༧གོང་ས་རྒྱལ་བ་རིན་པོ་ཆེ་མཆོག་དགུང་ལོ་ ༩༠ ཕེབས་པ་དང་བསྟུན་རང་དབང་ལུང་པའི་ནང་དུས་སྟོན་བྱེད་སྒོ་རིགས་སྤེལ་བཞིན་ཡོད་པ་དེས་བོད་ནང་ལ་ཤུགས་རྐྱེན་ཐེབས་ཉེན་ཆེ་བས་དོགས་ཟོན་ནན་པོ་དགོས་སྐོར་གྱི་ཡིག་ཆ་ཞིག་ནང་ཁུལ་དུ་བཀྲམ་འདུག
ཉེ་སྔོན་བོད་རང་སྐྱོང་ལྗོངས་སྲིད་གཞུང་གིས་ཕྱི་ལོ་ ༢༠༢༥ ལོའི་དུས་ཚིགས་གསུམ་པའི་ཉེན་གནས་སྔོན་བརྡ་ཞེས་པའི་བྱ་འགུལ་ཆེན་པོའི་བྱེད་ཕྱོགས་དང་། ཚོར་བ་སྐྱེན་དུས་ཀྱི་བྱེད་ཕྱོགས་ཟེར་བ་སོགས་ཀྱི་དོན་ཚན་ཆེན་མོ་བརྒྱད་ཅན་གྱི་ཡིག་ཆ་ཞིག་ནང་ཁུལ་དུ་བཀྲམ་ཡོད་པ་འདི་ག་བོད་ཀྱི་དུས་བབ་གསར་ཁང་ལ་ལག་སོན་བྱུང་།
ཡིག་ཆ་དེའི་དོན་ཚན་བརྒྱད་པ་མི་རིགས་ཆོས་ལུགས་སྐོར་ཞེས་པའི་ནང་གསེས་ ༣༦ པའི་ནང་དུ། འདི་ལོ་ནི་༸གོང་ས་ཏཱ་ལའི་བླ་མ་མཆོག་དགུང་གྲངས་ ༩༠ ཕེབས་པ་དང་བསྟུན། བོད་རང་བཙན་དང་རྒྱ་ནག་ལ་ངོ་རྒོལ་གྱི་སྟོབས་ཤུགས་ཀྱིས་བསླངས་བའི་བྱ་འགུལ་རིགས་སྤེལ་གྱི་ཡོད་པ་དང་། གསང་སྟབས་ཀྱིས་དེ་འབྲེལ་གནོད་ཚབས་ཅན་གྱི་སྒྲ་དང་བརྙན། དེ་བཞིན་ཅ་དངོས་རིགས་འདོན་སྤེལ་བྱས་ཏེ་བོད་ནང་དུ་བརྒྱུད་སྤེལ་བྱེད་བཞིན་ཡོད་སྟབས། བོད་ཡུལ་གྱི་དགེ་འདུན་པ་ཚོས་སྤྱི་ཚོགས་དྲ་ལམ་དང་ཡང་ན་གསང་བའི་བྱེད་ཐབས་བཀོལ་ཏེ་༧གོང་ས་ཏཱ་ལའི་བླ་མ་དང་བོད་རང་བཙན་གྱི་ནང་དོན་ཡོད་པའི་ཆ་འཕྲིན་གྱིས་སྨོན་འདུན་ཞུ་བར་དོགས་ཟོན་ནན་པོ་བྱེད་དགོས་སྐོར་དང་། དད་ལྡན་མང་ཚོགས་རྣམས་ཁྲིམས་འགལ་གྱི་འདུ་འཛོམས་རིགས་ལ་མཉམ་ཞུགས་བྱེད་པ་དང་། དར་ཆ་སྒྲེང་བ་དང་པར་རིས་འཕྱར་བ། ཐ་ན་རང་ལུས་མེར་སྲེག་གཏོང་བ་སོགས་ཀྱི་ཚབས་ཆེའི་དོན་རྐྱེན་རིགས་འབྱུང་བར་ཕྱོགས་ཡོངས་ནས་བཀག་སྡོམ་ནན་པོ་བྱེད་དགོས་སྐོར་སྐུལ་འདེད་བྱས་འདུག
ཡང་ནང་གསེས་དོན་ཚན་ ༣༧ པའི་ནང་དུ། ཆོས་ལུགས་སྡེ་ཁག་ཉུང་ཤས་ཀྱིས་ན་གཞོན་ལ་དམིགས་ཏེ་ཆོས་ལུགས་ཉམས་ལེན་ཁང་དང་དེ་འདྲའི་སློབ་གསོའི་བྱ་འགུལ་སྤེལ་བར་བཀག་སྡོམ་བྱེད་དགོས། ལྷག་པར་དུ་ཕྱི་ཕྱོགས་ཀྱི་རྒྱབ་ལྗོངས་ཡོད་པའི་བྱ་འགུལ་གྱིས་བསམ་བློར་སིམ་འཛུལ་བྱེད་པར་ཉེན་ཁ་ཡོད་པ་རྣམས་ལ་བཀག་སྡོམ་ནན་པོ་དགོས། དེ་བཞིན་ནང་གསེས་ ༣༨ པའི་ནང་། ཕྱི་ཟླ་ ༩ ཚེས་ ༩ ཉིན་ནི་བོད་རང་སྐྱོང་ལྗོངས་བཙུགས་ནས་ལོ་ ༦༠ འཁོར་བའི་དུས་སྟོན་ཡིན་པ་དང་། བོད་རང་བཙན་དང་རྒྱ་ནག་ལ་ངོ་རྒོལ་ངན་འབྲེལ་གྱི་ཟིང་ཆ་སློང་བ་དང་། བོད་རང་སྐྱོང་ལྗོངས་ཀྱི་ཁ་ཕྱོགས་དང་མི་རིགས་ཆོས་ལུགས་སྲིད་ཇུས། བོད་ཡུལ་འཕེལ་རྒྱས་ཀྱི་གྲུབ་འབྲས་སོགས་ལ་གཏོར་བརླག་དང་ནག་ནོག་རྒོལ་རྡུང་གཏོང་ཐབས་རིགས་ལ་བཀག་སྡོམ་དགོས་སྐོར་བཀོད་འདུག
གསར་འགོད་པ། སྐལ་བཟང་སྦྱིན་པ། རྩོམ་སྒྲིག་བྱེད་མཁན། པདྨ་མཚོ།
