རྒྱ་གར་ནང་མི་རིགས་ཕན་ཚུན་འཆམ་མཐུན་ཧ་ཅང་ཡག་པོ་རེད་དེ་ལྟ་བུའི་མིག་ལྟོས་བཟང་པོ་ཡོད་པ་མུ་མཐུད་ཡར་རྒྱས་གཏོང་དགོས་ཞེས་གསུངས།

༧གོང་ས་རྒྱལ་བ་རིན་པོ་མཆོག་ནས་རྒྱ་གར་གནའ་རབས་ཀྱི་སྤྱོད་ལམ་བཟང་པོ་དང་ཆོས་ལུགས་མཐུན་སྒྲིལ་གྱི་བཟང་པོའི་ཡོན་ཏན་དག་མུ་མཐུད་དུ་ལག་ལེན་གནང་དགོས་སྐོར་བཀའ་སློབ་སྩལ་སོང་།

དེ་རིང་ཕྱི་ཚེས་༡༦ ཉིན་ལ་དྭགས་ཞི་བའི་ཚལ་གསུང་ཆོས་ར་བར་ལ་དྭགས་ནང་ཚོགས་དང་དགོན་ཚོགས་ཐུན་མོང་ནས་ཇི་ལྟར་གསོལ་བ་བཏབ་པ་ལྟར།  ༧གོང་ས་རྒྱལ་བ་རིན་པོ་ཆེ་མཆོག་ནས་དགེ་བཤེས་གླང་རི་པས་མཛད་པའི་བློ་སྦྱོང་ཚིགས་བརྒྱད་མ་དང་། ༧རྒྱལ་མཆོག་བདུན་པ་ཆེན་པོས་མཛད་པའི་ལྟ་ཁྲིད་དྲན་པ་བཞི་ལྡན་གྱི་ཆོས་འབྲེལ་མཛད་སོང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། ངོས་རང་བོད་དུ་གཞིས་སྡོད་བྱེད་པའི་གོ་སྐབས་མ་བྱུང་བར་བཙན་བྱོལ་དུ་འབྱོར་བ་རེད། ནོར་བུ་གླིང་ཁ་ནས་ཐོན་ཏེ་བཙན་བྱོལ་དུ་འབྱོར་རྗེས། གང་ལྟར་ཧི་མ་ལ་ཡའི་རི་རྒྱུད་ཀྱི་མི་རྣམས་སེམས་ཐག་ཉེ་བོ་ཡོད་པས་ཧི་མ་ལ་ཡའི་རི་རྒྱུད་དུ་གཞིས་ཆགས་ཏེ་ཕལ་ཆེར་བསྡད་པ་རེད། ངོས་ཀྱིས་ཞུ་རྒྱུའི་དོན་ཚན་གཙོ་བོ་དེ་ང་ཚོ་བོད་པ་འཕགས་པ་སྤྱན་རས་གཟིགས་ཀྱི་གདུལ་ཞིང་གི་མི་རེད་ལ། ང་ཚོ་ཚང་མར་རང་བཞིན་གྱིས་སེམས་པ་བཟང་པོ་བྱེད་རྒྱུ་དང་། མ་ཎི་བགྲང་བའི་གོམས་གཤིས་ཡོད་བསྡད་པ་ཞིག་རེད། ང་ཚོ་བཙན་བྱོལ་བ་ཆགས་ནས་གོམས་གཤིས་དེ་ནམ་ཡང་བརྗེད་ཐབས་ཡོད་པ་མ་རེད། ད་དུང་ང་ཚོར་རྐྱེན་གློ་བུར་བ་ལ་འཕྲད་ཡོང་དུས། ང་ཚོའི་གོམས་གཤིས་དེ་ཟབ་ཏུ་འགྲོ་བ་དང་། བརྟན་དུ་འགྲོ་བ་ཞིག་ཆགས་ཡོང་གི་འདུག ངོས་རང་ནོར་བུ་གླིང་ཁ་ནས་ཐོན་ཡོང་དུས། ལྷ་སའི་གཙང་ཆུ་བརྒལ་སྟེ་ལྷ་སར་ཕྱིར་བལྟས་ཤིག་བྱས་པ་ཡིན། ལྷ་ས་མཐོང་བ་མཐའ་མ་ཆགས་ཀྱི་ཡོད་པ་དང་། ཐུགས་སྨོན་གནང་རྒྱུ་གལ་ཆེན་པོར་ཟེར་བས། ངོས་ཀྱིས་ལྷ་སར་ཅེར་ནས་ལྟ་སྐབས་ལྷ་སའི་གྲོང་དང་། སེ་ར། འབྲས་སྤུངས་ཀྱི་ཆོས་སྒྲ་བཅས་ཐོས་རྒྱུ་ཡོད་པ་ཞིག་བྱུང་། ཕྱོགས་གཅིག་ནས་སེམས་སྐྱོ་བོ་ཞིག་བྱུང་ལ། ཕྱོགས་གཅིག་ནས་མིའི་ལུང་བསླེབ་ཀྱང་སྡུག་བསྔལ་མི་འདོད་པ་དང་། བདེ་བ་འདོད་པ་གཅིག་པ་ཡིན་པའི་མི་ཡིན་པ་རེད། བོད་ནང་དུ་སྦྱངས་བའི་ཆོས་ཀྱི་བསླབ་བྱས་འདིར་ཡོད་ཀྱི་ཁམས་དང་མོས་པ་མཐུན་པའི་ཆོས་གྲོགས་རྣམས་ལ་ཆོས་བཤད་པའི་གོ་སྐབས་ཡག་པོ་ཡོག་གི་རེད་བསམ་པའི་སེམས་ཤུགས་བསྐྱེད་དེ་རྒྱ་གར་བསླེབ་པ་རེད། ད་ལྟ་བར་དུ་ཧི་མ་ལ་ཡའི་རི་རྒྱུད་ས་ཁུལ་གང་དུ་བསླེབ་ཀྱང་དངོས་གནས་ཧི་མ་ལ་ཡའི་མི་རྣམས་ལ་ཆོས་དད་དང་ངོས་རང་ལ་དགའ་བོ་བྱེད་མཁན་གྱི་བབ་ཆགས་གསལ་བོ་འདུག ཅེས་གསུངས་སོང་།

ཡང་༧མགོན་པོ་གང་ཉིད་མཆོག་ནས། ཁ་སང་ཡུལ་གྲུ་འདིའི་དམིགས་བསལ་གྱི་ཐོབ་ཐང་དང་། གང་ལྟར་སོ་སོའི་མི་རིགས་ཀྱི་ཐོབ་ཐང་ཆ་ཚང་ཞིག་ལག་ལེན་བསྟར་བའི་རྒྱ་གར་རང་བཙན་གྱི་དུས་ཆེན་ཁེལ་ཡོད། ང་ཚོ་ཚང་མ་སྤྲོ་བ་སྐྱེས་དགོས་པ་ཞིག་རེད། རང་དབང་རང་བཙན་གྱི་ཐོབ་ཐང་ཐོབ་ནས་གང་བྱུང་མང་བྱུང་བྱེད་པའི་སྐད་ཆ་མ་རེད། འགྲིག་མེད་པའི་སྐད་ཆ་མ་རེད། རང་དབང་གི་ཐོབ་ཐང་ཐོག་ནས་དངོས་གནས་དྲང་གནས་མི་ཚེ་དོན་དང་ལྡན་པ་ཞིག་དང་། ཀུན་ལ་ཕན་ཐོགས་སྒྲུབ་པ་ཞིག་དགོས། རྒྱ་གར་ལ་ཆ་བཞག་ན་འཛམ་གླིང་འདིར་མི་རིགས་མང་པོ་ཡོད་པའི་ལུང་པ་ཞིག་ཆགས་བསྡད་ཡོད། རྒྱ་གར་ནང་དུ་དངོས་གནས་མི་རིགས་ཕན་ཚུན་འཆམ་མཐུན་ཧ་ཅང་ཡག་པོ་རེད། དེ་ལྟ་བུའི་མིག་ལྟོས་བཟང་པོ་ཡོད་པ་དེ་མུ་མཐུད་ཡར་རྒྱས་གཏོང་དགོས། ཆོས་ལུགས་འདྲ་མིན་སྣ་ཚོགས་ཡོད་པ་ནི་མི་སྒེར་སོ་སོའི་གནས་ཚུལ་རེད། གང་ལྟར་རྒྱ་གར་གྱི་ལོ་རྒྱུས་ཀྱི་ཐོག་ནས་སེམས་པ་བཟང་པོ་བྱེད་པ་དང་། འཚེ་བ་མི་བྱེད་པའི་མིག་ལྟོས་ཡོད་པ་དེ་མུ་མཐུད་ཉམས་ཆག་མ་ཡོང་བ་དང་། བདག་གཅེས་ཡག་པོ་བྱས་ཏེ་རྒྱ་གར་ལུང་པ་འདི་འཚེ་མེད་ཞི་བདེའི་བསྟི་གནས་རང་གཞན་ཚང་མས་ཡིད་སྨོན་སྐྱེས་པ་ཞིག་ཡོང་བ་བྱ་དགོས། ད་ལྟའི་བར་དུ་ཧ་ཅང་ཡག་པོ་རེད། ཆོས་དད་རང་མོས་ཐོག་ནས་སོ་སོས་གང་བྱེད་ན་བྱ་རྒྱུ་ཡོད་པ་རེད། སྙིང་པོ་དེ་གཞན་ལ་འཚེ་བ་མི་བྱེད་པ་དང་། ཀུན་ལ་ཕན་ཐོགས་བསྒྲུབ་པ་དེ་རེད། རྒྱ་གར་འཕགས་པའི་ཡུལ་གྱི་གནའ་རབས་ཀྱི་སྤྱོད་ལམ་བཟང་པོ་དང་ཆོས་ལུགས་མཐུན་སྒྲིལ་གྱི་བཟང་པོའི་ཡོན་ཏན་མུ་མཐུད་དུ་ལག་ལེན་བསྐྱལ་དགོས།སོགས་བཀའ་སློབ་སྩལ་སོང་།

མཛད་འཆར་ལྟར་ན། སང་ཉིན་ལ་དྭགས་ཞི་བའི་ཚལ་གསུང་ཆོས་ར་བར། ལ་དྭགས་ནང་ཚོགས་དང་དགོན་ཚོགས་གཉིས་ཀྱིས་་༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་དང་། ཕྱི་ཟླ་ ༩ ཚེས་ ༡༠ ཉིན་ཐེག་ཆེན་ཆོས་གླིང་གཙུག་ལག་ཁང་དུ། ལྷོ་ཁའི་སྐྱིད་སྡུག་ཚོགས་པ་དང་། ཨི་ཐ་ཁའི་རྣམ་རྒྱལ་གྲྭ་ཚང་གི་ནང་ཆོས་སློབ་གཉེར་ཁང་། རྒྱལ་སྤྱིའི་བོད་ཀྱི་གཞོན་སྐྱེས་ཀྱིས་༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག  ཕྱི་ཟླ་ ༩ ཚེས་ ༢༠ཉིན་ཐེག་ཆེན་ཆོས་གླིང་གཙུག་ལག་ཁང་དུ། ལྷོ་ཤར་ཨེ་ཤི་ཡའི་ནང་པའི་རྒྱལ་ཁབ་ཁག་དང་ཁོ་རི་ཡའི་ནང་པ་རྣམས་ཀྱིས་༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ། དེ་བཞིན་ཕྱི་ཟླ་༡༠ ཚེས་ ༣ ཉིན་ཐེག་ཆེན་ཆོས་གླིང་གཙུག་ལག་ཁང་དུ། ཐའེ་ཝན་གྱི་དད་ལྡན་མང་པོས་ཇི་ལྟར་གསོལ་བ་བཏབ་པ་ལྟར། ༧གོང་ས་རྒྱལ་རིན་པོ་མཆོག་ནས་ཆོས་འབྲེལ་བཀའ་དྲིན་སྩལ་རྒྱུ་ཡིན་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། པདྨ་མཚོ།