བོད་ཀྱི་གནམ་གཤིས་འགྱུར་ལྡོག་ནི་གོ་ལའི་གནམ་གཤིས་འགྱུར་ལྡོག་དང་ཐད་ཀར་འབྲེལ་བ་ཡོད་པའི་སྙན་ཐོ་བཏོན། 

རྒྱ་ནག་གཞུང་གིས་བོད་ནང་གི་སྐྱེས་ཁམས་ཁོར་ཡུག་ལ་འགན་མ་ཁུར་བ་ནི་ས་ཁམས་ཆབ་སྲིད་ཀྱི་ཐོག་ནས་ཀྱང་རྒྱལ་ཁབ་ཕན་ཚུན་བར་འཁོན་འཛིང་ཡོང་བའི་གཞི་རྩར་གྱུར་ཡོད་སྐོར་སྙན་ཐོ་བཏོན།

ཟླ་འདིའི་ཕྱི་ཚེས་ ༦ ཉིན་སུ་ཝེ་ཌིན་དུ་རྟེན་གཞི་བྱས་པའི་སུ་ཊོག་ཧོམ་སི་ལྷོ་ཨེ་ཤ་ཡ་དང་རྒྱ་གར་ཞི་བདེ་རྒྱ་མཚོའི་གནད་དོན་ལྟེ་གནས་ཁང་(The Stockholm Center for South Asian and Indo-Pacific Affairs)གིས། བོད་ནང་གི་གནམ་གཤིས་འགྱུར་ལྡོག་དང་འབྲེལ་བའི་སྙན་ཐོ་ཞིག་བཏོན་ཡོད་ཅིང་། སྙན་ཐོ་དེའི་ནང་གོ་ལའི་གནམ་གཤིས་འགྱུར་ལྡོག་གི་ཆེད་མཁས་པ་མི་གྲངས་ ༢༠ ལྷག་གིས་རྟོག་ཞིབ་དང་ཉམས་ཞིབ་བྱས་པ་བརྒྱུད། བོད་ནང་དུ་གནམ་གཤིས་འགྱུར་ལྡོག་འགྲོ་བ་དེས་ཨེ་ཤ་ཡའི་རྒྱལ་ཁབ་ཁག་ལ་ཆུ་དང་ཟས་བཅུད། ནུས་ཤུགས་སོགས་ཀྱི་དཀའ་ངལ་འཕྲད་ཉེན་ཡོད་པ་མ་ཟད། གོ་ལའི་གནམ་གཤིས་འགྱུར་ལྡོག་གི་དཀའ་ངལ་ལ་ཐད་ཀར་འབྲེལ་བ་ཆགས་ཡོད་སྐོར་སོགས་གསལ་འདུག

ཤོག་ངོས་ ༢༧༦ ཡོད་པའི་སྙན་ཐོ་དེའི་ནང་། འཛམ་གླིང་གི་སྣེ་མོ་གསུམ་པར་གྲགས་པའི་བོད་མཐོ་སྒང་ནི་ལྷོ་དང་ལྷོ་ཤར་ཨེ་ཤ་ཡའི་མི་གྲངས་ཐེར་འབུམ་ ༢ ཙམ་གྱི་འཚོ་རྟེན་དུ་གྱུར་བའི་འཛམ་གླིང་གི་ཆུ་བོ་ཆེན་པོ་བཅུ་ཡི་འབྱུང་ཁུངས་ཡིན་ཡང་། དེང་སྐབས་བོད་ནང་གི་གཙང་པོ་དག་གི་མགོ་ཁུངས་སུ་གྱུར་བའི་གངས་རི་དང་བོད་ཀྱི་འཁྱམ་རོམ་དག་ཞུ་མུས་ཡིན་སྟབས། བོད་ཀྱི་གཙང་པོ་དག་གི་རྒྱུད་དུ་གནས་པའི་རྒྱལ་ཁབ་ཚོའི་མི་སེར་རྣམས་ལ་ཆུ་ལོག་དང་། ཐན་པ། དེ་བཞིན་འཚོ་རྟེན་སོགས་ཀྱི་ཐད་ནས་དཀའ་ངལ་འཕྲད་ཉེན་ཡོད་པ་མ་ཟད། རྒྱ་ནག་གཞུང་གིས་རྒྱལ་ཁབ་འཕེལ་རྒྱས་ཀྱི་མིང་འོག་ནས་མངའ་ཁོངས་སྟངས་འཛིན་དང་དམག་དོན་གྲ་སྒྲིག་སོགས་ཀྱི་སླད་བོད་ནང་གཞི་རྒྱ་ཆེ་བའི་རྨང་གཞིའི་འཛུགས་སྐྲུན་ལས་འཆར་ཏེ། གཞུང་ལམ་དང་། ལྕགས་ལམ། ཆུ་རགས་དང་གནམ་ཐང་སོགས་གསར་རྒྱག་དང་། བོད་ནང་གི་ས་གནས་མང་པོ་ཞིག་ལ་དམག་སྒར་བཙུགས་ཏེ། དམག་དོན་སྦྱོང་བརྡར་གྱི་ལས་དོན་སྤེལ་ནས་བོད་ཀྱི་སྐྱེས་ཁམས་ཁོར་ཡུག་ལ་གཏོར་བརླག་གཏོང་བཞིན་པ་དང་། རྒྱ་ནག་གཞུང་གིས་རྒྱལ་སྤྱིའི་ནང་ཁོར་ཡུག་སྲུང་སྐྱོབ་ཐད་ལ་མ་འཇོག་མང་པོ་བྱས་པ་མ་ཟད། འཛམ་གླིང་གི་གནམ་གཤིས་འགྱུར་ལྡོག་གི་ཚོགས་ཆེན་ཁག་ལ་ཞུགས་ནའང་། རྒྱལ་ཁབ་དང་ཚོགས་སྡེ་ཁག་གི་ཉེན་བརྡ་ལ་རྩིས་མེད་ཐོག བོད་ནང་གི་ཁོར་ཡུག་ལ་སྦག་བཙོག་དང་། གཏེར་ཁ་སྔོག་འདོན་སོགས་ཚུད་པའི་ལས་འདོན་མང་པོ་གཉེར་བཞིན་པའི་ཁར། ཁོར་ཡུག་སྲུང་སྐྱོབ་བྱེད་མཁན་རྣམས་ལ་དམ་དྲག་སོགས་བྱས་ཏེ། བོད་ནང་གི་སྐྱེས་ཁམས་ཁོག་ཡུག་ལ་གཏོར་བརླག་ཐེབས་ཀྱི་ཡོད། ཅེས་གསལ་འདུག 

སྙན་ཐོའི་ནང་ཕྱི་ལོ་ ༢༠༢༠ ལོ་ནས་ད་ལོ་བར་རྒྱ་ནག་གཞུང་གིས་བོད་ནང་གི་སྐྱེས་ཁམས་ཁོར་ཡུག་བདག་གཅེས་དང་སྲུང་སྐྱོབ་ལ་ཁ་གཡར་ནས་ཉུང་མཐར་ཡང་འབྲོག་མི་གྲངས་༩༣༠༠༠༠ ཙམ་བཙན་གྱིས་གནས་སྤོར་བྱས་ཏེ་བོད་ཀྱི་འབྲོག་མིའི་འཚོ་བ་མཇུག་བསྒྲིལ་དུ་བཅུག་ཡོད་པ་མ་ཟད། ཁ་གསབ་དང་རོགས་སྐྱོར་སོགས་གང་ཡང་མེད་པས་འབྲོག་མི་དེ་དག་གི་ངེས་གཏན་མེད་པའི་འཚོ་བར་དོ་ཕོགས་ཆེན་པོ་བྱུང་ཡོད་ལ།  གནས་སྤོར་བྱས་པའི་འབྲོག་མི་དག་གིས་ཆོས་ལུགས་ཉམས་ལེན་དང་ཆོས་ཕྱོགས་ཀྱི་བྱེད་སྒོ་སྤེལ་བར་དམ་དྲག་བྱས་ཡོད་པའི་མ་ཚད། བོད་སྐད་བཤད་པར་དམ་དྲག་དང་། ཆེད་དུ་རྒྱ་ནག་ནས་བོད་དུ་བསླེབས་པའི་རྒྱ་རིགས་དག་ལ་གཉེན་སྒྲིག་སོགས་བྱེད་བཅུག་སྟེ། བོད་ཀྱི་ཆོས་རིག་རྩིས་མེད་རྡོག་རོལ་གཏོང་གིན་ཡོད་པའི་ཁར། བོད་ནང་གི་ས་གནས་ཁག་ཏུ་སྲོལ་རྒྱུན་གྱི་སྐྱེས་ཁམས་ཁོར་ཡུག་སྲུང་སྐྱོབ་བྱེད་ཐབས་ལ་བཀག་འགོག་གིས་གནམ་གཤིས་འགྱུར་ལྡོག་གི་དཀའ་ངལ་འཕྲད་མུས་ཡིན། ཞེས་གསལ་འདུག 

ཡང་སྙན་ཐོ་དེའི་ནང་། བོད་ནང་ཆེས་འཇིགས་སྣང་སྐྱེས་དགོས་པ་ནི་ད་ལྟ་རྒྱ་ནག་གཞུང་གིས་བོད་ནང་གི་ས་གནས་མང་པོ་ཞིག་ཏུ་གློག་འདོན་ཆུ་རགས་གསར་རྒྱག་གིས་བོད་དེ་གློག་འདོན་ཆུ་རགས་ཀྱི་རྟེན་གཞི་ཆེན་པོ་ཞིག་ཏུ་བསྒྱུར་ཐབས་བྱེད་བཞིན་པ་དེ་ཡིན་ལ། ད་ལྟ་རྒྱ་ནག་གིས་གསར་རྒྱག་བྱེད་མུས་ཡིན་པའི་མེ་ཏོག་རྫོང་ཁོངས་ཀྱི་ཡར་ཀླུང་གཙང་པོའི་བཞུར་རྒྱུན་གྱི་གློག་འདོན་ཆུ་རགས་གཅིག་པུར་ཨ་སྒོར་དུང་ཕྱུར་ ༡༦༠ ལྷག་གི་འགྲོ་གྲོན་གཏོང་གིན་ཡོད་སྟབས། ཆུ་རགས་སོགས་ཚུད་པའི་འཛུགས་སྐྲུན་དེ་དག་གིས། བོད་ཀྱི་ས་གནས་ཁག་གི་ས་གཤིས་མི་བརྟན་པ་དང་། རི་ཉིལ།  ས་ཡོམ་སོགས་ཡོང་སླ་བ་མ་ཟད། རྒྱ་གར་དང་བྷང་ལ་དྷེ་ཤི་ལྟ་བུའི་བོད་ཀྱི་ལྷོ་རྒྱུད་ཀྱི་རྒྱལ་ཁབ་དག་ལ་རང་བྱུང་གི་གོད་ཆག་ཤུགས་ཆེན་ཡོང་ཉེན་དང་། རྒྱ་ནག་གིས་བོད་ནང་ཆུ་རགས་དེ་དག་གསར་རྒྱག་སྐབས་མི་མང་གནས་སྤོར་དང་། ལྷག་པར་དུ་འཛུགས་སྐྲུན་གྱི་འཆར་འགོད་དང་། ཁོར་ཡུག་གི་ཐོག་འགན་མ་ཁུར་བ་ནི། ས་ཁམས་ཆབ་སྲིད་ཀྱི་ཐོག་ནས་ཀྱང་རྒྱལ་ཁབ་ཕན་ཚུན་བར་འཁོན་འཛིང་ཡོང་བའི་གཞི་རྩར་གྱུར་ཡོད། ཅེས་གསལ་འདུག 

དེ་བཞིན་སྙན་ཐོ་དེའི་ནང་རྒྱ་ནག་གཞུང་གིས་ཁྲིམས་མཐུན་མིན་པའི་ཐོག་ནས་བོད་ནང་དུ་རྒྱ་རིགས་གནས་སྤོར་བྱེད་འཇུག་མུས་ཡིན་པའི་སྐོར་དང་། རྒྱ་ནག་གཞུང་གིས་འགྲིམ་འགྲུལ་ཁོ་ནར་ཁ་གཡར་ནས་འཛུགས་སྐྲུན་བྱས་དང་བྱེད་མུས་ཡིན་པའི་མེ་འཁོར་ལྕགས་ལམ་དང་། གནམ་ཐང་། གློག་འདོན་ཆུ་རགས་སོགས་ཀྱིས་བོད་ཀྱི་རང་བྱུང་ཁོར་ཡུག་ལ་གཏོར་བརླག་གཏོང་མུས་ཡིན་པའི་སྐོར། ཁྲིམས་མཐུན་མིན་པའི་ཐོག་ནས་ལི་ཐིམ་དང་ཟངས་ཚུད་པའི་གཏེར་ཁ་སྔོག་འདོན་བྱེད་མུས་ཡིན་པའི་སྐོར། ལྷག་པར་བོད་ཀྱི་གནམ་གཤིས་འགྱུར་ལྡོག་དེ་ཨེ་ཤ་ཡའི་རྒྱལ་ཁབ་ཁག་གཙོས། གོ་ལ་ཧྲིལ་པོའི་གནམ་གཤིས་འགྱུར་ལྡོག་དང་ཐད་ཀར་འབྲེལ་བ་ཡོད་པས། རྒྱལ་སྤྱི་ཁྱོན་ཡོངས་ཀྱིས་བོད་ནང་གི་ཁོར་ཡུག་སྲུང་སྐྱོབ་ཀྱི་ལས་དོན་ལ་གཞོལ་དགོས་པ་མ་ཟད། རྒྱ་ནག་གཞུང་གིས་བོད་ནང་གི་སྐྱེས་ཁམས་ཁོར་ཡུག་སྲུང་སྐྱོབ་ཀྱི་ལས་དོན་ཐད་ལ་སྐུལ་འདེད་བྱ་དགོས་པའི་རེ་སྐུལ་གནང་འདུག 

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།