགས་གཉིས་འཛིན་བཟུང་བཙན་འཁྲིད་བྱས་ཏེ་བདུན་ཕྲག་གསུམ་ལྷག་འགྲོ་བཞིན་ཡོད་ཀྱང་གང་དུ་ཡོད་མེད་ཙམ་ཡང་ཤེས་རྟོགས་མ་ཐུབ་པར་ལྷག་འདུག
འདི་ག་བོད་ཀྱི་དུས་བབ་གསར་ཁང་ལ་འབྲེལ་ཡོད་ནས་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། རྒྱ་ནག་གཞུང་གིས་གོ་སྟོན་སྐབས༧གོང་ས་རྒྱལ་བ་རིན་པོ་ཆེ་མཆོག་ལ་བསྟོད་གླུ་བླངས་བའི་ཉེས་མིང་འོག བོད་ཀྱི་ན་གཞོན་གླུ་བ་ཨ་སངས་ལགས་ཀྱི་གྲོགས་པོ་ན་གཞོན་གླུ་བ་དཔལ་ཆུང་ལགས་ཀྱང་འཛིན་བཟུང་བཙན་འཁྲིད་བྱས་ཏེ་བདུན་ཕྲག་གསུམ་ལྷག་འགྲོ་བཞིན་ཡོད་ཀྱང་། ད་ལྟའི་ཆར་གང་དུ་ཡོད་མེད་དང་གནས་སྟངས་ག་འདྲ་ཡོད་སོགས་གང་ཡང་ཤེས་རྟོགས་ཐུབ་ཀྱི་མེད་སྟབས། ཁོང་གི་ཁྱིམ་མི་ཚོས་སེམས་ཁྲལ་ཆེན་པོ་བྱེད་ཀྱི་ཡོད་འདུག
གླུ་བ་དཔལ་ཆུང་ལགས་ནི་བོད་རྔ་བ་རྫོང་ཨ་འདུས་སྡེ་བ་ནས་ཡིན་ཞིང་། དམིགས་བསལ་གྱིས་མིང་གྲགས་ཅན་དེ་འདྲ་མིན་ཡང་ཉེ་སྔོན་ན་གཞོན་གླུ་བ་ཨ་སངས་ལགས་མཉམ་དུ་ཞི་བདེའི་རྒྱལ་སྲས་ཞེས་པའི་བསྟོད་གླུ་དེ་བསྐྱར་ལེན་བྱས་རྗེས། རྒྱ་ནག་གཞུང་གིས་ཁོང་གཉིས་ཀ་འཛིན་བཟུང་བཙན་འཁྲིད་བྱས་ཡོད་པ་རེད། གླུ་བ་དཔལ་ཆུང་ལགས་ཀྱིས་གཉེན་སྒྲིག་བྱས་ཏེ་ལོ་གསུམ་ལྷག་ཕྱིན་ཡོད་པ་མ་ཟད། ཁོང་བཟའ་ཟླ་གཉིས་ལ་རང་ལོ་གསུམ་ཙམ་ཡིན་པའི་བུ་ཞིག་ཀྱང་ཡོད་འདུག
གཞན་ཡང་། ཨ་འདུས་དགོན་པའི་དགེ་འདུན་པ་ཚེ་དབང་དོན་གོ་ལགས་ཀྱིས་༧སྐུའི་གོ་སྟོན་གྱི་ཚབ་མཚོན་དབུ་ཞྭ་སྤྱི་ཚོགས་དྲ་ལམ་དུ་ཁྱབ་བསྒྲགས་བྱས་པའི་ཉེས་མིང་འོག འདི་ལོའི་༧སྐུའི་གོ་སྟོན་གྱི་སྐབས་ཏེ་ཕྱི་ཟླ་ ༧ ཚེས་ ༡ ཡས་མས་སུ། རྒྱ་ནག་ཉེན་རྟོག་པས་གློ་བུར་དུ་དགོན་པ་ནས་འཛིན་བཟུང་བཙན་འཁྲིད་བྱས་ཏེ་བདུན་ཕྲག་བཞི་ཙམ་འགྲོ་བཞིན་ཡོད་ཀྱང་། ཁོང་གང་དུ་ཡོད་མེད་ཙམ་ཡང་ཤེས་རྟོགས་ཐུབ་ཀྱི་མེད་པ་རེད།
དགེ་འདུན་པ་ཚེ་དབང་དོན་གོ་ལགས་རྔ་བ་ཨ་འདུས་སྡེ་བ་ནས་ཡིན་ཞིང་། ཆུང་དུས་ནས་ཨ་འདུས་དགོན་པར་ཆོས་ཞུགས་བྱས་ཏེ། ད་ལྟ་དབུ་མའི་འཛིན་གྲྭའི་ནང་སློབ་གཉེར་བྱེད་ཀྱི་ཡོད་འདུག
གླུ་བ་ཨ་སངས་ལགས་དང་དཔལ་ཆུང་ལགས་གཉིས་ཀྱིས་བསྐྱར་ལེན་བྱས་པའི་གླུ་གཞས་ཞི་བདེའི་རྒྱལ་སྲས་ཞེས་པ་དེའི་ནང་དུ། ལང་ཚོ་ཨ་མདོ་ནས་འཁྲུངས་ཤིང་།། ཞབས་བརྗེ་དབུས་གཙང་ལ་བཀོད་པ།། མཛད་འཕྲིན་འཕགས་ཡུལ་ནས་རྒྱས་པའི།། ཞི་བདེའི་རྒྱལ་སྲས་ཁྱེད་དྲན་ཀི། གསེར་དངུལ་གཡུ་བྱུར་གྱི་རྒྱན་ཆ།། སྟག་གཟིག་ཝ་སྲམ་གྱི་ཤོམ་ལྭ།། ཆོས་ལྡན་མི་རིགས་འདིར་མི་མཛའ།། གསུངས་པའི་བཀའ་སློབ་ཀྱང་དྲན་ཀི། ཁྱེད་ནི་མགོ་ཐོག་གི་ཉི་མ།། ཁྱེད་ནི་སེམས་ནང་གི་ཕ་མ།། ཁྱེད་ནི་བྱམས་ལྡན་གྱི་བླ་མ།། ཁྱེད་ཉིད་བརྗེད་ཐབས་ཤིག་མི་འདུག། ཅེས་པའི་གླུ་གཞས་དེ་བོད་ཕྱི་ནང་གཉིས་སུ་ཤུགས་ཆེན་ཁྱབ་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
