ལྡི་ལི་བསམ་ཡས་གླིང་གི་བོད་མི་ཚོས་ས་ཆ་རྣམས་ཁྲིམས་མཐུན་དེབ་སྐྱེལ་ཚགས་ཚུད་གནང་དགོས་སྐོར་ལམ་སྟོན་གནང་།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་བྱང་ཁུལ་གྱི་མངའ་སྡེ་ལྔའི་ནང་ཡོད་པའི་བོད་མིའི་གཞིས་ཆགས་ཁག་གི་ནང་གཞུང་འབྲེལ་གཟིགས་སྐོར་ཐེངས་གཉིས་པ་གནང་བཞིན་པ་འགྲུབ་ལ་ཉེ་ཡི་ཡོད་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་ནང་གི་བོད་མིའི་གཞིས་ཆགས་ཁག་ཏུ་འཚམས་གཟིགས་ཐེངས་གཉིས་པ་གནང་བཞིན་ཡོད་པ་ལྟར། ཁ་སང་ཕྱི་ཚེས་ ༡༣ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་གྱི་རྒྱལ་ས་ལྡི་ལི་ནས་རྒྱ་གར་བྱང་ཕྱོགས་པན་ཇབ་མངའ་སྡེའི་གྲོང་ཁྱེར་ཨམ་རིཊ་སར་བརྒྱུད་ཌལ་ཧོར་ཕུན་ཚོགས་གླིང་བོད་མིའི་གཞིས་ཆགས་སུ་ཕེབས་འབྱོར་བྱུང་ཡོད་ཅིང་།  སྲིད་སྐྱོང་མཆོག་གིས་ས་གནས་ཀྱི་བློ་གསལ་གླིང་དང་། སྒྲོལ་མ་ལྷ་ཁང་སོགས་སུ་མཆོད་མཇལ་ཞུས་ཡོད་པ་དང་། དེ་བཞིན་ས་གནས་བོད་མིའི་ཁྲོམ་ར་དང་། ཌལ་ཧོར་གཏན་འཇགས་སློབ་གྲྭ། ལས་ཁུངས་ཁག་བཅས་ཀྱི་ནང་གཟིགས་ཞིབ་གནང་ཡོད་འདུག

ཟླ་འདིའི་ཕྱི་ཚེས་ ༡༢ ཉིན་སྲིད་སྐྱོང་མཆོག་གིས་ལྡི་ལི་བུད་ཝི་ཧར་དང་བོད་སྒར་བསམ་ཡས་གླིང་གཉིས་སུ་འཚམས་གཟིགས་གནང་ཡོད་ཅིང་། སྐབས་དེར་སྲིད་སྐྱོང་མཆོག་གིས། བསམ་ཡས་གླིང་ནི་བོད་ཀྱི་བུད་མེད་ལྷན་ཚོགས་དང་། གཞོན་ནུ་ལྷན་ཚོགས། ས་གནས་མགོ་འཛིན་ལས་ཁུངས་སོགས་ཀྱིས་བོད་དོན་གྱི་ལས་འགུལ་སྤེལ་ས་གཙོ་བོ་ཞིག་ཆགས་ཡོད་དུས། ག་དུས་ཡིན་ཡང་རེ་བ་རྒྱག་ས་རྣམ་པ་ཚོ་ཆགས་ཡོད། འདིར་གཏན་སྡོད་བྱེད་མཁན་རྣམས་ཀྱིས་ལྷག་བསམ་རྣམ་དག་བྱེད་བཞིན་ཡོད་ཀྱང་། ཕྱི་ནས་ཡོང་བའི་མིས་ས་གནས་འདི་བརྒྱུད་ནས་ཁྲིམས་འགལ་གྱི་ལས་ཀ་རིགས་བྱས་ཚེ། འབྲེལ་ཡོད་འགན་འཁུར་བ་རྣམས་ལ་བརྡ་ལན་སྤྲོད་དགོས་རེད་མ་གཏོགས་མི་ཁ་ཤས་ཀྱི་ཆེད་དུ་སྤྱི་ཚོགས་ཡོངས་སུ་དཀའ་ངལ་འཕྲད་སྲིད་པ་དང་།  ང་ཚོའི་ངོས་ནས་གནས་ཚུལ་དེ་རིགས་བྱུང་ཚེ་ངེས་པར་དུ་འགན་འཁུར་དགོས།  ཞེས་དང་། ཕྱི་ལོ་ ༢༠༡༩ ནས་བཟུང་རྒྱ་གར་གཞུང་གིས་ས་ཆ་ཡོངས་རྫོགས་ཁྲིམས་མཐུན་གྱི་དེབ་སྐྱེལ་གནང་ཡོད་པར་བརྟེན། ལྡི་ལི་ཁུལ་གྱི་བོད་པའི་ཁྱིམ་ཚང་རྣམས་ཀྱིས་ཁྲིམས་མཐུན་དེབ་སྐྱེལ་བྱ་དགོས་པ་དང་། རྒྱ་གར་གཞུང་གིས་བཙན་བྱོལ་བོད་པར་ལྟ་རྟོག་བྱེད་བཞིན་ཡོད་པའི་ཁྲོད། ལྡི་ལི་བསམ་ཡས་གླིང་གཞིས་ཆགས་དམིགས་བསལ་ཐོག་འདིར་བཞག་པའི་གནས་སྟངས་ཤེས་པའི་ཐོག  ས་གནས་ཀྱི་ཁྲིམས་འཁུར་དགོས་པ་གནད་འགག་ཆེན་པོ་ཡིན་སྐོར་སོགས་གསུངས་འདུག

ཟླ་འདིའི་ཕྱི་ཚེས་ ༡༡ ཉིན་ནེ་ནི་ཏཱལ་ཨ་ཤེ་དབྱངས་སྐྱིད་དྲན་རྟེན་ཕུན་ཚོགས་བདེ་ལྡན་ཚོགས་ཁང་དུ། སྲིད་སྐྱོང་མཆོག་གིས་ས་གནས་མི་མང་ལ་གསུང་བཤད་གནང་ཡོད་ཅིང་། སྐབས་དེར་སྲིད་སྐྱོང་མཆོག་གིས་ཆབ་སྲིད་ཀྱི་གནད་དོན་ལ་མཚོན་ན། ང་ཚོས་དབུ་མའི་ལམ་གྱི་སྐོར་བཤད་སྐབས་དབུ་མའི་ལམ་གྱི་ཐོག་ནས་བོད་རྒྱའི་དཀའ་རྙོག་སེལ་དགོས་ན་རྒྱ་ནག་དང་གྲོས་མོལ་མེད་པའི་ལམ་གཞན་ཞིག་མེད། དེ་ཡང་རྒྱ་ནག་གིས་ཡ་ལན་མ་སྤྲད་བར་དུ་བོད་རྒྱའི་དཀའ་རྙོག་སེལ་བར་ང་ཚོས་རྒྱལ་སྤྱིའི་སྤྱི་ཚོགས་ལ་སྙོབ་དགོས་ཀྱི་ཡོད། རྒྱལ་ཁབ་སུ་འདྲ་ཞིག་དང་འབྲེལ་བ་བྱེད་སྐབས་འདིའི་ཁེ་ཕན་དང་སྦྱར་ཐུབ་ན་བོད་དོན་ཐོག་རྒྱབ་སྐྱོར་ཡོང་བའི་རེ་བ་ཡོད། སྐབས་དེར་བོད་ཀྱི་འགྲོ་བ་མིའི་ཐོབ་ཐང་གི་གནད་དོན་ཁོ་ན་མ་ཡིན་པར་རྒྱལ་ཁབ་གཉིས་ཀྱི་གནད་དོན་ཡིན་པ་ཤེས་དགོས་ཀྱི་ཡོད། ཅེས་གསུངས་འདུག

ཟླ་འདིའི་ཕྱི་ཚེས་ ༧ ཉིན་སྲིད་སྐྱོང་མཆོག་གིས་ཝཱ་ཎ་བོད་དགོན་བཤད་སྒྲུབ་འདོད་རྒུ་འཁྱིལ་དང་། སཱར་ནཱཐ་ཆོས་འཁོར་བསྐོར་བའི་གནས། སཱ་ར་ནཱ་ཐ་ཆོས་འཁོར་བསྐོར་བའི་གནས་དྲི་གཙང་ཁང་། ཝཛྲ་ཝིདྱ་གཙུག་ལག་སློབ་གཉེར་ཁང་། ཨོ་རྒྱན་བསམ་ཡས་ཆོས་འཁོར་གླིང་དགོན། གཡུ་ལོ་བཀོད་སྒྲོལ་མ་ལྷ་ཁང་བཅས་སུ་གནས་གཟིགས་ཕེབས་ཡོད་ཅིང་། དེ་བཞིན་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་ཨ་ཏཱི་ཤ་ཚོགས་ཁང་དུ་དགེ་ལས་སློབ་ཕྲུག་རྣམས་ལ་གསུང་བཤད་གནང་ཡོད་འདུག སྐབས་དེར་སྲིད་སྐྱོང་མཆོག་གིས་བོད་པའི་སློབ་ཕྲུག་གི་གྲངས་འབོར་ཇེ་ཉུང་དུ་འགྲོ་བཞིན་ཡོད་པ་དང་། ཧི་མ་ལ་ཡའི་རི་རྒྱུད་ཀྱི་སློབ་ཕྲུག་མང་དུ་འགྲོ་བཞིན་ཡོད། ཡིན་ནའང་ང་ཚོ་མི་རིགས་གཅིག་དང་། རིག་གཞུང་གཅིག སྒོས་སུ་ཆོས་དེ་གཅིག་པ་ཡིན། ཝཱ་ཎ་མཐོ་སློབ་ལྟ་བུ་ཡིན་ན་སྒྲིག་འཛུགས་ཀྱི་ཆ་ནས་རྩ་ཆེན་པོ་ཞིག་ཆགས་ཡོད་ཅིང་། སྒྲིག་འཛུགས་འདི་བརྒྱུད་ནས་སློབ་ཕྲུག་མང་པོ་ཞིག་ཐོན་ཡོད་ལ། བོད་པའི་སྤྱི་ཚོགས་ནང་དུ་འགན་འཁུར་མཁན་མང་པོ་ཞིག་བྱུང་ཡོད། ཅེས་དང་། དེ་བཞིན་བོད་རྒྱའི་དཀའ་རྙོག་སེལ་ཐབས་དང་། རྒྱ་གཞུང་གི་ཆབ་སྲིད་འགྱུར་བར་གདོང་ལེན་བྱེད་ཕྱོགས། རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་དང་བསྟུན་ནས་འགྱུར་བ་གཏོང་དགོས་རིགས་སོགས་ཀྱི་ཐོག་དྲི་བར་ལན་འདེབས་བཅས་གནང་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།