གོ་སྟོན་གྱི་རྟེན་འབུལ། ངའི་སེམས་ཁོངས་ན་ཡོད་པའི་མི་མངོན་པའི་རྒྱལ་ཁབ་དེ་ལ་བདེན་རྟགས་ཤིག

བསྟན་འཛིན་ཀུན་དགས་དབྱིན་ཡིག་ཏུ་བརྩམས།
ཚེ་རིང་དོན་གྲུབ་ཀྱིས་བོད་ཡིག་ཏུ་བསྒྱུར།
འགྱུར་རྩོམ་ཁུངས། བོད་ཀྱི་དུས་བབ།

ཕྱི་ལོ་ ༡༩༦༠ ནང་རྒྱ་གར་ཧི་མ་ལ་ཡའི་ས་ཁུལ་ག་གེ་མོ་ཞིག་གི་ལམ་བཟོ་ཡུལ་ཞིག་ཏུ་བོད་པའི་ཨ་མ་ལགས་ཤིག་གིས་བྱིས་པ་དམར་འབྱར་ཞིག་རྒྱབ་ཏུ་ཁུར་ཏེ། ས་བརྐོ་རྡོ་སློག་བྱེད་བཞིན་པའི་འདྲ་པར་ཞིག་གིས་བསྟན་འཛིན་ཀུན་དགའ་ལགས་ལ་བཙན་བྱོལ་དུ་ཐོག་མར་གྱར་སྐབས་གནས་སྟངས་ཡ་ང་ཡང་ཆོད་སེམས་བརྟན་པའི་ཁོང་གི་རྨོ་ལགས་དང་། དེ་བཞིན་བོད་མི་མི་རབས་གསུམ་གྱིས་རྒྱ་དམར་གྱིས་རང་ཉིད་ཀྱི་ཕ་ཡུལ་བཙན་བཟུང་བྱས་པ་ལ་ཁ་གཏད་གཅོག་ཆེད་དུ་གསོན་པོར་གནས་རྒྱུའི་སྙིང་སྟོབས་བཅངས་ཏེ། ༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་དག་པའི་དབུ་ཁྲིད་འོག་བོད་མི་རིགས་ཀྱི་ངོ་བོ་དང་རེ་བ་གསོན་པོར་ཉར་ཡོད་པ་རྣམས་ཡིད་ངོར་དྲན་དུ་བཅུག

ཁྱད་འཕགས་ཀྱི་ནུས་རྩལ་ལྡན་པའི་མིའི་རིགས་ཁོ་ན་འགྲོ་ཕོད་པའི་རི་བོའི་ཁྲོད་ནས་འགྲོ་ལམ་གཏོད་དེ། ང་ཚོའི་རྒན་རབས་རྒན་པ་ཚོས་རྒྱལ་ཁབ་ཅིག་གི་མ་འོངས་པ་དེ་ཁོང་ཚོའི་སྒལ་པར་འཁྱེར་ནས་བསླེབས་ཡོད། ལྷ་སྲུང་མས་སྡོང་གྲོགས་ཀྱི་ཕྱག་བསྐྱངས་མེད་ལ། མི་རིགས་གཞན་ང་ཚོའི་རྒྱབ་ཏུ་ལངས་མེད། ང་ཚོའི་རྒན་རབས་པ་ཚོས་ཧང་སངས་དགོས་པའི་བྱ་གཞག་དེ་བསྒྲུབས་པར་བརྟེན་དེ་རིང་ངས་རང་ཉིད་ཀྱི་ཚོར་སྣང་རྣམས་ཡིག་ཐོག་ཏུ་འགོད་རྒྱུའི་ཉིན་མོ་དེ་བྱུང་།

ངས་ང་ཚོ་ཚང་མ་གཅིག་ཏུ་སྦྲེལ་བར་བྱེད་མཁན་གྱི་བྱམས་བརྩེའི་བདག་ཉིད་ཅན་གྱི་སྟོན་པ་དང་ཁོང་གིས་གསུངས་པའི་དམ་པའི་ཆོས་ཀྱི་བཀའ་དྲིན་སྙིང་བཅངས་ཞུ་བཞིན་ཡོད། ང་ཚོར་ཡོད་པ་ནི་དད་པ་ཁོ་ན་སྟེ། ནང་དུ་མཆེད་བཞིན་པའི་དད་པའི་མེ་ལྕེས་ངལ་བའི་གངས་ཕྱིད་ཐམས་ཅད་བཞུར། ང་ཚོ་ནི་བདེ་ལྷོད་དུ་སྡོད་རྒྱུར་སྐྱེས་པ་མིན་པར། ཤབ་ཤུབ་ཏུ་བཏོན་པའི་ཁ་དོན་གྱིས་སྐྱེད་བསྲིངས་དང་། ཁུ་སིམ་སིམ་གྱི་རྣམ་འགྱུར་གྱིས་བཟོ་དབྱིབས་གཏོད། རླུང་འཚུབ་ཀྱིས་སྟོབས་སྤེལ་བའི་འགྱེལ་ས་ནས་ལངས་ཐུབ་པའི་རང་གཤིས་ཤིག་དང་སྦྲགས་ཏེ་སྐྱེས།

ངའི་རྨོ་ལགས་ནི་ས་གཞིའི་དབྱིབས་གཏོད་པའི་ཡངས་ཤིང་རྒྱ་ཆེ་བའི་རྩྭ་ཐང་སྟེང་ཕྱོགས་ངེས་མེད་དུ་རྒྱུ་བའི་རླུང་དང་འདྲ་བའི་བུ་མོ་ཞིག་ཏུ་སྐྱེས་ཡོད་མོད། འོན་ཀྱང་ཁོང་ས་བརྐོ་རྡོ་སློག་གི་ལམ་བཟོའི་ལས་ལ་ཞུགས་དགོས་བྱུང་བ་ནི་སྙན་གྲགས་ཀྱི་རྗེས་བསྙེགས་པ་མ་ཡིན་པར་འཚོ་གནས་ཀྱི་རྗེས་བསྙེགས་པ་ཞིག་རེད། ཁོང་གཅིག་པུས་བུ་ཕྲུག་བཞི་གཉོར་སྐྱོང་བྱ་ཆེད་དུ་ཉིན་མོ་ཚ་གདུང་ཆེ་བ་དང་མཚན་མོ་གཉིད་མེད་པའི་ངལ་རྩོལ་ལ་ཞུགས་དགོས་བྱུང་། བསྔགས་བརྗོད་མེད་ལ། གཟེངས་རྟགས་མེད། ཁོང་གི་དཀའ་སྤྱད་ཀྱི་འབད་བརྩོན་རྣམས་ནམ་ཡང་མི་ནུབ་པར་གནས་ཆེད་ཀྱི་འདྲ་པར་ཡང་མེད། ཡོད་པ་ནི་ཁོང་གིས་བུ་ཕྲུག་རྣམས་ཉིན་གཅིག་ལ་ཡིན་ནའང་འཚོ་གནས་ཐུབ་ཆེད་དུ་ལྟ་སྐྱོང་བྱ་རྒྱུའི་ཨུ་ཚུགས་མཐའ་སྐྱེལ་དང་མཁྲེགས་བཟུང་གི་ཆོད་སེམས་དེ་རེད།

ངའི་པཱ་ལགས་ནི་རྨོ་ལགས་ཀྱི་སྒལ་པར་འཁྱེར་ཡོད་པའི་རུས་པགས་ཙམ་ལས་མེད་པའི་བྱིས་པ་དམར་འབྱར་ཞིག་སྟེ། ཁོང་གིས་ཚིག་འབྲུ་གཅིག་ཀྱང་སྨྲ་མི་ཤེས་པའི་གོང་ནས་རྨོ་ལགས་ཀྱི་ངལ་བ་ཁྱད་གསད་ཀྱི་འཐབ་རྩོད་ནང་ཚེ་སྲོག་གི་དབུགས་རྔུབ་བཞིན་ཡོད། པཱ་ལགས་ནི་ཁོང་གི་ཨ་མ་ལགས་ཀྱི་ཁུ་སིམ་སིམ་གྱི་རྣམ་འགྱུར་གྱིས་ངས་དུས་ནམ་ཡང་འབྲི་ཐུབ་ངེས་ཀྱི་གཏམ་བཤད་ཀུན་ལས་ལྷག་པར་སྒྲ་དོན་གསལ་བར་གྲགས་བཞིན་པའི་འཇིག་རྟེན་ཞིག་གི་ནང་འཚར་ལོངས་བྱུང་ཡོད། ཁུ་སིམ་སིམ་གྱི་རྣམ་འགྱུར་དེ་ནི་དོན་གྱིས་སྟོང་པ་མ་ཡིན་པར། ཟབ་ཅིང་རྒྱ་ཆེ་བའི་དོན་གྱིས་ཁེངས་ཡོད། རྣམ་འགྱུར་དེས་ཕམ་ཉེས་དང་། ཡུལ་གྱར། བཙན་བྱོལ། དཀའ་སྤྱད་སྡུག་རུས་ཀྱི་སྒྲུང་གཏམ་བརྗོད་ཡོད། པཱ་ལགས་ཁོང་གི་གཉིད་གླུ་ནི་དྲག་ཆར་རླུང་འཚུབ་ཡིན་ལ། ཁོང་གི་རྩེད་ཆས་ནི་རྡོ་ཧྲུག་ཡིན། ཁོང་གི་དགོད་སྒྲ་ནི་ངེས་གཏན་མེད་པའི་གས་ཁའི་གསེང་ནས་གྲགས་ཡོད། ཡིན་ནའང་ཁོང་ནི་སྟོབས་ཆེན། བབ་རླིང། ཁུ་སིམ་སིམ་ཞིག་ཏུ་ཆེར་ལོངས་ཏེ། ཁོང་གི་ཨ་མ་ལགས་ཀྱི་དཀའ་སྡུག་རྣམས་ནམ་ཡང་ཆུད་ཟོས་སུ་གཏོང་རྒྱུ་མིན་པའི་སེམས་ཁོང་གི་དམ་བཅའ་བརྟན་པོར་བཟུང་ནས་གནས་ཡོད།

ཁོང་རྣམས་ཀྱིས་གཞན་གྱི་སྙིང་རྗེ་ལ་རེ་ལྟོས་བཅངས་མེད་ལ། གཞན་གྱི་ངོ་བསྟོད་དང་ལེགས་སྐྱེས་ལ་རེ་ལྟོས་དེ་བས་ཀྱང་བཅངས་མེད། ཁོང་རྣམས་ལ་དགོས་པ་ནི་མདུན་ཕྱོགས་སུ་བསྐྱོད་རྒྱུའི་ལམ་གཅིག་དང་། གོ་སྐབས་གཅིག མཁའ་དབུགས་གཅིག་ཁོ་ན། ཁོང་རྣམས་ཀྱིས་ནམ་ཡང་མི་མཐོང་བར་སྲིད་ཀྱང་གང་ལྟར་མཐོང་ངེས་པར་ཡིད་ཆེས་ཀྱིས་ཁེངས་པའི་སང་ཉིན་ཞིག་གི་ཆེད་དུ་འཚོ་གནས་བྱས་ཡོད། ཡིད་ཆེས་དེ་ནི་ལས་སླ་མོར་ཡོང་དཀའ། ཡིད་ཆེས་དེ་ནི་འཛམ་གླིང་གི་འགྱུར་ལྡོག་ལ་ལྟ་ཞིབ་བྱེད་བཞིན་དུ་སྐྱེས་ཡོད་ཅིང་། ད་ལྟ་ཡིན་ནའང་ཡིད་ཆེས་དེ་བློས་གཏོང་མི་བྱ་རྒྱུའི་གདམ་ཀ་བྱེད་བཞིན་ཡོད།

ལྟོས་དང་། ངས་འདིར་རང་ཉིད་ཀྱི་འཇམ་ཞིང་མཉེན་པའི་ལག་ཏུ་སྨྱུ་གུ་ཞིག་བཟུང་སྟེ་ཀྲོང་ངེར་བསྡད་ཡོད། ངས་ས་རྡོ་ནམ་ཡང་འཁྱེར་མ་མྱོང་། ངས་འཁྱེར་བ་ནི་ཁོང་ཚོའི་སྒྲུང་གཏམ་རེད་ལ། སྒྲུང་གཏམ་དེ་དག་གིས་ང་འཁྱེར་བཞིན་ཡོད། ཁོང་ཚོའི་དཀའ་སྡུག་ནི་ཁོང་ཚོ་དང་མཉམ་དུ་མཇུག་སྒྲིལ་བ་མ་རེད་ལ། ཁོང་ཚོའི་སྟོབས་ཤུགས་ཀྱང་ཁོང་ཚོ་དང་མཉམ་དུ་མཇུག་སྒྲིལ་བ་མ་རེད། དེ་དག་ནི་རྒྱུན་ཆད་མེད་པའི་ཆུ་རྒྱུན་ཞིག་དང་། མི་རབས་ནས་མི་རབས་བརྒྱུད་དེ་ཤབ་ཤུབ་ཏུ་འདོན་པའི་ཁ་འདོན་དང་འདྲ་བར་བརྒྱུད་སྤྲོད་བྱེད་བཞིན་ཡོད། ངས་འབྲི་བཞིན་པའི་བརྗོད་པ་རེ་རེའི་ནང་ཁོང་ཚོའི་བློས་གཏོང་གིས་ཁེངས་ཡོད་ཅིང་། ལོ་རྒྱུས་ཀྱི་འཕེལ་རིམ་ཁྲོད་ངའི་ལག་ནས་བཟུང་སྟེ་ལམ་སྣེ་འདྲེན་མཁན་གྱི་ལག་པ་དེ་དག་ལ་ངས་ནམ་ཡང་རེག་མ་མྱོང་ཡང་། ངས་བདམས་པའི་ཚིག་འབྲུ་རེ་རེར་ལག་པ་དེ་དག་གིས་རེག་བཞིན་ཡོད།

ངས་མི་ཚེ་འདི་དང་དུ་བླངས་ཏེ་བདམས་པ་ཞིག་མ་ཡིན་ནའང་། ངས་མི་ཚེ་འདི་གཞན་ཞིག་དང་བརྗེ་སྒྱུར་ནམ་ཡང་བྱེད་མི་སྲིད། མིང་འདི་དང་། ཁྲག་འདི། དཀའ་སྡུག་འདི། དེ་དག་ཚང་མ་ངའི་རེད། དེ་དག་གི་ནང་དུ་ངས་དོན་སྙིང་མཐོང་། ངའི་ད་ཡོད་ཀྱི་འབོད་སྒྲ་ནི་འབོད་སྒྲ་གྲག་རྒྱུ་མ་བྱུང་བའི་ཁོང་རྣམས་ལ་བརྟེན་ནས་བྱུང་། ངའི་ཞི་བདེའི་འཚོ་བ་འདི་ནི་ས་རུད་དང་མེ་མདའི་སྐད་སྒྲའི་ཉེ་འགྲམ་དུ་ཉལ་བའི་ཁོང་རྣམས་ལ་བརྟེན་ནས་བྱུང་། ངའི་རང་དབང་ནི་རང་དབང་ལ་ནམ་ཡང་ལོངས་སུ་སྤྱོད་མ་མྱོང་ཡང་སྙིང་སྟོབས་ལ་ནམ་ཡང་ལྕགས་སྒྲོག་བརྒྱབ་ཐུབ་མེད་པའི་ཁོང་རྣམས་ཀྱི་བཀའ་དྲིན་ལ་བརྟེན་ནས་བྱུང་།

ངས་རྨོ་ལགས་ཀྱི་ཁུ་སིམ་སིམ་གྱི་རྣམ་འགྱུར་དང་། པཱ་ལགས་ཀྱི་རེ་བ། ཨ་མ་ལགས་ཀྱི་མི་མངོན་པའི་ནུས་སྟོབས། ས་ཁྲའི་སྟེང་མི་གསལ་ཡང་ངའི་རུས་པའི་སྟེང་བཀོད་ཡོད་པའི་ངའི་རྒྱལ་ཁབ་བཅས་འཁྱེར་བཞིན་ཡོད། ངའི་རྒྱལ་ཁབ་གཞན་གྱིས་བཙན་འཕྲོག་བྱས་ཡོད་ཀྱང་ནམ་ཡང་རྩ་མེད་གཏོང་མི་ཐུབ། ངའི་རྒྱལ་ཁབ་ནི་ང་ཚོའི་སྐད་ཡིག་དང་། ང་ཚོའི་མར་མེ། ང་ཚོའི་རྒན་རྒོན་རྣམས་ཀྱི་གཉེར་རིས། དེ་བཞིན་གྲང་ངར་ཆེ་བའི་ལ་ཀླུང་གི་ཁྲོད་དུ་གྲགས་བཞིན་པའི་ལ་གླུ་བཅས་ཀྱི་ནང་དུ་གནས་ཡོད།

ངའི་རྒན་རབས་པ་ཚོས་དཀའ་སྡུག་གི་རི་བོ་བཏེགས་དགོས་དོན་ནི་ང་ཉམ་དམའ་བོའི་ངང་བསྐྱོད་རྒྱུའི་ཆེད་དུ་མིན། ཁོང་ཚོས་དཀའ་སྡུག་གིས་ཁེངས་པའི་གཞན་ཡུལ་དུ་ས་བརྐོ་རྡོ་སློག་གི་ལམ་བཟོར་ཞུགས་ཏེ་བུ་ཕྲུག་རྣམས་སྐྱོང་དགོས་དོན་ནི་ང་ཚོའི་དྲན་ཡུལ་ནས་བརྗེད་ཆེད་དུ་མ་རེད། ཁོང་རྣམས་ཀྱིས་རང་ཉིད་ཀྱི་བུ་ཕྲུག་ཚོས་མགོ་བོ་དུད་དེ་བསྐྱོད་མི་དགོས་པའི་འབྱུང་འགྱུར་ཞིག་རྨིས་ཡོད། དེར་བརྟེན་ངས་མགོ་བོ་དུད་དེ་བསྐྱོད་ཀྱི་མེད། ངས་ཁོང་རྣམས་ཀྱི་དྲན་གསོ་དག་ངའི་རྒྱབ་རྟེན་དང་། ཁོང་རྣམས་ཀྱི་རྨི་ལམ་དག་ངའི་ཕྱོགས་སྟོན་འཁོར་ལོར་བརྟེན་ཏེ་ཡར་ལང་བཞིན་ཡོད།

བྱས་ཙང་ངས་དྲན་བཞིན་ཡོད། དབུགས་ཀྱི་རྒྱུ་བ་རེ་རེ་བཞིན་དྲན་བཞིན་ཡོད། མདུན་ཕྱོགས་སུ་སྤོས་པའི་གོམ་སྟབས་རེ་རེའི་ནང་ངས་འདས་དོན་ལ་ཕྱིར་བཤིག་གིས་ངོས་འཛིན་ཐོབ་མེད་པའི་ཆེ་མཐོང་དང་ཕྱིར་འགྱངས་བྱུང་ཡོད་པའི་རྨི་ལམ་གྱི་ཁུར་པོ་དག་འཁྱེར་བཞིན་ཡོད།

ང་ནི་འབོད་སྒྲ་གཅིག་ཁོ་ན་མ་ཡིན་པར། ལྷགས་རླུང་གི་ཁྲོད་ན་མཆེད་བཞིན་པའི་ཁ་འདོན་དང་། ཁུ་སིམ་སིམ་གྱི་རྣམ་འགྱུར་སྟོང་ཚོ་མང་པོའི་བྲག་ཆ་ཞིག ང་ནི་བདེ་ལྷོད་དུ་སྡོད་རྒྱུར་སྐྱེས་པ་མ་ཡིན་པར་རྒྱུན་སྐྱོང་རྒྱུར་སྐྱེས།

སྐབས་རེར་ངའི་སེམས་ནང་ཁོང་རྣམས་ཀྱིས་ངའི་རྨི་ལམ་སྒྲུབ་ཆེད་དུ་རང་ཉིད་ཀྱི་རྨི་ལམ་ག་ཚོད་བློས་གཏོང་བྱས་པ་ཡིན་ནམ། ངས་རང་དབང་ངང་དབུགས་གཏོང་ཐུབ་ཆེད་དུ་རང་ཉིད་ཀྱི་དགོད་སྒྲ་ག་ཚོད་འཁྱུར་མིད་བཏང་བ་ཡིན་ནམ། ངས་ཉི་འོད་འདིའི་འོག་ཏུ་ཡི་གེ་འབྲི་ཐུབ་ཆེད་དུ་ཁོང་རྣམས་ཀྱིས་ཉི་འོད་ཀྱི་དྲོད་འཇམ་མེད་པར་དུས་ཡུན་ག་ཚོད་བསྐྱོད་པ་ཡིན་ནམ་སྙམ། ཉི་འོད་འདིའི་འོག་ཏུ་ངས་རྩོམ་འདི་འབྲི་དགོས་དོན་ནི་སྨྲེ་ངག་འདོན་ཆེད་དུ་མ་ཡིན་པར་ཆེ་བསྟོད་ཞུ་ཆེད་དུ་ཡིན། སྙིང་རྗེའི་བསམ་པ་སློང་ཆེད་དུ་མ་ཡིན་པར་དྲན་སྐུལ་ཞུ་ཆེད་དུ་ཡིན། ངའི་སྒྲུང་གཏམ་ནི་ང་གཅིག་པུའི་སྒྲུང་གཏམ་མ་རེད། དེ་ནི་ཁག་ཅིག་མེད་པར་གྱུར་ཟིན་ཞིང་ཁག་ཅིག་དཀའ་སྡུག་གིས་གུད་ཡོད་ཀྱང་ཚང་མ་དཔའ་སྟོབས་ཅན་ཞེ་གཅིག་ཡིན་པའི་ཚེ་སྲོག་སྟོང་ཚོ་མང་པོ་གཅིག་ཏུ་སྦྲེལ་བའི་སྒྲུང་གཏམ་ཞིག་རེད།

ད་ཆ་ངས་མི་རིགས་ཤིག་གི་ངོ་བོ་ནི་རྒྱལ་དར་དང་ཡིག་ཆའི་གནད་དོན་ཞིག་མ་ཡིན་པར། དྲན་ཤེས་ཀྱི་གནད་དོན་ཏེ། རྩམ་པའི་དྲི་བསུང་དང་། ཁ་འདོན་གྱི་ཤབ་ཤུབ་ཀྱི་སྒྲ། རྒྱལ་གླུ་གཏོང་སྐབས་འཆོར་བའི་མིག་ཆུ་བཅས་ཀྱི་གནད་དོན་ཡིན་པ་ཤེས། ཁྱེད་ཅག་ནི་ཕན་ཚུན་ནམ་ཡང་བློས་གཏོང་བྱས་མ་མྱོང་བའི་མི་རིགས་ཤིག་གི་ཁོངས་སུ་གཏོགས་པ་ནི་རྩ་ཆེའི་ཤེས་བྱ་རེད། ངས་ཞོགས་ལྟར་གཉིད་ལས་སད་སྐབས་རང་ཉིད་ནི་རྒྱུན་ཞིག་དང་། རང་ཉིད་ནི་ཁོང་ཚོའི་དཀའ་སྡུག་ལས་བྱུང་བའི་བརྡ་ལན། རང་ཉིད་ནི་ཁོ་ཚོའི་བསྐྱར་ལོག་ཅིག་ཡིན་པར་དྲན་སྐུལ་བྱེད་བཞིན་ཡོད།

ངས་ཁོང་རྣམས་ཀྱི་སྒྲུང་གཏམ་དང་། ཁོང་རྣམས་ཀྱིས་བཏོན་པའི་ཁ་འདོན། ཁོང་རྣམས་ཀྱིས་མཚོན་སྲུང་ལྟར་གྱོན་པའི་སྙིང་སྟོབས་བཅས་འཁྱེར་བཞིན་ཡོད། དེ་དག་ནི་ངས་དགའ་ཞིང་སྤྲོ་བའི་ངང་འཁྱེར་འདོད་པའི་ཁུར་པོ་ཞིག་རེད། གང་ལགས་ཤེ་ན་ཁུར་པོ་དེའི་ནང་མི་རབས་གཅིག་ནས་གཅིག་ཏུ་ཁུ་སིམ་སིམ་ངང་བརྒྱུད་སྤྲོད་བྱེད་པའི་ནུས་སྟོབས་ཤིག་སྟེ། དངོས་སུ་མ་སྨྲོས་ཀྱང་དོན་དུ་གོ་བརྡ་འཕྲོད་བཞིན་ཡོད་པའི་འགྱེལ་ས་ནས་ལངས་ཐུབ་པ་དགོས་པའི་སྙིང་སྟོབས་ཀྱི་འཕར་ལྡིང་ལྡན་ཡོད།

ཞོགས་ལྟར་ང་ཡར་ལངས་སྐབས་ཁོང་རྣམས་ཀྱི་སྙིང་སྟོབས་ཀྱང་ང་དང་མཉམ་དུ་ལང་བཞིན་ཡོད་ལ། ཁོང་རྣམས་ཀྱི་ཁུ་སིམ་སིམ་གྱི་རྣམ་འགྱུར་གྱིས་བརྗོད་ཚིག་གཞན་ཀུན་ལས་ལྷག་པར་སྒྲ་དོན་གསལ་བར་གྲགས་ཏེ་ང་ལ་གསོན་པོར་སྡོད་རྒྱུ་དེ་བཙན་གནོན་ལ་མགོ་མི་སྒུར་བའི་བྱ་སྤྱོད་ཅིག་ཡིན་པའི་དྲན་སྐུལ་བྱེད་བཞིན་ཡོད། ངས་འབྲི་བཞིན་པ་ནི་ཚིག་ཙམ་ཞིག་མ་རེད། ངས་ཁོང་རྣམས་ཀྱི་ལག་རྗེས་མདུན་ཕྱོགས་སུ་འཁྱེར་ཏེ། ཁོང་རྣམས་ཀྱིས་མངོན་དུ་མ་འགྱུར་བའི་རྨི་ལམ་དག་ལ་ཚེ་སྲོག་གི་མཁའ་དབུགས་སྦྱིན་བཞིན་ཡོད།

དེར་བརྟེན་འདིར་ལང་སྡོད་མཁན་ནི་ང་གཅིག་པུ་མ་ཡིན་པར། མུ་ནག་གི་ཁྲོད་དུ་རེ་བའི་འབོད་སྒྲ་ཤབ་ཤུབ་ཏུ་སྒྲོག་མཁན་གྱི་འབོད་སྒྲ་གྲངས་མེད་ཀྱི་བྲག་ཆ་གསོན་པོ་ཡང་ཡོད་པ་རེད། ངའི་མི་ཚེ་ནི་ཁོང་རྣམས་ཀྱི་བརྡ་ལན་རེད། ངའི་འབོད་སྒྲ་ནི་ཁོང་རྣམས་ཀྱི་རྒྱལ་ཁ་རེད། ང་ཐག་རིང་པོ་ཅི་ཙམ་བསྐྱོད་མིན་ལ་མ་ལྟོས་པར། ངས་རྩོམ་ཇི་ཙམ་འབྲི་མིན་ལ་མ་ལྟོས་པར། ངས་དབུགས་ཇི་ཙམ་རིང་པོ་གཏོང་མིན་ལ་མ་ལྟོས་པར། འགྲུལ་བཞུད་དེ་ནི་ང་གཅིག་པུའི་མ་ཡིན་པ་ངས་ཤེས།

ང་ནི་ཁོང་རྣམས་ལ་གཏོགས། ཁོང་རྣམས་ང་ལ་གཏོགས། ང་ཚོ་ནི་ནམ་ཡང་སྒྲུང་གཏམ་ཞིག་གིས་མཉམ་དུ་བཅིངས་ཡོད། འཛམ་གླིང་འདིས་སྒྲུང་གཏམ་དེ་འབྲི་གསུབ་གཏོང་ཐབས་བྱས་ཡོད་ཀྱང་ནམ་ཡང་སུབ་མི་ཐུབ། ང་ཚོ་ནི་སྙིབས་སྟོབས་ནང་རྩ་བ་ཚུགས། ཁུ་སིམ་སིམ་གྱི་རྣམ་འགྱུར་གྱིས་རྣམ་པ་གཏོད་དེ། ནམ་ཡང་འགོག་ཏུ་མེད་པར་གནས་ཡོད།

ང་ནི་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གཡོ་བ་མེད་པའི་བྱམས་བརྩེའི་དབུ་ཁྲིད་དང་ལམ་སྟོན་གྱི་ཐུགས་རྗེའི་གྲིབ་བསིལ་འོག་རང་དབང་ཅན་གྱི་འཛམ་གླིང་འདིའི་ནང་གསོན་པོར་འཚར་ལོངས་འབྱུང་བཞིན་ཡོད། ངའི་ཤེས་ཡོན་དང་། ངའི་ངོ་བོ། བོད་དོན་ཐོག་རང་དབང་ངང་གཏམ་བཤད་བྱེད་ཐུབ་པའི་ངའི་ནུས་རྩལ་བཅས་པ་ཚང་མ་ནི་བཙན་བྱོལ་ནང་༸མགོན་པོ་གང་ཉིད་ཀྱིས་གཏོད་གནང་བའི་ལམ་བུ་དེའི་ནང་རྩ་བ་ཚུགས་ཡོད། བྱེས་སུ་བོད་མི་འབུམ་གཅིག་དང་ཕྱེད་ཙམ་ལས་མེད་ནའང་ང་ཚོས་དྲང་བདེན་དང་། ཞི་བདེ། རང་ཉིད་ཀྱི་རིག་གཞུང་ཕྱུག་པོ་དེ་དག་སྲུང་སྐྱོབ་བྱ་རྒྱུ་བཅས་ཀྱི་དོན་དུ་འཐབ་རྩོད་ཀྱི་རྒྱུན་སྐྱོང་བཞིན་ཡོད། དེ་དག་ཚང་མ་ནི་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ངལ་འཛེམས་མེད་ཀྱིས་བསྐྱངས་གནང་བའི་མཛད་འཕྲིན་དང་ཐུགས་སྟོབས་ལ་བརྟེན་ནས་བྱུང་བ་ཞིག་རེད། ངས་༸མགོན་པོ་གང་ཉིད་ཀྱི་སྐུའི་གོ་སྟོན་གྱི་འཁྲུངས་སྐར་ཉིན་མོར་སྙིང་ཁོངས་རུས་པའི་གཏིང་ནས་བཀའ་དྲིན་རྗེས་དྲན་ཞུ་བཞིན་ཡོད། ཁོང་གི་འཆར་སྣང་དང་གཞན་ཕན་མཛད་འཕྲིན་ནི་ཆེས་མུན་ནག་གི་དུས་འདིའི་ནང་ང་ཚོར་སྦྱིན་པའི་འོད་སྣང་དང་ང་ཚོར་ད་དུང་ཡང་རེ་བ་ཡོད་བཞིན་པའི་རྒྱུ་མཚན་ཆགས་ཡོད།

^*བསྟན་འཛིན་ཀུན་དགའ་ལགས་ནི་ལྡི་ལི་གཙུག་ལག་སློབ་གྲྭ་ཆེན་མོ་ནས་གསར་འགོད་རིག་པའི་ཐོག་ཉེ་བའི་གཙུག་ལག་རབ་འབྱམས་པ་དང་། ཇཱ་ཝ་ཧཱར་ལཱལ་ནེ་རུ་གཙུག་ལག་སློབ་གྲྭ་ཆེན་མོ་ནས་རྒྱལ་སྤྱིའི་འབྲེལ་ལམ་ཐོག་གཙུག་ལག་རབ་འབྱམས་པ་སློབ་མཐར་ཕྱིན། ད་ལྟའི་ཆར་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ན་གཞོན་རོགས་སྐྱོར་ཚན་པའི་ལས་འཆར་དོ་དམ་པའི་ལས་འགན་ཁུར་བཞིན་ཡོད། ཁོང་ནི་སྤྱི་ཚོགས་ཞབས་ཞུའི་ལས་རིགས་ལ་དགའ་ཞེན་ཆེ་ཞིང་། བོད་མིའི་སྤྱི་ཚོགས་དེ་བཞིན་སྲ་བརྟན་དང་རྒྱུན་གནས་ཐུབ་པའི་བྱ་གཞག་ཐོག་ལེགས་སྐྱེས་འབུལ་རྒྱུའི་ཆོད་སེམས་བརྟན་པོ་བཅང་བཞིན་ཡོད་འདུག

དབྱིན་ཡིག་གི་མ་རྩོམ་དྲ་གནས་སྦྲེལ་ཐག་ https://www.tibetanreview.net/ghoton-tribute-a-testament-to-the-unseen-nation-within-me/