རྒྱ་ནག་གཞུང་གིས་མེ་སྐྱོན་ལ་ཁ་གཡར་ནས་མ་ཎི་དར་ལྕོག་མེར་བསྲེགས། 

རྒྱ་ནག་གཞུང་ཁོར་ཡུག་དང་མེ་གསོད་རུ་ཁག་གིས་དགུན་ཁར་མེ་སྐྱོན་བྱུང་ཉེན་ཡོད་ལུགས་བཤད་དེ་བོད་གཅིག་སྒྲིལ་རྫོང་གི་རི་མགོའི་མཎི་དར་ལྕོག་སོགས་མེར་བསྲེགས་འདུག

རྒྱ་ནག་གཞུང་གིས་བོད་ནང་གི་ས་གནས་མང་པོ་ཞིག་ལ་བསང་གསོལ་གཏོང་བ་དང་དར་ལྕོག་སྒྲེང་འཛུགས་བྱེད་པ་སོགས་ལ་དམ་དྲག་བྱེད་ཀྱིན་ཡོད་པ་ལྟར། ཟླ་འདིའི་ཕྱི་ཚེས་ ༡༨ ཉིན་རྒྱ་ནག་གཞུང་གིས་བོད་མགོ་ལོག་ཁུལ་གཅིག་སྒྲིལ་རྫོང་གི་ཁོར་ཡུག་དང་མེ་གསོད་རུ་ཁག་གིས། རྫོང་གི་མཎི་དར་ལྕོག་དེ་དག་དགུན་དུས་སུ་མེ་སྐྱོན་ཡོང་ཉེན་ཡོད་ལུགས་སོགས་བརྗོད་དེ་མེར་བསྲེགས་ཡོད་པ་མ་ཟད། མེའི་འཚིག་རོ་སོགས་གང་བྱུང་གཡུགས་བཞག་པས་མི་མང་གིས་གཙང་བཟོ་བྱས་ཡོད་འདུག  

འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས། ཉེ་ལམ་གཅིག་སྒྲིལ་རྫོང་གི་ཁོར་ཡུག་དང་མེ་གསོད་རུ་ཁག་གི་ལས་བྱེད་ཚོ་དར་ལྕོག་ཡོད་སའི་ཡུལ་དངོས་སུ་ཕྱིན་ཏེ་རྟོག་ཞིབ་བྱས་པ་བརྒྱུད། དགུན་དུས་ས་སྐམ་སྐབས་དར་ལྕོག་དེ་དག་གིས་མེ་སྐྱོན་འབྱུང་ཉེན་ཡོད་ལུགས་ཀྱི་གསལ་བསྒྲགས་ཤིག་བྱས་ཡོད་པ་མ་ཟད། ཟླ་འདིའི་ཕྱི་ཚེས་ ༡༨ ཉིན་ཆེད་དུ་ཁོར་ཡུག་དང་མེ་གསོད་ཀྱི་རུ་ཁག་གི་ལས་བྱེད་ཚོ་ཆེད་དུ་ཡོང་ནས་མཎི་ལ་སོགས་པའི་དར་ལྕོག་རྣམས་མེས་བསྲེགས་སོང་། ཞེས་བརྗོད་བྱུང་། 

ཡང་འབྲེལ་ཡོད་ཀྱིས། ལས་བྱེད་དེ་དག་གིས་དར་ལྕོག་སོགས་མེར་བསྲེགས་པ་ལས། འཚིག་རོ་རྣམས་གཙང་བཟོ་མ་བྱས་པར་གཡུགས་ཡོད་སྟབས། ས་གནས་བོད་མི་རྣམས་ཀྱིས་གཙང་བཟོ་བྱས་ཡོད་ཀྱང་། རྒྱ་ནག་གཞུང་གིས་དྲ་ལམ་སོགས་སུ་དགུན་དུས་མེ་སྐྱོན་རིགས་མི་འབྱུང་སླད་ཆེད་ལས་མི་སྣ་བཀོད་སྒྲིག་བྱས་ནས་དོ་དམ་བྱས་ཡོད་ལུགས་སོགས་བསྒྲགས་སོང་། ཞེས་དང་། གནད་དོན་དེ་དང་འབྲེལ་ནས་བོད་ནང་གི་བོད་མི་ཞིག་གིས་མཎི་དར་ལྕོག་མེ་ལ་བསྲེགས་པ་ནི་ཕ་མེས་ཀྱི་དུར་ས་སློག་པ་དང་མཚུངས། ཞེས་དང་། ཡང་བོད་མི་གཞན་ཞིག་གིས། ས་སྐམ་རྡོ་གྱོང་དུས་དར་ལྕོག་མེ་ལ་བསྲེགས་ན་མེ་སྐྱོན་ལོས་བྱུང་ཞེས་བྲིས་ནས་བོད་མིའི་དད་འདུན་རྡོག་རོལ་བཏང་བར་མ་འདོད་པའི་རྣམ་འགྱུར་བསྟན་འདུག

རྒྱ་ནག་གཞུང་གིས་བོད་ནང་ཆོས་ལུགས་ཀྱི་ལས་དོན་སྤེལ་བ་དང་། རི་མགོར་བསང་གཏོང་བ། དེ་བཞིན་དར་ལྕོག་སྒྲེང་བ་སོགས་བྱེད་པར་དམ་དྲག་བྱས་དང་བྱེད་མུས་ཡིན་པའི་ཁར། ས་གནས་ཁག་ཅིག་གི་རི་མགོའི་དར་ལྕོག་དང་ལབ་རྩེ་ཡིས་རང་བྱུང་ཁོར་ཡུག་འབག་བཙོག་དང་། སེམས་ཅན་སོགས་ལ་འཆི་སྐྱོན་མང་པོ་འབྱུང་གི་ཡོད་ལུགས་བཤད་ནས་མེད་པ་བཟོ་ཐབས་ཀྱི་ཡོད་པ་མ་ཟད། ཕྱི་ལོ་ ༢༠༢༣ ལོའི་ཟླ་ ༩ ནང་རྒྱ་ནག་གཞུང་གིས་བོད་གསེར་རྟ་རྫོང་གི་ཁེས་སྐོར་ཡུལ་ཚོའི་ཨ་བོས་དཀྱིལ་རི་མགོ་སྡེ་བ་ནས་ཡིན་པའི་བོད་མི་ཕྱུག་དར་དང་དགེ་ལོ། ཚེ་རྡོ། འབའ་མོ། ཀོ་རིས་བཅས་ཀྱིས་བསང་གསོལ་དང་ལབ་རྩེ་བསྟོད་པ། ཞབས་རིམ་བསྒྲུབས་པ་སོགས་ལ་ཉེས་མིང་གཡོགས་ཏེ་ལོ་གཉིས་རེའི་ཁྲིམས་ཐག་བཅད་ཡོད་པ་མ་ཟད། རང་ལོ་ ༥༢ ཡིན་པའི་བོད་མི་ཕྱུག་དར་ལགས་ལ་གཅར་རྡུང་བཏང་ནས་རྐྱེན་འདས་སུ་བཏང་ཡོད་པ་དང་། ཁོང་གི་ཁྱིམ་མི་ཚོར་ཕྱུག་དར་གློ་བུར་འདས་གྲོངས་སུ་ཕྱིན་པ་ལས་བསད་པ་མིན་སྐོར་དང་། ཁ་འགོག་ཐབས་སུ་གུན་གསབ་ལྟ་བུ་ཞིག་སྤྲོད་རྒྱུ་བྱས་ཡོད་ཀྱང་ཕྱིས་སུ་གོ་ཐོས་མེད་པར་གྱུར།

འབྲེལ་ཡོད་གསར་འགྱུར། https://tibettimes.net/2022/09/19/222146/

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།