བོད་མཚོ་སྔོན་ཞིང་ཆེན་མགོ་ལོག་ཁུལ་གཅིག་སྒྲིལ་རྫོང་སྨིན་ཐང་དགོན་འོད་གསལ་ཐེག་མཆོག་ཆོས་འཁོར་གླིང་གི་དགོན་བདག་དང་། རྡོ་རྗེ་བརྟན་མི་རིགས་ལས་རིགས་ལག་རྩལ་སློབ་གྲྭ་གསར་འཛུགས་གནང་མཁན་མཆོག་སྤྲུལ་རྡོ་རྗེ་བརྟན་མཆོག་རྒྱ་གཞུང་གིས་རྒྱུ་རྐྱེན་གང་ཡང་མི་ཤེས་པའི་ཐོག་ནས་འཛིན་བཟུང་བྱས་ཏེ་ད་ལྟའི་ཆར་གར་སོང་ཆ་མེད་དུ་གྱུར་ཡོད་འདུག
ཟླ་འདིའི་ཕྱི་ཚེས་ ༤ ཉིན་བོད་མཚོ་སྔོན་ཞིང་ཆེན་མགོ་ལོག་ཁུལ་གཅིག་སྒྲིལ་རྫོང་སྨིན་ཐང་དགོན་འོད་གསལ་ཐེག་མཆོག་ཆོས་འཁོར་གླིང་གི་དགོན་བདག་དང་། རྡོ་རྗེ་བརྟན་མི་རིགས་ལས་རིག་ལག་རྩལ་སློབ་གྲྭ་གསར་འཛུགས་གནང་མཁན་མཆོག་སྤྲུལ་རྡོ་རྗེ་བརྟན་ལགས་རྒྱ་གཞུང་གིས་རྒྱུ་རྐྱེན་གང་ཡང་མི་ཤེས་པའི་ཐོག་ནས་འཛིན་བཟུང་བྱས་ཏེ་ད་ལྟའི་ཆར་གར་སོང་ཆ་མེད་དུ་གྱུར་ཡོད་འདུག
དེའི་སྐོར་ལ་འབྲེལ་ཡོད་བོད་མི་ཞིག་གིས་འདི་གའི་གསར་འགོད་པར་བརྗོད་ཚུལ་ལྟར་ན། ཕྱི་ཟླ་ ༡༢ ཚེས་ ༤ ཉིན་རིན་པོ་ཆེ་མཆོག་སྨིན་ཐང་དགོན་ནས་རང་ཁྱིམ་དུ་འགྲོ་བཞིན་པའི་ལམ་བར་དུ་རྒྱ་གཞུང་གིས་འཛིན་བཟུང་བྱས་ཡོད་ཅིང་། འཛིན་བཟུང་བྱེད་མཁན་རྒྱ་གཞུང་གི་ཉེན་རྟོག་པ་དང་གསང་བའི་ལས་ཁུངས་གང་ཡིན་མིན་ཤེས་ཀྱི་མི་འདུག ཉིན་དེ་ནས་བཟུང་རིན་པོ་ཆེ་མཆོག་གར་སོང་ཆ་མེད་དུ་གྱུར་ཏེ་གནས་ཚུལ་གང་ཡང་ཤེས་རྟོགས་བྱུང་མི་འདུག ཅེས་འགྲེལ་བརྗོད་གནང་བྱུང་།
ཡང་ཁོང་གིས། གཙོ་བོ་རིན་པོ་ཆེ་མཆོག་གིས་བཙུགས་པའི་རྡོ་རྗེ་བརྟན་ལས་རིགས་ལག་རྩལ་སློབ་གྲྭ་སྒོ་བརྒྱབ་སྟེ། སློབ་གྲྭའི་སློབ་མ་ཚོར་རང་ཁྱིམ་དུ་ལོག་བཅུག་འདུག ཡིན་ནའང་། རིན་པོ་ཆེ་མཆོག་ལ་ནག་ཉེས་གང་ཡོད་ཀྱི་རྒྱུ་མཚན་གང་ཡང་བཤད་མི་འདུག རྒྱ་ནག་གཞུང་གིས་སྒེར་བཙུགས་སློབ་གྲྭ་ཚང་མ་སྒོ་རྒྱག་བཞིན་ཡོད་པ་དང་། རྡོ་རྗེ་བརྟན་ལས་རིགས་ལག་རྩལ་སློབ་གྲྭའི་ནང་སློབ་ཕྲུག་བཞི་བརྒྱ་ལྷག་ཡོད་པ་མ་ཟད། དེའི་ཁྲོད་གྲྭ་པ་ཆུང་ཆུང་མང་པོའི་སློབ་སྦྱོང་བྱེད་བཞིན་ཡོད་པས། གནད་དོན་དེའི་རྐྱེན་གྱིས་རིན་པོ་ཆེ་མཆོག་འཛིན་བཟུང་བྱས་པ་རེད་བསམ་གྱི་ཡོད་པ་རེད། ཅེས་འགྲེལ་བརྗོད་གནང་བྱུང་།
མཆོག་སྤྲུལ་རྡོ་རྗེ་བརྟན་ནམ་མཆོག་སྤྲུལ་ཐུབ་བསྟན་ཡེ་ཤེས་ཉི་མ་མཆོག་ནི་ཕྱི་ལོ་ ༡༩༦༧ ལོའི་བོད་ཟླ་ ༡༠ ཚེས་ ༢༥ ཉིན་ཨ་སྐྱོང་ཁང་སར་སྨིན་ཐང་དུ་སྐུ་འཁྲུངས། ༧ཆོས་རྗེ་དམ་པ་ཡིད་བཞིན་ནོར་བུ་སོགས་དམ་པ་དུ་མའི་མདུན་ནས་མདོ་སྔགས་ཀྱི་གཞུང་ལ་ཐོས་བསམ་བླ་མེད་གནང་། གསེར་ལྗོངས་བླ་རུང་ལྔ་རིག་ནང་བསྟན་སློབ་གླིང་ནས་སྡོམ་བརྩོན་སྡེ་སྣོད་འཛིན་པའི་མཁན་པོའི་ལག་འཁྱེར་ཐོབ། གཞི་ཆེན་དབོན་སྤྲུལ་ཐུབ་བསྟན་ལུང་རྟོགས་རྒྱ་མཚོ་དང་། གཞི་ཆེན་བེེ་རོ་འཇམ་དབྱངས་བསྟན་པའི་རྒྱལ་མཚན་ཟུང་གིས་གཞི་ཆེན་མཆོག་སྤྲུལ་མགོ་སེར་མཁྱེན་རབ་རྒྱ་མཚོའི་ཡང་སྲིད་དུ་ངོས་འཛིན་མཛད་ཅིང་སྨིན་དགོན་སྨིན་ཐང་དགོན་འོད་གསལ་ཐེག་མཆོག་གླིང་གི་དགོན་བདག་ཡིན།
ས་གནས་ཀྱི་སློབ་གསོའི་གནས་བབ་དང་རྒྱ་ཆེའི་མི་མང་གི་རེ་འདུན་བཞིན་ཁྲིམས་མཐུན་ལུགས་ཀྱི་སྒོ་ནས་སློབ་གྲྭ་ཆེ་འབྲིང་ཆུང་གསུམ་དང་། བཙུན་དགོན་སོགས་གསར་འཛུགས་དང་། དེ་དག་གི་མཐུན་རྐྱེན་དུ་མགྲོན་ཁང་དང་ཐེབས་རྩ་ཚོགས་པ་སོགས་བཙུགས། རིན་པོ་ཆེ་མཆོག་ནས་གཉན་པོ་གཡུ་རྩེའི་སློབ་ཆུང་གི་སློབ་གཙོ་དང་། མགོ་ལོག་གེ་སར་སྒྲུང་རབས་སྨིན་ཐང་ཡུལ་ཚོའི་བྱིས་པའི་མཉམ་ལེན་གྱི་ཚོགས་གཙོ། རྨ་གཡང་ལྷ་མཁར་ཕྱུག་མོའི་གེ་སར་རིག་གནས་རྒྱུད་སྤེལ་ལྟེ་གནས་ཀྱི་ཚོགས་གཙོ། གེ་སར་རིག་གནས་རྒྱུན་འཛིན་གཞི་ས་དང་གེ་སར་རིག་གནས་རྨ་གཡང་ཕྱུག་མོའི་བརྒྱུད་སྦྱོང་བྱེད་གནས་ཀྱི་མགོ་གཙོ། རྡོ་རྗེ་བརྟན་མི་རིགས་ལས་རིགས་ལག་རྩལ་སློབ་གྲྭའི་སློབ་གཙོ། ཇོ་མོའི་དགོན་སྐུ་གསུམ་མཁའ་འགྲོའི་འདུ་གླིང་གི་དགོན་བདག སྨིན་ཐང་དགོན་འོད་གསལ་ཐེག་མཆོག་གླིང་གི་དགོན་བདག། མཚོ་སྔོན་ཞིང་ཆེན་གཉན་པོ་གཡུ་རྩེ་དགེ་ལས་ཐེབས་རྩ་ཚོགས་པའི་ཚོགས་གཙོ། གཅིག་སྒྲིལ་རྫོང་སྲིད་གྲོས་ཀྱི་མགོ་གཙོ་གཞོན་པ་བཅས་ཀྱི་ཕྱག་ལས་གནང་ཡོད་འདུག
རྡོ་རྗེ་བརྟན་ལས་རིགས་ལག་རྩལ་སློབ་གྲྭ་ནི་ཕྱི་ལོ་ ༢༠༡༠ ལོར་རྒྱ་གཞུང་གིས་ཆོག་མཆན་ཐོབ་པ་ལྟར་མགོ་བཙུགས་ཡོད་ཅིང་། སློབ་གྲྭ་སྤྱིའི་རྒྱ་ཁྱོན་ལ་རྨི་གྲུ་བཞི་མ་ ༩༦༠༠༠ ཡོད་འདུག སློབ་གྲྭའི་ནང་དགེ་རྒན་ ༦༦ དང་། ད་བར་སློབ་མ་ ༡༣༠༠ མཐར་ཕྱིན་ཡོད་འདུག སློབ་གྲྭ་ནང་རྨང་གཞིའི་བསླབ་བྱའི་ནང་བོད་ཡིག་དང་། རྒྱ་ཡིག དབྱིན་ཡིག གྲངས་རིག ཆབ་སྲིད། བསམ་བློ་ཀུན་སྤྱོད། ལུས་རྩལ་སོགས་སློབ་སྦྱོང་དང་། ཆེད་ལས་བསླབ་བྱ་ཁྲོད་སྒྲ་རིག་དང་། ཐང་ག་སྒྱུ་རྩལ། བོད་ཀྱི་གསོ་བ་རིག་པ། གེ་སར་རིག་གནས་སྒྱུ་རྩལ། སྲོལ་རྒྱུན་གླུ་གར་ཆེད་སྦྱོང་། སྲོལ་རྒྱུན་འཚེམ་བཟོ། ཡུལ་སྐོར་དོ་དམ་ཞབས་འདེགས་བཅས་ཀྱི་ཐོག་ཆེད་སྦྱོང་བྱེད་བཞིན་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། བསྟན་འཛིན་ཕུར་བུ།
