གཏན་ཉིན་སློབ་གྲྭ་ཁག ༢༦ གི་རིགས་ལམ་འདུ་འཛོམས་འཚོག་བཞིན་འདུག 

༧གོང་ས་རྒྱལ་བ་རིན་པོ་ཆེ་མཆོག་དགུ་གྲངས་དགུ་བཅུར་ཕེབས་པའི་སྐུའི་གོ་སྟོན་སྲུང་གཙི་དང་འབྲེལ་ནས་རྒྱ་གར་ནང་ཡོད་པའི་བོད་པའི་གཏན་ཉིན་སློབ་གྲྭ་ཁག་ནས་སློབ་མ་གྲངས་ ༡༩༨ ཀྱི་རིགས་ལམ་འདུ་འཛོམས་ཆེན་མོ་ཞིག་འཚོག་མུས་ཡིན་འདུག

ཟླ་འདིའི་ཕྱི་ཚེས་ ༡༨ ཉིན་ནས་ ༢༨ བར་ཉིན་གྲངས་བརྒྱད་རིང་དབུས་བོད་མིའི་སྒྲིག་འཛུགས་ཤེས་རིག་ལས་ལས་ཁུངས་ཀྱི་གོ་སྒྲིག་འོག ཅོན་ཏ་ར་བོད་ཁྱིམ་དུ་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་གོ་སྟོན་སྲུང་གཙི་དང་འབྲེལ་ནས་རིགས་ལམ་འདུ་འཛོམས་ཤིག་འཚོག་མུས་ཡིན་ཞིང་། འདུ་འཛོམས་དེའི་སྟེང་གཏན་ཉིན་སློབ་གྲྭ་ཁག་ ༢༦ གི་སློབ་གྲྭ་ ༡༩༨ ཀྱིས་མཉམ་ཞུགས་གནང་ཡོད་ཀྱང་། བལ་ཡུལ་དུ་རྟེན་གཞི་བྱས་པའི་བཙན་བྱོལ་བོད་མིའི་གཏན་ཉིན་སློབ་གྲྭ་ཁག་བཞི་དང་། དོན་གྲུབ་གླིང་གཏན་ཉིན་སློབ་གྲྭ་བཅས་ཀྱིས་མཉམ་ཞུགས་གནང་ཐུབ་མེད་པ་རེད། 

ད་ལན་གྱི་རིགས་ལམ་འདུ་འཛོམས་དེ་དང་འབྲེལ་ནས་ཤེས་རིག་ལས་ཁུངས་ཀྱི་སྲོལ་རྒྱུན་ཚན་པའི་འགན་འཛིན་དངོས་སྒྲུབ་བསྟན་པ་ལགས་ཀྱིས་འདི་གའི་གསར་འགོད་པར། འདི་ལོའི་རིགས་ལམ་འདུ་འཛོམས་དེའི་ཐོག་བལ་ཡུལ་དུ་རྟེན་གཞི་བྱས་པའི་བཙན་བྱོལ་བོད་མིའི་གཞི་རིམ་བར་མ་ཡན་གྱི་སློབ་གྲྭ་བཞི་ཡིས་མཉམ་ཞུགས་གནང་ཐུབ་མེད། གང་ཡིན་ཟེར་ན། ད་ལན་གྱི་རོགས་དངུལ་དེ་རྒྱ་གར་ནང་གི་སློབ་གྲྭ་དང་། རྒྱ་གར་ནང་གི་སྒྲིག་འཛུགས་ལ་གནང་བཞག་པ་ཞིག་ཡིན་དུས། རྒྱ་གར་གཞུང་གི་རྩིས་ཀྱི་འགྲོ་སྟངས་གཞིར་བཟུང་མ་གནང་ན་སྐུ་ངལ་འཕྲད་ཀྱི་ཡོད་ས་རེད། གང་ཡིན་ཟེར་ན། བལ་ཡུལ་དེ་ཕྱི་རྒྱལ་ཆགས་འགྲོ་ཡི་ཡོད་དུས། རྒྱ་གར་ནང་གནང་བའི་རོགས་དངུལ་དེ་དག་ཕྱི་རྒྱལ་དུ་འགྲོ་སོང་གཏང་རྒྱུ་དང་། མཐུན་རྐྱེན་སྦྱོར་སྤྲོད་ཐད་ལ་ཅུང་སྐུ་ངལ་འཕྲད་ཀྱིན་ཡོད་པའི་རྐྱེན་གྱིས། ད་ལན་བལ་ཡུལ་ཁུལ་དུ་ཡོད་པའི་སློབ་གྲྭ་གཅིག་གིས་ཀྱང་མཉམ་ཞུགས་གནང་མེད། ཡིན་ཡང་། རྒྱ་གར་ནང་ཡོད་པའི་གཞི་རིམ་བར་མ་ཡན་གྱི་དྷ་ས་བོད་ཁྱིམ་དང་། མ་སུ་རི་བོད་ཁྱིམ། སམ་བྷོ་ཊའི་ཁྱབ་ཁོངས་སློབ་གྲྭ་ ༢༦ ཀྱིས་མཉམ་ཞུགས་བྱས་ཡོད་ཀྱང་། དྷེ་ར་རྡུན་ལ་དོན་གྲུབ་གླིང་སློབ་གྲྭར་ལྟ་སྒྲུབ་དགེ་རྒན་མེད་ཙང་། གཞི་རིམ་བར་མ་ཡན་གྱི་སློབ་གྲྭ་ཡིན་ནའང་མཉམ་ཞུགས་བྱས་ཐུབ་མེད་ཀྱང་། མཉམ་ཞུགས་བྱེད་མཁན་ཁྲོད་ལྟ་སྒྲུབ་དགེ་རྒན་ ༢༦ དང་། སློབ་ཕྲུག་བུ་ ༡༠༠ དང་བུ་མོ་ ༩༨ ཡོད།  ཅེས་བརྗོད་བྱུང་།

ད་ལན་སྐུའི་གོ་སྟོན་སྲུང་གཙི་དང་འབྲེལ་ནས་རིགས་ལམ་འདུ་འཛོམས་ཆེན་མོ་དེ་འཚོག་དགོས་པའི་རྒྱུ་མཚན་དང་འབྲེལ་ནས་ཁོང་གིས། འདི་ལོར་དབུས་བོད་མིའི་སྒྲིག་འཛུགས་དང་གཞུང་ཁོངས་མིན་པའི་ཚོགས་སྡེ་ཁག་གིས་རྣམ་པ་འདྲ་མིན་གྱི་ཐོག་ནས་སྐུའི་གོ་སྟོན་སྲུང་གཙི་ཞུ་མུས་ཡིན་པ་རེད། ལྷག་པར་དུ་སློབ་གྲྭ་མང་པོ་ཞིག་ཏུ་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་རྗེས་དྲན་དང་། སྐུའི་གོ་སྟོན་སྲུང་གཙིའི་སླད་ལས་དོན་སྣ་མང་ཞིག་གཉེར་མུས་ཡིན་པ་ལྟར། དབུས་བོད་མིའི་སྒྲིག་འཛུགས་ཀྱི་གོ་སྒྲིག་འོག་གི་ལས་རིམ་ཁྲོད། ད་ལན་རིགས་ལམ་འདུ་འཛོམས་ཆེན་མོ་འདི་ཤེས་རིག་ལས་ཁུངས་ཀྱི་ལས་གཞི་ཆེ་ཤོས་ཤིག་རེད། རིགས་ལམ་འདུ་འཛོམས་ཆེན་མོ་དེ་གོ་སྟོན་སྲུང་གཙི་དང་འབྲེལ་བའི་ལས་རིམ་ཞིག་གང་འདྲ་བྱས་ནས་ཆགས་ཀྱི་ཡོད་རེད་ཟེར་ན། སྤྱིར་བཏང་ཤེས་རིག་ལས་ཁུངས་ཀྱིས་ལོ་ལྟར་གོ་སྒྲིག་བྱས་པའི་རིགས་ལམ་འདུ་འཛོམས་དེ་འདྲ་ཆེན་པོ་ཞིག་གོ་སྒྲིག་གནང་གི་མེད་པ་རེད། རིགས་ལམ་འདུ་འཛོམས་ཀྱི་ལས་གཞི་གོ་སྒྲིག་ཞུ་སྐབས། རྒྱ་གར་དང་བལ་ཡུལ་ནང་ཡོད་པའི་སློབ་གྲྭ་ཁག་སྡེ་ཚན་ཆེན་མོ་བཞི་སྟེ། དྷེ་ར་རྡུན་ཁུལ་གྱི་སློབ་གྲྭ་ཁག་དང་། དྷ་ས་ཁུལ་གྱི་སློབ་གྲྭ་ཁག ལྷོ་ཁུལ་སློབ་གྲྭ་ཁག བལ་ཡུལ་ཚུད་པའི་བྱང་ཤར་ཁུལ་གྱི་སློབ་གྲྭ་ཁག་བཅས་སུ་དབྱེ་ནས། ལོ་རེར་ཤེས་རིག་ལས་ཁུངས་ཀྱིས་ས་ཁུལ་གཉིས་སུ་རིགས་ལམ་འདུ་འཛོམས་གོ་སྒྲིག་བྱ་ཐུབ་པར་བྱེད་ཀྱི་ཡོད་ཀྱང་། ད་ལན་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་དགུ་བཅུར་ཕེབས་པའི་སྐུའི་གོ་སྟོན་སྲུང་གཙིའི་སླད། ལས་རིམ་དམིགས་བསལ་བྱས་ནས་ས་ཁུལ་ཚང་མའི་སློབ་གྲྭ་ཁག་མཉམ་འཛོམས་ཀྱི་ལས་རིམ་ཞིག་ཆགས་ཡོད་པ་རེད། ཅེས་བརྗོད་བྱུང་། 

ཕྱི་ཚེས་ ༡༨ ཉིན་རིགས་ལམ་འདུ་འཛོམས་དབུ་འབྱེད་ཐོག་དཔལ་སྤུངས་ཤེས་རབ་གླིང་ནས་ཏཱ་ཡི་སི་ཏི་རིན་པོ་ཆེ་མཆོག་ཆིབས་བསྒྱུར་བསྐྱངས་ཏེ་བླངས་དོར་གྱི་བཀའ་སློབ་བསྩལ་ཡོད་འདུག་ལ། ད་ལན་གྱི་རྒྱ་གར་ནང་གི་གཏན་ཉིན་སློབ་གྲྭ་ཁག་ཡོངས་ཀྱི་རིགས་ལམ་འདུ་འཛོམས་ཐོག་སློབ་མ་རྣམས་ཀྱིས་ཞོགས་པ་ཆུ་ཚོད་བདུན་པ་ནས་དགོང་མོའི་ཆུ་ཚོད་བརྒྱད་པའི་བར། ཕན་ཚུན་རྟགས་གསལ་གཏོང་རེས་དང་། དམ་བཅའ་སོགས་འཚོག་གི་ཡོད་འདུག

འདས་ལོའི་ཕྱི་ཟླ་ ༩ ཚེས་ ༣༠ ནས་ཕྱི་ཟླ་ ༡༠ ཚེས་ ༥ བར་ཉིན་གྲངས་དྲུག་རིང་བོད་ཁྱིམ་གོ་པལ་པུར་དུ། ཧི་མ་ཅལ་མངའ་སྡེའི་བོད་སློབ་ནང་ཁུལ་གྱི་སྐབས་བཅུ་གཅིག་པའི་རིགས་ལམ་འདུ་འཛོམས་དེ་འཚོགས་ཡོད་ཅིང་། འདུ་འཛོམས་དེའི་ཐོག་སུ་ཇཱ་བོད་ཁྱིམ་དང་། དྷ་སྟེང་བོད་ཁྱིམ། ཅོན་ཏ་ར་བོད་ཁྱིམ། དཔེ་སྟོན་སློབ་གྲྭ། སེ་ལ་ཀུལ་བོད་ཁྱིམ། གོ་པལ་པུར་བོད་ཁྱིམ་བཅས་ཀྱི་འཛིན་རིམ་ལྔ་བ་ནས་དགུ་བ་བར་གྱི་སློབ་ཕྲུག་ཁྱོན་གྲངས་ ༣༠༠ ལྷག་མཉམ་ཞུགས་གནང་འདུག་ལ། འདས་ལོར་རྒྱ་གར་ལྷོ་ཁུལ་གྱི་རིགས་ལམ་འདུ་འཛོམས་དེ་བཀྲ་ཤིས་ལྷུན་པོར་འཚོགས་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།