སེངྒ་ལའི་ཨ་མར་པུ་ར་ནི་ཀ་ཡའི་ཆོས་བརྒྱུད་ཀྱིས་ཡོངས་འཛིན་གླིང་རིན་པོ་ཆེ་མཆོག་ལ་འཇིག་རྟེན་དོན་དུ་སློབ་དཔོན་ཆོས་ཀྱི་རྣམ་རྒྱན་ཞེས་པའི་གཟེངས་བསྟོད་འབུལ་བཞེས་མཛད་ཡོད་འདུག
ད་ལྟའི་ཆར་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གིས་ལྷོ་ཨེ་ཤ་ཡའི་རྒྱལ་ཁབ་ཁག་ཅིག་ཏུ་མཛད་འཕྲིན་སྐྱོང་བཞིན་པ་དང་བསྟུན། ཟླ་འདིའི་ཕྱི་ཚེས་ ༢ ཉིན་སེངྒ་ལའི་ཨ་མར་པུ་ར་ནི་ཀ་ཡའི་ཆོས་བརྒྱུད་ཀྱི་ཐོག་ནས། འདས་ལོར་ ༸གོང་ས་རྒྱལ་བ་རིན་པོ་ཆེ་མཆོག་ལ་སངས་རྒྱས་ཀྱི་རིང་བསྲེལ་རིན་པོ་ཆེ་ཕུལ་བའི་བཀའ་དྲིན་རྗེས་དྲན་དང་། འདི་ལོར་༸གོང་ས་མཆོག་དགུང་གྲངས་ ༩༠ ལ་ཕེབས་པའི་གོ་སྟོན་སྲུང་གཙིའི་སླད་དང་ལྷག་པར་དུ་༸མགོན་པོ་གང་ཉིད་མཆོག་བསྟན་འགྲོའི་མགོན་དུ་སྐུ་ཚེ་ཞབས་པད་བསྐལ་བརྒྱར་བརྟན་ཅིང་མཛད་འཕྲིན་ཕྱོགས་བཅུར་རྒྱས་པ་དང་། བོད་ལ་རང་དབང་གི་བདེན་པའི་ཉི་མ་མྱུར་དུ་འཆར་བ་སོགས་ཀྱི་སླད་དུ་སེངྒ་ལའི་ཡུལ་དུ་ནང་ཆོས་ཐོག་མར་སྲོལ་གཏོད་མཁན་ཆོས་ཀྱི་རྒྱལ་པོ་མྱ་ངན་མེད་ཀྱི་རྡོ་རིང་ཞིག་གསར་བཞེངས་གནང་ཡོད་ཅིང་། སྐབས་དེར་ཡོངས་འཛིན་གླིང་རིན་པོ་ཆེ་མཆོག་མཛད་སྒོར་ཕེབས་ནས་བཀའ་སློབ་གནང་ཡོད་པ་མ་ཟད། སེངྒ་ལའི་ཨ་མར་པུ་ར་ནི་ཀ་ཡའི་ཆོས་བརྒྱུད་ཀྱིས་ཡོངས་འཛིན་གླིང་རིན་པོ་ཆེ་མཆོག་ལ་འཇིག་རྟེན་དོན་དུ་སློབ་དཔོན་ཆོས་ཀྱི་རྣམ་རྒྱན་((LOKARTHACHARYA DHARMA VIBHUSHANA) ཞེས་པའི་གཟེངས་བསྟོད་འབུལ་བཞེས་མཛད་ཡོད་ཅིང་། གཟེངས་བསྟོད་དེ་ནི་དེ་སྔ་འབར་མའི་བླ་ཆེན་ཞིག་དང་། ཐའེ་ལཎ་ཌིའི་བླ་ཆེན་ཞིག་ལ་འབུལ་གནང་མཛད་ཡོད་པ་དང་། ཐེག་པ་ཆེན་པོ་དང་དེའི་ནང་ནས་ཀྱང་བོད་བརྒྱུད་ནང་བསྟན་གྱི་བླ་ཆེན་ཞིག་ལ་ཕུལ་བ་ཐོག་མ་དེ་རེད་འདུག
དེ་རིང་འདི་གའི་གསར་འགོད་པས་གླིང་རིན་པོ་ཆེ་མཆོག་གི་ཕྱག་མཛད་ཚེ་བརྟན་ལགས་སུ་བཀའ་འདྲི་ཞུས་པ་ལྟར་ན། ཡོངས་འཛིན་གླིང་རིན་པོ་ཆེ་མཆོག་གིས་སེངྒ་ལའི་ནང་སེམས་བསྐྱེད་གླིང་ལེགས་སྦྱར་དང་པ་ལིའི་རིག་གཞུང་སྤེལ་རེས་ལྟེ་གནས་ཁང་དུ་སངས་རྒྱས་ཀྱི་རིང་བསྲེལ་རིན་པོ་ཆེ་གདན་ཞུ་དང་མཆོད་འབུལ་མཛད་སྒོའི་ཚོགས་མགོན་དུ་བཀའ་དྲིན་བསྐྱངས་པ་དང་། ༸གོང་ས་མཆོག་གི་བདེ་སྐྱིད་ཀྱི་ཉམས་ལེན་ཁང་ཞེས་པ་གསར་བསྐྲུན་གྱི་ས་གཞི་བྱིན་རླབས་དང་ས་རྡོ་རྨང་འཇོག་གནང་བ། དེ་བཞིན་༸གོང་ས་མཆོག་སྐུ་ཚེ་ཞབས་པད་སྲིད་མཐར་བརྟན་པའི་སླད་དུ་ཕྱུགས་རིགས་ཚེ་ཐར་དང་། སློབ་ཕྲུག་ལ་མཁོ་ཆས་སྦྱིན་གཏོང་བཅས་གནང་ཡོད་འདུག་ལ། ད་ལྟའི་ཆར་རིན་པོ་ཆེ་མཆོག་འབྲུག་ཏུ་འཛམ་གླིང་ཞི་བདེའི་སྨོན་ལམ་ཆེན་མོའི་ཐོག་ཕེབས་ཡོད་འདུག
གསར་འགོད་པ། སྐལ་བཟང་སྦྱིན་པ།
