ལྡི་ལི་སྐུ་ཚབ་དོན་གཅོད་ཁང་གི་དྲུང་འཕར་དོན་འགྲུབ་རྒྱལ་པོ་ལགས་ལྷོ་ཨ་ཧྥེ་རི་ཁའི་སྐུ་ཚབ་དོན་གཅོད་གསར་པར་བསྐོ་གཞག་གནང་འདུག
ཁ་སང་ཟླ་འདིའི་ཕྱི་ཚེས་ ༢༦ ཉིན་བཀའ་དྲུང་ཡིག་ཚང་ནས་གསལ་བསྒྲགས་གནང་བ་ལྟར་ན། ལྡི་ལི་སྐུ་ཚབ་དོན་ཁང་གི་དྲུང་འཕར་དོན་འགྲུབ་རྒྱལ་པོ་ལགས་ལྷོ་ཨ་ཧྥི་རི་ཁའི་སྐུ་ཚབ་དོན་གཅོད་དུ་བསྐོ་གཞག་གནང་ཡོད་པ་དང་། ཁོང་གི་འབྲེལ་ཡོད་ཡིག་ཆ་རྣམས་འགྲུབ་མཚམས་དངོས་སུ་ལས་ཁུར་མགོ་འཛུགས་གནང་རྒྱུ་ཡིན་འདུག ཕྱི་ལོ་ ༢༠༢༢ ལོར་ལྷོ་ཨ་ཧྥེ་རི་ཀའི་སྐུ་ཚབ་དོན་གཅོད་གསར་པ་བསྐོ་གཞག་གནང་ཡོད་ཀྱང་ཡིག་ཆའི་ཐོག་ནས་དཀའ་ངལ་འཕྲད་དེ་ལས་འཁུར་ཞུ་མ་ཐུབ་པར་ལྷག་ཡོད་པ་རེད།
དྲུང་འཕར་དོན་འགྲུབ་རྒྱལ་པོ་ལགས་ནི་ཕྱི་ལོ་ ༡༩༧༥ ཟླ་ ༡ ཚེས་ ༢༤ ཉིན་རྒྱ་གར་དུ་སྐྱེས་ཡོད་ཅིང་། ཕྱི་ལོ་ ༡༩༩༤ ལོར་རྒྱ་གར་ཧི་མ་ཅལ་མངའ་སྡེའི་སིམ་ལ་ཁུལ་ནས་འཛིན་རིམ་བཅུ་གཉིས་བར་དུ་སློབ་སྦྱོང་བྱས་འདུག ཕྱི་ལོ་ ༡༩༩༧ ལོར་ཅཱན་དྷི་གྷར་གཙུག་ལག་སློབ་གླིང་དུ་ཚོང་ལས་རིག་པའི་ཐོག་ཉེ་བའི་གཙུག་ལག་རབ་འབྱམས་པའི་བསླབ་པ་མཐར་སོན། ཕྱི་ལོ་ ༢༠༠༠ ལོ་ནས་བཟུང་བོད་མིའི་སྒྲིག་འཛུགས་སྲི་ཞུའི་ལས་བྱེད་ཁོངས་སུ་ཞུགས། ཕྱི་ལོ་ ༢༠༠༠ ནས་ ༢༠༠༤ བར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲ་ལམ་སྡེ་ཚན་གྱི་འགན་འཛིན་དང་། ཕྱི་ལོ་ ༢༠༠༤ ནས་ ༢༠༠༧བར་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་བོད་ཀྱི་དྲ་བ་དང་དབྱིན་ཡིག་གསར་ཤོག་(Tibetan Bulletin) བཅས་ཀྱི་རྩོམ་སྒྲིག་པའི་ཕྱག་ལས་གནང་། ཕྱི་ལོ་ ༢༠༠༧ ནས་ ༢༠༠༩ བར་ལོ་གཉིས་རིང་ཐའེ་ཝན་དུ་ཕྱིན་ཏེ་རྒྱའི་སྐད་ཡིག་ཐོག་སློབ་གཉེར་བྱས། ཕྱི་ལོ་ ༢༠༡༢ ནས་ ༢༠༡༤ བར་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་བོད་ཀྱི་སྲིད་བྱུས་ཉམས་ཞིབ་ཁང་དུ་ཉམས་ཞིབ་པའི་ཕྱག་ལས་གནང་། ཕྱི་ལོ་ ༢༠༡༤ ནས་ ༢༠༡༨ བར་ཐའེ་ཝན་བོད་ཀྱི་སྐུ་ཚབ་དོན་གཅོད་ཁང་གི་དྲུང་ཆེའི་ལས་འགན་འཁུར། ཕྱི་ལོ་ ༢༠༡༩ ཟླ་བཅུ་པ་ནས་བཟུང་རྒྱ་གར་ལྡི་ལི་བོད་ཀྱི་སྐུ་ཚབ་དོན་གཅོད་ཁང་གི་དྲུང་འཕར་གྱི་ཕྱག་ལས་གནང་བཞིན་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
