ཨོ་གླིང་གྲོས་ཚོགས་ནང་༧གོང་ས་མཆོག་གི་འཁྲུངས་སྐར་སྲུང་གཙི་ཞུས་ཏེ་བོད་དོན་ལ་རྒྱབ་སྐྱོར་བྱས་འདུག
ཕྱི་ཟླ་ ༧ ཚེས་ ༢༨ ཉིན་ཨོ་གླིང་གྲོས་ཚོགས་ནང་བོད་དོན་རྒྱབ་སྐྱོར་བ་དང་སིཌ་ནེའི་གྲོས་ཚོགས་འཐུས་མི་འབུམ་རམས་པ་ལྕམ་སོའུ་ཧྥི་སི་ཀེམ་སི་ (Sophie Scamps) ལགས་ཀྱིས་༸གོང་ས་རྒྱལ་བ་རིན་པོ་ཆེ་མཆོག་གི་འཁྲུངས་སྐར་སྲུང་གཙི་ཞུས་པ་དང་འབྲེལ་ནས་གསུང་བཤད་གནང་ཡོད་ཅིང་། སྐབས་དེར་ཁོང་མོས། ༸གོང་ས་རྒྱལ་བ་རིན་པོ་ཆེ་མཆོག་གིས་གོ་སྟོན་དང་སྟབས་བསྟུན་དགའ་ལྡན་ཕོ་བྲང་མུ་མཐུད་གནས་ངེས་ཡིན་པའི་གསལ་བསྒྲགས་གནང་བ་ནི་དུས་ཚིགས་ཁྱད་པར་ཅན་ཞིག་ཆགས་ཀྱི་ཡོད་པ་ནན་བརྗོད་གནང་འདུག་ལ། ཁོང་གིས་གྲོས་ཚོགས་ནང་གསུང་བཤད་གནང་བ་དེ་ནི་བོད་མི་དང་བོད་མིའི་རིག་གཞུང་དང་ཆོས་དད་རང་དབང་སོགས་ལ་རྒྱབ་སྐྱོར་དང་གདུང་སེམས་མཉམ་སྐྱེད་ཀྱི་བརྡ་ལན་ཞིག་མཚོན་གྱི་ཡོད་འདུག
ཁོང་གིས་ཨོ་གླིང་ནང་གནས་སྡོད་བྱེད་མཁན་གྱི་བོད་རིགས་མང་ཆེ་ཤོས་ཤིག་སིཌ་ཎེའི་བྱང་ཕྱོགས་མཚོ་འགྲམ་གྱི་མེག་ཀེ་ལར་ནང་གནས་སྡོད་བྱེད་ཀྱི་ཡོད་པ་ནི་ང་ཚོ་སྤོབས་པ་སྐྱེས་འོས་པ་ཞིག་ཡིན། ང་ཚོ་སྤྱི་ཚོགས་འདི་འདྲ་ཡག་པོ་ཞིག་དང་ལྷན་དུ་མཉམ་གནས་བྱེད་རྒྱུ་བྱུང་བ་ནི་ཧ་ཅང་སྐལ་བ་བཟང་པོ་ཡིན། ༸གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ཕེབས་པའི་༸སྐུའི་འཁྲུངས་སྐར་ནི་དགའ་ཚོར་སྐྱེས་འོས་པའི་དུས་ཚིགས་ཁྱད་པར་ཅན་ཞིག་ཡིན་ལ། དུས་ཚིགས་འདི་ནི་ལྷག་པར་དུ་འཛམ་གླིང་སྤྱི་དང་བཙན་བྱོལ་དུ་གནས་པའི་བོད་མི་རྣམས་ལ་ཆོས་ཕྱོགས་ཀྱི་ཐོག་ནས་གལ་ཆེན་ཆགས་ཡོད། དམིགས་བསལ་གྱིས་༸གོང་ས་རྒྱལ་བ་རིན་པོ་ཆེ་མཆོག་ནས་དགའ་ལྡན་ཕོ་བྲང་དང་སྐུའི་ཡང་སྲིད་རྒྱུན་མཐུད་ཕེབས་ངེས་པའི་གསལ་བསྒྲགས་བསྐྱངས་ཡོད་པར་བརྟེན། འདི་ལོའི་གོ་སྟོན་གྱི་འཁྲུངས་སྐར་སྲུང་གཙི་གནང་བ་དེ་ནི་ཧ་ཅང་གནད་འགག་ཅན་དུ་གྱུར་ཡོད། གསལ་བསྒྲགས་དེར་བོད་མི་དང་མི་རིགས་གཞན་ས་ཡ་མང་པོས་ཡུན་རིང་རེ་སྒུག་བྱས་ཡོད། ༧གོང་ས་མཆོག་ནི་ང་ཚོའི་འཇིག་རྟེན་འདིའི་བྱམས་བརྩེ་དང་རེ་བའི་སྒྲོན་མེ་ལྟ་བུ་ཞིག་ཏུ་གྱུར་ཡོད། ཅེས་བརྗོད་འདུག
གཞན་ཡང་ཁོང་མོ་ཉེ་ལམ་ཨོ་གླིང་གི་སིཌ་ཎེའི་མེག་ཀེ་ལར་ (Mackellar) ས་ཁུལ་དུ་ཉིན་གཅིག་རིང་བོད་ཀྱི་རིག་གཞུང་འཁྲབ་སྟོན་ནང་མཉམ་ཞུགས་གནང་བའི་སྐོར་དང་། དེ་བཞིན་ཨོ་གླིང་གི་མངའ་སྡེའི་ (New South Wales) གྲོས་ཚོགས་ནང་སྲིད་སྐྱོང་སྤེན་པ་ཚེ་རིང་མཆོག་ལ་ཆེ་བསྟོད་སྐུ་མགྲོན་གྱི་གསོལ་ཚིགས་ཤིག་གི་སྐབས་ཁོང་མོ་མཉམ་ཞུགས་གནང་བའི་སྐོར། དེ་བཞིན། བོད་ནང་དུ་རང་དབང་གི་མཛད་སྒོའི་རིགས་སྲུང་གཙི་བྱེད་པའི་གོ་སྐབས་མེད་ཅིང་། བཙན་བྱོལ་ནང་བོད་མི་རྣམས་ལ་རིག་གཞུང་དང་སྨྲ་བརྗོད་རང་དབང་ཡོད་པའི་གལ་གནད་སོགས་ཀྱི་སྐོར་ལ་གླེང་སློང་གནང་ཡོད་འདུག
ཨོ་གླིང་གི་གྲོས་ཚོགས་འཐུས་མི་འབུམ་རམས་པ་སོའུ་ཧྥི་སི་ཀེམ་སི་ལགས། ཕྱི་ལོ་ ༢༠༢༣ ལོར་ཨོ་གླིང་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་དྷ་རམ་ས་ལར་འཚམས་གཟིགས་སུ་བཅར་སྐབས་ལྷན་བཅར་གནང་ཡོད་ཅིང་། སྐབས་དེར་ཁོང་མོས་༸གོང་ས་རྒྱལ་བ་རིན་པོ་ཆེ་མཆོག་དང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པར་མཇལ་འཕྲད་གནང་ཡོད། ལྕམ་སོའུ་ཧྥི་སི་ཀེམ་སི་ལགས་ནི་ཕྱི་ལོ་ ༢༠༢༢ ལོར་ཐོག་མར་ཨོ་གླིང་གྲོས་ཚོགས་འཐུས་མིར་འདེམས་ཐོན་བྱུང་ཞིང་། འདི་ལོར་བསྐྱར་དུ་གྲོས་ཚོགས་འཐུས་མིར་འོས་འདེམས་བྱུང་འདུག་ལ། ཁོང་མོ་ནི་ཨོ་གླིང་གི་ (independent) སྲིད་དོན་ཚོགས་པའི་ཚོགས་མི་ཡིན་པ་དང་ས་གནས་ (Mackellar) ནས་ཡིན་འདུག
