ཉེ་ལམ་༸གོང་ས་མཆོག་གི་འཁྲུངས་སྐར་སྐབས་༸སྐུའི་གོ་སྟོན་མཚོན་བྱེད་ཀྱི་དབུ་ཞྭ་ཞིག་དྲ་ལམ་དུ་ཁྱབ་སྤེལ་བྱས་པའི་ཉེས་མིང་འོག་འཛིན་བཟུང་བྱས་པའི་ཨ་འདུས་དགོན་པའི་གྲྭ་ཚེ་དབང་དོན་གོ་ལགས་ཀློད་གྲོལ་བཏང་ཡོད་འདུག
འདི་གའི་གསར་འགོད་པར་ཁུངས་ལྡན་གནས་ཚུལ་འབྱོར་བ་ལྟར་ན། འདི་ལོའི་ཕྱི་ཟླ་ ༧ ཚེས་ ༡ ཡས་མས་སུ། ༸སྐུའི་གོ་སྟོན་གྱི་ཚབ་མཚོན་དབུ་ཞྭ་ཞིག་སྤྱི་ཚོགས་དྲ་ལམ་དུ་ཁྱབ་བསྒྲགས་བྱས་པའི་ཉེས་མིང་འོག་འཛིན་བཟུང་བྱས་པའི་ཨ་འདུས་དགོན་པའི་དགེ་འདུན་པ་ཚེ་དབང་དོན་གོ་ལགས་ཟླ་གཅིག་དང་ཕྱེད་ཀ་ལྷག་བཀར་ཉར་བྱས་ཏེ། ཟླ་འདིའི་ཕྱི་ཚེས་ ༡༨ ཙམ་ལ་ཀློད་གྲོལ་བཏང་ཡོད་འདུག
འདི་གའི་གསར་འགོད་པར་གནས་ཚུལ་མཁོ་སྤྲོད་པས་བརྗོད་པ་ལྟར་ན། ཨ་འདུས་དགོན་པའི་གྲྭ་ཚེ་དབང་དོན་གོ་ལགས་ཀློད་གྲོལ་བཏང་ནས་ཉིན་གྲངས་བཞི་ཙམ་ཕྱིན་འདུག་ཅིང་། ཁོང་ཀློད་གྲོལ་བཏང་རྗེས་ཨ་འདུས་སྡེ་བའི་རང་ཁྱིམ་དུ་བཏང་ཡོད་པ་གསལ་བོ་ཡིན་ཡང་། ཁོང་གི་འགྲོ་འདུག་གི་རང་དབང་སོགས་ལ་དམ་དྲག་བྱེད་ཀྱི་ཡོད་མེད་སོགས་ཀྱི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད། དགེ་འདུན་པ་ཚེ་དབང་དོན་གོ་ལགས་རྔ་བ་ཨ་འདུས་སྡེ་བ་ནས་ཡིན་ཞིང་། ཆུང་དུས་ནས་ཨ་འདུས་དགོན་པའི་ཆོས་སྒོར་ཞུགས་ཏེ། ད་ལྟ་དབུ་མའི་འཛིན་གྲྭའི་ནང་སློབ་གཉེར་བྱེད་ཀྱི་ཡོད་འདུག
གཞན་ཡང་། བོད་ནང་གི་འབྲེལ་ཡོད་ཅིག་གིས་སྤྱི་ཚོགས་དྲ་ལམ་དུ། བོད་ཀྱི་ན་གཞོན་གླུ་བ་ཨ་སངས་ལགས་ཀློད་གྲོལ་བཏང་ཡོད་པ་དང་། ད་ལྟའི་ཆར་ཁོང་སྤྱི་ཚོགས་དྲ་ལམ་དུ་འཐོན་ཐུབ་ཀྱི་མེད་པ་མ་གཏོགས། ཁོང་ད་ལྟ་བདེ་འཇགས་ཡིན་པ་དང་ནང་མིའི་ལྷན་དུ་ཡོད་པའི་གནས་ཚུལ་སྤེལ་འདུག ཉེ་ལམ་༸སྐུའི་གོ་སྟོན་གྱི་སྐབས་སུ། བོད་རྔ་བ་རྫོང་ནས་ཡིན་པའི་ན་གཞོན་གླུ་བ་ཨ་སངས་ལགས་འཛིན་བཟུང་བཙན་འཁྲིད་བྱས་ཏེ། གླུ་བ་ཨ་སངས་དང་ཁོང་གི་རོགས་པ་གཉིས་ཀྱིས་ལོ་ཤས་གོང་དུ་གཞས་པ་གཞན་གྱིས་བླངས་བའི་གླུ་གཞས་ (ཞི་བདེའི་རྒྱལ་སྲས) ཞེས་པ་བསྐྱར་ལེན་བྱས་པའི་རྐྱེན་གྱིས་འཛིན་བཟུང་བཙན་འཁྲིད་བྱས་ཡོད།
གཙུག་ཏེའམ་དྲ་མིང་ལ་ཨ་སངས་སུ་འབོད་པའི་ན་གཞོན་གླུ་བ་ཁོང་ནི་བོད་རྔ་བ་སྟག་མོ་རྫོང་བར་མ་ཡུལ་ཚོའི་ཀ་ཤུལ་རུ་ཁག་བཞི་པའི་ནག་ཚང་ཚང་གི་བུ་ཡིན་ཞིང་། ཁོང་དང་བཟའ་ཟླ་ལྷ་མོ་གཉིས་ལ་རང་ལོ་གཅིག་ལྷག་ཡིན་པའི་བུ་གཅིག་དང་། མངལ་དུ་ཡོད་པའི་ཕྲུ་གུ་གཞན་ཞིག་ཡོད་འདུག
གསར་འགོད་པ། སྐལ་བཟང་སྦྱིན་པ།
