འབྱུང་འགྱུར་ཉིན་གྲངས་ ༦༠ ནང་རྒྱ་ནག་གིས་བོད་ལ་མིང་དོན་མཚུངས་པའི་རང་སྲིད་རང་སྐྱོང་སྤྲོད་པར་མོས་མཐུན་མ་བྱས་ཚེ། ཨ་རིས་བོད་རང་བཙན་གཙང་མའི་རྒྱལ་ཁབ་ཅིག་ལ་ངོས་འཛིན་བྱེད་དགོས་པའི་སྐུལ་མ་བྱས་འདུག
ཁ་སང་ཕྱི་ཚེས་ ༢༠ ཉིན་ཨ་རིའི་གྲོས་ཚོགས་གོང་མའི་ཚོགས་ཁང་ (Dirksen Senate Office Building) དུ། ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གིས་རྒྱ་ནག་གི་ཆོས་ལུགས་ལ་དམག་འཁྲུག ཆོས་དད་རང་དབང་ལ་འཇིགས་སྐུལ་དང་དེ་ཨ་རིར་གལ་ཆེན་པོ་ཡིན་པའི་རྒྱུ་མཚན་ཞེས་པའི་བརྗོད་གཞིའི་ཐོག་ཉན་ཞིབ་ཚོགས་ཡོད་ཅིང་། ཐེངས་འདིའི་ཉན་ཞིབ་སྟེང་ཨ་རིའི་གྲོས་ཚོགས་གོང་མའི་འཐུས་མི་ཟུར་པ་དང་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་ཟུར་པ་སཱམ་བྷི་རོན་བྷག་ལགས་ཀྱིས། རྒྱ་ནག་གིས་ཉིན་གྲངས་ ༦༠ ནང་ཚུད་དུ་བོད་ལ་མིང་དོན་མཚུངས་པའི་རང་སྲིད་རང་སྐྱོང་སྤྲོད་པར་ངོས་ལེན་མ་བྱས་ཚེ། ཨ་རིའི་ངོས་ནས་བོད་དེ་རང་བཙན་གཙང་མའི་རྒྱལ་ཁབ་ཅིག་ཡིན་པར་ཡོངས་གྲགས་ངོས་འཛིན་བྱ་དགོས་པའི་འབོད་སྐུལ་ཞུས་འདུག
ཨ་རིའི་གྲོས་ཚོགས་གོང་མའི་འཐུས་མི་ཟུར་པ་དང་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་ཟུར་པ་སཱམ་བྷི་རོན་བྷག་ལགས་ཀྱིས། ད་ལྟ་རྒྱ་ནག་གཞུང་གིས་ཐབས་ཤེས་ཡོད་རྒུ་རྩལ་སྤྲུགས་ཀྱི་ཐོག་ནས་བོད་ཀྱི་རིག་གཞུང་རྩ་བརླག་ཏུ་གཏོང་ཐབས་བྱས་ཏེ། མ་འོངས་པའི་མི་རབས་གསར་པ་ཚོའི་མདུན་དུ་བོད་སྐད་ཡིག་དང་རིག་གཞུང་མཐོང་རྒྱུ་མེད་པར་བཟོ་བཞིན་ཡོད་པ་དང་། བོད་མི་མང་ནས་༸གོང་ས་མཆོག་ལ་དད་མོས་བྱེད་པར་རྒྱང་ཐག་ཇེ་རིང་དུ་གཏོང་བཞིན་ཡོད། ཅེས་གསུངས་འདུག་ལ། ཁོང་གིས་བོད་ཀྱི་བདེན་པའི་འཐབ་རྩོད་དང་འབྲེལ་ནས་ཨ་རིའི་གཞུང་ལ་འབོད་སྐུལ་དོན་ཚན་གསུམ་ཞུས་འདུག
གཅིག ཨ་རིས་རྒྱ་ནག་གཞུང་གིས་༸གོང་ས་མཆོག་གི་ཡང་སྲིད་བསྐོ་གཞག་བྱེད་པའི་ཐོབ་ཐང་ལ་མཐའ་གཅིག་ཏུ་དགག་པ་རྒྱག་དགོས། གཉིས། ཨ་རིའི་སྲིད་འཛིན་གཞོན་པ་ཝན་སི་ (Vance) ལགས་དང་། ཡང་ན་རྒྱལ་སྲིད་དྲུང་ཆེ་མར་ཁོ་རུ་བྷི་ཡོ་ལགས་དྷ་རམ་ས་ལར་ཆེད་གཏོང་གིས་༸གོང་ས་རྒྱལ་བ་རིན་པོ་ཆེ་མཆོག་དང་ལྷན་དུ་གྲོས་མོལ་གནང་སྟེ། ཨ་རིའི་ངོས་ནས་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཡོད་པའི་བསྒྲགས་གཏམ་སྤེལ་དགོས་པ་དང་རྒྱ་ནག་ནང་ལོགས་སུ་བོད་ལ་མིང་དོན་མཚུངས་པའི་རང་སྲིད་རང་སྐྱོང་སྤྲོད་དགོས། ངས་ལས་དོན་འདི་འགྲུབ་རྒྱུ་ཡིན་མིན་ལ་དོགས་པ་ཆེན་པོ་ཡོད། རྒྱུ་མཚན་ནི་ཧོང་ཀོང་ལ་བལྟས་ན་ཤེས་ཐུབ། འོན་ཀྱང་། གལ་ཏེ་རྒྱ་ནག་གིས་གནད་དོན་འདི་ལ་ཉིན་གྲངས་ ༦༠ ནང་མོས་མཐུན་མ་བྱས་ཚེ། ང་ཚོས་བོད་འདི་རང་བཙན་གཙང་མའི་རྒྱལ་ཁབ་ཅིག་ལ་ངོས་འཛིན་ཡོད་པའི་གསལ་བསྒྲགས་སྤེལ་དགོས། གསུམ། བོད་དང་ཤར་ཊུར་ཀི་སི་ཐན་ནི་རྒྱ་ནག་གི་ཆ་ཤས་མིན་པ་དང་། ཀ་ཛ་ཁི་སི་ཐན་ (Kazakhstan) དང་ཨུ་ཛི་བྷེ་ཀི་སི་ཐན་ (Uzbekistan) གཉིས་ཀྱང་ནི་ཨུ་རུ་སུའི་ཆ་ཤས་ཡིན། རྒྱལ་ཁབ་འདི་དག་བཙན་བཟུང་བྱས་པའི་ས་ཁུལ་ཡིན་པས། ང་ཚོས་གང་ཐུབ་ཅི་ཐུབ་ཀྱིས་དེ་ལྟར་ངོས་འཛིན་བྱེད་དགོས།
ཉན་ཞིབ་སྟེང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་དང་ཉམས་ཞིབ་པ་རྒན་པ་བུ་ཆུང་ཚེ་རིང་ལགས་ཀྱིས་རྒྱ་ནག་གཞུང་གིས་འདས་པའི་ལོ་ངོ་བདུན་ཅུ་ཙམ་གྱི་རིང་བོད་ཀྱི་ཆོས་དང་རིག་གཞུང་། ཡུལ་སྲོལ་གོམས་གཤིས་དང་བོད་མིའི་རང་དབང་དང་མངོན་འདོད། ཆོས་ལུགས་དད་མོས་ཀྱི་རང་དབང་དང་འགྲོ་བ་མིའི་ཐོབ་ཐང་། དེ་བཞིན། ༸གོང་ས་མཆོག་གི་ཡང་སྲིད་ཀྱི་གནད་དོན་ལ་ཐེ་ཇུས་བྱེད་པར་གྲ་སྒྲིག་ཡོད་སྐོར་སོགས་གླེང་སློང་བྱས་རྗེས། ཨ་རིའི་གཞུང་ལ་དགོས་འདུན་དོན་ཚན་བདུན་བཏོན་པའི་ནང་། གཅིག ཨ་རིའི་སྲིད་འཛིན་ཊོམ་ཕུའི་གཞུང་གིས་ཕྱི་ལོ་ ༢༠༢༠ ལོའི་ཨ་རིའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་ལྟར། རྒྱ་ནག་གི་དཔོན་རིགས་ཚོས་༸གོང་ས་མཆོག་གི་ཡང་སྲིད་ངོས་འཛིན་བྱེད་པར་ཐེ་ཇུས་བྱེད་པ་གཙོས་བོད་མིའི་ཆོས་དད་རང་དབང་ལ་རྡོག་རོལ་བཏང་ཚེ། ཕྱི་ལོ་ ༢༠༡༦ ལོའི་ཨ་རིའི་མཱག་ནེ་སི་ཀེ་འགྲོ་བ་མིའི་ཐོབ་ཐང་ (The Global Magnitsky Human Rights Accountability Act) གི་ཁྲིམས་དང་ཕྱི་ལོ་ ༡༩༦༥ ལོའི་ཨ་རིའི་གཞིས་སྤོ་དང་མི་སེར་གྱི་ཁྲིམས་ལུགས་ལྟར་ཉེས་ཆད་གཅོད་དགོས།
གཉིས། སྲིད་འཛིན་ཊོམ་ཕུའི་སྲིད་གཞུང་གིས་ཡུ་རོབ་མཐུན་ཚོགས་དང་མཉམ་འབྲེལ་རྒྱལ་ཚོགས་གཙོས་པའི་གུ་ཡངས་རྒྱལ་ཁབ་དང་རྒྱལ་སྤྱིའི་སྒྲིག་འཛུགས་ཁག་དང་ལྷན་དུ་མུ་མཐུད་མཉམ་འབྲེལ་བྱས་ཏེ། བོད་མིའི་ཆོས་དད་རང་དབང་ཐོག་གཅིག་གྱུར་གྱི་སྲིད་ཇུས་དང་མཉམ་འབྲེལ་གྱི་ལས་གཞི་གསར་པ་རྩོམ་དགོས། གསུམ། ཊོམ་ཕུ་གཞུང་གིས་ཡོངས་གྲགས་ཀྱི་ཐོག་ནས་༸པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཉི་མ་མཆོག་གཙོས་པའི་ཆོས་ལུགས་དད་མོས་རང་དབང་གི་ཐོབ་ཐང་རྩོད་ལེན་ཆེད་འཛིན་བཟུང་བྱས་པའི་བོད་ཀྱི་ཆབ་སྲིད་བཙོན་པ་ཡོངས་ཀློད་གྲོལ་གཏོང་བའི་དགོས་འདུན་བཏོན་དགོས། བཞི། རྒྱ་ནག་གཞུང་གིས་རྒྱལ་མཚམས་ལས་བརྒལ་བའི་དྲག་གནོན་མཚམས་འཇོག་བྱས་ཏེ། ཞི་བའི་ལམ་ནས་བོད་མིའི་ཐོབ་ཐང་ཞུ་གཏུག་གནང་མཁན་ཀྲང་ཡ་དྷི་ (Zhang Yadi) ཚུད་པའི་བོད་མི་རྣམས་ཀློད་གྲོལ་གཏོང་བར་སྐུལ་མ་གནང་དགོས། ལྔ། ཨ་རིའི་རྒྱལ་སྲིད་ལས་ཁུངས་ཀྱིས་བོད་ནང་འགྲོ་འོང་འདྲ་མཉམ་གྱི་སྲིད་ཇུས་འོག་ཉེས་ཆད་ཕོག་པའི་རྒྱ་ནག་གི་དཔོན་རིགས་ཚོའི་མིང་ཐོ་ཕྱིར་བསྒྲགས་བྱས་ཏེ། བོད་ནང་གི་དགོན་སྡེ་ཁག་དང་ནང་ཆོས་ཉམས་ལེན་པའི་གནས་སྟངས་ཚུད་པའི་བོད་ནང་གི་གནས་སྟངས་ལ་ལྟ་ཞིབ་སྔར་ལྷག་ཡོང་ཐབས་བྱེད་དགོས།
དྲུག ཨ་རིའི་གྲོས་ཚོགས་ཀྱི་འབྲེལ་ཡོད་ཚོགས་ཆུང་ཁག་གིས་བོད་ནང་འགྲོ་འོང་གི་ཆོག་མཆན་ཞུ་དགོས་པ་མ་ཟད། ཨ་རིའི་ཕྱི་འབྲེལ་མི་སྣ་དང་མང་ཚོགས་ཀྱི་ཚོགས་པ་ཁག་གི་སྐུ་ཚབ་རྣམས་ལའང་བོད་ལ་འགྲོ་འོང་གི་གོ་སྐབས་འཚོལ་བར་སྐུལ་མ་གཏོང་རྒྱུ་ནི་བོད་ནང་འགྲོ་འོང་འདྲ་མཉམ་གྱི་སྲིད་ཇུས་ལག་བསྟར་བྱེད་པའི་ཆ་ཤས་ཤིག་ཡིན། བདུན། བོད་མི་རྣམས་ལ་ཆོས་དད་རང་དབང་མེད་པ་ནི་ཆབ་སྲིད་ཀྱི་དཀའ་ངལ་ཆེན་པོ་ཞིག་ཡིན་པ་དང་། གནད་དོན་དེ་གླེང་སློང་བྱེད་དགོས། ཕྱི་ལོ་ ༢༠༠༢ ལོར་བོད་ཀྱི་སྲིད་བྱུས་ཀྱི་ཁྲིམས་ཡིག་དང་། ༢༠༢༠ ལོའི་ཨ་རིའི་བོད་དོན་སྲིད་བྱུས་དང་རྒྱབ་སྐྱོར་ཁྲིམས་འཆར་གྱི་དགོངས་དོན་ལྟར། ཨ་རིའི་གཞུང་ལ་བོད་ཀྱི་སྐུ་ཚབ་དང་རྒྱ་ནག་གི་མགོ་ཁྲིད་བར་ཆ་རྐྱེན་གང་ཡང་མེད་པའི་ཐོག་ནས་གྲོས་མོལ་བྱེད་པར་སྐུལ་མ་གཏོང་བའི་སྲིད་ཇུས་ཤིག་ཡོད་ལ། ཊོམ་ཕུའི་སྲིད་གཞུང་གིས་རྒྱ་ནག་གཞུང་ལ་མཐོ་རིམ་མི་སྣ་བརྒྱུད་ནས་གསང་བ་དང་ཡོངས་གྲགས་ཀྱི་ཐོག་ནས་བོད་རྒྱའི་དཀའ་རྙོག་སེལ་ཐབས་སུ་༸གོང་ས་མཆོག་གམ་ཁོང་གི་སྐུ་ཚབ་དང་ལྷན་དུ་ཆ་རྐྱེན་མེད་པའི་ཐོག་ནས་གྲོས་མོལ་བསྐྱར་གསོ་དགོས་པའི་སྐུལ་མ་གཏོང་དགོས། ཞེས་བརྗོད་འདུག
ཨ་རིའི་གྲོས་ཚོགས་འོག་མའི་འཐུས་མི་ཇིམ་མེག་གྷོ་ཝན་ (Jim McGovern) ལགས་ཀྱིས། རྒྱ་ནག་གཞུང་གིས་བོད་དོན་དཀའ་རྙོག་སེལ་བར་དབུ་མའི་ལམ་གྱི་སྲིད་བྱུས་ལ་ངོས་ལེན་མི་བྱས་ཚེ། བོད་དེ་རང་བཙན་གཙང་བའི་རྒྱལ་ཁབ་ཅིག་ལ་ངོས་འཛིན་གནང་རྒྱུ་དང་། རྒྱ་གཞུང་གིས་༸གོང་ས་ཏཱ་ལའི་བླ་མའི་ཡང་སྲིད་ངོས་འཛིན་གནང་ཕྱོགས་ཐད་ཐེ་ཇུས་ཤུགས་ཆེན་བྱེད་བཞིན་ཡོད་པར་བརྟེན། ཕྱི་ལོ་ ༢༠༢༠ ལོའི་ཨ་རིའི་བོད་དོན་སྲིད་བྱུས་དང་རྒྱབ་སྐྱོར་ཁྲིམས་འཆར་དང་འགལ་གྱི་ཡོད་པས། ཨ་རིའི་གཞུང་ནས་རྒྱ་ནག་གིས་ཐེ་ཇུས་བྱེད་བཞིན་པ་དེ་ལ་ངོས་ལེན་མེད། ཅེས་སོགས་གསུངས་འདུག
གཞི་རྩའི་ད་ལན་གྱི་ཉན་ཞིབ་དེའི་ནང་རྒྱ་ནག་གིས་ཕྱིའི་རྒྱལ་ཁབ་ཁག་ཏུ་ཡོད་པའི་ཆོས་ལུགས་ཀྱི་ཚོགས་སྡེ་ཁག་དང་མི་སྒེར་ལ་གནོན་ཤུགས་དང་རྒྱལ་མཚམས་ལས་བརྒལ་བའི་དྲག་གནོན་བྱེད་བཞིན་པ། ཆོས་དད་རང་མོས་དང་རྒྱལ་ཁབ་ཀྱི་བདེ་འཇགས་བར་གྱི་འབྲེལ་བ། ཞི་བདེ་རྒྱ་མཚོའི་ཁུལ་གྱི་ཆོས་དད་རང་མོས་དང་ཕྱི་འབྲེལ་གྱི་ཐབས་ཇུས་སོགས་ཀྱི་སྐོར་གླེང་སློང་གནང་འདུག་ལ། ལྷག་པར་དུ་རྒྱ་ནག་གཞུང་གིས་བོད་བརྒྱུད་ནང་བསྟན་ཆོས་ལུགས་དང་། རྒྱ་ནག་གི་རྩ་རླུང་སྒོམ་སྒྲུབ་ཚོགས་པ། ཡུ་གུར་བའི་ཁ་ཆེའི་ཆོས་ལུགས། ཡེ་ཤུ་ཆོས་ལུགས་སོགས་ཀྱི་ཐོག་སྲིད་ཇུས་འདྲ་མིན་ལག་བསྟར་གྱིས། དངོས་ཤུགས་བརྒྱུད་གསུམ་གྱི་ཐོག་ནས་དྲག་གནོན་ཤུགས་ཆེན་བྱེད་བཞིན་ཡོད་སྟབས། རྒྱ་ནག་གི་ཆོས་དད་རང་དབང་གི་གནས་བབ་ནི་ཨ་རིའི་ཕྱི་སྲིད་ཀྱི་དམིགས་འབེན་ཞིག་ཏུ་འཛིན་དགོས་པ་མ་ཟད། བོད་བརྒྱུད་ནང་པ་དང་རྒྱ་ནག་གི་རྩ་རླུང་སྒོམ་སྒྲུབ་ཚོགས་པ། ཡུ་གུར་བའི་ཁ་ཆེའི་ཆོས་ལུགས། ཡེ་ཤུ་ཆོས་ལུགས་པ་སོགས་ཀྱི་གནད་དོན་ནི་ཨ་རིའི་མངོན་འདོད་ཞིག་ཏུ་བརྩིས་ཏེ། ཨ་རིས་ཕྱི་སྲིད་དང་རྒྱལ་སྲིད་འབྲེལ་ལམ་གྱི་ཐོག་ནས་འབྲེལ་ཡོད་རྒྱལ་སྤྱིའི་གཞུང་ཁག་དང་ཚོགས་སྡེ་ཁག དེ་བཞིན་མི་མང་གི་སྐུ་ཚབ་ཚོགས་པ་སོགས་སུ་འབྲེལ་འདྲིས་ཀྱིས་རྒྱ་ནག་གཞུང་ལ་གནོན་ཤུགས་དང་ཆོས་དད་རང་དབང་ལ་རྡོག་རོལ་གཏོང་བཞིན་པར་འགན་ལེན་བྱེད་དུ་འཇུག་དགོས་སྐོར་སོགས་གླེང་སློང་བྱས་ཡོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
