ཅེཀ་སྲིད་འཛིན་གྱིས་༧གོང་ས་མཆོག་ལ་མཇལ་ཁ་ཞུས་པར་སྐྱོན་བརྗོད་བྱས་འདུག

རྒྱ་ནག་གཞུང་གིས་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཕེ་ཌར་པཱ་ཝལ་ནས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་པར་ངོ་རྒོལ་བསྒྲགས་གཏམ་སྤེལ་འདུག

རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༢༨ ཉིན་རྒྱ་ནག་གཞུང་གིས། ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཕེ་ཌར་པཱ་ཝལ་ལགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་པར་ངོ་རྒོལ་ཡོད་སྐོར་བསྒྲགས་འདུག

དེ་འབྲེལ་ཅེཀ་སྤྱི་མཐུན་རྒྱལ་ཁབ་ནང་ཡོད་པའི་རྒྱ་ནག་གཞུང་ཚབ་ཁང་གིས། རྒྱལ་ཁབ་སུ་འདྲ་ཞིག་གི་གནད་ཡོད་མི་སྣ་དང་གཞུང་འབྲེལ་མི་སྣས་༧གོང་ས་རྒྱལ་བ་རིན་པོ་ཆེ་མཆོག་དང་ཁོང་གི་འབྲེལ་ཡོད་མི་སྣར་འབྲེལ་ལམ་བྱེད་པར་མཐའ་ཅིག་ཏུ་ངོ་རྒོལ་ཡོད། ཅེས་དང་། ཅེཀ་སྤྱི་མཐུན་རྒྱལ་ཁབ་ཀྱིས་རྒྱ་ནག་གཅིག་གི་སྲིད་བྱུས་ལ་བརྩི་སྲུང་བྱས་ཏེ། རྒྱལ་ཁབ་གཉིས་ཀྱི་འབྲེལ་ལམ་གོང་འཕེལ་གཏོང་དགོས་པ་ལས། བོད་རང་བཙན་གྱི་ཁ་བྲལ་ཕྱོགས་ཁག་ལ་རྒྱབ་སྐྱོར་བྱ་རྒྱུ་མཚམས་འཇོག་དགོས་ཞེས་བརྗོད་འདུག་ལ། དེ་རྗེས་ཅེཀ་སྤྱི་མཐུན་རྒྱལ་ཁབ་སྲིད་འཛིན་ལས་ཁུངས་ཀྱིས་༧གོང་ས་མཆོག་ལ་མཇལ་ཁ་ཞུས་པ་དེ་སྲིད་འཛིན་སྒེར་ངོས་ནས་མཇལ་བཅར་ཞུས་པ་ཡིན་ཚུལ་གྱི་གསལ་བཤད་ཅིག་ཀྱང་བྱས་འདུག

ཟླ་འདིའི་ཚེས་ ༢༧ ཉིན་ལ་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཕེ་ཌར་པཱ་ཝལ་ལགས་ལ་དྭགས་སུ་ཕེབས་འབྱོར་བྱུང་བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བཀའ་བློན་རྣམ་པས་ཕེབས་བསུའི་སྣེ་ལེན་ཞུས་ཡོད་ཅིང་། སྲིད་འཛིན་ཕེ་ཌར་པཱ་ཝལ་ལགས་དབུས་པའི་ཅེཀ་སྐུ་ཚབ་ཚོགས་ཆུང་གིས་ཁྲིག་སེ་དགོན་པར་གནས་མཇལ་གྲུབ་རྗེས།  ༧གོང་ས་རྒྱལ་བ་རིན་པོ་མཆོག་ནས་ཁོང་རྣམ་པར་མཇལ་འཕྲད་མཛད། སྐབས་དེར་འདི་གའི་གསར་འགོད་པར་སྲིད་འཛིན་པཱ་ཝལ་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་ཅིཀ་སྤྱི་མཐུན་རྒྱལ་ཁབ་ནང་ཐེངས་ ༡༡ ཞབས་ཀྱིས་བཅགས་ཡོད་ལ། ང་ལ་མཚོན་ན། ཁོང་ད་རེས་ལན་གཅིག་མཇལ་རྒྱུ་བྱུང་བ་དེ་ཧ་ཅང་གིས་དགའ་ཚོར་དང་གཟི་བརྗིད་ལྡན་པ་ཞིག་ཡིན། ༧གོང་ས་རྒྱལ་བ་རིན་པོ་ཆེ་མཆོག་ནས་བོད་རང་བཙན་དགོས་ཚུལ་གསུངས་ཀྱི་མེད། ༧མགོན་པོ་གང་ཉིད་ནས་གཉིས་ཕན་དབུ་མའི་ལམ་གྱི་ཐོག་ནས་བོད་རྒྱའི་དཀའ་རྙོག་སེལ་བའི་དགོངས་གཞི་གཙོ་བོ་དང། ཆོས་དད་རང་དབང་། སྨྲ་བརྗོད་རང་དབང་། བོད་མི་རྣམས་ལ་སྐད་ཡིག་བཀོལ་སྤྱོད་སོགས་ཀྱི་རང་དབང་དགོས་པར་རྒྱབ་སྐྱོར་བྱེད་ཀྱི་ཡོད་ཅེས་བརྗོད་འདུག

དེ་རྗེས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་སྣེ་འཁྲིད་པའི་བཀའ་ཤག་སྐབས་བཅུ་དྲུག་པས་ལ་དྭགས་བསོད་ནམས་གླིང་གི་ཚོགས་ཁང་དུ་སྲིད་འཛིན་པཱ་ཝལ་ལགས་སུ་སྣེ་ལེན་གྱི་སྟབས་བདེ་མཛད་སྒོ་ཞིག་འཚོགས་ཡོད་ལ། སྐབས་དེར་སྲིད་སྐྱོང་མཆོག་ནས། ངའི་ལས་རོགས་དང་བོད་མིའི་སྒྲིག་འཛུགས་ཀྱི་བཀའ་ཤག དེ་བཞིན་གླེ་ཁུལ་གྱི་མགོ་ཁྲིད་ཚང་མའི་ཚབ་ཞུས་ཏེ་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་མཆོག་ལ་ཕེབས་བསུ་ཞུ་རྒྱུ་བྱུང་བ་ནི་ང་ཚོར་དམིགས་བསལ་གྱི་གོ་སྐབས་བཟང་པོ་ཞིག་དང་གཟི་བརྗིད་ཅིག་ཡིན། ཞེས་གསུངས་འདུག

དེ་རྗེས་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་མཆོག་གིས། ང་ཚོ་ནི་ཡུ་རོབ་རྒྱལ་ཁབ་ཀྱི་སྙིང་དབུས་སུ་ཡོད་པའི་ཅེཀ་སྤྱི་མཐུན་རྒྱལ་ཁབ་ནས་ཡོང་བ་ཡིན། ང་ཚོའི་རྒྱལ་ཁབ་ཀྱི་རིག་གཞུང་དང་ལོ་རྒྱུས། དེ་བཞིན་ད་ལྟའི་གནས་སྟངས་སོགས་གང་ཅིའི་ཐད་ནས་མི་འདྲ་རུང་། ཚང་མ་འགྲོ་བ་མི་ཞིག་ཡིན་པའི་ཆ་ནས་མི་ཚེ་དོན་སྙིང་ལྡན་པ་ཞིག་དང་། ང་ཚོའི་བྱིས་པ་ཚོར་མ་འོངས་པ་བཟང་པོ་ཞིག་ཡོང་ཐབས་བྱེད་པའི་དམིགས་ཡུལ་གཅིག་མཚུངས་ཡིན། ང་ཚོས་ད་རེས་བོད་དོན་རྒྱབ་སྐྱོར་མཚོན་ཆེད་༸གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་པ་ཡིན། ཁྱེད་ཀྱི་སྐད་ཡིག་དང་ཆོས་ལུགས། རིག་གཞུང་སྲུང་སྐྱོབ་བྱ་རྒྱུ་དེ་ནི་ཁྱེད་ཚོའི་གཞི་རྩའི་ཐོབ་ཐང་ཡིན། ཞེས་དང་། ཁོང་གིས་བོད་མི་རྣམས་ཕྱིར་རང་ཡུལ་དུ་ལོག་ཐུབ་པའི་རེ་བ་ཡོད་སྐོར་བཅས་གསུངས་འདུག

བློ་བཟང་སྒྲོལ་མ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།