བོད་མི་གཉིས་ཀྱིས་བྱམས་བརྩེའི་ལོ་སྲུང་གཙི་དང་རྒྱ་གར་གཞུང་མང་གཉིས་ལ་བཀའ་དྲིན་རྗེས་དྲན་ཞུ་བ། རྒྱ་གར་གྱིས་བོད་རང་བཙན་གཙང་མའི་རྒྱལ་ཁབ་ཅིག་ཡིན་པར་ངོས་འཛིན་ཡོང་ཐབས། དེ་བཞིན། རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་། སྐད་ཡིག་སོགས་རྩ་མེད་གཏོང་ཐབས་བྱེད་བཞིན་པ་སོགས་ཀྱི་སྐོར་རྒྱ་གར་རྒྱལ་ཡོངས་སུ་དྲིལ་བསྒྲགས་བྱེད་སླད་སྦག་སྦག་སྐོར་སྐྱོད་གནང་མགོ་བཙུགས་སོང་།
བོད་མི་གཉིས་ཀྱིས་རྒྱ་གར་རྒྱལ་ཡོངས་སུ་སྦག་སྦག་སྐོར་སྐྱོད་ཀྱི་ལས་འགུལ་སྤེལ་མགོ་བཙུགས། བོད་ཀྱི་དུས་བབ་ཀྱི་པར། ༢༠༢༥།༡༢།༡༠
དེ་རིང་༸གོང་ས་མཆོག་ལ་ནོ་སྦེལ་ཞི་བདེ་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༦ འཁོར་བ་དང་། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་བསྟུན། བཞུགས་སྒར་གྱི་དཔའ་བོའི་རྡོ་རིང་གི་མདུན་ནས་བོད་དོན་ལས་འགུལ་བ་འཇམ་དབྱངས་བསྟན་འཛིན་ལགས་དང་བློ་གྲོས་དཔལ་ལྡན་ལགས་རྣམ་གཉིས་ནས། ཟླ་གསུམ་རིང་རྒྱ་གར་རྒྱལ་ཡོངས་སུ་སྦག་སྦག་སྐོར་སྐྱོད་གནང་སྟེ་བོད་དོན་དྲིལ་བསྒྲགས་དང་འབྲེལ་བའི་ལས་འགུལ་སྤེལ་མགོ་བཙུགས་སོང་།
འདི་གའི་གསར་འགོད་པར་ལས་འགུལ་བ་གཉིས་ཀྱིས་འགྲེལ་བརྗོད་གནང་བ་ལྟར་ན། ཐེངས་འདིའི་ལས་འགུལ་དེ་ནི་རྒྱ་གར་རྒྱལ་ཡོངས་ཀྱི་མངའ་སྡེ་ ༢༡ དང་རང་སྐྱོང་ས་ཁུལ་ ༢ ནང་སྤེལ་འཆར་ཡོད་ཅིང་། འབྱུང་འགྱུར་ཕྱི་ཟླ་ ༣ ཚེས་ ༡༠ སྟེ་གསུམ་བཅུའི་དུས་དྲན་ཉིན་རྒྱ་གར་གྱི་རྒྱལ་ས་ལྡི་ལི་རུ་མཇུག་བསྡུ་འཆར་འདུག
ལས་འགུལ་གྱི་དམིགས་ཡུལ་སྐོར་ལ་ལས་འགུལ་བ་གཉིས་ཀྱིས། འདིའི་དམིགས་ཡུལ་གཙོ་བོ་ནི། ༸གོང་ས་མཆོག་གི་བྱམས་བརྩེའི་ལོ་སྲུང་བརྩི་ཞུ་རྒྱུ་དང༌། རྒྱ་གར་ལ་སྙིང་ཐག་པ་ནས་བཀའ་དྲིན་རྗེས་དྲན་ཞུ་བ། དགྲ་བོ་རྒྱ་དམར་སྲིད་གཞུང་གིས་བོད་ཀྱི་ངོ་བོ་རྩ་མེད་བཟོ་བའི་དྲག་གནོན་ལ་ངོ་རྒོལ། རྒྱ་གར་གཞུང་ནས་བོད་ནི་ལོ་རྒྱུས་ཐོག་རང་བཙན་གྱི་རྒྱལ་ཁབ་ཅིག་ཡིན་པར་ངོས་འཛིན་ཡོང་རྒྱུར་འབོད་སྐུལ་ཞུ་རྒྱུ་དེ་ཡིན། ལས་འགུལ་འདི་ནི་བདེན་པ་སྲུང་སྐྱོབ་དང༌། བོད་ཀྱི་ངོ་བོ་དང་རིག་གཞུང་སྲུང་སྐྱོབ། རྒྱ་བོད་གཉིས་ཀྱི་འབྲེལ་ལམ་སྔར་ལྷག་ཤུགས་ཆེར་གཏོང་རྒྱུའི་ལས་འགུལ་ཞིག་ཡིན། ཞེས་བརྗོད་བྱུང་།
ཐེངས་འདིའི་སྦག་སྦག་སྐོར་སྐྱོད་ཀྱི་ལས་འགུལ་ཁྲོད་བོད་མི་འཇམ་དབྱངས་བསྟན་འཛིན་ལགས་དང་བློ་གྲོས་དཔལ་ལྡན་ལགས་གཉིས་ཀྱིས། གསར་འགོད་བསྒྲགས་གཏམ་ཞིག་སྤེལ་ཡོད་པའི་ནང་། གཅིག བྱམས་བརྩེའི་ལོ་སྲུང་བརྩི། ཕྱི་ལོ་ ༢༠༢༥ ནི་༸གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་དགུང་གྲངས་ ༩༠ བདག་གིར་བཞེས་པར་བརྟེན། འཛམ་གླིང་ཡོངས་ལ་བྱམས་བརྩེའི་ལོ་ཞེས་དགའ་སྟོན་སྲུང་བརྩི་ཞུ་བཞིན་ཡོད། ༸གོང་ས་མཆོག་གི་སྙིང་རྗེ་དང༌། འཚེ་མེད་ཞི་བ། འཛམ་གླིང་གི་འགན་འཁུར་སོགས་རླབས་ཆེན་གྱི་བཀའ་སློབ་ནི་ཉག་ཕྲའི་དུས་སྐབས་འདིར་ལམ་སྟོན་གྱི་སྒྲོན་མེ་ལྟ་བུ་ཞིག་ཡིན། འཛམ་གླིང་ཡོངས་ནས་༸རྒྱལ་བ་རིན་པོ་ཆེ་སྐུ་ཚེ་རིང་པོ་བཞུགས་པའི་སྨོན་ལམ་དང་། འཛམ་གླིང་ཞི་བདེ། སྤྱི་ཚོགས་དང་མི་རིགས་འཕེལ་རྒྱས་ཀྱི་དོན་དུ་གནང་བའི་མཛད་རྗེས་ལ་བཀུར་སྟི་ཞུ་བཞིན་ཡོད།
གཉིས། རྒྱ་གར་ལ་བཀའ་དྲིན་རྗེས་དྲན། ཕྱི་ལོ་ ༡༩༥༩ ལོར་རྒྱ་ནག་གིས་བོད་ལ་དམག་འཐབ་དང་བཙན་འཛུལ་བྱས་རྗེས་བོད་མི་ཚོས་རྒྱ་གར་དུ་སྐྱབས་བཅོལ་ཞུས་པ་ནས་ད་བར་ལོ་དྲུག་ཅུ་ལྷག་འགོར་ཡོད། ལོ་ངོ་དེ་དག་གི་རིང་རྒྱ་གར་གྱིས་བོད་མི་ཆོར་བདེ་འཇགས་དང་བཀུར་སྟི། རང་དབང་སྤྲད་པ། བོད་མི་ཚོར་རང་གི་ཚོགས་པ་སྒྲིག་འཛུགས་བསྐྱར་འཛུགས་བྱེད་པའི་གོ་སྐབས་སྤྲད་པ། བོད་ཀྱི་རིག་གཞུང་། སྐད་ཡིག ཆོས་ལུགས། ངོ་བོ་བཅས་ཉར་ཚགས་ལ་རྒྱབ་སྐྱོར་གནང་བ། གནས་སྡོད་ས་ཆ་དང་། སློབ་གྲྭ། ཚོགས་སྡེ་སོགས་ཀྱི་དོན་དུ་ས་གནས་སྤྲད་པ། བོད་མི་ཚོར་བཙན་བྱོལ་དུ་མང་གཙོའི་འཛིན་སྐྱོང་འཛུགས་སྐྲུན་གནང་བའི་གོ་སྐབས་སྤྲད་པ། བོད་མི་སྤྱི་སྒེར་ཡོངས་ནས་རྒྱ་གར་གྱི་ཡུན་རིང་གཏོང་ཕོད་ཆེན་པོས་དང་རྒྱབ་སྐྱོར་བརྟན་པོ་གནང་བར་སྙིང་ཐག་པ་ནས་ཐུགས་རྗེ་ཆེ་དང་རྟག་ཏུ་བཀའ་དྲིན་རྗེས་དྲན་ཞུ་བཞིན་ཡོད།
གསུམ། རྒྱ་ནག་གིས་བོད་ཀྱི་ངོ་བོ་རིམ་པ་བཞིན་སུབ་པའི་སྐོར། བོད་ནང་དུ་རྒྱ་ནག་གིས་བོད་ཀྱི་ངོ་བོ་རྩ་མེད་བཟོ་བའི་དོན་དུ་དྲག་གནོན་དང་སྡུག་རྩུབ་ཅན་གྱི་སྲིད་བྱུས་སྤེལ་མུས་ཡིན་པས། བོད་མི་རྣམས་ཀྱིས་སེམས་ཚབས་བྱེད་དགོས་པའི་གནད་དོན་གཙོ་བོ་གཤམ་གསལ་འདི་དག་ཚུད་ཡོད། བོད་ཀྱི་བྱིས་པ་ས་ཡ་གཅིག་ལྷག་ཙམ་ལོ་བཞི་དང་ལྔ་ལས་མ་སོན་པའི་བྱིས་པ་རྣམས་རང་གི་ཕ་མ་དང་ཁ་བྲལ་དུ་བཏང་ནས་བཙན་ཁྲིད་ཀྱིས་ཆེད་འཛུགས་བྱས་པའི་གཅའ་སྡོད་སློབ་གྲྭའི་ནང་བཙན་འཇུག་བྱས་ཏེ། ཁོང་ཚོ་བཙན་ཤེད་ཀྱིས་རང་གི་ཁྱིམ་ཚང་དང༌། རིག་གཞུང༌། ཆོས་ལུགས། མ་སྐད་བཅས་ནས་ཁ་བྲལ་གཏོང་བཞིན་ཡོད། བོད་ཀྱི་སྐད་ཡིག་དང་། ཆོས་ལུགས། རིག་གཞུང་སློབ་གཉེར་བྱ་རྒྱུར་དཀའ་ངལ་ཆེན་པོ་བཟོ་བཞིན་ཡོད། ལྷག་པར་བཙན་ཤེད་ཀྱིས་བོད་མི་འདྲེས་སྦྱོར་དང་བོད་མིའི་ཉིན་རེའི་འཚོ་བར་དོ་དམ་སྟངས་འཛིན་བྱེད་པའི་སྲིད་བྱུས་ལ་འབད་བརྩོན་བྱེད་བཞིན་པ་འདི་དག་གིས་བོད་མི་རིགས་ཀྱི་ངོ་བོ་མཚོན་པའི་རིག་གཞུང་དང་རྒྱལ་ཁབ་ཅིག་ཏུ་གནས་སྡོད་བྱེད་པར་འཚོ་གནས་ཀྱི་ཉེན་ཁ་ཆེན་པོ་ཞིག་བཟོ་བཞིན་ཡོད།
བཞི་རྒྱ་གར་ལ་བོད་ཀྱི་ལོ་རྒྱུས་ཀྱི་གནས་བབ་ངོས་འཛིན་གནང་བར་འབོད་སྐུལ། ང་ཚོས་རྒྱ་གར་གཞུང་དང་རྒྱ་གར་མི་མང་ལ་བོད་ཀྱི་དོན་དངོས་ལོ་རྒྱུས་ཀྱི་བདེན་པ་ཡང་བསྐྱར་ངོས་འཛིན་གནང་བར་འབོད་སྐུལ་ཞུ་བཞིན་ཡོད། རྒྱ་གར་གྱི་ས་མཚམས་ནི་བོད་དང་མཉམ་འབྲེལ་ཡོད་པ་ལས་རྒྱ་ནག་དང་མཉམ་དུ་མིན་པ། ལོ་རྒྱུས་དང་རིག་གཞུང་གི་ངོས་ནས་རྒྱ་གར་བྱང་ཕྱོགས་ཀྱི་མཐའ་མཚམས་ནི་བོད་དང་མཉམ་འབྲེལ་ཡོད། རྒྱ་ནག་གིས་ བོད་ལ་བཙན་འཛུལ་བྱས་རྗེས་མཐའ་མཚམས་ནས་བཙན་འཛུལ་འགོ་འཛུགས་འགོག་མི་ཐུབ་པའི་བདེན་པ་ཞིག་ཡིན། བོད་ནི་རྒྱ་ནག་གིས་བཙན་འཛུལ་བྱས་པའི་རྒྱལ་ཁབ་ཅིག་ཡིན་པར་ངོས་འཛིན་དང་རྒྱ་ནག་གི་ཆ་ཤས་མིན་པར་ངོས་འཛིན་བྱས་ན། བོད་ལ་ཕན་ཐོགས་ཡོད་པ་ཙམ་མ་ཟད་རྒྱ་གར་རང་ཉིད་ལའང་ཆབ་སྲིད་དང་དཔལ་འབྱོར། རྒྱལ་ཁབ་ཀྱི་བདེ་འཇགས་བཅས་པར་འབྲེལ་བ་ཆེན་པོ་ཡོད།
འབོད་སྐུལ། རྒྱ་གར་གྱི་མི་དམངས་དང༌། བོད་དོན་རྒྱབ་སྐྱོར་བའི་ཚོགས་སྡེ་ཡོངས་ལ་འདི་དག་བྱེད་བར་འབོད་སྐུལ་ཞུ་བཞིན་ཡོད། བོད་དང་མཉམ་དུ་གནས་པ། བདེན་པ་དང་དྲང་བདེན་ཉར་ཚགས། སྙིང་རྗེ་དང་ཞི་བདེ་ལྡན་པའི་རིག་གནས་སྲུང་སྐྱོབ། བོད་ཀྱི་ངོ་བོ་དང༌། རིག་གཞུང༌། རང་དབང་བཅས་ཉར་ཚགས་ཀྱི་འབད་བརྩོན་ལ་རྒྱབ་སྐྱོར་གནང་རྒྱུ། རྒྱ་གར་རྒྱལ་ཡོངས་སུ་སྦག་སྦག་སྐོར་སྐྱོད་ལས་འགུལ་འདིས་བོད་དོན་འཐབ་རྩོད་སླད་བོད་རིགས་གཞོན་སྐྱེས་རྣམས་ཀྱི་ལྷག་བསམ་དང་སྙིང་སྟོབས། འབད་བརྩོན་བཅས་མཚོན་བྱེད་ཅིག་ཡིན། ཞེས་བརྗོད་འདུག
གསར་འགོད་པ། སྐལ་བཟང་སྦྱིན་པ།
