རྒྱ་ནག་གཞུང་གིས་བོད་རྫ་ཆུ་ཁའི་ཀ་བཞི་སྡེ་བའི་ཡུལ་མི་ ༨༠ ཡས་མས་འཛིན་བཟུང་གིས། ཁག་ཅིག་ལ་ཉེས་རྡུང་བཏང་ནས་ནད་པ་བཟོས་པ་དང་ཁག་ཅིག་ལ་བཙན་གྱིས་ཁས་ལེན་ཡི་གེ་ཞིག་ལ་མཚན་རྟགས་འགོད་དུ་བཅུག་སྟེ། ཐེངས་འདིའི་དོན་རྐྱེན་བཟོ་མཁན་ནི་ཀ་བཞི་སྡེ་བའི་ཡུལ་མི་ཡིན་པ་ཁས་ལེན་དུ་བཅུག་ཡོད་པ་རེད།
འདི་གའི་གསར་འགོད་པར་འབྲེལ་ཡོད་ཅིག་གིས་གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་ཕྱི་ཟླ་ ༡༡ ཚེས་ ༥ ཉིན་རྒྱབ་ཆུ་ཚོད་ ༣ དང་སྐར ༡༡ སྟེང་། བོད་རྫ་ཆུ་ཁའི་ཀ་བཞི་སྡེ་བའི་གསེར་ཁོག་ཞེས་པའི་ས་ཆ་དེར་རྒྱ་ནག་གིས་གཏེར་ཁ་སྔོག་འདོན་བྱེད་བཞིན་པ་ཡུལ་མི་ཚོས་མཐོང་ནས་གཏེར་ཁ་སྔོན་འདོན་བཀག་འགོག་བྱས་སྟབས། ཕྱི་ཚེས་ ༦ ཉིན་གྱི་དགོང་དྲོའི་ཆུ་ཚོད་ ༦།༥༠ ཙམ་ནས་རྒྱ་ནག་གཞུང་གིས་ཀ་བཞི་སྡེ་བའི་ཡུལ་མི་འཛིན་བཟུང་བྱེད་མགོ་བརྩམས་ཡོད་པ་དང་། ད་ལྟའི་བར་ཡུལ་མི་ཁྱོན་ ༨༠ ཡས་མས་འཛིན་བཟུང་གིས་སེར་ཤུལ་རྫོང་དུ་བཙན་ཁྲིད་བྱས་ཏེ། ད་དུང་ཡང་མི་མང་པོ་ཞིག་བཀག་ཉར་འོག་བཅུག་ཡོད་འདུག
ཕྱི་ཟླ་ ༡༢ པའི་ནང་གསར་དུ་ཤེས་རྟོགས་བྱུང་བའི་གནས་ཚུལ་ལྟར་ན། རྒྱ་ནག་གིས་འཛིན་བཟུང་བཀག་ཉར་བྱས་པའི་ཀ་བཞི་སྡེ་བའི་ཡུལ་མི་རྣམས་ལ་བཙོན་ཁང་དུ་ཉིན་རེར་རྩམ་ཆུ་གྲང་མོ་ཏོག་ཙམ་ལས་ཟ་མ་གང་ཡང་མ་སྤྲད་པ་དང་། ཉིན་མཚན་འགར་གཅིན་སྐྱག་དང་གཉིད་ཁུག་ཏུ་མ་བཅུག་པ་མ་ཟད། ཡུལ་མི་ཁག་ཅིག་ལ་ཉེས་རྡུང་བཏང་ནས་རྩིབ་མ་བཅག་པ་དང་མི་འགའ་ཞིག་གི་མཁལ་མ་ནད་པ་བཟོས་པ་དང་གཟུགས་པོ་སྐྱོ་བོ་ཆགས་པ། དེ་བཞིན་ཁ་ཤས་ཀྱི་གློ་ནད་བསྐྱར་ལོག་བརྒྱབ་པ་སོགས་བྱུང་འདུག
ཡང་རྒྱ་ནག་གཞུང་གིས་བཙོན་ཁང་དུ་ཀ་བཞི་སྡེ་བའི་ཡུལ་མི་རྣམས་ལ་གནས་ཚུལ་ཕྱི་ཕྱོགས་སུ་མི་གཏོང་བའི་ཁས་ལེན་དང་མཚན་རྟགས་བརྒྱབ་ཏུ་བཅུག་པ་དང་། དེ་ནས་ཡུལ་མི་རྒན་རབས་པ་མང་པོ་ཞིག་འཛིན་བཟུང་གིས་ཁོང་ཚོའི་ཁ་པར་ལ་དོ་ནན་ཞིབ་བཤེར་དང་འདྲི་རྩད་བྱས་ཏེ། ཆབ་སྲིད་སློབ་གསོ་ཟེར་བ་བཏང་རྗེས་ཕྱིར་ནང་ལ་མངགས་ཡོད་ཀྱང་། དེ་ནས་སླར་ཡང་ཉིན་གཅིག་གཉིས་ཀྱི་རྗེས་སུ་འབོད་འགུག་བྱས་ནས་འདྲི་རྩད་དང་། ལག་ཐོག་ཁ་པར་ལ་ཞིབ་བཤེར་གྱིས་གནས་ཚུལ་ཕྱི་ཕྱོགས་སུ་བསྐྱལ་ཡོད་མེད་ལ་བརྟག་ཞིབ་དོ་ནན་བྱེད་བཞིན་ཡོད་འདུག
ད་སྔ་བར་ཤེས་རྟོགས་བྱུང་བའི་གནས་ཚུལ་ལྟར་ན། རྒྱ་ནག་གཞུང་གིས་འཛིན་བཟུང་བྱས་པའི་ཡུལ་མིའི་ཁྲོད་ནས་མི་འགའ་ཞིག་ནད་པ་ཆགས་ནས་ཀློད་གྲོལ་བཏང་བ་དང་། འགའ་ཞིག་ལ་རྗེས་ཕྱོགས་གཏེར་ཁ་སྔོག་འདོན་བཀག་འགོག་མི་བྱེད་པ་དང་། གནས་ཚུལ་ཕྱི་ཕྱོགས་སུ་མི་གཏོང་བའི་ཁས་ལེན་དམ་བཅའ་བཞག་བཅུག་ནས་ཀློད་གྲོལ་བཏང་ཡོད་འདུག་ལ། ཀློད་གྲོལ་ཐོབ་པའི་ཡུལ་མི་རྣམས་ལ། ཡུལ་མི་ཚོས་དོན་དག་མེད་སར་གཞུང་གི་ལས་བྱེད་པར་ཉེས་རྡུང་བཏང་བ་མཐོང་སོང་ཞེས་ཁས་ལེན་གྱི་ཡི་གེ་ཞིག་ལ་བཙན་གྱིས་མཚན་རྟགས་བརྒྱབ་བཅུག་ཡོད་འདུག
ད་ལྟའི་ཆར་ཕྱི་ཟླ་ ༡༡ ནང་འཛིན་བཟུང་བྱས་པའི་ཡུལ་མི་དག་ལས་མི་བདུན་གར་སོང་ཆ་མེད་དུ་གྱུར་ཡོད་པ་དང་། ས་གནས་དེར་གསར་འགོད་པ་འབྱོར་སྐབས་གཞུང་གིས་བཀའ་མངག་ཡོད་པའི་མི་མ་གཏོགས་མི་གཞན་སུས་ཀྱང་སྐད་ཆ་བཤད་མི་ཆོག་པར་བཟོས་ཡོད་པ་རེད་ལ། ད་དུང་ཁྱིམ་ཚང་མང་པོ་ཞིག་གི་ཁྱིམ་དུ་བརྙན་མིག་དང་སྒྲ་འཇུག་འཕྲུལ་ཆས་སོགས་བཞག་ནས་ནང་མིའི་སྐད་ཆར་གསང་ཉན་དང་ཁོང་ཚོའི་འགྲོ་འདུག་རང་དབང་ལ་དམ་དྲག་བྱེད་བཞིན་ཡོད་འདུག
ང་ཚོར་འབྱོར་བའི་གནས་ཚུལ་ལ་གཞིགས་ན། ས་གནས་ཡུལ་མི་རྣམས་ཀྱིས་གཏེར་ཁ་སྔོག་འདོན་བྱེད་བཞིན་པ་མཐོང་མ་ཐག་གཏེར་ཁ་སྔོག་འདོན་མཚམས་འཇོག་བྱས་ཏེ། ཡུལ་ཚོའི་འབྲེལ་ཡོད་མགོ་ཁྲིད་མི་སྣར་ཡར་ཞུ་བྱས་སྐབས། ཡུལ་ཚོའི་མགོ་ཁྲིད་ཚོས་ཡུལ་མི་རྣམས་ལ་རྒྱབ་སྐྱོར་བྱས་མེད་ཁར། ཁྱེད་རང་ཚོར་ཐེ་ཇུས་ཡོད་མ་རེད། ས་གཞི་འདིའི་བདག་དབང་ཡོངས་རྫོགས་ཀྲུང་གོ་རྒྱལ་ཁབ་ལ་ཡོད་རེད། ང་ཚོས་རྟོག་ཞིབ་དང་ཐག་གཅོད་ཡོང་གི་རེད་ཅེས་ཧམ་རྫུན་བཤད་པ་དང་། ཡང་ཁྱོད་རང་ཚོས་གསེར་བརྐོ་བར་བཀག་འགོག་བྱས་པ་ནོར་འཁྲུལ་ཡིན་རབས་བརྗོད་སྐབས། སེར་ཤུལ་ཡུལ་ཚོའི་ཡུལ་མི་རྣམས་ལ་དུས་རྒྱུན་དུ་རྒྱ་གཞུང་གིས་དབང་ཡོད་དང་གཉའ་གནོན་ཚད་མེད་བྱེད་བཞིན་ཡོད་སྟབས། ཡུལ་མི་དག་གིས་འུ་ཐུག་ཐབས་ཟད་ཀྱིས་ངོས་ལེན་བྱེད་མ་ཐུབ་པར་ཁ་རྩོད་ཤོཪ་ཡོད་འདུག
ད་ལྟའི་ཆར་ཀ་བཞི་སྡེ་བའི་ཡུལ་མིའི་གྲངས་བརྒྱད་ཅུ་ཡས་མས་ཤིག་འཛིན་བཟུང་གིས་ཉེས་རྡུང་བཏང་བར་བཤད་པ་ལས། ཁོང་ཚོར་མཇུག་འབྲས་ཇི་ཡོང་བཤད་ཚོད་མི་ཐིག་པའི་གནས་སུ་ལྷུང་ཡོད་པ་དང་། ཐེངས་འདིའི་གནས་ཚུལ་བྱུང་སྐབས་སེར་ཤུལ་རྫོང་འཐབ་ཕྱོགས་གཅིག་གྱུར་ཁང་དང་། དྲག་ཆས་ཉེན་རྟོག་པ། དམག་མི། ཡུལ་ཚོའི་མགོ་ཁྲིད་བཅས་ཀྱིས་ཀ་བཞིའི་ཡུལ་ལུང་ཡོངས་རྫོགས་མཐའ་ནས་བསྐོར་བ་མ་ཟད། སྐབས་དེར་ཚོགས་འདུ་ཞིག་ཚོགས་ནས་མགོ་ཁྲིད་ཚོས་བཤད་དོན། གནས་ཚུལ་འདི་གོང་རིམ་དང་རྒྱལ་སྤྱིའི་ཕྱི་ཕྱོགས་སུ་གཏན་ནས་གཏོང་མི་ཆོག གལ་སྲིད་གནས་ཚུལ་དེ་འདྲ་བྱུང་ན་ཁྲིམས་འགལ་ཚབས་ཆེན་ཡིན་ཞེས་སྡིགས་ར་བཏང་ཡོད་པ་དང་། ཁྱིམ་ཚང་རེ་རེའི་ནང་དུ་དམག་མི་དག་བཙན་འཛུལ་བྱས་ཏེ་ཁ་པཪ་སྔོག་བཤེཪ་ཚ་ནན་བྱས་འདུག ད་ལྟའི་ཆར་སྲང་ལམ་གང་སར་དྲག་ཆས་དམག་མི་འགྲེམ་འཇོག་བྱས་ནས། ཡུལ་མི་ཚོའི་མིག་གི་ལྟ་སྟངས་འགྲིག་མིན་ཙམ་གྱིས་ཀྱང་འཛིན་བཟུང་བཀག་ཉར་བྱེད་བཞིན་ཡོད་འདུག
ད་རེས་ནི་ཀ་བཞི་སྡེ་བའི་ཁོར་ཡུག་ཏུ་གཏེར་ཁ་སྔོག་འདོན་བྱས་པ་ཐེངས་དང་པོ་མིན་པར་ཕྱི་ལོ་ ༡༩༩༠ ནང་ནས་ད་ལྟའི་བར་གཏེར་ཁ་སྔོག་འདོན་བྱས་པའི་གནས་ཚུལ་ཐེངས་མང་བྱུང་ཡོད་པ་རེད། ཡུལ་མི་ཚོས་བཤད་པ་ལྟར་ན། གསེར་བརྐོས་དོན་རྐྱེན་དེ་དག་གི་རྒྱབ་ཏུ་སེར་ཤུལ་རྫོང་གི་དཔོན་རིགས་དང་། ཡུལ་ཚོའི་མགོ་ཁྲིད། ཚོང་པ་འགའ་ཞིག་གིས་ངན་པ་ལག་འབྲེལ་དང་ལྐོག་ཟ་བྱེད་བཞིན་ཡོད་འདུག སྤྱིར་བོད་རྫ་ཆུ་ཁར་རྒྱ་ནག་གཞུང་གིས་ཡར་རྒྱས་ལ་ཁ་གཡར་ནས་ས་གནས་དེར་ཆུ་མཛོད་གསར་རྒྱག་དང་རྫ་ཆུ་འབག་གཙོག ས་གཞི་སྔོག་འདོན་གྱིས་མཚོན་པའི་ཁོར་ཡུག་གཏོར་སྐྱོན་ཚབས་ཆེན་བཏང་ཡོད་པར་མ་ཟད། ནམ་རྒྱུན་དུའང་ཀ་བཞི་ཡུལ་ཚོའི་མགོ་ཁྲིད་དག་གིས་རྒྱ་མིའི་རྒྱུག་ཁྱི་བྱས་ནས། ཀ་བཞི་དགོན་པའི་དུས་མཆོད་ཚོགས་སྐབས་དགེ་འདུན་པ་བཞི་རེ་ཙམ་ལས་ཚོགས་མི་ཆོག་པ་དང་། མི་མང་གི་མ་ཎི་ཚོགས་མི་ཆོག་པ། དམིགས་བསལ་དུས་ཆེན་སྐབས་རྒན་ཁོག་གཅིག་ཀྱང་གླིང་སྐོར་ལ་འགྲོ་རུ་མི་འཇུག་པ། ད་དུང་མི་གྲངས་བཅུ་ལས་མང་བ་འདུ་འཛོམས་མི་ཆོག་པ་དང་སློབ་ཕྲུག་ཚོའི་གུང་སེང་སྐབས་རིག་གཞུང་ཟབ་སྦྱོང་འཛིན་གྲྭ་ཚོགས་མི་ཆོག་པ་སོགས་བྱེད་སྒོ་སྣ་ཚོགས་ཤིག་ལའང་བཙན་འགོག་བྱས་དང་བྱེད་བཞིན་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
