ཧྥ་རན་སིའི་སྲིད་འཛིན་མེག་ཁོ་རོན་ལགས་རྒྱ་ནག་ནང་སྐོར་སྐྱོད་གནང་བཞིན་འདུག

རྒྱལ་སྤྱིའི་བོད་དོན་ལས་འགུལ་ཁང་གིས་ཧྥ་རན་སིའི་སྲིད་འཛིན་གྱིས་རྒྱ་ནག་དང་ལྷན་དུ་བོད་དོན་གླེང་སློང་དགོས་པའི་འབོད་སྐུལ་ཞུས་འདུག

Chinese President Xi Jinping and French President Emmanuel Macron have tea by the water, enjoying the view and discussing the past and present, at the Pine Garden in Guangzhou, south China’s Guangdong Province, April 7, 2023.

ཁ་སང་ཕྱི་ཚེས་ ༣ ནས་ ༥ བར་ཉིན་གྲངས་གསུམ་གྱི་རིང་ཧྥ་རན་སིའི་སྲིད་འཛིན་མེག་ཁོ་རོན་ (Emmanuel Macron) ལགས་རྒྱ་ནག་ནང་སྐོར་སྐྱོད་གནང་བཞིན་ཡོད་པ་དང་། རྒྱ་ནག་དང་ལྷན་དུ་ཚོང་འབྲེལ་ཡར་རྒྱས་གཏོང་ཕྱོགས་དང་། ཨུ་རུ་སུ་དང་ཡུ་ཁུ་རེན་བར་གྱི་དམག་འཁྲུག་སྐོར་གླེང་སློང་བྱེད་མུས་ཡིན་འདུག

རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་བསྟན་ཆོས་རྒྱ་མཚོ་ལགས་ཀྱིས། རང་དབང་ཅན་གྱི་རྒྱལ་ཁབ་ཁག་གི་མགོ་ཁྲིད་ཚོས་དུས་ཡུན་རིང་པོར་དྲག་གནོན་འོག་ཚུད་པའི་མི་མང་གི་ཆེད་དུ་སྐད་ཆ་བཤད་རྒྱུའི་འགན་འཁུར་བླངས་ཡོད་པ་ལྟར། སྲིད་འཛིན་མེག་ཁོ་རོན་ལགས་ཀྱིས་འགན་འཁུར་དེ་བཞེས་ཏེ་རྒྱ་ནག་གི་མགོ་ཁྲིད་ཞི་ཅིན་ཕིན་དང་ལྷན་དུ་བོད་ཀྱི་གནས་སྟངས་དང་། ཁྲིམས་འགལ་གྱིས་བཙོན་འཇུག་བྱས་པའི་བོད་མི་རྣམས་ཀྱི་གནས་སྟངས་ཐད་འདྲི་བརྩད་བྱེད་དགོས་པ་མ་ཟད། ༸གོང་ས་མཆོག་དང་ཁོང་གི་སྐུ་ཚབ་དང་ལྷན་དུ་གྲོས་མོལ་བསྐྱར་གསོ་བྱ་རྒྱུར་སྐུལ་མ་གཏོང་དགོས་པའི་འབོད་སྐུལ་ཞུ་ཡི་ཡོད། ཅེས་བརྗོད་འདུག

ཁ་སང་ཕྱི་ཚེས་ ༣ ཉིན་གྱི་ཕྱི་དྲོར་ཧྥ་རན་སིའི་སྲིད་འཛིན་མེག་ཁོ་རོན་ལགས་རྒྱ་ནག་གི་རྒྱལ་ས་པེ་ཅིན་དུ་འབྱོར་ཡོད་འདུག་ལ། ཉེ་བའི་ཆར་ཡུ་རོབ་མཐུན་ཚོགས་དང་རྒྱ་ནག་བར་གྱི་ཚོང་འབྲེལ་ཐད་དཀའ་ངལ་ཤུགས་ཆེན་འཕྲད་ཀྱི་ཡོད་པར་བརྟེན། ཐེངས་འདིའི་སྐོར་སྐྱོད་བྱས་པ་བརྒྱུད་རྒྱལ་ཁབ་གཉིས་ཀྱི་ཚོང་འབྲེལ་ཡར་རྒྱས་གཏོང་རྒྱུ་དང་། ཨུ་རུ་སུ་དང་ཡུ་ཁུ་རེན་བར་གྱི་དམག་འཁྲུག་མཚམས་འཇོག་ཡོང་རྒྱུའི་ཐད་གླེང་སློང་བྱེད་བཞིན་འདུག

French President Emmanuel Macron meets with Chinese President Xi Jinping in 2022.

དེ་འབྲེལ་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ལིན་ཅེན་ (Lin Jian) གྱིས། རྒྱ་ནག་གཞུང་གིས་རྒྱལ་ཁབ་གཉིས་བར་གྱི་འབྲེལ་ལམ་ཡར་རྒྱས་གཏོང་རྒྱུ་དང་། མཉམ་ལས་གཏིང་ཟབ་ཏུ་གཏོང་རྒྱུ། རྒྱ་ནག་དང་ཡུ་རོབ་བར་གྱི་འབྲེལ་བ་སྲ་བརྟན་དང་ཡར་རྒྱས་གཏོང་ཐུབ་པའི་རེ་བ་བྱེད་ཀྱི་ཡོད་སྐོར་སོགས་བརྗོད་འདུག

རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་མཐུན་ཚོགས་ཀྱི་སྲིད་ཇུས་འགན་འཛིན་ཝིན་སེན་ཊི་ (Vinent Metten) ལགས་ཀྱིས། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་། ཆབ་སྲིད་ཀྱི་ཛ་དྲག་གི་གནས་སྟངས་ཇེ་ཆེར་འགྲོ་བཞིན་ཡོད་པར་བརྟེན། སྲིད་འཛིན་མེག་ཁོ་རོན་ལགས་ཀྱི་འཚམས་གཟིགས་འདི་ནི་བོད་ལ་མཚོན་ན་གནད་འགག་ཆེན་པོ་ཆགས་ཀྱི་ཡོད། ཧྥ་རན་སི་རྒྱལ་ཁབ་ནི་ཡུ་རོབ་མཐུན་ཚོགས་ཀྱི་སྣེ་ཁྲིད་རྒྱལ་ཁབ་ཅིག་ཡིན་པའི་ཆ་ནས། སྲིད་འཛིན་གྱི་རྒྱ་ནག་གི་སྐོར་སྐྱོད་ཁྲོད། རྒྱ་ནག་གི་འགྲོ་བ་མིའི་ཐོབ་ཐང་དང་ཁྲིམས་ལུགས་དབང་སྒྱུར་ནི་ཆེས་གནད་འགག་ཆགས་ཀྱི་ཡོད་པ་གསལ་སྟོན་བྱ་རྒྱུའི་འགན་དམིགས་བསལ་ཡོད་པ་རེད། ཅེས་གསུངས་འདུག

རྒྱལ་སྤྱིའི་བོད་དོན་ལས་འགུལ་ཁང་གིས། ཧྥ་རན་སིའི་སྲིད་འཛིན་གྱིས་རྒྱ་ནག་དང་ལྷན་དུ་བོད་ནང་གི་གནས་སྟངས་དང་། བོད་ཀྱི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་གི་ཡོད་པའི་ཐད་གླེང་སློང་དགོས་པ་དང་། རྒྱ་ནག་གི་དཔོན་རིགས་ཀྱིས་༸གོང་ས་རྒྱལ་བ་རིན་པོ་ཆེ་མཆོག་དང་ཁོང་གི་སྐུ་ཚབ་དང་ལྷན་དུ་གྲོས་མོལ་བསྐྱར་གསོ་དགོས་པ། ཐེངས་འདིའི་ཧྥ་རན་སིའི་སྲིད་འཛིན་གྱི་སྐོར་སྐྱོད་ཁྲོད། ཁྲིན་ཏུའུ་དང་ཟི་ཁྲོན་སོགས་བོད་ཀྱི་ས་གནས་ཁག་ཏུ་སྐོར་སྐྱོད་གནང་གི་ཡོད་པར་བརྟེན། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་མུས་ཡིན་པ་དང་། རྒྱ་གཞུང་གིས་བཙན་གྱིས་བོད་ཕྲུག་རྣམས་བཅའ་སྡོད་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤྲོད་ཀྱི་ཡོད་པ་སོགས་ལ་བརྟེན་ནས་བོད་ཀྱི་རིག་གཞུང་དང་ངོ་བོ་རྩ་མེད་གཏོང་ཐབས་བྱེད་བཞིན་ཡོད་པ་ཐེར་འདོན་གནང་དགོས་པའི་འབོད་སྐུལ་ཞུས་འདུག

ལས་འགུལ་ཁང་གིས། འདི་ལོའི་ཕྱི་ཟླ་ ༧ ཚེས་ ༣༡ ཉིན་རྒྱ་ནག་གཞུང་གིས་བོད་ནང་གི་གནས་སྟངས་དང་བོད་མིའི་ཐོབ་ཐང་ཐད་བསམ་ཚུལ་བཤད་པའི་རྐྱེན་གྱིས་འཛིན་བཟུང་བྱས་པའི་རྒྱ་རིགས་སློབ་མ་ཀྲང་ཡ་ཏི་ (Zhang Yadi) གང་མགྱོགས་ཀློད་གྲོལ་དགོས་པ་དང་། ཁོང་མོ་བཀག་ཉར་བྱས་པ་དེས་གཞི་རྩའི་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་བཏང་ཡོད་པར་བརྟེན། སྲིད་འཛིན་མེག་ཁོ་རོན་ལགས་ཀྱིས་གནད་དོན་དེ་གླེང་སློང་བྱས་ཏེ། ཁྲིམས་མཐུན་དང་འགྲོ་བ་མིའི་ཐོབ་ཐང་སྲུང་སྐྱོབ་དགོས་པའི་འབོད་སྐུལ་ཞུས་འདུག

གསར་འགོད་པ། བསྟན་འཛིན་ཕུར་བུ།