རྒྱལ་སྤྱིའི་རྒྱལ་བ་ཚངས་དབྱངས་རྒྱ་མཚོའི་ཞིབ་འཇུག་ཚོགས་འདུ་ཐེངས་དང་པོ་མཇུག་སྒྲིལ་བའི་མཛད་སྒོའི་ཐོག་ཏཱ་ལའི་བླ་མ་དྲུག་པ་དང་བཅུ་བཞི་པ་གཉིས་ནི་ངོ་བོ་གཅིག་པ་ཡིན་ལ། ང་ཚོ་མོན་པ་རྣམས་ཏཱ་ལའི་བླ་མ་གཉིས་ཀ་དང་འབྲེལ་བ་ཡོད་པས་ཧ་ཅང་སྐལ་བ་བཟང་པོ་ཡིན་པ་རྟོགས་ཡོད་སོགས་གསུངས་སོང་།
དེ་རིང་ཕྱི་ཟླ་ ༡༢ ཚེས་ ༦ ཉིན་མོན་རྟ་དབང་ཀ་ལ་དབང་པོ་ཚོགས་ཁང་དུ། ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་དང་། དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་མཆོག་དབུ་བཞུགས་ཐོག རྒྱལ་སྤྱིའི་རྒྱལ་བ་ཚངས་དབྱངས་རྒྱ་མཚོའི་ཞིབ་འཇུག་ཚོགས་འདུའི་མཇུག་སྡོམ་མཛད་སྒོ་འཚོགས་སོང་ལ། ད་ལན་གྱི་ཞིབ་འཇུག་ཚོགས་འདུ་འདི་ནི་༸གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ལ་ཕེབས་པའི་དགའ་སྟོན་གྱི་ཆ་ཤས་ཤིག་དང་། མོན་པ་རྣམས་ཀྱིས་ཕུལ་བའི་ལེགས་སྐྱེས་རྨད་དུ་བྱུང་བ་ཞིག་ཡིན་སྐོར་སོགས་གསུངས་སོང་།
ཨ་རུ་ན་ཅལ་མངའ་སྡེའི་ཆོས་རིག་བློན་ཆེན་ལས་ཁུངས་ཀྱི་ངེས་སྟོན་པ་ཐུབ་བསྟན་སྐལ་ལྡན་ལགས་ཀྱིས་མཇུག་སྡོམ་མཛད་སྒོའི་ཐོག དེ་རིང་འདིར་ང་རང་སྤོབས་པ་དང་དགའ་སྤྲོ་ཆེན་པོས་ལངས་ནས་ཡོད། རྒྱུ་མཚན་ནི་ཐུབ་བསྟན་བཤད་སྒྲུབ་གླིང་ཐེབས་རྩ་ཁང་དུ་རྒྱལ་བ་ཚངས་དབྱངས་རྒྱ་མཚོའི་རིག་གཞུང་དང་ལོ་རྒྱུས་ཀྱི་གལ་ཆེའི་རང་བཞིན་སྐོར་གྱི་རྒྱལ་སྤྱིའི་ཚོགས་འདུ་ཐེངས་དང་པོའི་ཉིན་གཉིས་ཀྱི་ཚོགས་འདུ་མཇུག་བསྒྲིལ་བས། ང་ཚོ་མོན་པ་རྣམས་ལ་སྤོབས་པ་དང་དགའ་སྤྲོ་སྐྱེ་བའི་རྒྱུ་མཚན་ཞིག་ཡོད་པ་ནི། མཁས་དབང་དེ་དག་ལས་ང་ཚོས་ཤེས་རྟོགས་བྱུང་བ་ལྟར་ན། མོན་པ་ཏཱ་ལའི་བླ་མ་དྲུག་པ་རིག་འཛིན་ཚངས་དབྱངས་རྒྱ་མཚོ་མཆོག་གིས་མདོ་སྔགས་གཉིས་ཀའི་ནང་ནས་ནང་པའི་ལྟ་གྲུབ་ཀྱི་གཞུང་མང་པོ་བརྩམས་ཡོད་པ་མ་ཟད། གསོལ་འདེབས་གལ་ཆེན་མང་པོ་ཡང་མཛད་ཡོད། ཁོང་གི་གསུང་རྩོམ་ཁག་ཅིག་ནི་ད་ལྟའང་རྒྱ་གར་ལྷོ་ཕྱོགས་ཀྱི་སེ་ར་དང་། འབྲས་སྤུངས། དགའ་ལྡན་སོགས་ཀྱི་དགོན་སྡེ་ཆེན་པོ་ཁག་ཏུ་མཇལ་རྒྱུ་འདུག མགུར་གླུའམ་ཆོས་གླུ་ནི་བརྗོད་པའི་ནུས་པ་ལས་འདས་པ་ཞིག་རེད། དེ་ནི་ཧ་ཅང་ངོ་མཚར་ཆེན་པོ་རེད། འོན་ཀྱང་། གལ་ཆེ་ཤོས་ནི་ཏཱ་ལའི་བླ་མ་དྲུག་པ་དང་བཅུ་བཞི་པ་གཉིས་ནི་ངོ་བོ་གཅིག་པ་ཡིན་པས། ད་ལྟ་ང་ཚོ་མོན་པ་རྣམས་ཏཱ་ལའི་བླ་མ་གཉིས་ཀ་དང་འབྲེལ་བ་ཡོད་པས་ཧ་ཅང་སྐལ་བ་བཟང་པོ་ཡིན་པ་རྟོགས་ཡོད། ཅེས་གསུངས་སོང་།
ཡང་ཁོང་གིས། ཚོགས་འདུ་འདིའི་དམིགས་ཡུལ་གཙོ་བོ་ནི་གཞོན་སྐྱེས་རྣམས་ལ་དགའ་ལྡན་ཕོ་བྲང་སྐོར་གོ་རྟོགས་སྤེལ་བ་དང་། ལྷག་པར་དུ་ཏཱ་ལའི་བླ་མ་སྐུ་ཕྲེང་དྲུག་པ་བརྒྱུད་ནས་ཏཱ་ལའི་བླ་མ་དང་འབྲེལ་བ་དམ་ཟབ་བཟོ་རྒྱུ་དེ་ཡིན། དེ་ལྟར་བྱས་ན་ད་ལྟའི་འཛམ་གླིང་ལ་ཏཱ་ལའི་བླ་མ་སྐུ་ཕྲེང་བཅུ་བཞི་པ་གལ་ཆེན་པོ་ཡིན་པ་ཤེས་ཐུབ་པ་མ་ཟད། མ་འོངས་པར་སྐུའི་ཡང་སྲིད་ཀྱི་དོན་སྙིང་རྟོགས་ཐུབ། འདི་ལོར་ཏཱ་ལའི་བླ་མ་སྐུ་ཕྲེང་བཅུ་བཞི་པ་ཆེན་པོ་དགུང་གྲངས་དགུ་བཅུའི་འཁྲུངས་སྐར་གྱི་དུས་ཆེན་སྲུང་བརྩི་བྱེད་བཞིན་ཡོད་པ་དེ་བརྗེད་མི་རུང་། དེར་བརྟེན། དུས་ཆེན་འདིའི་ཆ་ཤས་སུ་ང་ཚོ་ཚང་མས་ཐོག་མར་ཏཱ་ལའི་བླ་མའི་ཐུགས་སྐྱེད་དམ་བཅའ་བཞི་དྲན་གསོ་བྱས་ཏེ། དེ་ནས་དམ་བཅའ་བཞི་པོ་དེ་ང་ཚོའི་ཉིན་རེའི་འཚོ་བའི་ནང་རང་ཉིད་ཀྱི་དམ་བཅའ་ལྟར་ལག་བསྟར་བྱ་རྒྱུར་དམ་བཅའ་འཇོག་དགོས། དེ་ནི་ང་ཚོའི་བླ་མ་དང་བརྩི་བཀུར་ཞུ་ཡུལ་༸རྒྱལ་བ་བསྟན་འཛིན་རྒྱ་མཚོ་ལ་གུས་འདུད་ཞུ་བའི་ཐབས་ལམ་ཆེས་འོས་ཤོས་དེ་ཡིན། ཅེས་གསུངས་སོང་།
དེའི་རྗེས་ཧར་བར་གཙུག་ལག་སློབ་གཉེར་ཁང་གི་ནང་དོན་རིག་པའི་དགེ་རྒན་ཆེན་མོ་ཇེ་ནེཊ་རྒྱ་མཚོ་ལགས་དང་། སྐུ་བཅར་རྣམ་རྒྱལ་གྲྭ་ཚང་གི་སློབ་སྤྱི་དགེ་བཤེས་ཐུབ་བསྟན་ཡར་འཕེལ་ལགས་གཉིས་ཀྱིས་དབྱིན་བོད་གཉིས་ཀྱི་ནང་ཚོགས་འདུ་འདིའི་དབྱིན་བོད་གཉིས་ཀྱི་རྩོམ་ཤོག་ཀློག་འདོན་གནང་བའི་ཁྲོད། བགྲོ་གླེང་འདིར་གསུང་བཤད་པ་ཞལ་གྲངས་ ༢༦ ཡོད་པ་ནས་དབྱིན་སྐད་ཐོག་གསུང་བཤད་གནང་མཁན་ཞལ་གྲངས་ ༡༡ དང༌། བོད་སྐད་ཐོག་གསུང་བཤད་གནང་མཁན་ཞལ་གྲངས་ ༡༥ ཡོད་པ་ལས། བོད་སྐད་ཐོག་ནས་རྣམ་ཐར་སྐོར་ལ་གསུང་བཤད་གནང་མཁན་ཞལ་གྲངས་ ༦ དང༌། གསུང་རྩོམ་ཐོག་གསུང་བཤད་གནང་མཁན་ཞལ་གྲངས་ ༤ ། མགུར་གླུའི་ཐོག་གསུང་བཤད་གནང་མཁན་ཞལ་གྲངས་ ༥ ཡོད་པ་བརྗོད་གཞི་རིགས་གསུམ་ལ་དབྱེ་འདུག ཅེས་གསུངས་ནས། ད་ལན་རྒྱལ་སྤྱིའི་རྒྱལ་བ་ཚངས་དབྱངས་རྒྱ་མཚོའི་ཞིབ་འཇུག་ཚོགས་འདུའི་ཚོགས་བཅར་བ་རྣམས་ཀྱི་རྩོམ་ཤོག་རྣམས་ངོ་སྤྲོད་གནང་སོང་།
ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས། རྒྱ་གར་དང་ཕྱི་རྒྱལ་གྱི་མཁས་པ་ཚོ་ཚོགས་འདུ་འདིར་ཕེབས་པ་དང་། རིག་གནས་འདྲ་མིན་བར་གྱི་བགྲོ་གླེང་བརྒྱུད་ནས། ང་ཚོས་རྒྱལ་བ་དྲུག་པ་མཆོག་གི་ཆོས་ཕྱོགས་དང་། རིག་གཞུང་། རྩོམ་རིག ལོ་རྒྱུས་བཅས་ཀྱི་ཤུལ་བཞག་རྗེས་སུ་འབྲངས་ཐབས་བྱས་ཡོད། ང་ཚོས་ཁོང་གི་མགུར་གླུ་དང་། ཧི་མ་ལ་ཡའི་ས་ཁུལ་གྱི་མི་མང་གི་སེམས་ནང་ད་དུང་ཡང་ཁོང་གི་མི་ཚེ་དང་གསུང་ལ་བརྟེན་ནས་སེམས་ཤུགས་འཕེལ་བཞིན་པ་བཅས་ཀྱི་ཐོག་ནས། ཤུལ་བཞག་འདི་ནི་འདས་པའི་དངོས་པོ་ཞིག་མིན་པར་བསྐྱར་དུ་ངོས་འཛིན་བྱས་ཡོད། ཅེས་གསུངས་སོང་།
ཡང་བློན་ཆེན་མཆོག་གིས། ང་ཚོས་མཛེས་སྡུག་ལྡན་པའི་ཚོགས་འདུ་འདི་མཇུག་སྒྲིལ་བཞིན་པ་དང་། ལྷག་པར་དུ་ངའི་ས་གནས་ཀྱི་གྲོགས་པོ་ཚོར་ཚོགས་འདུ་འདི་ལས་བྱུང་བའི་ཤེས་རྟོགས་དང་། བགྲོ་གླེང་། སེམས་ཤུགས་བཅས་ང་ཚོའི་གྲོང་གསེབ་དང་། སློབ་ཁང་། ཁྱིམ་ཚང་བཅས་སུ་འཁྱེར་ནས་འགྲོ་རྒྱུར་སྐུལ་མ་ཞུ་རྒྱུ་ཡིན། བྱེད་སྒོ་འདིས་ང་ཚོའི་འདས་པའི་དོན་དག་ལ་གུས་བརྩི་བྱེད་པ་དང་། ང་ཚོའི་ཤུལ་བཞག་ལ་རྩ་བ་བརྟན་པོ་ཚུགས་པའི་མ་འོངས་པ་ཞིག་བསྐྲུན་རྒྱུའི་ཆོད་སེམས་གསར་པ་ཞིག་མཚོན་བྱེད་ཡིན་པར་ཤོག ཅེས་དང་། རྒྱང་ཐག་རིང་པོ་ནས་ཚོགས་འདུ་འདིར་མཉམ་ཞུགས་བྱེད་མཁན་གྱི་སྐུ་མགྲོན་རེ་རེར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། རྟ་དབང་དུ་བཞུགས་མཁན་གྱི་སྐུ་མགྲོན་ཚོར་རྟ་དབང་ཁུལ་དུ་བདེ་སྐྱིད་ལྡན་པའི་བཞུགས་གནས་དང་བདེ་འཇགས་ངང་ཕེབས་སྐྱེལ་ཞུ་རྒྱུ་ཡིན། ཞེས་གསུངས་སོང་།
གོ་སྒྲིག་ཚོགས་ཆུང་གི་ཚོགས་གཙོ་སྤྲུལ་སྐུ་བསྟན་འཛིན་འགྱུར་མེད་རིན་པོ་ཆེ་མཆོག་གིས་མཇུག་སྡོམ་གསུང་བཤད་གནང་སྐབས། ལོ་གཅིག་ལྷག་གི་སྔོན་ངས་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་དང་བཀའ་མོལ་ཐོག་མར་འབྱུང་སྐབས། ངས་རང་ཉིད་ཁྱེད་ཚོའི་མདུན་དུ་ལངས་ནས་མཇུག་སྡོམ་གྱི་གཏམ་བཤད་བྱེད་པར་བསམ་བློ་བཏང་མེད། འདིར་སླེབས་པར་ལས་ཀ་མང་པོ་བྱས་ཡོད་ལ། ང་གཅིག་པུ་མ་ཡིན་པར་མི་མང་པོས་བྱས་ཡོད། འོན་ཀྱང་ངས་ཐེ་ཚོམ་མེད་པར་བཤད་ཐུབ་པ་ཞིག་ལ་དེ་ནི་རིན་ཐང་ལྡན་པ་ཞིག་རེད། ཉིན་འདི་དག་ནི་ང་དང་དེ་བཞིན་དུ་རྟ་དབང་ལ་མཚོན་ན་དམིགས་བསལ་གྱི་དོན་ཆེན་ཞིག་རེད། གལ་ཆེ་བ་ཞིག་ལ་ངས་ཁྱེད་ཚོ་ཚང་མར་ཡང་དེ་བཞིན་དུ་དམིགས་བསལ་ཅན་ཞིག་བྱུང་ཡོད་པར་རེ་བ་རྒྱག་གི་ཡོད། གཏམ་བཤད་འདི་འདྲའི་ནང་དུ་རྒྱུན་དུ་ཚིག་རྒྱན་སྣ་ཚོགས་བེད་སྤྱོད་བྱེད་ཀྱི་ཡོད་ཀྱང་། ངས་འུད་བརྗོད་མེད་པར་བཤད་ཐུབ་པ་ཞིག་ལ་འདི་ནི་དངོས་གནས་ལོ་རྒྱུས་ཀྱི་དོན་ཆེན་ཞིག་རེད། འདི་འདྲའི་ཚོགས་འདུ་ཐོག་མ་དེ་ཡིན་པ་དང་། དེ་ནི་ཧ་ཅང་ལེགས་གྲུབ་བྱུང་བ་ཞིག་རེད། སྔོན་ཆད་རྒྱལ་ཁབ་དང་། རིག་གཞུང་། སྒྲིག་འཛུགས། སློབ་གྲྭ་སྣ་ཚོགས་ནས་ཡོང་བའི་མཁས་པ་འདི་འདྲ་མང་པོ་ཞིག་མཉམ་དུ་འཛོམས་ནས་རྒྱལ་བ་ཚངས་དབྱངས་རྒྱ་མཚོའི་སྐོར་ལ་སློབ་སྦྱོང་དང་དཔྱད་ཞིབ་བྱས་མེད། ང་ཚོས་དེ་ཁོང་གི་འཁྲུངས་ཡུལ་དུ་གོ་སྒྲིག་བྱེད་ཐུབ་པ་དེ་ནི་དེ་བས་ཀྱང་ངོ་མཚར་ཆེ་བ་ཞིག་རེད། ཅེས་གསུངས་སོང་།
རིན་པོ་ཆེ་མཆོག་ནས་ཚོགས་འདུ་འདི་ནི་༸གོང་ས་སྐྱབས་མགོན་ཆེན་པོ་མཆོག་དགུང་གྲངས་ ༩༠ ལ་ཕེབས་པའི་དགའ་སྟོན་གྱི་ཆ་ཤས་ཤིག་ཡིན་པ་དང་། ངས་དངོས་གནས་འདི་ནི་ང་ཚོས་ཕུལ་བའི་ལེགས་སྐྱེས་རྨད་དུ་བྱུང་བ་ཞིག་ཡིན་པར་ཚོར་གྱི་ཡོད། བཀའ་སློབ་ནང་གསལ་པོར་གསུངས་པ་ལྟར་རང་གི་བླ་མ་དམ་པ་ལ་མཆོད་པ་འབུལ་བའི་ཐབས་ལམ་ཡག་ཤོས་ནི་ཉམས་ལེན་བྱ་རྒྱུ་དེ་ཡིན་པ་དང་། ངས་ཚོགས་འདུ་འདི་ནི་མཆོད་པ་ཟབ་མོ་དང་གལ་ཆེན་ཞིག་ཡིན་པར་ཡིད་ཆེས་བྱེད་ཀྱི་ཡོད། ཚོགས་འདུ་འདི་གོ་སྒྲིག་དང་། གཙོ་སྐྱོང་། མཉམ་ཞུགས་བྱས་པའི་དགེ་བའི་རྩ་བ་གང་ཡོད་པ་དེས་ཚོགས་བཅར་བ་དང་སྦྱིན་བདག་ཚང་མ་ལ་མཁས་པའི་བློ་གྲོས་དང་སྤྲོ་སྣང་རྒྱུན་མི་ཆད་པར་འབྱུང་བར་ཤོག ཅེས་རྒྱལ་སྤྱིའི་རང་བཞིན་ཚོགས་འདུ་འདི་ལེགས་པར་གྲུབ་སོང་།
སང་ཉིན་ནས་ཐེངས་འདིའི་ཚོགས་ཆེན་ཐོག་བཅར་བའི་ཆེད་མཁས་པ་དང་ཉམས་ཞིབ་པ་རྣམ་པ་འཕགས་བོད་མཐའ་མཚམས་ཁུལ་དུ་ཡུལ་སྐོར་དང་གནས་གཟིགས་སུ་ཕེབས་རྒྱུ་ཡིན་འདུག
གསར་འགོད་པ་དཔལ་ལྡན་གྱིས་མོན་རྟ་དབང་ནས་སྤེལ། རྩོམ་སྒྲིག་བྱེད་མཁན། པདྨ་མཚོ།
