བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བོད་དོན་རྒྱབ་སྐྱོར་བ་སྐུ་ཞབས་ཇིན་ཧྥ་རན་ཀོ་ཨིས་ཧམ་བྷར་ཊི་ལགས་སྐུ་གྲོངས་བར་མྱ་ངན་དང་ཁོང་གི་ཤུལ་ལུས་ནང་མི་ཉེ་འབྲེལ་རྣམས་ལ་གདུང་སེམས་མཉམ་སྐྱེད་ཞུས་འདུག
(File image) Jean-François Humbert and other French Parliamentarians with His Holiness the Dalai Lama in Toulouse, France, on 15 August 2011
ཟླ་འདིའི་ཕྱི་ཚེས་ ༡༩ ཉིན་ཧྥ་རན་སིའི་གྲོས་ཚོཊ་གོང་མའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཟུར་པ་སྐུ་ཞབས་ཇིན་ཧྥ་རན་ཀོ་ཨིས་ཧམ་བྷར་ཊི་ ( Jean-François Humbert) ལགས་དགུང་ལོ་ ༧༣ སྟེང་སྐུ་གྲོངས་ཡོད་སྟབས། དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། དམ་པ་ཁོང་སྐུ་གྲོངས་བར་མྱ་ངན་དང་ཤུལ་ལུས་ནང་མི་ཉེ་འབྲེལ་རྣམས་ལ་གདུང་སེམས་མཉམ་སྐྱེད་ཀྱི་འཕྲིན་ཡིག་ཅིག་ཕུལ་འདུག
དེ་ཡང་སྲིད་སྐྱོང་སྤེན་པ་ཚེ་རིང་མཆོག་གི་ཐུགས་གསོའི་འཕྲིན་ཡིག་ནང་། ཁོང་ནི་གཞུང་དྲང་ལྡན་པའི་མི་ཞིག་ཡིན་པའི་ཁར། ཁོང་གི་སྐད་ཆ་ནི་ཚད་གཞི་ལྡན་པ། བྱ་སྤྱོད་ནི་རྩ་དོན་དང་མཐུན་པ། བོད་དོན་ལ་བློ་བརྟན་འགྱུར་མེད་ཀྱི་ཆོད་སེམས་མཆིས། ཁོང་གིས་ལོ་ངོ་བཅུ་ཕྲག་མང་པོར་བོད་དོན་རྒྱབ་སྐྱོར་གནང་ཡོད་ལ། ཁོང་གིས་ཧྥ་རན་སིའི་གྲོས་ཚོགས་ནང་གི་ལས་དོན་དང་། རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་(International Information Group on Tibet)་མགོ་ཁྲིད་ཀྱི་ཐོག་ནས་བོད་ཀྱི་འབོད་སྒྲ་རྒྱལ་སྤྱིའི་གླེང་སྟེགས་སུ་བསྒྲགས་ཡོད། ཁོང་གི་རྒྱབ་སྐྱོར་གྱིས་བོད་བཙན་བཟུང་བྱས་པའི་གནས་སྟངས་དང་། བོད་མི་རིགས་ཀྱི་རིག་གཞུང་རྩ་གཏོར། འགྲོ་བ་མིའི་ཐོབ་ཐང་གི་དཀའ་ངལ་སོགས་ལ་རྒྱལ་སྤྱིར་གོ་རྟོགས་ཆེས་ཆེར་སྤེལ་ཡོད། ཅེས་གསུངས་འདུག
ཡང་སྲིད་སྐྱོང་མཆོག་གིས། ངས་བོད་ཀྱི་དངོས་གནས་ཀྱི་གྲོགས་པོ་དང་བོད་ལ་རྒྱབ་སྐྱོར་བྱེད་མཁན་ཞིག་འདས་གྲོངས་སུ་གྱུར་བར་མྱ་ངན་ཞུ། ཁོང་གིས་ལྷོད་མེད་ཀྱི་ངང་ནས་བོད་དོན་རྒྱབ་སྐྱོར་དང་། བོད་དོན་ཐད་ལས་དོན་གཉེར་བ་སྙིང་དབུས་ནས་གུས་འདུད་དང་ཡི་རངས་ཞུ། དེ་བཞིན་ངས་དབུས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ནས་ཁོང་གི་ཤུལ་ལུས་ནང་མི་དང་གཉེན་ཉེ་ཡོངས་ལ་སེམས་བསམ་པའི་གཏིང་ནས་མྱ་ངན་དང་བསྔོ་སྨོན་ཞུ། ཞེས་གསུངས་འདུག
Sikyong Penpa Tsering Extends Condolences on the Passing of Senator Jean François Humbert
སྐུ་ཞབས་ཇིན་ཧྥ་རན་ཀོ་ཨིས་ཧམ་བྷར་ཊི་ལགས་ནི་ཕྱི་ལོ་ ༡༩༥༢ ལོར་སྐུ་འཁྲུངས་ཤིང་། ཁོང་ཕྱི་ལོ་ ༡༩༩༨ ནས་ ༢༠༠༤ བར་ཧྥ་རན་སིའི་ཀོམ་ཏེའི་(Comté) ས་གནས་ལྷན་ཚོགས་ཀྱི་ཚོགས་གཙོ་དང་། ཕྱི་ལོ་ ༡༩༩༨ ནས་ ༢༠༡༤ བར་དུ་བྷོ་ས་ཁུལ་གྱི་ཧྥ་རན་སིའི་གྲོས་ཚོགས་འཐུས་མིར་བདམས། ཁོང་གིས་ཕྱི་ལོ་ ༢༠༠༩ ནས་ ༢༠༡༢ བར་ཧྥ་རན་སིའི་གྲོས་ཚོགས་ནང་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་(International Information Group on Tibet)་ཚོགས་གཙོ་དང་ཚོགས་གཞོན་བཅས་ཀྱི་འགན་འཁུར། ཕྱི་ལོ་ ༢༠༡༡ ལོར་ཧྥ་རན་སིར་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས། ཁོང་གིས་བོད་དང་བོད་མིར་རྒྱབ་སྐྱོར་དང་། རྒྱ་ནག་གཞུང་གིས་ཁྲིམས་མཐུན་མིན་པའི་སྲིད་ཇུས་ཁག་ལ་ངོ་རྒོལ་ལན་མང་གནང་། ཕྱི་ལོ་ ༢༠༡༣ ལོར་ཁོང་གིས་ཧྥ་རན་སིའི་གྲོས་ཚོཊ་གོང་མའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གནང་སྐབས་བོད་མིའི་སྒྲིག་འཛུཊ་སྲིད་སྐྱོང་བློ་བཟང་སེང་གེ་མཆོག་ཡུལ་དེའི་གྲོས་ཚོགས་གོང་མར་གདན་ཞུས་གནང་ཡོད་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
