རྒྱ་ནག་རྐང་རྩེད་སྤོ་ལོའི་མཐུན་ཚོགས་ནང་ལྐོག་ཟ་རུལ་སུངས་ཀྱི་གནད་དོན་བསྟུད་མར་བྱུང་།

རྒྱ་ནག་རྐང་རྩེད་སྤོ་ལོའི་མཐུན་ཚོགས་སྒྲིག་ལམ་འགན་འཛིན་ཟུར་པ་ཝང་ཞའོ་ཕིན་གྱིས་ལྐོག་རྔན་འབོར་ཆེན་བླངས་བའི་ནག་ཉེས་འོག་ལོ་ ༡༠ དང་ཟླ་ ༦ གི་བཙོན་འཇུག་ཁྲིམས་ཐག་བཅད་ཡོད་འདུག

ཕྱི་ཟླ་ ༧ ཚེས་ ༣༠ ཉིན་རྒྱ་ནག་ཧུའུ་པེ་ཞིང་ཆེན་སུང་ཙེ་གྲོང་ཁྱེར་མི་དམངས་ཁྲིམས་ཁང་ཟེར་བས། རྒྱ་ནག་རྐང་རྩེད་སྤོ་ལོའི་མཐུན་ཚོགས་སྒྲིག་ཁྲིམས་འགན་འཛིན་ཟུར་པ་ཝང་ཞའོ་ཕིན་གྱིས་ལྐོག་རྔན་འབོར་ཆེན་བླངས་བའི་ནག་ཉེས་བཙུགས་ཏེ། ལོ་ ༡༠ དང་ཟླ་ ༦ རིང་བཙོན་འཇུག་ཁྲིམས་ཆད་དང་། རྒྱ་སྒོར་ཁྲི་ ༧༠ ཡིས་ཉེས་ཆད་བཅད་ཡོད་པ་མ་ཟད་རྒྱུ་ནོར་གཞུང་བཞེས་བཏང་ཡོད་འདུག

ཉེ་ལམ་རྒྱ་ནག་ཚེ་ཞིན་གསར་ཁང་གིས་དེ་འབྲེལ་གནས་ཚུལ་སྤེལ་བ་ལྟར་ན།  རྒྱ་ནག་གི་རྐང་རྩེད་སྤོ་ལོའི་མཐུན་ཚོགས་ཀྱི་ཁྱབ་ཁོངས་སུ་ལྐོག་ཟ་རུལ་སུངས་བྱས་པའི་དོན་རྐྱེན་མང་པོ་བྱུང་ཡོད་པའི་ཁྲོད། ཉེས་འཛུགས་ཁས་མ་བླངས་པའི་གྱོད་གཞི་བྱུང་མེད་ཀྱང་། རྒྱ་ནག་རྐང་རྩེད་སྤོ་ལོའི་མཐུན་ཚོགས་ཀྱི་སྒྲིག་ཁྲིམས་འགན་འཛིན་ཟུར་པ་ཝང་ཞའོ་ཕིན་ལ་ཞིབ་བཤེར་བྱས་ནས་ལོ་གཉིས་ཙམ་ཕྱིན་ཡོད་པ་རེད།

འདི་ལོའི་ཕྱི་ཟླ་ ༤ པའི་ནང་ཧུའུ་པེ་ཞིང་ཆེན་སོང་ཙི་གྲོང་ཁྱེར་མི་དམངས་ཁྲིམས་ཁང་དུ་ཁྲིམས་བཤེར་ཐོག་མ་འཚོགས་ཡོད་ཅིང་། སྐབས་དེར་ཝང་ཞའོ་ཕིན་ལ་ལྐོག་རྔན་རྒྱ་སྒོར་ཁྲི་ ༦༤༥ བླངས་བའི་ནག་ཉེས་བཙུགས་ཡོད་ཀྱང་། ཁོ་དང་ཁོའི་ཁྲིམས་རྩོད་པ་གཉིས་ཀྱིས་ནག་ཉེས་བཙུགས་པར་ཁས་ལེན་བྱས་མེད་པ་རེད།

ཕྱི་ལོ་ ༢༠༢༣ ལོའི་ཟླ་ ༣ ཚེས་ ༢༤ ཉིན་རྒྱ་ནག་སྒྲིག་ཁྲིམས་ཞིབ་བཤེར་ཁང་དང་། རྒྱ་ནག་ལུས་རྩལ་སྤྱི་ཁྱབ་ཁང་། ཧུའུ་པེ་ཞིང་ཆེན་ལྟ་སྐུལ་དོ་དམ་ཁང་སོགས་ཀྱིས་ཝང་ཞའོ་ཕིན་གྱིས་ཁྲིམས་འགལ་ཚབས་ཆེན་བྱས་པའི་དོགས་གཞིའི་གནད་དོན་ལ་ཞིབ་བཤེར་བྱས་ཡོད་པ་དང་། འདི་ལོའི་ཕྱི་ཟླ་ ༤ ཚེས་ ༡༦ ཉིན་སུང་ཙེ་གྲོང་ཁྱེར་མི་དམངས་ཁྲིམས་ཁང་གིས་ཝང་ཞའོ་ཕིང་གི་གྱོད་དོན་ཡོངས་གྲགས་ཐོག་འདྲི་གཅོད་བྱས་ཡོད་འདུག

ཝང་ཞའོ་ཕིན་ནི་ཕྱི་ལོ་ ༡༩༥༩ ལོར་རྒྱ་ནག་ཧྲན་ཞི་ཞིང་ཆེན་ཅི་ཧྲན་རྫོང་དུ་སྐྱེས་ཡོད་ཅིང་། ཕྱི་ལོ་ ༡༩༨༢ ལོར་པེ་ཅིན་ལུས་རྩལ་སློབ་གླིང་ནས་སློབ་མཐར་ཕྱིན། ཕྱི་ལོ་ ༡༩༨༨ ལོར་རྒྱ་ནག་ཆབ་སྲིད་ཁྲིམས་ལུགས་སློབ་ཆེན་དུ་ལུས་རྩལ་དང་འབྲེལ་བའི་ཐོག་ཆེད་སྦྱོང་བྱས་ཏེ་ཁྲིམས་ལུགས་རིག་པའི་སློབ་གནས་ཐོབ།  ཕྱི་ལོ་ ༢༠༠༢ ལོར་རྒྱ་ནག་ཆབ་སྲིད་ཁྲིམས་ལུགས་སློབ་ཆེན་གྱི་ལུས་རྩལ་ཁྲིམས་ལུགས་ཞིབ་འཇུག་ལྟེ་གནས་སུ་ལས་ཀ་བྱས། ཕྱི་ལོ་ ༢༠༠༩ ལོར་རྒྱ་ནག་རྐང་རྩེད་སྤོ་ལོའི་མཐུན་ཚོགས་སྒྲིག་ཁྲིམས་འགན་འཛིན་གྱི་ལས་འགན་འཁུར། ཕྱི་ལོ་ ༢༠༡༩ ལོར་རྒྱ་ནག་རྐང་རྩེད་སྤོ་ལོའི་མཐུན་ཚོགས་ཀྱི་སྐབས་ ༡༡ པའི་ཚོགས་ཆེན་སྟེང་དུ་ཡང་བསྐྱར་འགན་འཛིན་དུ་འདེམས་ཐོན་བྱུང་། ཕྱི་ལོ་ ༢༠༢༣ ལོའི་ནང་རྒྱ་ནག་སྒྲིག་ཁྲིམས་ཞིབ་བཤེར་ཁང་སོགས་ཀྱིས་ཞིབ་བཤེར་བྱེད་མགོ་བཙུགས་ཡོད་འདུག

གཞན་ཡང་། རྒྱ་ནག་ཧུའུ་པེ་ཞིང་ཆེན་ཐུང་ཧྲན་རྫོང་མི་དམངས་ཁྲིམས་ཁང་ཟེར་བས། རྒྱ་ནག་རྐང་རྩེད་སྤོ་ལོའི་རིམ་འདས་མཉམ་འགྲན་ཚད་ཡོད་ཀུང་སིའི་ལས་འཛིན་ལྷན་ཚོགས་ཀྱི་མགོ་འཛིན་ཟུར་པ་ལིའུ་ཅུན་གྱིས་ལྐོག་རྔན་བླངས་པའི་ནག་ཉེས་བཙུགས་ཏེ། ལོ་ ༡༡  བཙོན་འཇུག་ཁྲིམས་ཆད་དང་། རྒྱ་སྒོར་ཁྲི་ ༡༡༠ ཡིས་ཉེས་ཆད་བཅད་ཡོད་པ་མ་ཟད་རྒྱུ་ནོར་གཞུང་བཞེས་བཏང་ཡོད་འདུག

དེ་བཞིན་འདས་ལོའི་ཕྱི་ཟླ་ ༡༢ ཚེས་ ༡༣ ཉིན་རྒྱ་ནག་རྐང་སྤོལ་རུ་ཁག་གི་ཆེས་མཐོའི་སློབ་སྟོན་པ་ལི་ཐའེ་ཡིས་ཨ་སྒོར་ས་ཡ་ ༡༠ ལྷག་ལྐོག་ལེན་བྱས་ཡོད་པའི་ནག་ཉེས་འོག། ཁོ་ལ་མི་ལོ་ཉི་ཤུ་ཡི་བཙོན་འཇུག་ཁྲིམས་ཆད་དང་། ཆབ་སྲིད་ཀྱི་ཁེ་དབང་སོགས་འཕྲོག་ཡོད་པའི་གནས་ཚུལ་ཐོན་འདུག  ལོ་དེའི་ཕྱི་ཟླ་ ༡༢ པའི་ནང་རྒྱ་ནག་རྒྱལ་ཡོངས་རྐང་རྩེད་སྤོ་ལོ་མཐུན་ཚོགས་ཀྱི་དྲུང་ཆེ་ལུའུ་ཡེ་ཡིས་དངུལ་སྒོར་གཡོ་ལེན་དང་ལྐོག་བཟའ་བྱས་པའི་ནག་ཉེས་གཡོགས་ནས་མི་ལོ་བཅུ་གཅིག་གི་བཙོན་འཇུག་ཁྲིམས་ཆད་དང་རྒྱ་སྒོར་ས་ཡ་ ༣།༦ གི་ཉེས་ཆད་བཅད་ཡོད། ཡང་རྒྱ་ནག་རྒྱལ་ཡོངས་རྩེད་འགྲན་གཟུ་དཔང་དོ་དམ་ཚན་པའི་འགན་འཛིན་ཟུར་པ་ཐན་ཧའེ་ཡིས་དངུལ་སྒོར་ལྐོག་བཟའ་བྱས་པའི་ནག་ཉེས་འོག་མི་ལོ་དྲུག་དང་ཕྱེད་ཀའི་བཙོན་འཇུག་ཁྲིམས་ཐག་དང་། ཨ་སྒོར་འབུམ་ཉི་ཤུ་ལྷག་གི་དངུལ་ཆད་བཅད་འདུག ལོ་དེའི་ཕྱི་ཟླ་  ༣ ནང་རྒྱ་ནག་རྒྱལ་ཡོངས་རྐང་རྩེད་སྤོ་ལོའི་མཐུན་ཚོགས་ཀྱི་འགན་འཛིན་ཟུར་པ་ཁྲིན་ཞིས་ཡོན་གྱིས་རྒྱ་སྒོར་ས་ཡ་ ༨༡།༠༣ གྱི་ལྐོག་རྔན་བླངས་པའི་ནག་ཉེས་འོག་ཚེ་བཙོན་གྱི་ཁྲིམས་ཐག་བཅད་དེ། མི་ཚེ་གང་བོར་ཆབ་སྲིད་ཀྱི་དབང་ཆ་མེད་པར་བཟོས་པ་མ་ཟད། མི་སྒེར་གྱི་རྒྱུ་ནོར་ཚང་མ་གཞུང་བཞེས་བཏང་ཡོད་འདུག དེ་བཞིན་ཕྱི་ཟླ་ ༣ པའི་ནང་རྒྱ་ནག་རྐང་རྩེད་སྤོ་ལོ་ལྷན་ཚོགས་ཀྱི་རྒྱུན་ལས་དྲུང་ཡིག་གཞོན་པ་ཁྲིན་ཡུང་ཉིང་གིས་ལྐོག་རྔན་བླངས་བའི་ནག་ཉེས་འོག་ལོ་ ༡༤ བཙོན་འཇུག་ཁྲིམས་ཆད་དང་། རྒྱ་སྒོར་ཁྲི་ ༢༢༠ ཉེས་ཆད་བཅད་ཡོད་པ་སོགས་སྔ་རྗེས་སུ་ལྐོག་ཟ་རུལ་སུངས་ཀྱི་གནད་དོན་བསྟུད་མར་བྱུང་ཡོད་པ་རེད།

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།