༧གོང་ས་རྒྱལ་བ་རིན་པོ་ཆེ་མཆོག་ནས་ལྷོ་ཤར་ཨེ་ཤ་ཡའི་རྒྱལ་ཁབ་ཁག་གི་རང་བྱུང་གོད་ཆག་ཁྲོད་རྐྱེན་འདས་བྱུང་བ་དང་མྱུར་སྐྱོབ་བྱེད་པར་ཐུགས་སྨོན་མཛད་འདུག
དེ་རིང་ཕྱི་ཟླ་ ༡༢ ཚེས་ ༢ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ཉེ་ལམ་ལྷོ་ཤར་ཨེ་ཤ་ཡའི་རྒྱལ་ཁབ་ཁག་གི་ནང་དུ་དྲག་ཆར་གྱི་གོད་ཆག་ཚབས་ཆེན་བྱུང་བར་ཐུགས་གསོའི་གསུང་འཕྲིན་ཞིག་བསྩལ་འདུག ༧གོང་ས་མཆོག་གི་ཐུགས་གསོའི་གསུང་འཕྲིན་ནང་། ཉེ་ལམ་ཨེ་ཤ་ཡའི་རྒྱལ་ཁབ་ཨིན་ཌོ་ནེ་ཤི་ཡ་དང་། ཤྲི་ལངྒ། ཝི་ཏི་ནམ། ཐའེ་ལན་ཌི། མཱ་ལེ་ཤི་ཡ། ཧྥི་ལི་པིན་སོགས་ཉེ་འཁོར་ས་ཁུལ་ཁག་ཏུ། དྲག་ཆར་དང་རླུང་འཚུབ་ཀྱི་གོད་ཆག་ཁྲོད་མི་མང་པོ་རྐྱེན་འདས་དང་། མི་མང་ས་ཡ་མང་པོར་དཀའ་ངལ་ཚབས་ཆེན་བཟོས་པའི་གནས་ཚུལ་ཐོས་པར་ངོས་རང་སེམས་པ་ཧ་ཅང་སྐྱོ་བོ་བྱུང་། ཐེངས་འདིའི་གོད་ཆག་ཁྲོད་འདས་གྲོངས་སུ་གྱུར་པའི་ཁྱིམ་མི་ཡོངས་ལ་སེམས་གཏིང་ནས་གདུང་སེམས་མཉམ་སྐྱེད་ཞུ་བཞིན་ཡོད་ལ། རང་བྱུང་གི་གནོད་འཚེ་ཁྲོད་རྨས་སྐྱོན་བྱུང་ཡོད་པའི་མི་རྣམས་མྱུར་དུ་དྲག་སྐྱེད་ཡོང་བའི་སྨོན་ལམ་འདེབས། དེ་བཞིན་རང་བྱུང་གོད་ཆག་བྱུང་སའི་ས་ཁུལ་ཡོངས་ཀྱི་མྱུར་སྐྱོབ་ཀྱི་ལས་དོན་དང་བསྐྱར་གསོའི་ལས་དོན་ལེགས་འགྲུབ་ཡོང་བའི་སྨོན་ལམ་འདེབས་ཀྱི་ཡོད་ལ། མྱུར་སྐྱོབ་བྱེད་མཁན་རྣམས་ཀྱིས་མི་མང་པོ་བདེ་འཇགས་ངང་སྐྱོབ་ཐུབ་པའི་སྨོན་ལམ་འདེབས། ཞེས་གསུངས་འདུག
ཕྱི་ཟླ་ ༡༡ ཚེས་ ༢༨ ཙམ་ནས་ལྷོ་ཤར་ཨེ་ཤ་ཡའི་ནང་དྲག་ཆར་དང་རླུང་འཚུབ་ཆེན་པོ་གཡུགས་ཏེ་ཆུ་ལོག་རྒྱུག་པ་དང་རི་ཉིལ་བའི་དོན་རྐྱེན་བྱུང་ཡོད་པའི་ཁྲོད། ཨིན་ཌོ་ནེ་ཤི་ཡ་ནང་མི་གྲངས་ ༦༠༤ དང་། ཤྲི་ལངྒའི་ནང་མི་གྲངས་ ༣༩༠ ། ཐའེ་ལན་ཌིའི་ནང་མི་གྲངས་ ༡༧༦ ། ཝི་ཏི་ནམ་ནང་མི་གྲངས་ ༩༠ ། དེ་བཞིན་ཉེ་འཁོར་ས་ཁུལ་ཁག་ཏུ་ཉུང་མཐར་མི་༡༢༠༠ ལྷག་རྐྱེན་འདས་སུ་ཕྱིན་ཡོད་ཅིང་། ད་དུང་མི་བརྒྱ་ཕྲག་ཁ་ཤས་གར་སོང་ཆ་མེད་དུ་གྱུར་ཡོད་པ་མ་ཟད། མི་ས་ཡ་མང་པོའི་འཚོ་གནས་ཐད་གནོད་འཚེ་བྱུང་སྟེ་གནས་སྤོ་བྱེད་དགོས་བྱུང་ཡོད་པ་རེད།
ཁ་སང་ཟླ་འདིའི་ཕྱི་ཚེས་ ༡ ཉིན་ཤྲི་ལངྒའི་སྲིད་འཛིན་ཨ་ནུ་རཱ་ཀུ་མཱ་རཱ་(Anura Kumara Dissanayake)མཆོག་གིས། ཐེངས་འདིའི་རང་བྱུང་གོད་ཆག་ནི་ཤྲི་ལངྒ་རྒྱལ་ཁབ་ཀྱི་ལོ་རྒྱུས་ཁྲོད་རང་བྱུང་གི་གནོད་འཚེ་ཆེ་ཤོས་དང་དཀའ་ངལ་ཆེ་ཤོས་དེ་ཆགས་ཡོད་པ་མ་ཟད། རྒྱལ་ཁབ་ཡོངས་སུ་གནོད་སྐྱོན་ཚབས་ཆེན་བཟོས་ཡོད་ལ། ཕྱི་ལོ་ ༢༠༠༤ ལོར་རྒྱ་མཚོའི་རླུང་འཚུབ་ཆེན་པོ་ལས་ཀྱང་ཤུགས་རྐྱེན་ཆེན་པོ་ཐེབས་ཡོད། ཅེས་གསུངས་འདུག
རྒྱ་གར་གྱི་གནམ་གཤིས་ཞིབ་འཇུག་ཁང་གི་གནམ་གཤིས་ཚན་རིག་པ་རོ་སི་མཱ་ཐོ་ཀོལ་(Roxy Mathew Koll)ལགས་ཀྱིས། འདི་ལོའི་ལོ་མགོ་ནས་བཟུང་ཞི་བདེ་རྒྱ་མཚོ་དང་རྒྱ་གར་རྒྱ་མཚོའི་ནང་དུ་ཉུང་མཐར་རླུང་འཚུབ་ཐེངས་ ༡༦ བྱུང་ཡོད་ཅིང་། རླུང་འཚུབ་འབྲིང་ཙམ་གྱིས་ཀྱང་དྲག་ཆར་ཆེན་པོ་དང་ཆུ་ལོག་ཆེན་པོ་བཟོས་ཡོད། འདི་ལོར་ཆར་བ་ཤུགས་ཆེན་བབས་པའི་རྐྱེན་གྱིས་རི་ཉིལ་བ་དང་ཆུ་ལོག་གི་གནོད་སྐྱོན་ཆེན་པོ་ཐེབས་ཡོད་པ་ལས། རླུང་འཚུབ་ཀྱི་གྲངས་ཀའི་ཐོག་ནས་ཤུགས་རྐྱེན་ཐེབས་མེད། ཅེས་བརྗོད་འདུག
གནད་དོན་དེའི་སྐོར་ལ་རྒྱལ་སྤྱིའི་རྒྱ་གྲམ་དམར་པོ་ཚོགས་པའི་ཞི་བདེ་རྒྱ་མཚོ་ཁུལ་གྱི་འགན་འཛིན་ཨེ་ལེ་ཛིན་ཌར་མེ་ཐིའོ་(Alexander Matheou) ལགས་ཀྱིས། རྒྱལ་ཁབ་ཁག་གིས་རང་བྱུང་གནོད་འཚེའི་སྔོན་བརྡ་གཏོང་བྱེད་ཀྱི་འཕྲུལ་ཆས་ཡག་པོ་བཟོས་ཏེ། ཆུ་ལོག་སོགས་ཀྱི་རང་བྱུང་གནོད་འཚེ་བྱུང་བའི་སྐབས་མི་མང་གནས་སྤོ་བྱེད་ས་བཟོ་དགོས་པ་མ་ཟད། རང་བྱུང་གི་ཐབས་ལམ་ཐོག་ནས་སྤྱི་ཚོགས་ཀྱི་བདེ་འཇགས་སྲུང་སྐྱོབ་བྱ་དགོས། ཆུ་ལོག་གི་གནོད་འཚེ་ནི་གནམ་གཤིས་འགྱུར་ལྡོག་གི་གནད་དོན་ཐོག་ནས་བྱུང་དང་འབྱུང་བཞིན་པའི་རྒྱུན་ལྡན་གྱི་གནས་སྟངས་ཤིག་ཆགས་ཀྱི་ཡོད་པས། གནོད་འཚེ་སྔོན་འགོག་ཐོག་ཏུ་མ་དངུལ་གཏོང་རྒྱུ་གལ་ཆེན་པོ་རེད། ཅེས་བརྗོད་འདུག
ཉེ་བའི་དུས་རབས་འདི་དག་གི་ནང་དུ་མིས་བཟོས་པའི་དྲོད་ཁང་མང་པོ་བྱུང་བ་དང་བསྟུན། སའི་གོ་ལའི་རླུང་ཁམས་ཀྱི་དྲོད་ཚད་ཆེ་རུ་འགྲོ་བཞིན་ཡོད་ཅིང་། འདས་ལོ་ནི་ཚ་དྲོད་ཆེ་ཤོས་ཀྱི་ལོ་ཡིན་པ་ཟིན་ཐོ་འཁོད་ཡོད། རྒྱ་མཚོ་རུ་ཚ་དྲོད་རྒྱས་རྐྱེན་རླུང་འཚུབ་འབྱུང་བར་ཤུགས་རྐྱེན་ཆེན་པོ་ཐེབས་ཡོད། ཉེ་བའི་ལོ་འདི་དག་གི་ནང་རྒྱ་གར་དང་འབར་མའི་རྒྱ་མཚོ་ཁུལ་གྱི་རྒྱ་མཚོའི་ཚ་དྲོད་ཤུགས་ཆེན་འཕར་ཡོད། ཕྱི་ལོ་ ༢༠༢༤ ལོའི་ཚ་དྲོད་ཀྱི་ཞིབ་འཇུག་ལྟར་ན། བོད་མཐོ་སྒང་གི་དྲོད་ཚད་འཕར་བ་དེས་ལྷོ་ཤར་ཨེ་ཤ་ཡ་དང་ཤར་ཨེ་ཤ་ཡའི་མཐའ་འཁོར་གྱི་ཞི་བདེ་རྒྱ་མཚོའི་རླུང་གི་འཁོར་སྐྱོད་ཉུང་དུ་བཏང་ཡོད་པ་དང་། དེ་བཞིན་ཕྱི་ལོ་ ༡༩༩༠ ལོ་ནས་ཨ་རབ་རྒྱ་མཚོའི་རླུང་གི་འཁོར་སྐྱོད་ཉུང་དུ་ཕྱིན་སྟེ་ཚ་བའི་རླུང་འཚུབ་ཤུགས་ཆེ་རུ་གྱུར་ཡོད། དྲོད་ཚད་འཕར་བ་དེས་རླུང་ཁམས་ནང་དུ་ཆུ་རླངས་མང་པོ་བཟུང་ཡོད་ཅིང་། འཛམ་གླིང་གི་དྲོད་ཚད་འཕར་བ་དེས་ཆར་པའི་འབབ་ཚད་མང་པོ་ཆགས་ཡོད་ཀྱང་། ཆར་དུས་ཀྱི་དུས་ཚིགས་ལ་འགྱུར་ལྡོག་བྱུང་སྟེ་སྔོན་དཔག་བྱ་མི་ཐུབ་པ་ཆགས་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
