སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་གྱི་ཨ་སམ་མངའ་སྡེའི་ནང་གཞུང་འབྲེལ་ཕྱོགས་ཕེབས་ཀྱིས་རྒྱ་གར་བོད་དོན་རྒྱབ་སྐྱོར་ཚོགས་པས་བོད་དོན་ཐོག་མུ་མཐུད་རྒྱབ་སྐྱོར་གནང་དགོས་པའི་འབོད་སྐུལ་ཞུས་འདུག
ཟླ་འདིའི་ཕྱི་ཚེས་ ༡༧ ནས་ ༢༧ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་གྱི་རྒྱལ་ས་ལྡི་ལི་དང་། གུ་ཝཱ་ཧཱ་ཊི། ལ་ཁ་ནའོ་བཅས་སུ་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར། ཁ་སང་ཕྱི་ཚེས་ ༢༠ ཉིན་རྒྱ་གར་གྱི་ཨ་སམ་མངའ་སྡེའི་གུ་ཝཱ་ཧཱ་ཊིའི་ཀོ་ཌིན་གཙུག་ལག་སློབ་གླིང་(Cotton University) གི་ཚོགས་ཁང་དུ། སྲིད་སྐྱོང་མཆོག་གིས་ཁོར་ཡུག་དང་། བདེ་སྲུང་། ཞི་བདེ་ཞེས་པའི་བརྗོད་གཞི་དང་འབྲེལ་ནས་བོད་དོན་གོ་རྟོགས་ཀྱི་གསུང་བཤད་གནང་ཡོད་ཅིང་། སྐབས་དེར་སློབ་གླིང་དེའི་དགེ་ལས་སློབ་གཉེར་བ་ ༢༠༠ ལྷག་མཉམ་ཞུགས་གནང་ཡོད་འདུག དེ་བཞིན་སྲིད་སྐྱོང་མཆོག་གིས་ཀོན་ཌིན་གཙུག་ལག་སློབ་གླིང་གི་ཉེ་བའི་རིགས་བདག་རཱ་མེ་ཤ་ཅ་དེ་ཀ་ (Dr. Ramesh Ch. Deka) ལགས་དང་། རིགས་དྲུང་ཧི་རེན་ཌེ་ཀ་ (Dr. Hiren Deka) ལགས། བོད་ཀྱི་རང་དབང་། ཨ་སམ་ཀྱི་འབོད་སྒྲ་ཞེས་པའི་ཚོགས་པའི་ཚོགས་གཙོ་ (Free Tibet- A Voice from Assam,President) སོམ་ཡི་དིབ་དཏྟ་ (Soumyadeep datta) ལགས་དང་། འབྲེལ་མཐུད་པ་ནོ་ཝ་ནི་ཏ་ཤར་མ་(Novanita Sharma) ལགས་སོགས་སུ་མཇལ་འཕྲད་གནང་ཡོད་འདུག
ཉིན་རྒྱབ་ཏུ་ཨ་སམ་མངའ་སྡེའི་གུ་ཝཱ་ཧཱ་ཊིའི་པ་རཱ་གྷི་ཇོ་ཏི་ཤ་པུར་(Pragjyotishpur University) གཙུག་ལག་སློབ་གླིང་གི་ཚོགས་ཁང་དུ། སྲིད་སྐྱོང་མཆོག་གིས་བོད་དོན་ཆབ་སྲིད་ཀྱི་གལ་གནད་སྐོར་ལ་གསུང་བཤད་གནང་ཡོད་ཅིང་། གཏམ་བཤད་སྐབས་སློབ་གླིང་དེའི་དགེ་ལས་སློབ་གཉེར་བ་བཅས་ཁྱོན་མི་གྲངས་ ༢༠༠ ལྷག་འདུ་འཛོམས་བྱུང་ཡོད་པ་མ་ཟད། སྐབས་དེར་སྲིད་སྐྱོང་མཆོག་གིས་གཙུག་ལག་སློབ་གླིང་དེའི་ཉེ་བའི་རིགས་བདག་སློབ་དཔོན་ཆེན་མོ་སྨྲི་ཏི་ཀུ་མར་སིངྷ་ (Prof. Smriti Kumar Sinha) ལགས་དང་རིགས་དྲུང་ཇོ་གེ་ཤ་ཀ་ཀ་ཏི་ (Jogesh Kakati) ལགས་རྣམ་གཉིས་ལ་མཇལ་འཕྲད་གནང་ཡོད་འདུག
ཟླ་འདིའི་ཕྱི་ཚེས་ ༡༩ ཉིན་རྒྱ་གར་ཨ་སམ་མངའ་སྡེའི་གུ་ཝཱ་ཧཱ་ཊི་རུ། འཕགས་བོད་འབྲེལ་མཐུད་ཚོགས་པའི་གོ་སྒྲིག་འོག རྟ་དབང་གནས་སྐོར་ཞེས་པའི་བོད་དོན་གོ་རྟོགས་ལས་འགུལ་ཐེངས་བཅུ་བཞི་པ་འཚོགས་ཡོད་ཅིང་། དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། ཨ་སམ་མངའ་སྡེའི་གྲོས་ཚོགས་ཀྱི་ཚོགས་གཙོ་གཞོན་པ་འབུམ་རམས་པ་ནུ་མོལ་མོ་མིན་ (Dr.Numol Momin) ལགས་དང་། ཨ་སམ་མངའ་སྡེའི་རྩེད་རིགས་དང་ན་གཞོན་བདེ་དོན་བློན་ཆེན་ནན་དི་ཏ་གོར་ལོ་སཱ་ (Nandita Gorlosa) ལགས། ཨ་སམ་མངའ་སྡེའི་གྲོས་ཚོགས་འཐུས་མི་བྷི་དྷི་ཡ་སིང་ཨིང་ལེན་ (Bidya Sing Engleng)ལགས། ཨ་རུ་ནཱ་ཅལ་མངའ་སྡེའི་གྲོས་ཚོགས་འཐུས་མི་ཟུར་པ་རིན་ཆེན་མཁའ་འགྲོ་ལགས། རྒྱ་གར་རྒྱལ་ཡོངས་དང་བླངས་ཞབས་ཞུ་ཚོགས་པའི་ལས་བྱེད་རུ་པེཤ་ཀུ་མར་ (Shri Rupesh Kumar) ལགས། འཕགས་བོད་འབྲེལ་མཐུད་ཚོགས་པའི་དྲུང་ཆེ་པན་ཀ་ཇི་གྷོ་ཡལ་ (Pankaj Goyal) ལགས། ཨ་སམ་འཕགས་བོད་འབྲེལ་མཐུད་ཚོགས་པའི་ཚོགས་གཙོ་ཀེ་ལཱ་ཤ་སར་མ་ (Kailash Sarma) ལགས། དེ་བཞིན་རྒྱ་གར་གྱི་མངའ་སྡེ་ ༡༨ ནས་ཚོགས་བཅར་བ་གྲངས་ ༣༠༠ ཙམ་མཉམ་ཞུགས་གནང་འདུག
སྐབས་དེར་སྲིད་སྐྱོང་སྤེན་པ་ཚེ་རིང་མཆོག་གིས། སྟོན་པ་བཅོམ་ལྡན་འདས་ཀྱི་འཚེ་བ་མེད་པ་དང་བྱམས་བརྩེའི་བསླབ་བྱ་ལས་བོད་མི་ཚོས་བོད་དོན་འཐབ་རྩོད་ནི་འཚེ་མེད་ཞི་བའི་ལམ་ནས་བྱས་དང་བྱེད་མུས་ཡིན་པ་དང་། ༧གོང་ས་རྒྱལ་བ་རིན་པོ་ཆེ་མཆོག་ནས་བོད་རྒྱའི་དཀའ་རྙོག་སེལ་ཐབས་གཉིས་སྨན་དབུ་མའི་ལམ་གྱི་དགོངས་གཞིའི་སྐོར་ངོ་སྤྲོད་གནང་སྟེ། བོད་རྒྱའི་དཀའ་རྙོག་མ་སེལ་བར་དུ་བོད་མི་རྣམས་ནས་རེ་བ་མ་བརླག་པར་བོད་དོན་འཐབ་རྩོད་རྒྱུན་མཐུད་གནང་རྒྱུ་ཡིན་ཞེས་གསུངས་འདུག
དེ་བཞིན་སྲིད་སྐྱོང་མཆོག་གིས་བོད་དང་ཡོན། མིང་། ཆིང་རྒྱལ་རབས། རྒྱ་གར་དབྱིན་གཞུང་བཅས་ཀྱི་བར་འབྲེལ་བའི་ལོ་རྒྱུས་སྐོར་ངོ་སྤྲོད་གནང་སྟེ་རྒྱ་ནག་གཞུང་གིས་བོད་དེ་བཞིན་གནའ་སྔ་མོ་ནས་རྒྱ་ནག་གི་ཆ་ཤས་ཡིན་ཚུལ་བརྗོད་པ་ནི་ལོ་རྒྱུས་ལ་འཁྱོག་བཤད་བྱས་པ་ཞིག་ཡིན་པ་དང་། བོད་ནི་གནའ་སྔ་མོ་ནས་རང་བཙན་གྱི་རྒྱལ་ཁབ་ཅིག་ཡིན་པ་ནན་བརྗོད་གནང་ཡོད་པ་དང་། དེ་བཞིན་ཉེ་ལམ་བཞུགས་སྒར་དྷ་རམ་ས་ལར་༧གོང་ས་རྒྱལ་བ་རིན་པོ་མཆོག་གིས་ཆོས་སྲིད་ལུགས་གཉིས་ཀྱི་ཐུགས་འགན་བཞེསཏེ་མི་ལོ་ ༧༥ འཁོར་བའི་དུས་དྲན་སྲུང་གཙི་ཞུས་པའི་སྐོར་དང་། འཕགས་བོད་གཉིས་བར་གྱི་རིག་གཞུང་དང་། ཆོས་ལུགས། སྐད་ཡིག་བཅས་ཀྱི་འབྲེལ་བའི་སྐོར། བོད་ཀྱི་ས་བབ་ཆགས་དབྱིབས་སོགས་ཀྱི་ལོ་རྒྱུས་ཀྱི་གལ་གནད། དེ་བཞིན་བོད་བཙན་པོའི་སྐབས་ཀྱི་ཆབ་སྲིད་མངའ་ཐང་རྒྱས་པའི་སྐོར་བཅས་གསུངས་འདུག
ཟླ་འདིའི་ཕྱི་ཚེས་ ༡༧ ཉིན་རྒྱ་གར་གྱི་རྒྱལ་ས་ལྡི་ལིའི་རྒྱ་གར་རྒྱལ་སྤྱིའི་བསྟི་གནས་ཁང་ (India International Centre) དུ། ལྡི་ལི་གོ་སྟོན་གོ་སྒྲིག་ཚོགས་ཆུང་གི་གོ་སྒྲིག་འོག ༧གོང་ས་མཆོག་གིས་ཆོས་སྲིད་ལུགས་གཉིས་ཀྱི་་ཐུགས་འགན་བཞེས་ཏེ་མི་ལོ་ ༧༥ འཁོར་བའི་དུས་དྲན་སྲུང་བརྩི་དང་བསྟུན་ཆེད་མཁས་མི་སྣའི་བགྲོ་གླེང་ཞིག་འཚོགས་ཡོད་ཅིང་། ཚོགས་ཐོག་ཏུ་སྲིད་སྐྱོང་སྤེན་པ་ཚེ་རིང་མཆོག་དང་། རྒྱ་གར་གྱི་གཞུང་ཚབ་ཟུར་པ་ཤི་ཝ་ཤང་ཀར་མེ་ནོན་(Shivshankar Menon) ལགས། རྒྱ་གར་གྱི་ཕྱི་འབྲེལ་ཞིབ་འཇུག་པ་སི་ར་ཇ་མོ་ཧན་ (Dr.C. Raja Mohan) ལགས། རྩོམ་པ་པོ་དྷི་ལིབ་སིན་ཧཱ་ (Dilip Sinha) ལགས། ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་ལོ་རྒྱུས་སློབ་དཔོན་བྱམས་པ་བསམ་གཏན་ལགས། ལྡི་ལིར་ཡོད་པའི་རྒྱལ་ཁབ་བཅུའི་གཞུང་ཚབ་པ། དེ་བཞིན་བོད་ཀྱི་མཐོ་སློབ་ཀྱི་སློབ་གཉེར་བ་དང་རྒྱ་གར་བ་བཅས་ཚོགས་བཅར་བ་ ༢༠༠ ལྷག་མཉམ་ཞུགས་གནང་འདུག
སྐབས་དེར་སྲིད་སྐྱོང་མཆོག་གིས། ༸གོང་ས་རྒྱལ་བ་རིན་པོ་ཆེ་མཆོག་ནས་ཕུགས་རྒྱང་རིང་པོའི་དགོངས་པ་བཞེས་ཏེ་ཆབ་སྲིད་ཀྱི་ཐུགས་འགན་ཡོངས་རྫོགས་མང་ཚོགས་ཀྱིས་འོས་འདེམས་བྱས་པའི་མགོ་ཁྲིད་ལ་རྩིས་སྤྲོད་མཛད་པའི་སྐོར་དང་། ཉེ་ལམ་༧གོང་ས་མཆོག་ནས་དགའ་ལྡན་ཕོ་བྲང་རྒྱུན་མཐུད་གནས་ངེས་ཡིན་པ་དང་༸རྒྱལ་དབང་སྐུ་ཕྲེང་རྒྱུན་མཐུད་ཕེབས་ངེས་ཡིན་པའི་ཞལ་བཞེས་བཟང་པོ་གནང་བའི་སྐོར། རྒྱ་ནག་གཞུང་གིས་ཡང་སྲིད་ངོས་འཛིན་དེ་ཆབ་སྲིད་ཀྱི་ལག་ཆར་བེད་སྤྱོད་ཀྱིས་ཡང་སྲིད་ངོས་འཛིན་ཐོག་ཐེ་བྱུས་བྱེད་བཞིན་པའི་སྐོར། དེ་བཞིན་བོད་རྒྱའི་དཀའ་རྙོག་དེ་ཞི་བའི་གྲོས་མོལ་གྱིས་དཀའ་ངལ་མ་སེལ་བར་དུ་རྒྱལ་སྤྱིའི་སྟེང་ཞུ་གཏུག་མུ་མཐུད་གནང་རྒྱུ་ཡིན་སྐོར་སོགས་གསུངས་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
