དེ་རིང་བཞུགས་སྒར་དུ་བོད་མིའི་མང་གཙོ་དབུ་བརྙེས་ཏེ་ལོ་ངོ་ ༦༥ འཁོར་བའི་གཞུང་འབྲེལ་མཛད་སྒོ་འཚོགས་སོང་།
དེ་རིང་ཕྱི་ཟླ་ ༩ ཚེས་ ༢ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་མིའི་མང་གཙོ་དབུ་བརྙེས་ཏེ་ལོ་ངོ་ ༦༥ འཁོར་བའི་དུས་དྲན་སྲུང་གཙིའི་གཞུང་འབྲེལ་མཛད་སྒོ་འཚོགས་སོང་བ་དང་། མཛད་སྒོའི་ཐོག་ཉི་འོང་གི་གྲོས་ཚོགས་འཐུས་མི་སྐུ་ཞབས་ཝ་དྷ་ (Wada Yushiro) མཆོག་དང་རྒྱ་གར་གྱི་གྲོས་ཚོགས་འཐུས་མི་སྐུ་ཞབས་ཨར་ཐར་ (Alfred Kan-Ngam Arthur) རྣམ་གཉིས་དང་། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་གཙོ་བྱས་པའི་ལྷན་ཁང་ཁག་གི་དྲུང་ཆེ་རྣམས་དང་སྲི་ཞུའི་ལས་བྱེད་རྣམས། དྷ་སྟེང་བོད་ཁྱིམ་དགེ་སློབ་རྣམས་དང་བཞུགས་སྒར་ཁུལ་གྱི་སེར་སྐྱ་མི་མང་བཅས་འཛོམས་འདུག
བོད་ཀྱི་མང་གཙོའི་དུས་དྲན་ཐེངས་ ༦༥ པའི་གཞུང་འབྲེལ་མཛད་སྒོའི་སྟེང་། བོད་མིའི་སྒྲིག་འཛུགས་ཀྱི་ཞབས་ལོ་ཧྲིལ་པོ་ཉེར་ལྔ་ལོན་པའི་ལས་བྱེད་བསྟན་འཛིན་རིག་ལྡན་ལགས་དང་བཀྲ་ཤིས་དབྱངས་འཛོམས་ལགས་གཉིས་དང་། རྒྱ་གར་གྱི་སློབ་ཆེན་ཁག་ནས་ཐོན་པའི་འབུམ་རམས་པ་བདུན། དགའ་ལྡན་ཕོ་བྲང་གི་གཟེངས་རྟགས་ཐོབ་མཁན་གྱི་སློབ་མ་གྲངས་ ༡༠ ། དེ་བཞིན་སྲིད་སྐྱོང་གཟེངས་རྟགས་ཐོབ་མཁན་སློབ་མ་ ༤ བཅས་ལ་ཆེ་བསྟོད་ངོས་འཛིན་དང་གཟེངས་རྟགས་ཕུལ་སོང་།
སྐབས་དེར་སྐུ་མགྲོན་གཙོ་བོ་རྒྱ་གར་གྱི་གྲོས་ཚོགས་འཐུས་མི་སྐུ་ཞབས་ཨར་ཐར་ (Alfred Kan-Ngam Arthur) མཆོག་གིས། ཕྱི་ལོ་ ༢༠༢༥ ལོ་ནི་༸གོང་ས་མཆོག་དགུང་གྲངས་ ༩༠ ཕེབས་པའི་བྱམས་བརྩེའི་ལོར་སྲུང་གཙི་གནང་གི་ཡོད་པ་ལྟར། འཛམ་གླིང་ནང་༸གོང་ས་མཆོག་གི་རླབས་ཆེན་གྱི་མཛད་འཕྲིན་ཁག་བརྒྱུད་བོད་ཀྱི་བདེན་པའི་འཐབ་རྩོད་སྐོར་ལ་ཤེས་རྟོགས་མེད་མཁན་མེད་པ་ལྟ་བུ་ཡིན་པ་དང་རྒྱ་གར་གྱི་སྲིད་བློན་ནེའུ་རོ་ནས་བརྩིས་པའི་ད་ལྟའི་སྲིད་བློན་རིམ་བྱོན་གྱིས་བོད་ཀྱི་འཐབ་རྩོད་ལ་བློ་སྟོབས་ཆེན་པོས་རྒྱབ་སྐྱོར་གནང་བ་དང་༸གོང་ས་མཆོག་གི་མཛད་འཕྲིན་ཁག་བརྒྱུད་བོད་པའི་འཐབ་རྩོད་དེ་འཛམ་གླིང་ཡོངས་ལ་ཁྱབ་ཐུབ་པ་བྱུང་ཡོད་སྐོར་དང་། ༸གོང་ས་མཆོག་གི་བྱམས་བརྩེ་དང་འཛམ་གླིང་ཞི་བདེ་གོང་མཐོར་གྱི་དགོངས་གཞི་དག་ནི་ཡིད་སྨོན་སྐྱེས་ཡུལ་ཞིག་ཡིན་པ་དང་རྒྱ་གར་ནང་མི་ཚང་མས་རང་དབང་ལ་ལོངས་སུ་སྤྱོད་ཀྱིན་ཡོད་པ་བཞིན་བོད་མི་ཚོས་ཀྱང་རང་དབང་ལ་ལོངས་སུ་སྤྱད་དེ་བོད་ཀྱི་བདེན་མཐའ་གང་མགྱོགས་སེལ་བའི་རེ་བ་ཡོད་སྐོར་གྱི་གསུང་བཤད་གནང་སོང་བ་དང་། ཉི་འོང་གི་གྲོས་ཚོགས་འཐུས་མི་སྐུ་ཞབས་ཝ་དྷ་ (Wada Yushiro) མཆོག་གིས། འདི་ལོའི་ཕྱི་ཟླ་བདུན་པའི་ཚེས་ ༢ ཉིན་༸གོང་ས་མཆོག་གིས་སྐུའི་ཡང་སྲིད་རྒྱུད་མཐུད་ཕེབས་ངེས་ཡིན་པའི་གསལ་བསྒྲགས་བསྐྱངས་པ་ལྟར། སྐུའི་ཡང་སྲིད་ཀྱི་གནད་དོན་ཐད་སུ་གཅིག་ལའང་ཐེ་ཇུས་བྱེད་པའི་ཐོབ་ཐང་མེད་སྐོར་དང་༸གོང་ས་མཆོག་གིས་འཛམ་གླིང་ནང་བྱམས་སྙིང་རྗེ་དང་ཞི་བདེ་གོང་སྤེལ་གྱི་དགོངས་གཞིར་རྒྱབ་སྐྱོར་ཞུ་རྒྱུ་ཡིན་སྐོར། དེ་བཞིན། ཉི་ཧོང་ནི་ནང་པའི་རྒྱལ་ཁབ་ཅིག་ཡིན་པ་དང་འཛམ་གླིང་ནང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་ཆེ་ཤོས་དེ་ཡིན་སྟབས། འདི་ལོར་ཉི་ཧོང་དུ་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་འཚོགས་ཏེ། ༸གོང་ས་མཆོག་གི་ཡང་སྲིད་ཀྱི་གནད་དོན་གཙོས་བོད་ཀྱི་གནད་དོན་ཐོག་གྲོས་ཆོད་ ༦༡ གཏན་འབེབ་བྱས་ཏེ་མཉམ་འབྲེལ་རྒྱལ་ཚོགས་ཀྱི་གཙོས་འཛམ་གླིང་རྒྱལ་ཁབ་ཁག་དང་དམངས་གཙོ་དང་འགྲོ་བ་མིའི་ཐོབ་ཐང་གི་ཚོགས་སྡེ་ཁག་སོགས་ལ་བོད་ཀྱི་གནད་དོན་དུས་ནས་དུས་གླེང་སློང་གིས་བོད་ཀྱི་བདེན་མཐའ་གསལ་ཐབས་བྱས་དང་བྱེད་མུས་ཡིན་སྐོར་སོགས་གསུངས་སོང་།
བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་ནང་། ༸གོང་ས་མཆོག་བཙན་བྱོལ་དུ་༸ཞབས་སོར་འཁོད་མ་ཐག་ཏུ་རང་རེའི་ཕྱིས་འབྱུང་བོད་གཞུང་གི་ལས་དོན་སྒྲུབ་ཕྱོགས་དེང་དུས་དང་མཐུན་པའི་བསྐྱར་བཟོ་གནང་རྒྱུའི་ཐུགས་འགན་ཆེ་བཞེས་མཛད་ཅིང་། ཕྱི་ལོ་ ༡༩༦༠ ཟླ་ ༢ ཚེས་ ༣ ཉིན་གནས་མཆོག་རྡོ་རྗེ་གདན་དུ་༸གོང་ས་༸སྐྱབས་མགོན་ཆེན་པོ་མཆོག་ལ་ཆོལ་གསུམ་ཆོས་ལུགས་དང་བཅས་པའི་མི་འཐུས་ནས་བརྟན་བཞུགས་བསྟར་འབུལ་དང་འབྲེལ་བླང་དོར་ཚུལ་བཞིན་ཞུ་རྒྱུའི་མནའ་གན་མཐུ་མོ་ཆེ་འབུལ་ལམ་ཞུས་པའི་སྐབས་སུ།“བོད་འདི་སྔར་ལྟར་མ་ཡིན་པར་བོད་ཆོས་སྲིད་གཉིས་ལྡན་མང་གཙོའི་གཞུང་ཞིག་དགོས་པ་གལ་ཆེར་བརྟེན་རྒྱ་ཆེའི་མི་མང་གི་ངོ་ཚབ་མང་མོས་འོས་འདེམས་བྱས་པའི་འཐུས་མིའི་ལྷན་ཚོགས་ཤིག་དགོས་གཤིས་སྔ་འཕྲོས་ཆོས་བརྒྱུད་ཆེན་པོ་བཞི་ནས་འཐུས་མི་རེ་དང་། ཆོལ་ཁ་གསུམ་ནས་འཐུས་མི་གསུམ་རེ་བཅས་ཁྱེད་རང་རྣམས་ཁུངས་སོ་སོར་ཕྱིར་ལོག་ཟིན་འཕྲལ་མི་མང་གི་ཁྲོད་དུ་ཤེས་ཡོན་འཇོན་ཐང་དང་། རྒྱལ་གཅེས་ལྷག་བསམ་ལྡན་ལ་མང་ཚོགས་ཀྱི་ཡིད་ཆེས་བློ་གཏད་འཕེར་བ་ཇི་ཡོད་ནས་འོས་འདེམས་ཀྱིས་མིང་ཐོ་འོས་གྲངས་འཕྲལ་འབུལ་དགོས།” ཞེས་བཀའ་སློབ་ཕེབས་དགོངས་བཞིན། སྐབས་དང་པོའི་བོད་མི་མང་སྤྱི་འཐུས་རྣམས་༸གོང་ས་༸སྐྱབས་མགོན་ཆེན་པོ་མཆོག་ནས་ཕྱག་རྟགས་བསྐོ་གཞག་བསྩལ་དོན་བཞིན་ཕྱི་ལོ་ ༡༩༦༠ ཟླ་ ༩ ཚེས་ ༢ ཉིན་ལས་ཁུར་དམ་འབུལ་ཞུས་པ་ནས་བཟུང་བོད་མིའི་མང་གཙོ་ཐོག་མར་དབུ་བརྙེས། དེ་བཞིན་༸གོང་ས་མཆོག་གིས་བོད་མིའི་འཕྲལ་ཕུགས་ཀྱི་བདེ་རྩར་དགོངས་པ་ཆེ་བཞེས་ཀྱིས་བོད་མིའི་རིག་གཞུང་གོམ་སྲོལ་དང་། དེང་རབས་ཀྱི་ལེགས་ཆ་རྣམས་ཕྱོགས་བསྡོམས་ཀྱིས་རླབས་ཆེན་གྱི་ལམ་སྟོན་ཟབ་མོ་རིམ་ཕེབས་འོག་བཙན་བྱོལ་བོད་གཞུང་གི་ཆབ་སྲིད་ཀྱི་རང་བཞིན་རང་དབང་དང་། འདྲ་མཉམ། དྲང་བདེན། འཚེ་མེད་ཞི་བ་བཅས་ཀྱི་གཞི་རྩ་ལྡན་པའི་ཡང་དག་པའི་མང་གཙོའི་ལམ་སྲོལ་བཟང་པོ་འདི་སྲོལ་གཏོད་གནང་ཡོད།
དེ་རྗེས་ཕྱི་ལོ་ ༡༩༦༡ ལོར་མ་འོངས་བོད་ཀྱི་རྩ་ཁྲིམས་སྙིང་དོན་དང༌། ༡༩༦༣ ལོར་བོད་ཀྱི་རྩ་ཁྲིམས་ཡོངས་ཁྱབ་གསལ་བསྒྲགས་གནང༌། ཕྱི་ལོ་ ༡༩༩༡ ལོར་བོད་མི་མང་སྤྱི་འཐུས་ལྷན་ཚོགས་དེ་ཉིད་མིང་དོན་མཚུངས་པའི་ཁྲིམས་བཟོ་ལྷན་ཚོགས་སུ་བསྒྱུར་གནང་མཛད་པ་ལྟར། སྤྱི་འཐུས་སྐབས་བཅུ་གཅིག་པས་གཏན་ལ་ཕབ་པའི་བཙན་བྱོལ་བོད་མིའི་བཅའ་ཁྲིམས་ལ་ཕྱི་ལོ་ ༡༩༩༡ ཟླ་ ༦ ཚེས་ ༢༨ ཉིན་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་ཆོག་མཆན་བསྩལ་ནས། བཙན་བྱོལ་བོད་གཞུང་འདི་གཞི་རྩའི་ཁྲིམས་ཡིག་ཡོད་པའི་དེང་རབས་ཀྱི་མང་གཙོའི་འགྲོ་ལུགས་དང་མཐུན་པ་ཞིག་ཏུ་བསྒྱུར་གནང་མཛད་ཅིང་། བོད་མིའི་སྒྲིག་འཛུགས་ཀྱི་ལས་དོན་གནང་ཕྱོགས་ཀྱང་གྲོས་ཚོགས་ཀྱིས་གཏན་འབེབས་གནང་བའི་ཁྲིམས་སྒྲིག་ཁག་གཞི་རྩར་བཟུང་སྟེ་ཁྲིམས་ལུགས་ཀྱིས་དབང་བསྒྱུར་བའི་མང་གཙོའི་ལམ་ལུགས་ལག་བསྟར་བྱེད་བཞིན་ཡོད།
དེ་ནས་ཕྱི་ལོ་ ༢༠༠༡ ལོར་ྋགོང་ས་ྋསྐྱབས་མགོན་ཆེན་པོ་མཆོག་གི་བཀའ་དགོངས་ལྟར། བཀའ་བློན་ཁྲི་པ་མི་མང་གིས་ཐད་ཀར་འོས་བསྡུའི་ལམ་ནས་འདེམས་བསྐོ་གནང་བ་དང་། ཕྱི་ལོ་ ༢༠༡༡ ལོར་ྋགོང་ས་ྋསྐྱབས་མགོན་ཆེན་པོ་མཆོག་ནས་གཞུང་ས་དགའ་ལྡན་ཕོ་བྲང་གིས་བོད་སྤྱིའི་ཆབ་སྲིད་ཀྱི་མངའ་དབང་ལོ་བཞི་བརྒྱར་ཉེ་བའི་རིང་བསྐྱངས་པའི་ཆབ་སྲིད་ཀྱི་འགན་དབང་མི་མང་གིས་ཐད་ཀར་འོས་འདེམས་བྱས་པའི་འགོ་ཁྲིད་ཚོར་བསྩལ་ཏེ། དེ་དག་གཞིས་བྱེས་བོད་མི་ཡོངས་ཀྱི་ངོ་ཚབ་དང་སྲི་ཞུ་སྒྲུབ་པའི་ནུས་པ་ལྡན་པ་ཞིག་ཏུ་བསྒྱུར་གནང་མཛད་དེ་མང་གཙོའི་ལམ་ལུགས་ཐོག་ཤར་སྐྱོད་དང་བོད་ཀྱི་བདེན་པའི་འཐབ་རྩོད་རྒྱུན་སྐྱོང་ཞུས་དང་ཞུ་བཞིན་པ་ནི་དགའ་སྤོབས་འོས་པ་ཞིག་ཏུ་གྱུར་ཡོད།
༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་རྣམས་ལ་མང་གཙོའི་ལམ་སྲོལ་དར་ཞིང་རྒྱས་པ་འདི་འདྲ་བ་ཞིག་བྱིན་གྱིས་རླབས་པ་ཙམ་དུ་མ་ཟད། བོད་རྒྱལ་ཁབ་དང་མི་རིགས་ཀྱི་ངོ་བོ་ཆོས་དང་། རིག་གཞུང་། སྐད་ཡིག་སོགས་རྩ་བརླག་ཏུ་མི་འགྲོ་བར་གསོན་པོར་གནས་ཐུབ་པ་བྱུང་ཞིང་། རྒྱ་ནག་གཞུང་གིས་རྒྱལ་སྤྱིའི་ནང་གནོན་ཤུགས་དང་དྲིལ་བསྒྲགས་ལོག་པ་སྤེལ་མུས་ཀྱང་དེར་ལྟོས་མེད་ཀྱིས་རྒྱལ་ཁབ་མང་པོའི་གཞུང་དང་གྲོས་ཚོགས་སོགས་ནས་བོད་དང་བོད་མིར་རྒྱབ་སྐྱོར་དང་མཐུན་འགྱུར་གནང་བ་བཅས་ནི་༸རྒྱལ་དབང་མཆོག་གི་མཛད་འཕྲིན་དང་སྐུ་དྲིན་ཉག་གཅིག་ཆགས་ཡོད། སླད་མར་ཡང་འཕགས་ཡུལ་རྡ་རམ་ས་ལ་ནས་༸གོང་ས་༸སྐྱབས་མགོན་ཆེན་པོ་མཆོག་དང་། བོད་མིའི་སྒྲིག་འཛུགས་མང་གཙོའི་ཆ་ལག་ཡོངས་སུ་ཚང་བ་འདི་ཉིད་ཀྱིས་འཛམ་གླིང་ནང་བོད་དང་བོད་མིར་དོ་སྣང་དང་རྒྱབ་སྐྱོར་ཐོབ་པ་དང་། ཕ་ཡུལ་བོད་ནང་ལ་རྒྱུན་དུ་སེམས་ཁུར་གྱིས་གཞིས་བྱེས་མཉམ་འཛོམས་ཡོང་བའི་རེ་བ་བྱེད་བཞིན་ཡོད།
རྒྱ་ནག་དམར་གཞུང་གིས་བོད་མི་རིགས་ཀྱི་ཆོས་དང་། རིག་གཞུང་། སྐད་ཡིག་སོགས་རྩ་བརླག་ཏུ་གཏོང་བ་སོགས་ཀྱི་སྲིད་བྱུས་ངན་པ་བཤམ་རྒྱུ་མཚམས་འཇོག་བྱ་རྒྱུ་ཕར་ཞོག ད་དུང་སྲིད་བྱུས་ཇེ་ངན་ཇེ་སྡུག་ཏུ་གཏོང་མུས་ཡིན། ༧གོང་ས་མཆོག་གིས་བོད་རྒྱའི་དཀའ་རྙོག་འདི་ཉིད་གྲོས་མོལ་གྱི་ལམ་ནས་སེལ་ཐབས་དགོས་པའི་ལམ་སྟོན་འདས་ལོ་བཅུ་ཕྲག་མང་པོའི་རིང་གནང་ཡོད་ནའང་། རྒྱ་ནག་གཞུང་གི་དཔོན་རིགས་ཚོའི་རྣ་བར་མི་འཇེབས་པ་དང་། བཙན་དབང་འོག་ཏུ་འཛིན་པའི་བོད་མི་གཙོས་གྲངས་ཉུང་མི་རིགས་རྣམས་ལ་རྒྱུན་དུ་སུན་གཙེར་དང་འགྲོ་འདུག་སྤྱོད་གསུམ་གྱི་ཐོག་ལ་དམ་དྲག་ཤུགས་ཆེར་བྱེད་བཞིན་པ་ད་དུང་ཡང་མཚམས་འཇོག་བྱས་མེད། འོན་ཀྱང་གཞིས་བཞུགས་བོད་མི་རྣམས་ཀྱིས་མི་རིགས་ཀྱི་ལ་རྒྱ་འགྱུར་མེད་བརྟན་བཟུང་གནང་བཞིན་ཡོད་པས་རང་རེ་བྱེས་འཁོད་བོད་མི་རྣམས་ལ་སེམས་ཤུགས་དང་སྙིང་སྟོབས་འཕར་མ་སྐྱེད་གཞི་ཞིག་ཏུ་གྱུར་ཡོད།
ཕྱི་ལོ་ ༢༠༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་། བོད་མི་མང་སྤྱི་འཐུས་གཉིས་ཀྱི་འོས་བསྡུ་ཆེན་མོ་སླེབས་ལ་ཉེ་བས། དེ་བསྟུན་དབུས་འོས་བསྡུ་ལས་ཁང་ནས་སྔོན་འགྲོ་དང་། དངོས་གཞིའི་འོས་བསྡུའི་དུས་ཚེས་སོགས་ཀྱི་ལས་རིམ་ཞིབ་ཕྲ་རིམ་པས་ཡོང་རྒྱུར་སོང་། འོས་བསྡུའི་ནང་ཆ་ཤས་བཞེས་མཁན་བཙན་བྱོལ་བོད་མི་ཡོངས་ནས་དོ་སྣང་དང་ཐུགས་འཁུར་ཆེ་བཞེས་གནང་སྟེ། གཙོ་བོ་རྒྱ་ནག་གཞུང་ཕྱོགས་ནས་དུས་དང་རྣམ་པ་ཀུན་ཏུ་བཙན་བྱོལ་སྤྱི་ཚོགས་ནང་འཁྲུག་གཞིའི་ལས་དོན་སྤེལ་གྱི་ཡོད་སྟབས་དེ་འདྲའི་སྲིད་དོན་གྱི་ལག་ཆར་མི་འགྲོ་བ་གཟབ་ནན་དགོས་རྒྱུ་དང་། དེ་བཞིན་ཅོལ་ཆུང་བ་ཉུང་ཤས་ཀྱིས་ཆོལ་ཁ་ཆོས་བརྒྱུད་ཁ་ལ་འཁྱེར་ནས་སྤྱི་ཚོགས་དྲྭ་ལམ་སོགས་ནང་ཕུ་དཀྲུག་མདའ་དཀྲུག་བྱེད་པར་རྗེས་སུ་མི་འགྲོ་བར་སོ་སོའི་རྣམ་དཔྱོད་ལ་བརྟེན་ནས་བོད་མིའི་ཡ་རབས་སྤྱོད་བཟང་ཉམས་ཞན་དུ་མ་སོང་བར་འོས་བསྡུའི་སྒྲིག་གཞི་དང་འགལ་མེད་ཐོག རང་རང་གི་མང་གཙོའི་ཁེ་དབང་ལོངས་སུ་སྤྱོད་ཐུབ་རྒྱུའི་འགན་ཁུར་བཞེས་དགོས་པའི་སྐུལ་མ་ཞུ་རྒྱུ་ཡིན།
སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་ལས་དོན་གནང་ཕྱོགས་དང་འབྲེལ་དེ་རིང་འདིར་ཞུ་འདོད་བྱུང་བ་ཞིག་ནི་སྐབས་བཅུ་བདུན་པའི་སྤྱི་འཐུས་ཐུན་མོང་གི་ནུས་པ་གཅིག་ཏུ་སྤུངས་ནས་བཙན་བྱོལ་བོད་མིའི་བཅའ་ཁྲིམས་སོགས་ལ་དུས་བསྟུན་གྱི་བསྐྱར་བཅོས་སོགས་བྱས་ཐུབ་ནས་མང་གཙོའི་ཀ་བ་གསུམ་དང་། རང་དབང་ཅན་གྱི་སྡེ་ཚན་ཆ་ལག་ཚང་བའི་བཙན་བྱོལ་བོད་མིའི་སྒྲིག་འཛུགས་ཀྱི་ལས་དོན་གནང་ཕྱོགས་རྒྱུན་ལྡན་བཞིན་འགྲོ་ཐུབ་པ་བྱུང་ཡོད་པ་མ་ཟད་གནད་དོན་མང་པོའི་ཐོག་ཁྲིམས་སྒྲིག་ནང་ཁ་གསལ་བཟོས་ཐུབ་ཡོད། དེ་བཞིན་ཕྱི་ལོ་ ༢༠༢༢ ལོར་ཨ་རིའི་རྒྱལ་ས་ཝ་ཤིན་ཊོན་དང་། ཉེ་ཆར་ཕྱི་ཟླ་ ༦ པའི་ནང་ཉི་འོང་རྒྱལ་ས་ཊོཀ་ཡོ་བཅས་སུ་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་ ༨ པ་དང་། ༩ པ་སོ་སོ་བསྐོང་ཚོགས་ཞུས་པ་དང་། སྤྱི་འཐུས་རྣམ་པ་ཆ་བགོས་ཀྱིས་ཕྱིའི་རྒྱལ་ཁབ་ཁག་ཏུ་བོད་དོན་ཞུ་སྐུལ་གནང་བ་སོགས་ཀྱིས་རྒྱལ་སྤྱིའི་ཐོག་བོད་དོན་ལ་རྒྱབ་སྐྱོར་དང་ཁྱབ་བསྒྲགས་རྒྱ་ཆེ་བྱུང་ཡོད་ལ། གནས་ཡུལ་རྒྱ་གར་གཞུང་དང་། མངའ་སྡེ་སོ་སོར་གྲོས་ཚོགས་འཐུས་མི་སོགས་ལ་བོད་དོན་ཞུ་སྐུལ་གྱི་ལས་འགུལ་རིམ་པ་སྤེལ་ཐུབ་པ་བྱུང་བ་དེ་དག་གིས་གྲུབ་འབྲས་ཀྱང་མི་དམན་པ་ཐོབ་ཡོད། ཅེས་གསལ་འདུག
བཀའ་ཤག་གི་གསུང་བཤད་ནང་། སྐབས་ ༡༧ པའི་གྲོས་ཚོགས་ཚོགས་དུས་ལྔ་པའི་གྲོས་ཆོད་དགོངས་དོན་ཆེད་འཛུགས་གནང་བའི་ཁྲིམས་སྒྲིག་བསྐྱར་ཞིབ་འཆར་ཟིན་ཚོགས་ཆུང་ལ་བཀའ་ཤག་གི་ངོས་ནས་བཅའ་ཁྲིམས་ཀྱི་དོན་གནད་མང་དག་ཅིག་བསྐྱར་བཅོས་འཆར་ཟིན་གྱི་ངོ་བོར་ཕུལ་བའི་ནང་། སྐབས་དེའི་སྤྱི་ཚོགས་ཀྱི་བསམ་ཚུལ་དང་། བཅའ་ཁྲིམས་ཀྱི་དཀའ་ངལ་ཙམ་ཞིག་མ་ཡིན་པར། དུས་བསྟུན་གདོང་ལེན་དང་། མ་འོངས་ཕུགས་འཕེར་ལ་དམིགས་པའི་དོན་གནད་ཁག་ཅིག་བཀོད་ཡོད་ཁོངས། བཅའ་ཁྲིམས་དོན་ཚན་དང་པོའི་ནང་༸རྒྱལ་དབང་སྐུ་ཕྲེང་རིམ་བྱོན་ནས་ཀྱང་རང་ཆས་སུ་ཡོད་པའི་སྐུ་དབང་རྣམས་བཞེས་སྐྱོང་མཛད་རྒྱུ་ཞེས་དང་། ནང་གསེས་གཉིས་པར་བཀའ་སློབ་ལམ་སྟོན་བསྩལ་རྒྱུའི་ཆ་རྐྱེན་བཏོད་པ་བཀའ་ཤག་གི་འཆར་འབུལ་ལྟར་བསྐྱར་བཅོས་གཏན་འབེབས་ཟིན་ནའང་། དོན་གནད་གཞན་རྣམས་རང་སོར་ལྷག་ཡོད་པས། མ་འོངས་པར་ཚང་མས་ཐུགས་ཞིབ་གནང་བའི་རེ་བ་ཡོད།
སྐབས་ ༡༧ པའི་སྤྱི་ལྷན་གྲོས་ཚོགས་ཀྱི་ཚོགས་དུས་ ༨ པར་བཀའ་ཤག་གི་གཞུང་འབྲེལ་གསལ་བཤད་དུ་བཅའ་ཁྲིམས་ནང་གསལ་ཡུལ་ཁྲིམས་བརྩི་སྲུང་ཞུ་དགོས་གལ་ཆེ་སྐོར་སྙན་སྒྲོན་ཞུས་པའི་ནང། “སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མི་བརྒྱད་ཁྲི་ཙམ་མི་ལོ་ ༦༥ གོང་རྒྱ་བལ་འབྲུག་གསུམ་ནང་བཙན་བྱོལ་དུ་ཕེབས་ནས་ད་ལྟའི་བར། གནས་ཡུལ་རྒྱལ་ཁབ་ཁག་དང་། བཙན་བྱོལ་བོད་མིའི་སྤྱི་ཚོགས་གཉིས་ཀར་འཕེལ་འགྱུར་ཆེན་པོ་ཕྱིན་ཡོད་པ་དང་དུས་མཚུངས་སུ། འདི་དག་གི་ཁྲིམས་སྒྲིག་གི་ཆ་རྐྱེན་དང་། སྲིད་ཇུས་ལག་བསྟར་བྱེད་ཕྱོགས་ལའང་འགྱུར་བ་ཧ་ཅང་ཆེན་པོ་ཕྱིན་ཡོད་སྟབས། ང་ཚོས་བཅའ་ཁྲིམས་དོན་ཚན་དྲུག་པའི་ལམ་སྟོན་ཇི་བཞིན་ཡུལ་ཁྲིམས་ཀྱི་ནང་དོན་གོ་རྟོགས་ཡོད་པའི་ཐོག་ནས་བོད་མིའི་སྒྲིག་འཛུགས་ཀྱི་བྱེད་སྒོ་ཡོངས་སུ་རྫོགས་པ་ཡུལ་ཁྲིམས་དང་མཐུན་པ་བཟོ་དགོས་པ་དང་། ཡང་སྒོས་སུ་ཁྲིམས་སྒྲིག་ཁག་ལ་དུས་བསྟུན་བསྒྱུར་བཅོས་ཀྱིས། ཁྲིམས་མཐུན་དང་ཕུགས་འཕེར་གྱི་ཐབས་ལམ་ལག་ལེན་བསྟར་རྒྱུ་ཁ་ཚ་དགོས་གཏུག་ཆགས་ཡོད་”ཅེས། འཕེལ་རིམ་རྒྱབ་ལྗོངས་དང་། ཁྲིམས་དོན་གནས་བབ། ཁྲིམས་སྒྲིག་གི་དྲི་བ། གདོང་ལེན་བྱེད་སྒོ་བཅས་འགྲེལ་བརྗོད་ཞུས་ཡོད་ལ། གྲོས་ཚོགས་ཚོགས་དུས་ ༩ པར་བོད་མིའི་སྒྲིག་འཛུགས་ཀྱི་སྔོན་རྩིས་སྒྲིག་གཞི་བསྐྱར་བཅོས་ཁྲིམས་འཆར་གྲོས་ཚོགས་སུ་ཕུལ་བར། ཞིབ་འཇུག་སླད་ཆེད་བཙུགས་ཚོགས་ཆུང་བསྐོ་གཞག་ཟིན་འདུག་པས། ཚུགས་ཉེའི་གྲོས་ཚོགས་ཚོགས་དུས་འདིར་བསྐྱར་བཅོས་གཏན་འབེབས་ཐུབ་པའི་རེ་བ་ཞུ་བཞིན་ཡོད།
བཀའ་ཤག་གི་ངོས་ནས་ད་ལོ་༸རྒྱལ་བའི་གོ་སྟོན་དུས་ཆེན་གྱི་གོ་སྐབས་དམ་འཛིན་བྱས་ཏེ། བོད་ཀྱི་ཆོས་ཚོགས་ཐེངས་ ༡༥ པ་གཟབ་རྒྱས་ངང་སྐོང་ཚོགས་དང་། གངས་ལྗོངས་ལྷ་མི་ཐུན་མོང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ། ༸རྒྱལ་བའི་གོ་སྟོན་དངོས་གཞིའི་མཛད་སྒོར་བོད་ཀྱི་ཆོས་བརྒྱུད་ཁག་གི་དབུ་ཁྲིད་བླ་ཆེན་དང་སྐུ་ཚབ། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་ཁྲ་གོར་གོར་གདན་གཅིག་ཏུ་འཛོམས་ཐོག རྒྱ་གར་དབུས་དང་མངའ་སྡེ་ཁག་གི་སྐུ་ཚབ་བློན་ཆེན་གྱིས་གཙོས་འཛམ་གླིང་ཡུལ་གྲུ་ཁག་ནས་ཕེབས་པའི་སྐུ་མགྲོན་དང་། སྒྱུ་རྩལ་བ་བརྒྱ་ཕྲག་དུ་མས་༸རྒྱལ་བའི་གོ་སྟོན་དང་བསྟུན་པའི་བྱམས་བརྩེའི་ལོ་འཁོར་དབུ་འཛུགས་ཀྱི་མཛད་རིམ་ལ་མཉམ་ཞུགས་གནང་བའི་གནས་ཚུལ་རྣམས་གསར་འགྱུར་བརྒྱུད་ལམ་ ༢༡༦ ཙམ་གྱིས་རྒྱང་སྲིང་དང་། དངོས་ཕབ་གློག་བརྙན་དང་དཔྱད་གླེང་རྩོམ་ཡིག་སྣ་ཚོགས་བརྒྱུད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་ལ་རྗེས་སུ་ཡི་རངས་དང་། དགོངས་བཞེད་ལ་མོས་གུས་རྒྱབ་སྐྱོར་ཇི་ཡོད་ཀུན་གྱི་མཐོང་ལམ་དུ་མངོན་ཐབས་དང་། བོད་ཀྱི་ཆབ་སྲིད་ཀྱི་གལ་གནད་སྐོར་གླེང་སློང་ཤུགས་ཆེ་བྱེད་ཐུབ་པ་བྱུང་ཡོད། ཅེས་གསུངས་འདུག
ཡང་གསུང་འཕྲིན་ནང་། ཕྱི་ལོ་ ༢༠༢༥ ཟླ་ ༧ ཚེས་ ༢ ཉིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས། ༸རྒྱལ་དབང་སྐུ་ཕྲེང་རྒྱུན་མཐུད་ཕེབས་རྒྱུ་ཡིན་པའི་ཞལ་བཞེས་བཀའ་དྲིན་བསྐྱངས་པར། བོད་ཀྱི་ཆོས་ཚོགས་ཐེངས་བཅོ་ལྔ་པར་ཚོགས་ཞུགས་ཆོས་བརྒྱུད་རིས་མེད་ཀྱི་དབུ་ཁྲིད་བླ་ཆེན་རྣམ་པ་དང་། ཚོགས་བཅར་བ་སྤྱི་མགྲིན་ནས་ཉིན་དེ་རང་དུ། “སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བསྩལ་བའི་གསུང་འཕྲིན་རིན་པོ་ཆེ་དགོངས་དོན་ཆ་ཚང་ལ་ཚོགས་བཅར་བ་ཡོངས་ནས་སྤྱི་མོས་ཀྱིས་རྒྱབ་སྐྱོར་ཞུ་རྒྱུ་”ཞེས་དང། “སྐུ་ཕྲེང་རྒྱུན་མཐུད་ཇི་ལྟར་བྱ་རྒྱུ་ནི་བོད་བརྒྱུད་ནང་བསྟན་གྱི་ཆོས་ཕྱོགས་ཀྱི་བྱེད་སྒོ་ཞིག་ཡིན་སྟབས། རྒྱ་ནག་དམར་གཞུང་གིས་ཆབ་སྲིད་དགོས་མཁོ་ཁོ་ནར་དམིགས་ནས་༸རྒྱལ་བའི་སྐུ་ཕྲེང་རིམ་བྱོན་ཕེབས་ཕྱོགས་ཐད་ཇུས་ངན་སྣ་ཚོགས་གཤོམ་སྒྲོགས་བྱས་དང་བྱེད་བཞིན་པར་དགག་པ་མཐའ་གཅིག་ཏུ་བྱ་རྒྱུ་མ་ཟད། དུས་ནམ་ཡང་ངོས་ལེན་བྱེད་ཐབས་མེད་”ཅེས་དམིགས་བསལ་ཐུགས་རྗེ་ཆེ་ཞུའི་གྲོས་ཆོད་དོན་ཚན་གསུམ་ཅན་ཞིག་བསྣོལ་འཇོག་དང་། ཕྱི་ཟླ་ ༧ ཚེས་ ༤ ཉིན་ཟུར་རྒྱན་གྲོས་ཆོད་དོན་ཚན་བཞི་ཅན་གཏན་འབེབས་གནང་བའི་ནང་། “༸རྒྱལ་བའི་ཡང་སྲིད་ངོས་འཛིན་གྱི་བྱེད་སྒོའི་འགན་ཁུར་བྱེད་པོ་དང་། ངོས་འཛིན་བྱེད་ཕྱོགས་འགྱུར་མེད་རྡོ་རྗེའི་ཚིག་གིས་མནན་པ་རྗེན་པར་ཕེབས་པས། བསྟན་འགྲོའི་འགལ་རྐྱེན་བར་ཆད་མཐའ་དག་རང་བཞིན་དུ་ཞི་ཞིང་། མཛད་འཕྲིན་བསྐལ་པའི་བར་སྐྱོང་ངེས་ཀྱི་གཡར་དམ་ལ་ཚོགས་བཅར་བ་ཡོངས་དང་རྗེས་འཇུག་ཀུན་གྱིས་ཐེ་ཚོམ་ནེམ་ནུར་མེད་པར་བརྩི་བཀུར་ཉམས་ལེན་ཞུ་རྒྱུ་”ཞེས་གཡར་དམ་བཅས་ཡོད་པས། རྒྱ་ནག་གུང་ཁྲན་གཞུང་གིས། ༸རྒྱལ་བའི་ཡང་སྲིད་ངོས་འཛིན་”རྒྱལ་ནང་ནས་བརྩད་ཞིབ་དང་། གསེར་བུམ་དཀྲུག་འདོན། ཀྲུང་དབྱང་གི་ཆོག་མཆན་”ཟེར་བའི་ཆབ་སྲིད་ཀྱི་ཧམ་ཤེད་རྨང་ནས་བསྒྱེལ་ཡོད།
རྒྱ་ནག་གུང་ཁྲན་གཞུང་གིས་བོད་ལ་བཙན་འཛུལ་བྱས་མ་ཐག་པ་ནས་བོད་བརྒྱུད་ནང་བསྟན་རྩ་མེད་གཏོང་བའི་དམིགས་ཡུལ་བཟུང་སྟེ། ཆོས་བྱེད་བསྟི་གནས་དགོན་པ་དྲུག་སྟོང་ལྷག་རྩ་གཏོར་དང་། གྲྭ་བཙུན་རྣམས་བཙན་ཤེད་ཀྱིས་སྐྱ་སར་ཕབ་པ་མ་ཟད། བོད་མི་ས་ཡ་གཅིག་དང་འབུམ་གཉིས་ལྷག་དུས་མིན་རྐྱེན་ལམ་བཏང་ཡོད་པ་དང་། དེང་སང་བོད་མི་ཚོར་སོ་སོའི་ངོ་རྟགས་དོར་ནས་ཀྲུང་ཧྭ་མི་རིགས་ཀྱི་འདུ་ཤེས་བསྐྲུན་དགོས་པ་དང་། བོད་བརྒྱུད་ནང་བསྟན་ཀྲུང་གོ་ཅན་དུ་བསྒྱུར་དགོས་ཟེར་ནས། དགོན་པ་ཁག་གི་གྲྭ་བཙུན་གྱི་གྲངས་ཚད་ཚོད་འཛིན་དང་། དགོན་པའི་མཁར་དབང་དང་ཡོང་འབབ་ཚང་མ་རྒྱ་གཞུང་གིས་བཙན་འཕྲོག །དགོན་པའི་འཛིན་སྐྱོང་སྒྲིག་འཛུགས་ནང་དམར་ཤོག་ཚོགས་མི་དང་། ལས་བྱེད། སྤྱི་བདེ་མི་སྣ་བཀོད་སྒྲིག །གྲྭ་བཙུན་ཚོར་འགྲོ་འོང་བཀག་སྡོམ་དང་། ནང་ཆོས་ལ་ཐོས་བསམ་སྒོམ་གསུམ་བྱེད་པའི་ཐོབ་ཐང་བཀག་ནས་དམར་པོའི་ལྟ་སྤྱོད་སློབ་ཁྲིད། མཁན་བླ་དགེ་བཤེས་རྣམས་ཆབ་སྲིད་ཀྱི་ལག་ཆར་བཀོལ་སྤྱོད་སོགས་རྒྱ་གུང་ཁྲན་གཞུང་ལས་ལྷག་པའི་བསྟན་དགྲ་ཞིག་ད་བར་བོད་བརྒྱུད་ནང་བསྟན་གྱི་ལོ་རྒྱུས་ནང་བྱུང་མྱོང་མེད་པས། ལོ་རྒྱུས་དང་། བཟང་སྤྱོད། ཁྲིམས་ལུགས་གང་ཅིའི་ཐོག་ནས་ཀྱང་རྒྱ་གུང་ཁྲན་གྱི་ཀྲུང་དབྱང་ཟེར་བ་དེར་རྒྱལ་མཚམས་བརྒལ་ཏེ་༸རྒྱལ་བའི་ཡང་སྲིད་ངོས་འཛིན་ཐོག་ཆོག་མཆན་སྤྲོད་པའི་འོས་བབ་གཏན་ནས་ཡོང་ཤེས་ཐབས་མེད།
རྒྱ་གུང་ཁྲན་གཞུང་གིས་ལོ་ངོ་ ༣༠ གོང་ཀུན་གཟིགས་༸པཎ་ཆེན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་དགུང་ལོ་དྲུག་སྟེང་བཙན་ཁྲིད་ཀྱིས་ད་བར་གར་སོང་ཆ་མེད་དུ་གྱུར་ཡོད་པ་དང་། གསེར་བུམ་དཀྲུག་འདོན་ཟེར་བའི་འཁྲབ་སྟོན་བརྒྱུད་ནས་བསྐོ་གཞག་བྱས་པའི་པཎ་ཆེན་རྒྱལ་མཚན་ནོར་བུ་གུང་ཁྲན་ཏང་གི་ལེའུ་བཅུ་པའི་ངག་ཅན་བཟོས་ཏེ་ལབ་བརྡོལ་ཅི་རིགས་འབྱིན་དུ་འཇུག་པ་དང་། བོད་རིགས་རྣམས་བཙན་འདེད་ཀྱིས་མཇལ་ཁ་དང་། ཆོས་ཉན་དུ་ཁྲིད་བཞིན་པའི་ཁོར་ཡུག་དེ་ལྟ་བུའི་ནང་། བསྟན་འགྲོར་ཕན་བདེ་སྒྲུབ་པའི་གོ་སྐབས་ཤིག་ཡོང་མི་སྲིད་པས། ཡང་སྲིད་འཁྲུངས་པའི་དགོས་པ་མེད་པར་གྱུར་ཡོད།
ང་ཚོས་གསལ་བརྗོད་ཐུབ་པ་ཞིག་ནི། སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་༸སྐུ་ཚེ་ཡུན་རིང་བཞུགས་རྒྱུ་ངེས་བརྟན་ཡིན་པ་དང་། མུ་མཐུད་མཛད་ཁུར་བཞིའི་ཐོག་ཐུགས་བརྩོན་མཛད་རྒྱུ་མ་ཟད། ཇི་སྲིད་བོད་དོན་བདེན་མཐའ་མ་གསལ་བ་དེ་སྲིད་དུ་མ་འོངས་༸རྒྱལ་བའི་ཡང་སྲིད་ཀྱང་རང་དབང་ལུང་པར་འཁྲུངས་རྒྱུའི་བཀའ་གསལ་ཕེབས་ཟིན་ཡོད་ལ། རང་དབང་ལུང་པ་ནས་འབྱོན་ངེས་ཀྱི་༸རྒྱལ་བའི་ཡང་སྲིད་གང་ཉིད་འཚོལ་ཞིབ་ངོས་འཛིན་དང་། ཁྲི་འདོན་གྱི་འགན་ཁུར་རྣམས་དགའ་ལྡན་ཕོ་བྲང་ཡིད་ཆེས་དགེ་རྩས་ལེན་རྒྱུ་ཡིན་ཞིང་། དགེ་རྩའི་དབང་ལྡན་འགན་འཛིན་རྣམ་པས། བོད་བརྒྱུད་ནང་བསྟན་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པ་དང། ༸རྒྱལ་དབང་སྐུ་ཕྲེང་ན་རིམ་དང་ལུས་དང་གྲིབ་བཞིན་འགྲོགས་པའི་དམ་ལྡན་ཆོས་སྲུང་ཁག་ལ་སྐབས་བསྟུན་ལམ་སྟོན་ཞུས་ཏེ་ཡང་སྤྲུལ་རྩད་གཅོད་ངོས་འཛིན་སྔོན་སྲོལ་བཞིན་བྱ་རྒྱུ་ཡིན་ལ། སྐུ་ཕྲེང་ན་རིམ་ནས་གངས་ཅན་པ་རྣམས་སྐྱོང་བའི་གཡར་དམ་གཡེལ་མེད་སྒྲུབ་ངེས་པས། རྒྱ་ནག་གུང་ཁྲན་གཞུང་གི་ཧམ་ཤེད་ངན་གཡོའི་རྫུན་སྤྱོད་རྣམས་རྒྱལ་སྤྱིའི་ནང་དང་། ནང་པའི་སྤྱི་ཚོགས་སྤྱི་དང་། བོད་བརྒྱུད་ནང་བསྟན་གྱི་རྗེས་འཇུག་པའི་ཁྲོད་ངོས་ལེན་ཐོབ་པའི་གཞི་རྟེན་གང་ཡང་མེད་པ་ཆགས་རྒྱུ་ཉག་ཅིག་ཡིན།
༸རྒྱལ་བའི་གོ་སྟོན་ཉིན། རྒྱལ་ཁབ་དང་གཞུང་གི་དབུ་ཁྲིད་ལས་ཟུར་དང་། གནད་ཡོད་མི་སྣ་མང་པོ་ཞིག་གིས་༸མགོན་པོ་མཆོག་གི་འཁྲུངས་སྐར་དུས་ཆེན་ལ་འཚམས་ཞུ་ཕུལ་བ་མ་ཟད། དབྱིན་ཡུལ་དང་། ཧྥ་རན་སི། འཇར་མན། ནི་དྷར་ལནྜ། ལི་ཐུ་ཝེ་ནི་ཡ། ཨེས་ཏོ་ནི་ཡ། ཨའི་སི་ལནྜ་བཅས་ཀྱི་འགྲོ་བ་མིའི་ཐོབ་ཐང་གི་སྐུ་ཚབ་ཐུན་མོང་ནས་༸རྒྱལ་བའི་ཡང་སྲིད་དང་འབྲེལ་བའི་གནད་དོན་ལ་ཕྱི་ནས་ཐེ་བྱུས་མི་ཆོག་པའི་མཉམ་འབྲེལ་སྲིད་ཇུས་བསྒྲགས་གཏམ་སྤེལ་ཡོད་པ་དང་། ཟླ་ ༧ ཚེས་ ༢༧ ཉིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ལོ་མང་འབྲེལ་ལམ་གཏིང་ཟབ་ཡོད་པའི་རྒྱལ་ཁབ་སྟེ། ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་སྐུ་ཞབས་པེ་ཊར་པ་ཝེལ་མཆོག་ལ་དྭགས་སུ་༸གོང་ས་མཆོག་མཇལ་བཅར་བྱུང་བ་ནི་ལོ་རྒྱུས་ཀྱི་ལེ་ཚན་གསར་པ་ཞིག་ཆགས་ཡོད། བཀའ་ཤག་གིས་བོད་མིའི་སྤྱི་ཚོགས་དང་། བོད་བརྒྱུད་ནང་བསྟན་གྱི་རྗེས་འཇུག་པ། ནང་པའི་སྤྱི་ཚོགས། རྒྱལ་ཁབ་ཁག་བཅས་ནས་༸རྒྱལ་བའི་ཡང་སྲིད་ཀྱི་གནད་དོན་ཐོག་ཁྲིམས་ཡིག་དང་། གྲོས་ཆོད། བསྒྲགས་གཏམ། གསོལ་འདེབས། སྙན་ཐོ་སོགས་འདོན་སྤེལ་ཟིན་པ་རྣམས་བསྡུ་རུབ་ཀྱིས། རྒྱབ་རྟེན་ཡིག་ཆའི་ཚུལ་དུ་གསོག་ཉར་བྱེད་བཞིན་པ་དང་། ད་དུང་མུ་མཐུད་རང་དབང་ལུང་པའི་ནང་ནུས་ལྡན་གྱི་རྒྱབ་སྐྱོར་འཚོལ་ཐབས་འབད་བརྩོན་ཞུ་རྒྱུ་ཡིན་པས། འབྲེལ་ཐོགས་ཚང་མས་མཉམ་རུབ་གནང་སྐྱོང་ཡོང་བའི་འབོད་སྐུལ་ཞུ་བཞིན་ཡོད།
མང་གཙོ་ལམ་ལུགས་ནི་བོད་དོན་འཐབ་རྩོད་ཀྱི་གཞོམ་གཞིག་མི་ཐུབ་པའི་སྟོབས་ཤུགས་ཡིན་ལ། མ་འོངས་པར་གཞིས་བྱེས་ལྷན་འཛོམས་སྐབས་གཞིས་བཞུགས་སྤུན་ཟླ་ཚོར་འབུལ་རྒྱུའི་ལེགས་སྐྱེས་རྩ་ཆེ་ཤོས་ཀྱང་འདི་ཡིན། བཀའ་ཤག་གི་འབོད་ཚིག་ཏུ་སྤྱི་སྙོམས་དྲང་བདེན་ཞེས་པ་འདི་ཡང་མང་གཙོ་ལམ་ལུགས་ཀྱི་ཁྲིམས་ལུགས་དྲང་བདེན་དང་སྲིད་ཇུས་སྤྱི་སྙོམས་ལ་བརྟེན་ནས་མངོན་འགྱུར་བྱེད་ཐུབ་པ་དང་། མི་མང་རྣམས་ཆབ་སྲིད་དང་སྤྱི་ཚོགས་ཀྱི་བྱེད་སྒོར་མཉམ་ཞུགས་ཀྱི་སྒོ་ནས་ནུས་པ་མཉམ་སྤུངས། བོད་རང་དབང་གི་ཆེད་དུ་རྡོག་གྲ་འགྲིག་པོའི་ཐོག་ནས་གོམ་པ་མདུན་སྤོ་བཅས་ཀྱི་རེ་འདུན་འཆང་གི་ཡོད་པས། ང་ཚོ་ཐུན་མོང་གི་རྨི་ལམ་མངོན་དུ་འགྱུར་བར་ཚང་མས་བློ་སྟོབས་སྐྱེད་རོགས་ཞེས་གསལ་འདུག
གསར་འགོད་པ། སྐལ་བཟང་སྦྱིན་པ།
