བལ་ཡུལ་གཞུང་གིས་ངོ་དེབ་དང་ཡུ་ཊུབ་ཚུད་པའི་སྤྱི་ཚོགས་དྲ་གནས་ ༢༦ བཀག་སྡོམ་བྱས།

སྤྱི་ཚོགས་དྲ་གནས་ངོ་དེབ་དང་ཡུ་ཊུབ་སོགས་ཀྱིས་དུས་ཐོག་ཏུ་ཐོ་འགོད་བྱས་མེད་པའི་རྐྱེན་གྱིས་དེ་རིང་ནས་བཟུང་བལ་ཡུལ་གཞུང་གིས་བཀག་སྡོམ་བྱས་ཡོད་འདུག

བལ་ཡུལ་ནང་གི་ངོ་དེབ་དང་། ཡུ་ཊུབ། ཨིན་སི་ཌ་གྷ་རམ་ (Instagram) ཚུད་པའི་སྤྱི་ཚོགས་དྲ་གནས་ ༢༦ ཙམ་གྱིས་བལ་ཡུལ་གྱི་བརྡ་འཕྲིན་དང་འབྲེལ་ལམ་ལས་ཁུངས་ (Ministry of Communication and Information Technology) སུ་དུས་ཐོག་ཐོ་འགོད་བྱས་མེད་པར་བརྟེན། དེ་རིང་ཕྱི་ཚེས་ ༥ ཉིན་ནས་བཟུང་བལ་ཡུལ་གཞུང་གིས་སྤྱི་ཚོགས་དྲ་གནས་ ༢༦ དངོས་སུ་བཀག་ཡོད་འདུག

དེའི་ཐད་བལ་ཡུལ་གྱི་གསར་འགོད་མཐུན་ཚོགས་ཀྱིས། གཞུང་གིས་ཐབས་ལམ་གཞན་སྤྲད་མེད་པའི་ཐོག་སྤྱི་ཚོགས་དྲ་གནས་བཀག་སྡོམ་བྱས་པའི་ཐག་གཅོད་དེས་སྨྲ་བརྗོད་རང་དབང་དང་གསར་འགོད་རང་དབང་ལ་དམ་དྲག་བྱེད་ཀྱི་ཡོད་པ་མ་ཟད། རྩ་ཁྲིམས་ལྟར་ཆ་འཕྲིན་གྱི་ཐོབ་ཐང་ལའང་ཤུགས་རྐྱེན་ཐེབས་ཡོད། དེར་བརྟེན་སྤྱི་ཚོགས་དྲ་གནས་བཀག་སྡོམ་གྱི་ཐག་གཅོད་ལ་མཐའ་གཅིག་ཏུ་ངོ་རྒོལ་ཡོད་སྐོར་དང་། སྲིད་གཞུང་གིས་གསར་འགོད་རང་དབང་དང་སྨྲ་བརྗོད་རང་དབང་ལ་བརྩི་བཀུར་བྱས་ཏེ་བཀག་སྡོམ་གྱི་ཐག་གཅོད་དེ་འཕྲལ་དུ་ཕྱིར་འཐེན་བྱེད་དགོས་པའི་དགོས་འདུན་བཏོན་འདུག

ཡུལ་དེའི་བརྡ་འཕྲིན་དང་འབྲེལ་ལམ་ལས་ཁུངས་ཀྱིས། འདི་ལོའི་ཕྱི་ཟླ་ ༨ ཚེས་ ༢༨ ཉིན་ནས་བདུན་ཕྲག་གཅིག་ནང་ཚུད་དུ་སྤྱི་ཚོགས་དྲ་གནས་ལས་ཁུངས་ཀྱིས་ཐོ་འགོད་བྱ་དགོས་པའི་ཡོངས་ཁྱབ་གསལ་བསྒྲགས་སྤེལ་ཡོད་ཀྱང་། ངོ་དེབ་སོགས་སྤྱི་ཚོགས་དྲ་གནས་ཚོས་ཐོ་འགོད་བྱས་མེད་སྐོར་བརྗོད་འདུག

བལ་གཞུང་གི་ཐག་གཅོད་དེའི་རྐྱེན་གྱིས་ཡུལ་དེའི་ནང་གནས་སྡོད་བྱེད་མཁན་ཡུལ་མི་ས་ཡ་མང་པོས་སོ་སོའི་ཕ་མ་དང་། སྤུན་གཉེན་སོགས་ལ་འབྲེལ་འདྲིས་བྱེད་པར་དཀའ་ངལ་འཕྲད་བཞིན་ཡོད་འདུག་ལ། བལ་ཡུལ་གྱི་གསར་འགོད་པ་རྒན་པ་རི་ཇལ་ (Pralhad Rijal) ལགས་ཀྱིས། བལ་ཡུལ་གྱི་གཞོན་སྐྱེས་ས་ཡ་ ༧ ལྷག་ཕྱིའི་རྒྱལ་ཁབ་ཁག་ཏུ་ལས་ཀ་དང་མཐོ་རིམ་སློབ་སྦྱོང་བྱེད་བཞིན་ཡོད་པས། ཐག་གཅོད་དེའི་རྐྱེན་གྱིས་གཞོན་སྐྱེས་དེ་དག་གིས་རང་ཁྱིམ་དུ་ཡོད་པའི་སོ་སོའི་ནང་མི་དང་གྲོགས་པོ་རྣམས་ལ་འབྲེལ་བ་བྱེད་པར་དཀའ་ངལ་འཕྲད་རྒྱུ་ཡིན་སྐོར་བརྗོད་འདུག

འདི་ལོའི་ཕྱི་ཟླ་ ༨ པའི་ནང་བལ་ཡུལ་གྱི་ཆེས་མཐོའི་ཁྲིམས་ཁང་གིས་ཕྱིའི་རྒྱལ་ཁབ་དང་རྒྱལ་ནང་གི་སྤྱི་ཚོགས་དྲ་གནས་རྣམས་ཀྱིས་ཐོ་འགོད་ངེས་པར་དུ་བྱ་དགོས་པའི་བཀའ་རྒྱ་བཏང་ཡོད་འདུག་ལ། ཟླ་དེའི་ཕྱི་ཚེས་ ༢༨ ནས་ཕྱི་ཟླ་ ༩ ཚེས་ ༤ ནང་ཚུད་དུ་ཐོ་འགོད་བྱ་དགོས་པའི་གསལ་བསྒྲགས་ཀྱང་སྤེལ་ཡོད་འདུག་ལ། དེ་རིང་འདི་གའི་གསར་འགོད་པས་བལ་ཡུལ་ནང་གནས་སྡོད་བྱེད་མཁན་ཁག་ཅིག་ལ་སྐད་ཆ་དྲིས་དུས་དེ་རིང་ནས་སྤྱི་ཚོགས་དྲ་གནས་དེ་དག་སྒོ་འབྱེད་ཐུབ་ཀྱི་མེད་སྐོར་བརྗོད་བྱུང་།

ཕྱི་ལོ་ ༢༠༢༣ ཟླ་ ༡༡ ནང་བལ་ཡུལ་གཞུང་གིས་སྤྱི་ཚོགས་དྲ་གནས་ཊིག་ཊོག་ (TikTok) བཀག་སྡོམ་བྱས་ཡོད་ཀྱང་། ཕྱིས་སུ་ཊིག་ཊོག་གིས་བལ་ཡུལ་གཞུང་ལ་ཐོ་འགོད་བྱས་ཏེ་འདས་ལོའི་ཕྱི་ཟླ་ ༨ པའི་ནང་བསྐྱར་དུ་བེད་སྤྱོད་གཏོང་ཐུབ་པ་ཆགས་ཡོད་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།