ཁཱལ་མུག་གི་སྲིད་འཛིན་ཟུར་པ་ཁེར་སིན་ནེ་ཁོ་ལྭ་ཡེ་ཝེག་མཆོག་གིས་ཕྱི་ལོ་ ༢༠༠༤ ལོར་༧གོང་ས་མཆོག་ཁཱལ་མུག་སྤྱི་མཐུན་རྒྱལ་ཁབ་ནང་དུ་ཆིབས་སྒྱུར་བསྐྱངས་པ་ནི་སྤོབས་པ་ཞིག་ཡིན་སྐོར་འགྲེལ་བརྗོད་གནང་བྱུང་།
དེ་རིང་ཕྱི་ཚེས་ ༢༥ ཉིན་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་ཁཱལ་མུག་གི་སྲིད་འཛིན་ཟུར་པ་ཁེར་སིན་ནེ་ཁོ་ལྭ་ཡེ་ཝེག་(Kirsan Nikolayevich llyumzhinov) མཆོག་དང་། རུ་སོག་དོན་གཅོད་ཏི་ལོ་རིན་པོ་ཆེ་མཆོག དེ་བཞིན་སོག་ཡུལ་གྱི་དད་ལྡན་སེར་སྐྱ་མི་མང་ ༢༥༠ ལྷག་ལ་མཇལ་ཁ་སྩལ་ཡོད་འདུག
མཇལ་ཁའི་སྐོར་ལ་ཁཱལ་མུག་གི་སྲིད་འཛིན་ཟུར་བ་ཁེར་སིན་ནེ་ཁོ་ལྭ་ཡེ་ཝེག་མཆོག་གིས་འདི་གའི་གསར་འགོད་པར། ཕྱི་ལོ་ ༢༠༠༤ ཟླ་ ༡༢ ནང་༧གོང་ས་རྒྱལ་བ་རིན་པོ་ཆེ་མཆོག་ཁཱལ་མུག་སྤྱི་མཐུན་རྒྱལ་ཁབ་ནང་ཆིབས་བསྒྱུར་བསྐྱངས་པ་རེད། སྐབས་དེར་༧གོང་ས་མཆོག་ནས་ཐོག་མར་ནང་པའི་མཆོད་རྟེན་གྱི་རྨང་རྡོ་བཞེངས་པ་རེད། ད་ལྟ་མཆོད་རྟེན་གྱི་བཀོད་པ་ཡོངས་རྫོགས་ལེགས་གྲུབ་བྱུང་ཡོད། དེ་རིང་ངས་ནང་པའི་མཆོད་རྟེན་གྱི་པར་༧གོང་ས་མཆོག་ལ་ཕུལ་བ་ཡིན། ༧གོང་ས་མཆོག་ནས་ཀྱང་མཆོད་རྟེན་གྱི་རྨང་རྡོ་བཞེངས་པ་དྲན་པ་སོས་ཀྱི་འདུག ནང་པའི་མཆོད་རྟེན་དེ་ནི་ཁཱལ་མུག་སྤྱི་མཐུན་རྒྱལ་ཁབ་ནང་གི་ནང་པའི་ཆོས་ལུགས་བསྟི་གནས་ཁང་ཞིག་ཆགས་ཡོད། དེ་བཞིན་དེ་རིང་ཨུ་རུ་སུའི་ནང་༧གོང་ས་མཆོག་དང་ནང་པའི་ཕྱག་དེབ་ཁག་པར་སྐྲུན་རོགས་རམ་བྱེད་མཁན་ཚོང་པ་(Iger makarov) ལགས་ཀྱིས་ཀྱང་མཇལ་བཅར་ཞུས་ཡོད། ང་ཚོ་ཚང་མས་༧གོང་ས་མཆོག་གི་སྐུ་ཚེ་བརྟན་པའི་སྨོན་ལམ་ཞུས་ཡོད། ཅེས་འགྲེལ་བརྗོད་གནང་བྱུང་།
ཡང་ཁོང་གིས། ༧གོང་ས་རྒྱལ་བ་རིན་པོ་ཆེ་མཆོག་ལ་ངས་ཐེངས་མང་པོར་མཇལ་བཅར་ཞུས་ཡོད། ཕྱི་ལོ་ ༡༩༩༣ ལོར་ང་རང་ཁཱལ་མུག་སྤྱི་མཐུན་རྒྱལ་ཁབ་ཀྱི་སྲིད་འཛིན་ལ་འོས་འདེམས་བྱུང་བ་རེད། དེ་དུས་གཞུང་འབྲེལ་ཐོག་ནས་དྷ་རམ་ས་ལར་༧གོང་ས་མཆོག་ལ་མཇལ་བཅར་ཞུ་རུ་ཡོང་མྱོང་ཡོད་ལ། ཡུ་རོབ་ཀྱི་རྒྱལ་ཁབ་ཁག་ནས་ཀྱང་མཇལ་བཅར་ཞུས་མྱོང་། ཕྱི་ལོ་ ༢༠༠༤ ལོར་༧གོང་ས་རྒྱལ་བ་རིན་པོ་ཆེ་མཆོག་ཁཱལ་མུག་སྤྱི་མཐུན་རྒྱལ་ཁབ་ནང་དུ་ཆིབས་སྒྱུར་བསྐྱངས་ཏེ། ཁེལ་མེག་གི་མི་མང་སྟོང་ཕྲག་མང་པོར་བཀའ་སློབ་སྩལ་ཡོད། དེ་ནི་ངའི་སེམས་པའི་ནང་སྤོབས་པ་སྐྱེས་པ་ཞིག་རེད། ཏོག་དབྱིབས་གཉན་རིམས་ཀྱི་སྔོན་ལ་ངས་༧གོང་ས་མཆོག་ལ་མཇལ་བཅར་ཞུས་པ་ཡིན། སྐབས་དེར་༧གོང་ས་མཆོག་ནས་བོད་དང་ཨུ་རུ་སུའི་ཁོངས་སུ་ཡོད་པའི་ཁཱལ་མུག་དང་ཐུ་ཝ། བྷོ་རི་ཡ་བཅས་ཀྱི་འབྲེལ་ལམ་སྐོར་ནས་བཀའ་སློབ་མང་པོ་གནང་བྱུང་། ཞེས་འགྲེལ་བརྗོད་གནང་བྱུང་།
མཇལ་ཁའི་སྐོར་ལ་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་གིས་འདི་གའི་གསར་འགོད་པར། སོག་པོ་མི་མང་ཐུན་མོང་ནས་ཇི་ལྟར་གསོལ་བ་བཏབ་པ་ལྟར། སང་ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུ་གཏན་ཁེལ་ཡོད་པས། བརྟན་བཞུགས་ཐོག་སོག་པོ་ནས་མི་མང་ ༥༠༠ ལྷག་ཕེབས་ཡོད་ཅིང་། དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་སོག་པོ་མི་མང་གྲངས་ ༢༥༠ ལྷག་ལ་མཇལ་ཁ་སྩལ་ཡོད། སྤྱིར་བཏང་ཐེངས་འདིའི་བརྟན་བཞུགས་གོ་སྒྲིག་ཞུ་མཁན་ཚོགས་པ་ཁ་ཤས་ཡོད་ཀྱང་། ཚོགས་པའི་མིང་འཁྱེར་གྱི་མེད། སོག་པོ་མི་མང་ཐུན་མོང་གི་རྣམ་པའི་ཐོག་ནས་བརྟན་བཞུགས་འབུལ་གྱི་ཡོད། བརྟན་བཞུགས་འབུལ་མཁན་མང་པོ་ཡོད་པས། ཚོགས་པའི་མིང་གལ་ཆེན་པོ་བརྩི་བཞིན་འདུག ང་ཚོས་ཚོགས་པའི་མིང་ཆེན་པོ་གནང་གི་མི་འདུག སོག་པོ་ཟེར་དུས་སོག་པོའི་རྒྱལ་ཁབ་གཅིག་པོར་དགོངས་པ་བཞེས་རྒྱུ་ཡོད་པ་མ་རེད། དེ་རིང་འདིར་ཨུ་རུ་སུའི་ཁྱབ་ཁོངས་ཀྱི་ཁེལ་མེག་དང་ཐུ་ཝ། བྷོ་རི་ཡ་བཅས་ཀྱི་སོག་རིགས་མཉམ་ཞུགས་གནང་གི་ཡོད་པ་རེད། དེ་རིང་འདིར་ཁཱལ་མུག་གི་དགེ་བཤེས་ལྷ་རམས་པ་ཐོན་པ་བྱུང་ཡོད། ཕལ་ཆེར་ལོ་ ༨༣ རྗེས་སུ་དགེ་བཤེས་ལྷ་རམས་ཐོན་པ་རེད། འདི་ནི་ང་ཚོས་དགའ་བསུ་ཞུ་དགོས་པ་ཞིག་ཆགས་ཀྱི་ཡོད། ཅེས་འགྲེལ་བརྗོད་གནང་བྱུང་།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
