ཕྱི་ལོ་ ༡༨༩༨ ལོར་དབྱིན་ཇིའི་ས་ཁང་བདག་ཉར་མཁན་ཞིག་གིས་འཁྱེར་བའི་སངས་རྒྱས་ཀྱི་སྐུ་གདུང་གི་རིག་དངོས་ ༣༠༠ ཕྱིར་རྒྱ་གར་གཞུང་ལ་རྩིས་སྤྲོད་བྱས་ཡོད་འདུག
བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་འཛམ་གླིང་ནང་གྲགས་ཆེ་བའི་རིན་སྡུར་ཚོང་སྒྱུར་ཁང་སོ་ཐའི་བྷ་ (Sotheby) ཡིས། རྒྱ་གར་གཞུང་དང་ནང་པ་མང་པོའི་འབོད་སྐུལ་དང་གནོན་ཤུགས་འོག སངས་རྒྱས་ཀྱི་སྐུ་གདུང་གི་རིག་དངོས་རྩ་ཆེན་ ༣༠༠ ཕྱིར་རྒྱ་གར་གཞུང་ལ་བསློགས་ཡོད་ཅིང་། གནད་དོན་དེའི་ཐད་རྒྱ་གར་གྱི་སྲིད་བློན་མུ་དྷི་མཆོག་གིས། རིག་དངོས་ཕྱིར་སློག་བྱས་པའི་དོན་དག་ནི་དགའ་སྤོབས་སྐྱེས་དགོས་པ་དང་རྒྱ་གར་གྱི་རིག་དངོས་ཤུལ་བཞག་ལ་རྒྱལ་ཁ་ཐོབ་པ་ཆགས་ཀྱི་ཡོད། ཅེས་བརྗོད་འདུག་ལ། སངས་རྒྱས་བཅོམ་ལྡན་འདས་ཀྱི་སྐུ་གདུང་དང་འབྲེལ་བའི་རིག་དངོས་དེ་དག་ནི་ལོ་ངོ་ ༡༢༧ རྗེས་ནས་ཕྱིར་རྒྱ་གར་དུ་འབྱོར་བ་ཞིག་ཡིན་འདུག
འདི་ལོའི་ཕྱི་ཟླ་ ༥ བར་སོ་ཐའི་བྷ་ཡིས་རིག་དངོས་དེ་དག་ཧོང་ཀོང་ནང་རིན་སྡུར་གྱི་ལམ་ནས་ཚོང་སྒྱུར་བྱེད་རྩིས་བྱས་སྐབས། རྒྱ་གར་གཞུང་གིས་གནད་ཡོད་མི་སྣ་སོགས་མངགས་གཏོང་བྱས་ཏེ་ཁྲིམས་ཐོག་ནས་རིག་དངོས་དེ་དག་རྒྱ་གར་གྱི་ཡིན་ཚུལ་སོགས་ཀྱི་ཉེན་བརྡ་བཏང་བར་བརྟེན། དེ་རིང་སོ་ཐའི་བྷ་རིན་སྡུར་ཚོང་སྒྱུར་ཁང་གིས་རིག་དངོས་དེ་དག་ཕྱིར་རྒྱ་གར་ལ་རྩིས་སྤྲོད་བྱས་ཡོད་པ་དང་། ད་ལྟ་སངས་རྒྱས་ཀྱི་སྐུ་གདུང་དང་འབྲེལ་བའི་རིག་དངོས་དེ་དག་མོམ་བྷ་རུ་རྟེན་གཞི་བྱས་པའི་གྷོཌ་ར་ཇི་བཟོ་ཚོང་ (Godrej Industries Group) ཁང་དུ་ཉར་ཚགས་བྱས་ཡོད་འདུག
སོ་ཐའི་བྷ་རིན་སྡུར་ཚོང་སྒྱུར་ཁང་གིས་གནད་དོན་དེའི་ཐད། ང་ཚོས་འདས་པའི་ཟླ་གཉིས་ལྷག་གི་རིང་ཅ་དངོས་ཀྱི་བདག་པོ་དང་ཉོ་ཚོང་མཁན་གསར་པ། རྒྱ་གར་གཞུང་བཅས་དང་ལྷན་དུ་གྲོས་བསྡུར་རིམ་པ་བྱས་པའི་མཐར། རིག་དངོས་དེ་དག་རྒྱ་གར་ལ་རྩིས་སྤྲོད་རྒྱུ་བྱུང་བར་དགའ་ཚོར་ཆེན་པོ་བྱུང་ལ། ད་ལྟ་རིག་དངོས་དེ་དག་རྒྱ་གར་ལ་རྩིས་སྤྲོད་ཀྱིས་མི་འགྱང་བར་སྤྱི་དམངས་འགྲེམས་སྟོན་བྱེད་ཡུལ་ཞིག་ཏུ་འཇོག་རྒྱུ་རེད། ཅེས་བརྗོད་འདུག
རིག་དངོས་གསར་དུ་ཉོ་མཁན་རྒྱ་གར་གྱི་གྷོཌ་ར་ཇི་བཟོ་ཚོང་ཁང་གིས། ང་ཚོར་ལོ་རྒྱུས་ཀྱི་རིན་ཐང་ལྡན་པའི་རིག་དངོས་འདི་དག་རྩིས་སྤྲོད་ཀྱི་གོ་རིམ་ཁྲོད་རོགས་འདེགས་བྱེད་པའི་གོ་སྐབས་བྱུང་བར་དགའ་སྤོབས་བྱུང་། སངས་རྒྱས་ཀྱི་སྐུ་གདུང་དང་འབྲེལ་བའི་རིག་དངོས་འདི་དག་གིས་རིག་དངོས་ཁོ་ན་ཙམ་མིན་པར། འདི་དག་གིས་སྐལ་བ་མ་སྟོང་བར་དུ་སྙིང་རྗེ་དང་ཞི་བདེ། འགྲོ་བ་མིའི་རིགས་ཐུན་མོང་གི་རིག་དངོས་ཤུལ་བཞག་མཚོན་གྱི་ཡོད། ཅེས་བརྗོད་འདུག
ཕྱི་ལོ་ ༡༨༩༨ ལོར་དབྱིན་ཇིའི་ས་ཚོང་བདག་ཉར་མཁན་ཝི་ལིམ་པའེ་པུ་ (William Claxton Peppé) ལ་སངས་རྒྱས་ཀྱི་སྐུ་གདུང་དང་འབྲེལ་བའི་རིག་དངོས་དེ་དག་གནས་མཆོག་ལིམ་བུ་ནིའི་ཉེ་འཁྲིས་ས་འོག་ཅིག་ནས་ཐོག་མར་རྙེད་སོན་བྱུང་ཡོད་ཅིང་། སྐབས་དེར་སངས་རྒྱས་ཀྱི་རིང་བསྲིལ་གཙོ་བྱས་པའི་མུ་ཏིག་དང་གཡུ། རྡོ་རྗེ་ཕ་ལམ་དང་གསེར་ཤོག བུམ་པ་སོགས་ཤུལ་བཞག་རིག་དངོས་ཁྱོན་ ༡༨༠༠ ཙམ་རྙེད་ཡོད། དེའི་ཁྲོད་ཀྱི་སངས་རྒྱས་ཀྱི་རིང་བསྲིལ་དང་རིག་དངོས་མང་ཆེ་བ་སྐབས་དེའི་དབྱིན་ཇིའི་རྒྱ་གར་གཞུང་ལ་རྩིས་སྤྲོད་བྱས་ཡོད་པ་དང་། ཕྱིས་སུ་སངས་རྒྱས་ཀྱི་རིང་བསྲིལ་ཚང་མ་ཐའེ་ལན་ཌི་དང་སེངྒ་ལ། འབར་མ་བཅས་སུ་བགོ་འགྲེམས་བྱས་ཡོད་པ་ལོ་རྒྱུས་སྨྲ་བས་འགྲེལ་བརྗོད་བྱས་འདུག
ཕྱི་ལོ་ ༢༠༡༩ ཙམ་ནས་ཝི་ལིམ་པའེ་པུ་ (William Claxton Peppé) ཡི་ཁྱིམ་ཚང་གིས་རིག་དངོས་ ༣༠༠ དྲ་ལམ་དུ་ཚོང་འགྲེམས་གསལ་བརྡ་བཏང་བ་ནས་རྒྱལ་སྤྱིའི་ཚོང་སྒྱུར་གྱི་སྡིངས་ཆ་མང་པོའི་སྟེང་འགྲེམས་སྟོན་བྱས་ཡོད་པ་དང་། འདི་ལོའི་ཕྱི་ཟླ་ ༢ ནས་ ༥ བར་སོ་ཐའེ་བྷ་རིན་སྡུར་ཚོང་སྒྱུར་ཁང་གི་དྲ་ལམ་དུ་ཚོང་སྒྱུར་གྱི་གསལ་བསྒྲགས་སྤེལ་ཏེ། མཇུག་མཐར་ཧོང་ཀོང་ནང་ཚོང་སྒྱུར་བྱེད་གཏན་ཁེལ་བའི་གནས་ཚུལ་ཐོན་མ་ཐག རྒྱ་གར་གཙོ་བྱས་པའི་འཛམ་གླིང་ཡུལ་གྲུ་གང་སར་ནས་ནང་པའི་རིག་དངོས་ཞིབ་འཇུག་པ་དང་ནང་བསྟན་མཁས་དབང་། ནང་པའི་དབུ་འཁྲིད་སོགས་ཀྱིས་སངས་རྒྱས་ཀྱི་སྐུ་གདུང་དང་འབྲེལ་བའི་རིག་དངོས་དེ་དག་ནི་དད་ལྡན་ཁྲི་ཕྲག་མང་པོའི་གསོལ་འདེབས་བྱེད་ཡུལ་ཆགས་བསྡད་ཡོད་པས། རིག་དངོས་དེ་དག་ཚོང་སྒྱུར་བྱེད་མི་རུང་བའི་ཁར། རིག་དངོས་ཀྱི་བདག་དབང་རྒྱ་གར་ལ་ཡོད་པའི་བསམ་ཚུལ་དང་སྐྱོན་བརྗོད་མང་པོ་བྱས་ཡོད་འདུག
གསར་འགོད་པ། སྐལ་བཟང་སྦྱིན་པ།
