སྲིད་སྐྱོང་མཆོག་གིས་བཙན་བྱོལ་བོད་མིའི་གནས་སྡོད་མངའ་སྡེ་ལྔའི་ནང་ཕྱོགས་ཕེབས་གནང་བཞིན་པ།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་མ་ཧཱ་ར་ཤི་ཌི་ར་དང་།  ཨོ་ཌི་ཤཱ། ཆ་དྷི་སི་གྷར།   ཨུ་ཏ་ར་ཁན་ཌི། ཨུ་ཌར་པར་རྡེ་ཤི་མངའ་སྡེ་བཅས་སུ་གཞུང་འབྲེལ་ཕྱོགས་ཕེབས་གནང་བཞིན་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་རྒྱ་གར་དབུས་བོད་མིའི་གཞིས་ཆགས་ཁག་ཏུ་འཚམས་གཟིགས་ཐེངས་གཉིས་པ་གནང་བཞིན་ཡོད་པ་ལྟར། ཁ་སང་ཕྱི་ཚེས་ ༣༠ ཉིན་གྱི་སྔ་དྲོའི་ཆུ་ཚོད་ ༨ ཙམ་ལ་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་མ་ཧཱ་ར་ཤི་ཏྲ་མངའ་སྡེའི་ནཱག་པུར་གྲོང་ཁྱེར་གྱི་གནམ་ཐང་དུ་ཕེབས་འབྱོར་སྐབས། སྐབས་དེར་སྲིད་སྐྱོང་མཆོག་གིས་རྒྱ་གར་གྱི་གསར་འགྱུར་བརྒྱུད་ལམ་ཁག་གི་གསར་འགོད་པར་༸གོང་ས་རྒྱལ་བ་རིན་པོ་མཆོག་གི་༸སྐུའི་ཡང་སྲིད་དང་འབྲེལ་བའི་གནད་དོན་སྐོར་གྱི་བཅར་འདྲི་དང་ལེན་གནང་ཡོད་འདུག

དེ་ནས་ནཱག་པུར་གྲོང་ཁྱེར་ནས་སྦན་ད་ར་ནོར་རྒྱས་གླིང་གཞིས་ཆགས་སུ་ཕེབས་སྐབས། སྲིད་སྐྱོང་མཆོག་གིས་རྒྱ་གར་རྒྱལ་ཡོངས་སྤྱི་ཚོགས་ཞབས་ཞུ་ཚོགས་པའི་(Rashtriya Swayamsevak Sangh) གནད་ཡོད་མི་སྣ་ཁག་ཅིག་དང་། ནཱག་པུར་རྒྱ་གར་བོད་དོན་རྒྱབ་སྐྱོར་ཚོགས་པའི་(Nagpur India Tibet Support Group) ཚོགས་མི་རྣམས་དང་ཐུག་འཕྲད་གནང་ཞིང་། སྐབས་དེར་སྲིད་སྐྱོང་མཆོག་གིས་༸གོང་ས་རྒྱལ་བ་རིན་པོ་ཆེ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་དང་། འཕགས་བོད་གཉིས་ཀྱི་ལོ་རྒྱུས་ཀྱི་གལ་གནད། ༸རྒྱལ་བའི་ཡང་སྲིད་རྒྱུན་མཐུད་ཕེབས་རྒྱུའི་ཞལ་བཞེས་སྩལ་བ་སོགས་ཀྱི་སྐོར་ལ་གསུང་བཤད་གནང་འདུག

ཉིན་རྒྱབ་སྲིད་སྐྱོང་མཆོག་གིས་སྦན་ད་ར་ནོར་རྒྱས་གླིང་གི་སེར་བྱེས་ཐེག་ཆེན་གླིང་དགོན་པ་དང་། སྔ་འགྱུར་སྒྲུབ་བརྒྱུད་ཆོས་འཕེལ་གླིང་དགོན་པར་མཆོད་མཇལ་དུ་ཕེབས་པ་དང་། དེ་བཞིན་ས་གནས་ཀྱི་བོད་མིའི་བཟོ་གྲྭ་དང་། རྒན་གསོ་ཁང་། སློབ་གྲྭ། ལས་ཁུངས་ཁག་བཅས་ཀྱི་ནང་གཟིགས་ཞིབ་གནང་ཡོད་འདུག

ཟླ་འདིའི་ཕྱི་ཚེས་ ༢༥ ནས་ཕྱི་ཟླ་ ༨ པའི་ཚེས་ ༡༢ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་གྱི་རྒྱལ་ས་ལྡི་ལི་དང་། ཇཱ་མུ། ལ་དྭགས། བྷན་ཌཱ་རཱ་ནོར་རྒྱས་གླིང་། ཨོ་ཌི་ཤཱ་ཕུན་ཚོགས་གླིང་། མན་སྤར་ཕན་བདེ་གླིང་། ཝཱ་རཱ་ཎ་སཱི། སྡེ་ར་ལྡུན་ཁྱབ་ཁོངས་ནེ་ནི་ཏལ་བཅས་སུ་གནད་ཡོད་མི་སྣ་ཁག་ལ་མཇལ་འཕྲད་དང་། དེ་བཞིན་ས་གནས་བོད་མི་རྣམས་ལ་མཇལ་འཕྲད་གནང་རྒྱུའི་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་རེད།

ཟླ་འདིའི་ཕྱི་ཚེས་ ༢༧ ཉིན་ལ་དྭགས་རྒྱལ་ས་གླེ་རུ། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བདེ་སྲུང་བཀའ་བློན་རྒྱ་རི་སྒྲོལ་མ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་བཅས་ཀྱིས་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་སྐུ་ཞབས་པེ་ཊར་པ་ཝེལ་ (Petr Pavel) མཆོག་ལ་མཇལ་འཕྲད་གནང་ཡོད་ཅིང་། སྐབས་དེར་སྲིད་སྐྱོང་མཆོག་གིས། ད་ཐེངས་རྒྱལ་ཁབ་ཅིག་གི་སྲིད་འཛིན་འདི་གར་༧མགོན་པོ་གང་ཉིད་མཆོག་ལ་མཇལ་ཁ་ཞུས་པར་བཅར་བ་དང་། ང་ཚོ་ལྷན་དུ་དུས་ཚོད་བཏང་བ་ནི་ཐོག་མ་ཆགས་ཀྱི་ཡོད། དེར་བརྟེན་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་མཆོག་འདི་གར་དངོས་སུ་ཕེབས་འབྱོར་གྱིས་བོད་དོན་ལ་རྒྱབ་སྐྱོར་གནང་བར་བཀའ་དྲིན་ཆེ་ཞུ་རྒྱུ་ཡིན་ཞེས་གསུངས་འདུག

དེ་བཞིན་ཟླ་འདིའི་ཕྱི་ཚེས་ ༢༦ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་གཙོས་བཀའ་བློན་རྣམ་པས།  ༸སྐྱབས་རྗེ་ཁྲིག་སེ་རིན་པོ་ཆེ་སྐུ་འཕྲེང་ ༩ པ་ངག་དབང་འཇམ་དབྱངས་བྱམས་པ་བསྟན་འཛིན་མཆོག་ལ་མཇལ་བཅར་ཞུས་ཏེ། རིན་པོ་ཆེ་མཆོག་ནས་བྱང་ཐང་ཆུ་མུར་དུ་གནས་སྡོད་བོད་མི་རྣམས་ལ་དྭགས་གླེ་རུ་གཞིས་སྤོས་ཆེད་ས་ཆ་ཨེ་ཀར་ ༨ མ་ཟིན་ཙམ་གསོལ་སྩལ་གནང་བར་ཐུགས་རྗེ་ཆེ་ཞུས་ཡོད་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།