ཉིན་གྲངས་བརྒྱད་རིང་གི་གྲོས་ཚོགས་ཚོགས་དུས་བཅུ་པ་དབུ་འཛུགས་གནང་སོང་།

དེ་རིང་ཕྱི་ཚེས་ ༡༠ ནས་ ༡༨ བར་ཉིན་གྲངས་བརྒྱད་ཀྱི་རིང་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པ་དངོས་སུ་དབུ་འཛུགས་གནང་སོང་།

དེ་རིང་སྔ་དྲོའི་ཆུ་ཚོད་ ༩།༣༠ སྟེང་གངས་ཅན་སྐྱིད་གཤོངས་ཀྱི་སྤྱི་འཐུས་ལྷན་ཚོགས་ཀྱི་ཚོགས་ཁང་དུ་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པ་དབུ་འཛུགས་གནང་སོང་བ་དང་། ད་ལན་གྱི་ཚོགས་དུས་ཐོག་བོད་ནང་གི་ཛ་དྲག་གནས་ལ་གདུང་སེམས་མཉམ་སྐྱེད་ཀྱི་གྲོས་ཆོད་ཅིག་གཙོ་བྱས་པའི་བཀའ་ཟུར་བཀྲ་ཤིས་དབང་འདུས་ལགས་དང་། བཀའ་ཟུར་ཚེ་རིང་དོན་གྲུབ་ལགས། སྤྱི་ཟུར་ངག་དབང་བཀྲ་ཤིས་ལགས་བཅས་ལ་མྱ་ངན་གུས་འདུད་ཀྱི་གྲོས་ཆོད་ཅིག འོས་བསྡུའི་འགན་འཛིན་འཕར་མ་གཉིས་བསྐོ་གཞག་དང་བཅའ་ཁྲིམས་བསྐྱར་བཅོས། དམིགས་བསལ་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་རྩིས་ལོ་ ༢༠༢༤་་་  ༢༠༢༥ ཡི་ལས་བསྡོམས་ཁག་ལ་ཞིབ་བཤེར་དང་གསལ་འདེབས་བྱ་རྒྱུ་དེ་ཡིན་ཞིང་། ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གྲོས་ཚོགས་ཀྱི་ལས་ཉིན་བརྒྱད་དེ་དོན་ཕན་ལྡན་པ་ཡོང་བར་ཚང་མས་མཉམ་རུབ་ཀྱིས་མཐུན་འགྱུར་གནང་བའི་འབོད་སྐུལ་ཞུས་སོང་།

གྲོས་ཚོགས་ཚོགས་དུས་བཅུ་པའི་སྟེང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་དབུ་འཛུགས་གསུང་བཤད་གནང་བའི་ནང་། བོད་མི་མང་སྤྱི་འཐུས་ལྷན་ཚོགས་ལོ་གཅིག་ལ་ཐེངས་གཉིས་འཚོགས་ཀྱི་ཡོད་པ་ལྟར། ཕྱི་ཟླ་ ༣ པའི་ནང་དངུལ་རྩིས་གྲོས་ཚོགས་དང་། ཕྱི་ཟླ་ ༩ པའི་ནང་ལས་བསྡོམས་གྲོས་ཚོགས་ཟེར་ནས་ད་ལྟ་ང་ཚོ་ལས་བསྡོམས་གྲོས་ཚོགས་འཚོག་གི་ཡོད་པ་རེད། གཙོ་བོ་ལས་ཉིན་མང་ཆེ་བ་ལྷན་ཁང་ཁག་གི་ལས་བསྡོམས་རྒྱས་པ་དེ་དེ་སྔོན་ནས་སྤྱི་འཐུས་རྒྱུན་ལས་ལ་གནང་ནས་སྤྱི་འཐུས་རྒྱུན་ལས་ཀྱིས་དེ་ལ་ཤར་སྐྱོད་བྱས་ཏེ། སྙན་ཐོ་དང་དྲི་བ་ཕེབས་ཀྱི་ཡོད་རེད། དེ་བཞིན་ལྷན་ཁང་སོ་སོའི་ངོས་ནས་ལས་བསྡོམས་བསྡུས་པ་གྲོས་ཚོགས་ནང་སྙན་སྒྲོན་ཞུ་རྒྱུའི་གནས་སྟངས་ཀྱི་ཐོག་ནས། དེ་རིང་གི་གྲོས་ཚོགས་དེ་དེ་རིང་ཕྱི་ཟླ་ ༩ ཚེས་ ༡༠ ནས་ ༡༨ བར་དུ་ལས་ཉིན་བརྒྱད་བྱུང་བའི་རིང་ལ། ལས་ཉིན་མང་བ་དེ་ལས་བསྡོམས་ཀྱི་གྲོས་ཚོགས་ཐོག་ལ་འབུལ་དགོས་པའི་གནས་སྟངས་ཆགས་རེད། སྤྱི་ཡོངས་ཀྱི་ཆབ་སྲིད་ཀྱི་གནས་སྟངས་ཐོག་ལ་ཉེ་སྔོན་ཕྱི་ཟླ་ ༩ ཚེས་ ༢ ཡོངས་ཁྱབ་ཀྱི་བཀའ་ཤག་གི་གསུང་བཤད་དང་གྲོས་ཚོགས་ཀྱི་གསུང་བཤད་ནང་། རྒྱལ་སྤྱིའི་གནས་སྟངས་དང་བོད་ནང་གི་གནས་སྟངས། ལྷག་པར་དུ་ལོ་འདིའི་ནང་ལོགས་ལ་ཆབ་སྲིད་དང་འཛིན་སྐྱོང་གི་ལས་དོན་གལ་ཆེ་བ་བྱུང་ཡོད་པ་དེ་གསལ་པོ་ཡོད་པ་རེད། ཚང་མས་མཁྱེན་གྱི་ཡོད་རེད། ཅེས་གསུངས་སོང་།

ཚོགས་གཙོ་མཆོག་གིས། ཕྱི་ཟླ་ ༧ པའི་ནང་བོད་ཀྱི་ཆོས་ཚོགས་ཐེངས་ ༡༥ པ་འཚོགས་རེད། སྐབས་དེ་དུས་དབུ་ཁྲིད་བླ་ཆེན་ཁག་དང་སྐུ་ཚབ་ཁག ཚོགས་བཅར་བ་ ༡༥༠ ལྷག་མཉམ་ཞུགས་བྱས་ཡོད་པ་རེད། སྐབས་དེ་དུས་༧གོང་ས་རྒྱལ་བ་རིན་པོ་ཆེ་མཆོག་གསལ་ཞལ་མཇལ་རྒྱུ་བྱུང་བ་དང་། ལྷག་པར་དུ་༧གོང་ས་མཆོག་གིས་༧རྒྱལ་དབང་སྐུ་ཕྲེང་རིམ་པ་རྒྱུན་མཐུད་ནས་ཕེབས་རྒྱུའི་ཞལ་བཞེས་བཀའ་དྲིན་བཟང་པོ་བསྐྱངས་ཡོད་པ་རེད། སྐབས་དེར་ཆོས་བརྒྱུད་རིས་སུ་མ་ཆད་པའི་དབུ་ཁྲིད་བླ་ཆེན་ཁག་དང་སྐུ་ཚབ་ཁག ཚོགས་བཅར་ཚང་མས་སྤྱི་མོས་ཀྱི་ཐོག་ནས་རྒྱབ་སྐྱོར་གྱི་གྲོས་ཆོད་བཞག་པ་དང་། ཆོས་ཚོགས་ཀྱི་མཇུག་ཏུ་དམིགས་བསལ་གྲོས་ཆོད་ཟུར་མཆན་དོན་ཚན་བཞི་ཅན་ཞིག་བཞག་ནས། མདོར་ན་༸གོང་ས་རྒྱལ་བ་རིན་པོ་ཆེ་མཆོག་གི་དགོངས་གཞི་གང་ཡིན་པ་དེའི་ཐོག་ནས་ཤར་སྐྱོད་ཞུ་རྒྱུ་གཅིག་དང་། ལྷག་པར་དུ་རྒྱ་ནག་གཞུང་གིས་༸རྒྱལ་དབང་གི་སྐུ་ཕྲེང་རྒྱུན་མཐུད་ཕེབས་རྒྱུར་ཐེ་ཇུས་བྱེད་པ་ཡིན་ན། དེར་རྩ་བ་ནས་མོས་མཐུན་མེད་པ་དང་ངོས་ལེན་མེད་པ། དེ་བཞིན་རྒྱལ་སྤྱིའི་སྤྱི་ཚོགས་ཀྱི་ཐོག་ནས་ཕྱི་ཟླ་ ༦ ཚེས་ ༦ ལ་ཡུ་རོབ་ཀྱི་རྒྱལ་ཁབ་ཁག་བདུན་གྱི་འགྲོ་བ་མིའི་ཐོབ་ཐང་གི་སྡེ་ཚན་གྱི་ཐོག་ནས་༸རྒྱལ་དབང་སྐུ་ཕྲེང་ཕེབས་རྒྱུ་དེ་བོད་མི་གཅིག་པོའི་ལག་ལ་ཡོད་པ། གཞན་གྱིས་ཐེ་གཏོགས་བྱས་ན་འགྲིག་གི་མེད་པ། དེ་བཞིན་མཉམ་འབྲེལ་རྒྱལ་ཚོགས་ཀྱི་ཇི་ནི་ཝ་ཚོགས་ཆེན་ཐེངས་ ༥༩ པའི་སྐབས། དབྱིན་ཇིའི་གཞུང་ཚབ་ཀྱིས་ཟུར་དུ་འདུ་སྐོང་བྱས་ཏེ་ཚོགས་ཁག་ཅིག་ལྷན་འཛོམས་གནང་བའི་ཐོག་ནས་༸གོང་ས་མཆོག་གི་སྐུ་ཕྲེང་ཕེབས་རྒྱུ་དེ་བོད་མི་རང་གི་ཆོས་ཕྱོགས་ཀྱི་བྱེད་སྒོ་རང་རེད། དེ་ལ་ཆབ་སྲིད་ཀྱི་ཐོག་ནས་ཐེ་ཇུས་བྱེད་པ་ཡིན་ན་ཐད་ཀར་ཆོས་དད་རང་དབང་ལ་ཐེ་ཇུས་བྱས་པ་ཆགས་ཀྱི་ཡོད་རེད་ཟེར་ནས། གང་ལྟར་༸སྐྱབས་མགོན་རིན་པོ་ཆེའི་སྐུ་ཕྲེང་རྒྱུན་མཐུད་ནས་ཕེབས་རྒྱུ་དེ་ང་ཚོའི་ཆོས་ཕྱོགས་ཀྱི་བྱེད་སྒོ་ཞིག་ཡིན་པ་དང་། རྒྱལ་སྤྱིའི་སྤྱི་ཚོགས་ཀྱི་ཐོག་ནས་དེ་ལ་ངོས་འཛིན་བྱས་པའི་ཐོག་ནས་རྒྱ་ནག་གཞུང་གིས་ཐེ་ཇུས་བྱས་ན་ངོས་ལེན་མེད་པ་དང་། ཆོས་དད་རང་དབང་གི་གནས་སྟངས་ཀྱི་ཐོག་ནས་རྒྱལ་སྤྱིའི་ཁྲིམས་ལུགས་དང་འགལ་གྱི་ཡོད་པ་ཡོངས་གྲགས་ཆགས་ཡོད་པ་རེད། ཅེས་གསུངས་སོང་།

གོ་སྟོན་དང་འབྲེལ་ནས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། ད་ལོ་༸གོང་ས་རྒྱལ་བ་རིན་པོ་ཆེ་མཆོག་དགུང་ལོ་ ༩༠ ཕེབས་པར་བོད་མིའི་སྒྲིག་འཛུགས་ཀྱིས་གོ་སྟོན་སྲུང་གཙི་གནང་གི་ཡོད་པ་དང་། བརྟན་བཞུགས་བསྟར་འབུལ་ཞུ་རྒྱུ་སོགས་ལས་རིམ་མང་པོ་བྱུང་བ་རེད། རྒྱལ་སྤྱིའི་ནང་དུ་འབྲེལ་བ་ཡོད་པའི་ལས་གཞི་མང་པོ་བྱུང་བ་རེད། དེ་བཞིན་ང་ཚོ་སྒྲིག་འཛུགས་ཀྱིས་ད་ལྟ་ལས་རིམ་འགྲོ་བཞིན་པ་ཆགས་ཀྱི་ཡོད་པ་རེད། དེ་དང་འབྲེལ་ནས་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་སྔོན་མ་ལྡི་ལི་ལ་ཚོགས་འདུ་ཞིག་འཚོགས་པ་རེད། སྐབས་དེ་དུས་ཐག་གཅོད་བྱུང་བ་རེད། སྤྱི་འཐུས་རྒྱུན་ལས་ཀྱིས་དེའི་མཇུག་སྐྱོང་གནང་དགོས་པས། ང་ཚོ་གྲོས་ཚོགས་འདིའི་ནང་དུ་༧གོང་ས་མཆོག་ལ་བཀའ་དྲིན་རྗེས་དྲན་གྱི་གྲོས་ཆོད་ཅིག་འཁུར་ཡོང་གི་ཡོད་ལ། གྲོས་ཆོད་དེ་སང་ཉིན་ཕེབས་ཀྱི་རེད། དེའི་ནང་དུ་༧གོང་ས་མཆོག་གི་སྐུ་ཕྲེང་རྒྱུན་མཐུད་ནས་ཕེབས་རྒྱུ་དེ་དམིགས་བསལ་གྱི་བཀའ་དྲིན་ཆེན་པོ་ཡིན་པ་དང་། རྒྱ་ནག་གཙོས་དེ་ལ་ཆབ་སྲིད་ཀྱི་ཐེ་ཇུས་བྱས་ན་ངོས་ལེན་ནམ་ཡང་མེད་པའི་གྲོས་ཆོད་ཁག་ཅིག་ཕེབས་ཀྱི་ཡོད། ཅེས་གསུངས་སོང་།

བོད་ནང་གི་གནས་སྟངས་དང་འབྲེལ་ནས་ཚོགས་གཙོ་མཆོག་གིས། ཉེ་ཆར་བོད་རང་སྐྱོང་ལྗོངས་ཟེར་བ་བཙུགས་ནས་ལོ་ ༦༠ འཁོར་ཟེར་བའི་རྒྱ་ནག་གཞུང་གི་ཆབ་སྲིད་ཀྱི་དགོས་མཁོ་བསྒྲུབ་རྒྱུའི་ལས་འགུལ་ཞིག་བརྩམས་ཡོད་རེད། དེ་ཡང་ཀྲུང་དབྱང་གི་ཆབ་སྲིད་ཀྱི་གནད་ཡོད་མི་སྣ་བོད་རང་སྐྱོང་ལྗོངས་ཟེར་བར་ཕྱིན་ནས་མཛད་སྒོ་འཚོགས་པ་དང་། ཕྱི་ཟླ་ ༨ ཚེས་ ༢༠ ཉིན་གྱི་དགོང་མོར་རྒྱ་ནག་གི་གཙོ་འཛིན་ཞི་ཅིན་ཕིན་གྱིས་སྐབས་དེ་དུས་གཏམ་བཤད་སྤེལ་བ་དེ་དག་ལ་བལྟས་ན། རྩ་བས་ལྷ་སར་ཕེབས་ཏེ་བོད་མི་རྣམས་ལ་དམིགས་བསལ་གྱིས་བཀོད་མངགས་བྱས་ཏེ་དམ་དྲག་གི་ཐོག་ནས་དགའ་བསུའི་རྣམ་པ་ཤུགས་ཆེན་པོ་ཞུ་བཅུག་ཡོད། དེ་ཡང་རྒྱ་ནག་གིས་ཁོ་ཚོའི་དགོས་མཁོ་རང་གི་ཐོག་ནས་ཆེད་མངགས་འཁྲབ་སྟོན་གྱི་རྣམ་པ་འདྲ་བོ་ཞུ་བཅུག་པ་དེ་ཚང་མས་མཐོང་བསྡད་པ་རེད། རྒྱལ་སྤྱིའི་སྤྱི་ཚོགས་ཀྱིས་དེ་ལ་དོ་སྣང་ཤུགས་ཆེན་བྱས་མེད་པ་དང་། འཁྲབ་སྟོན་གྱི་རྣམ་པ་དེ་ང་ཚོས་མཐོང་བསྡད་པ་ཞིག་རེད། མཛད་སྒོ་དང་དེའི་རྗེས་འབྲས་སུ་བོད་རང་སྐྱོང་ལྗོངས་ཟེར་བའི་ས་གནས་ཁག་དཔེར་ན་མངའ་རིས། གཞིས་ཀ་རྩེ། ལྷོ་ཁ། ནག་ཆུ། ཀོང་པོ་ཉིང་ཁྲི། ཆབ་མདོ་སོགས་ལ་ཚོགས་ཆུང་ཆ་བགོས་བྱས་ནས་ས་གནས་སུ་ཕྱིན་ཏེ་ཆབ་སྲིད་དྲིལ་བསྒྲགས་བྱ་རྒྱུ། དེ་བཞིན་དམར་ཤོག་ཚོགས་པའི་ལོ་རྒྱུས་སྒྲོག་སྦྱངས་བྱ་རྒྱུ། རྒྱ་ནག་གི་སྐད་ཡིག་བཀོད་ཁྱབ་ཤུགས་ཆེ་རུ་གཏང་རྒྱུ། མི་རིགས་མཉམ་བསྲེས་ཀྱི་རྣམ་པ་ཤུགས་ཆེ་རུ་གཏོང་དགོས་པ་སོགས་ནམ་རྒྱུན་དུ་བརྒྱུད་སྐུར་བྱས་ནས་བསྡད་ཡོད་པ་དག་རེད། བོད་མི་རིགས་དང་རིག་གཞུང་རྩ་མེད་གཏོང་རྒྱུ། བོད་ཀྱི་སྐད་ཡིག་བཀོལ་སྤྱོད་བྱེད་དུ་མི་བཅུག་པ་སོགས་དམ་དྲག་ཤུགས་ཆེ་རུ་གཏོང་བཞིན་པའི་གནས་སྟངས་ཤིག་ཆགས་ཀྱི་ཡོད། རྒྱ་ནག་གཞུང་གིས་རྒྱལ་སྤྱིའི་སྤྱི་ཚོགས་ལ་འཁྲབ་སྟོན་བྱེད་དགོས་པ་དེ་དུས་རྒྱུན་དུ་ནས་བྱེད་བསྡད་པའི་གནས་སྟངས་ཆགས་ཡོད། བོད་དེ་རྒྱ་ནག་གི་ནང་སྲིད་ཀྱི་གནས་སྟངས་ཆགས་ཡོད་པ་དང་རྒྱལ་ཁབ་གཞན་གྱིས་དེ་ལ་ཐེ་ཇུས་བྱས་ན་འགྲིག་གི་མེད་ཟེར་ནས་དུས་རྒྱུན་དུ་སྒྲོག་སྦྱངས་བྱེད་བཞིན་པའི་གནས་སྟངས་རེད། དེར་བརྟེན་ང་ཚོའི་ངོས་ནས་རྒྱལ་སྤྱིའི་སྟེང་བོད་དེ་རྒྱ་ནག་གི་ནང་སྲིད་ཀྱི་གནད་དོན་མ་ཡིན་པ་དང་། རྒྱལ་སྤྱིའི་གནད་དོན་ཡིན་པ། རྒྱལ་སྤྱིས་དེ་ལ་རྒྱབ་སྐྱོར་དང་དོ་སྣང་བྱེད་དགོས་ཡོད་པ་དེ་ཤུགས་ཆེ་བ་སྟོན་ཐུབ་དགོས་པ་དེ་གལ་ཆེ་བ་ཆགས་ཀྱི་འདུག

ཕྱི་ལོ་ ༢༠༠༨ ནས་ད་ལྟ་བར་དུ་བོད་ནང་གི་ཛ་དྲག་གི་གནས་སྟངས་ཐོག་བགྲོ་གླེང་དང་ཐུགས་སྣང་གནང་གི་ཡོད་པ་རེད། ད་ལྟའང་བོད་ནང་དུ་ཛ་དྲག་གི་གནས་སྟངས་མུ་མཐུད་ནས་གནས་པའི་གནས་སྟངས་ཆགས་འདུག དེ་བཞིན་བོད་ཀྱི་སྣོད་བཅུད་ཐོག་ནས་ཆུ་རགས་རྒྱག་རྒྱུ་དང་། ཤིང་ནགས་གཅོད་བྲེག གཏེར་ཁ་སྔོག་འདོན། དམག་གི་མཚོན་ཆ་བཟོ་སྐྲུན་བྱ་རྒྱུ་སོགས་ཀྱིས་ཉིན་རེ་ཉིན་རེར་བོད་ཀྱི་ཁོར་ཡུག་ལ་ཉམས་ཆག་ཤུགས་ཆེན་ཡོང་བཞིན་པའི་གནས་སྟངས་ཆགས་འདུག དེ་བཞིན་བོད་ནང་གི་བོད་མི་དང་། ཆོས་བྱེད་མཁན་གྱི་དགེ་འདུན་པ་དང་གྲྭ་བཙུན་ཁག་ལ་ཚོད་འཛིན་དང་།  བླ་སྤྲུལ་མཚན་གནས་ཡོད་མཁན་དང་སྤྱི་ཚོགས་ལ་ཐུགས་སྣང་གནང་མཁན། སྤྱི་ཚོགས་ཀྱི་ཐོག་ལ་ཆེ་མཐོང་ཡོད་མཁན་ཚོར་ནག་ཉེས་བཙུགས་ནས་བཙོན་འཇུག་བྱས་པའི་ཐོག ནང་མི་དང་འབྲེལ་ཡོད་སོགས་ལ་ཐུག་འཕྲད་བྱེད་དུ་མ་བཅུག་པར་མཐའ་མ་བཙོན་ཁང་ནང་ནས་སྐུ་བཀྲོངས་པའི་གནས་སྟངས་བྱུང་ཡོད། ཉེ་ཆར་བོད་ནང་གི་དགོན་པ་ཞིག་གི་སྤྲུལ་སྐུ་དཔལ་ལྡན་དབང་རྒྱལ་ལགས་སྐུ་བཀྲོངས་པའི་གནས་ཚུལ་བྱུང་སོང་། དེ་འདྲ་བ་མང་པོ་བྱུང་གི་ཡོད་པ་རེད། འོན་ཀྱང་། གནས་ཚུལ་ངོ་མ་དེ་བརྒྱུད་ལམ་གྱི་ཐོག་ནས་རྟོགས་ཐུབ་ཀྱི་མེད་ལ། དེ་འདྲ་མང་པོ་ཞིག་ཡོད་པ་གསལ་པོ་ཞེ་དྲགས་ཆགས་ཀྱི་འདུག དྷ་རམ་ས་ལར་གོ་སྟོན་སྲུང་གཙི་བྱེད་པའི་སྐབས་སུ་བོད་ནང་དུ་ཆེད་མངགས་དཔེར་ན་འབྲས་སྤུངས་དང་དགའ་ལྡན་དགོན་པ་དེ་ཚོར་ཕྱི་ཟླ་ ༧ ཚེས་ ༡ ནས་ ༦ བར་དུ་སློབ་གསོ་སྤྲད་ནས་དམིགས་བསལ་གྱིས་འཇིགས་སྐུལ་བྱས་འདུག བོད་ནང་གི་ཆོས་དད་རང་དབང་དང་། སྐད་ཡིག་རང་དབང་། འགྲོ་བ་མིའི་ཐོབ་ཐང་གི་གནས་སྟངས་དེ་དག་ཉིན་རེ་ནས་ཛ་དྲག་ཏུ་འགྲོ་བཞིན་པའི་གནས་སྟངས་ཆགས་ཀྱི་འདུག དེའི་ཐོག་ལ་གྲོས་ཚོགས་ཀྱིས་བོད་ནང་གི་ཛ་དྲག་གནས་སྟངས་ཀྱི་ཐོག་ལ་གདུང་སེམས་མཉམ་སྐྱེད་ཀྱི་གྲོས་ཆོད་ཅིག་ཡོད། དེའི་ནང་གང་ལ་གང་འཚམ་གསལ་པོ་བཀོད་ཡོད་པས་སྤྱི་འཐུས་རྣམ་པ་དང་འཛིན་སྐྱོང་བཀའ་ཤག་གི་ངོས་ནས་ཐུགས་སྣང་གནང་སྟེ། རྒྱལ་སྤྱིའི་སྟེང་གནད་དོན་དེ་ཚོ་ཁ་གསལ་དུ་གཏོང་དགོས་པ་དང་ཞུ་སྐུལ་ཤུགས་ཆེ་ཙམ་ཞུ་དགོས་པ་གལ་ཆེན་པོ་ཆགས་ཀྱི་འདུག ཅེས་གསུངས་སོང་།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།