༸གོང་ས་རྒྱལ་བ་རིན་པོ་ཆེ་མཆོག་རྒྱ་གར་གྱི་རྒྱལ་ས་ལྡི་ལི་རུ་ཞབས་སོར་བདེ་བར་འཁོད།

དེ་རིང་༧གོང་ས་རྒྱལ་བ་རིན་པོ་ཆེ་མཆོག་བཞུགས་སྒར་ནས་ལྡི་ལིར་ཞབས་སོར་བདེ་བར་འཁོད་ཡོད་པ་དང་སང་ཉིན་རྒྱ་གར་ལྷོ་ཕྱོགས་སུ་ཆིབས་སྒྱུར་བསྐྱང་རྒྱུ་ཡིན་འདུག

དེ་རིང་སྔ་དྲོར་༸གོང་ས་རྒྱལ་བ་རིན་པོ་ཆེ་མཆོག་བཞུགས་སྒར་རྒྱལ་བའི་ཕོ་བྲང་ནས་ཆིབས་ཐོན་གྱིས་གྷ་གྷལ་གནམ་ཐང་བརྒྱུད་རྒྱ་གར་གྱི་རྒྱལ་ས་ལྡི་ལིར་ཆིབས་བསྒྱུར་བསྐྱངས་སོང་བ་དང་། སང་ཉིན་ཕྱི་ཚེས་ ༡༢ ཉིན་ལྡི་ལིའི་གནམ་ཐང་བརྒྱུད་ནས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དུ་ཞབས་སོར་འཁོད་རྒྱུ་ཡིན་འདུག

གྷ་གྷལ་གནམ་ཐང་དུ་༧གོང་ས་རྒྱལ་བ་རིན་པོ་ཆེ་མཆོག་ནས་གསར་འགོད་པར། ངོས་རང་རྒྱ་གར་ལྷོ་ཕྱོགས་སུ་འགྲོ་བཞིན་ཡོད། ངོས་རང་རྒྱ་གར་གྱི་ས་ཆ་གང་དུ་ཕྱིན་ཡང་། རྒྱ་གར་མི་མང་གིས་དངོས་གནས་དྲང་གནས་ངོས་རང་ལ་བྱམས་བརྩེ་ལྷད་མེད་པ་སྟོན་གྱི་འདུག ང་ཚོར་དངོས་གནས་གཅེན་གཅུང་གི་འདུ་ཤེས་ཡོད། ཅེས་གསུངས་སོང་།

དེ་བཞིན་ཁ་སང་ཕྱི་ཚེས་ ༡༠ ཉིན་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་དེ་ལོ་ངོ་ ༣༦ འཁོར་བའི་གཞུང་འབྲེལ་མཛད་སྒོའི་ཐོག་ཕེབས་པའི་ཅེག་རྒྱལ་ཁབ་ཀྱི་གྲོས་ཚོགས་ཀྱི་ཚོགས་གཞོན་ལྕམ་སྐུ་ཇེ་ཊ་ཀ་སི་ཊི་ལོ་ཝ་ (Jietka Sietlova) ལགས་དང་། ཨོ་གླིང་གྲོས་ཚོགས་འཐུས་མི་ལྕམ་སྐུ་སྦར་སྦ་ར་པོ་ཀོག་ (Barbara Pocock) ལགས། ཅི་ལིའི་གྲོས་ཚོགས་འཐུས་མི་སྐུ་ཞབས་ཝ་ལ་ཊོ་ མི་རོ་སི་ཝིག་ (Vlado Mirosevic) ལགས། ཧྥ་རན་སིའི་གྲོས་ཚོགས་འཐུས་མི་ལྕམ་སྐུ་ས་མཱནྠཱ་ཀཱ་ཛེ་བོ་ནེལ་ (Samantha Cazebonel) ལགས། ནིའུ་ཛི་ལེནྜ་གྲོས་ཚོགས་འཐུས་མི་སྐུ་ཞབས་གྲེག་ཧྥེ་ལེ་མིང་ (Greg Flemming) ལགས། ཕི་ཇི་གྲོས་ཚོགས་འཐུས་མི་སྐུ་ཞབས་བི་རེནྡྲ་ལཱལ་ (Virendra Lal) ལགས་བཅས་རྒྱལ་ཁབ་དྲུག་གི་གྲོས་ཚོགས་འཐུས་མི་རྣམས་ལ་མཇལ་འཕྲད་གནང་ཡོད་པ་མ་ཟད།  སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག ཨོ་གླིང་སྐུ་ཚབ་དོན་གཅོད་ཀརྨ་སེང་གེ་ལགས། ལྷོ་ཨ་མེ་རི་ཁའི་སྐུ་ཚབ་དོན་གཅོད་འཇིགས་མེད་ཚེ་རིང་ལགས། སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་བཅས་སུ་མཇལ་ཁ་སྩལ་འདུག

དགའ་ལྡན་ཕོ་བྲང་གི་དྲ་རྒྱར་གསལ་བའི་༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཆར་ལྟར་ན།  ཕྱི་ལོ་ ༢༠༢༦ ལོའི་ཟླ་ ༢ ཚེས་ ༢༣ ཉིན་༸གོང་ས་རྒྱལ་བ་རིན་པོ་ཆེ་མཆོག་ལ་ཐེག་ཆེན་ཆོས་གླིང་གཙུག་ལག་ཁང་དུ་རྒྱལ་སྤྱིའི་བོད་ཀྱི་ཆབ་སྲིད་བཙོན་ཟུར་ཚོགས་པ་དང་། སུད་སི་ལྷ་ས་བུའི་ཚོགས་པ་གཉིས་ཀྱིས་ཚེ་དཔག་མེད་དྭགས་མ་བཅུད་འདྲེན་གྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།