ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གིས་ཨ་རིའི་གྲོས་ཚོགས་ནས་ཨ་རིའི་སློབ་ཆེན་ཁག་ཏུ་རྒྱ་ཡིག་དང་བོད་ཡིག དེ་བཞིན་ཡུ་གུར་སྐད་ཡིག་བཅས་ཀྱི་སློབ་ཚན་རྒྱ་སྐྱེད་གཏོང་དགོས་པར་སྐུལ་མ་བྱས་འདུག
དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གིས། ཨ་རིའི་མཐོ་སློབ་དང་སློབ་ཆེན་ཁག་ཏུ་རྒྱ་ཡིག་དང་བོད་ཡིག དེ་བཞིན། ཡུ་གུར་བའི་སྐད་ཡིག་སློབ་ཁྲིད་དགོས་གལ་ཆེ་བའི་རེ་སྐུལ་ཞུས་འདུག་ལ། འབོད་སྐུལ་དེ་ནི་ཨ་རིར་རྒྱ་ནག་དང་འབྲེལ་བའི་སྐད་ཡིག་དང་རིག་གཞུང་གི་ཤེས་བྱའི་སྐོར་ལ་ཤེས་རྟོགས་ཟབ་མོ་མེད་ཚེ། ཨ་རིས་རྒྱ་ནག་གི་དམིགས་ཡུལ་ངོས་འཛིན་མི་ཐུབ་པའི་ནོར་འཁྲུལ་དང་། འགྲོ་བ་མིའི་ཐོབ་ཐང་ལ་སྣང་མེད་བྱེད་པ། དེ་བཞིན་རྒྱ་ནག་གི་གསང་བའི་བྱ་གཞག་ལ་གདོང་ལེན་བྱེད་པའི་ནུས་པ་ཉམས་དམས་སུ་འགྲོ་ཉེན་ཡོད་པར་ཉེན་བརྡ་བཏང་བ་ཞིག་ཡིན་འདུག
ཡང་དེ་འབྲེལ་ (stratnewsglobal) གནས་ཚུལ་ལྟར་ན། ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གིས། བོད་ཀྱི་སྐད་ཡིག་དང་ཡུ་གུར་སྐད་ཡིག་གི་སློབ་སྦྱོང་རྒྱ་སྐྱེད་གཏོང་དགོས་པའི་འབོད་སྐུལ་དེ་ནི་མངོན་འདོད་ཙམ་ཡིན་པ་ལས། ད་ལྟའི་ཆར་ཨ་རིའི་མཐོ་སློབ་ཁ་ཤས་ཤིག་མ་གཏོགས་ཨ་རིའི་སློབ་ཆེན་ཁག་ཏུ་བོད་དང་ཡུ་གུར་གྱི་སྐད་ཡིག་གཉིས་ཀའི་སློབ་ཚན་ཧ་ཅང་ཉུང་ཉུང་ཡིན་པ་དང་། དེ་འཕེལ་རྒྱས་རྒྱ་ཆེར་འགྲོ་བའི་ལམ་ཁ་མེད་ཅིང་། ལྷག་པར་དུ་བོད་ཡིག་དང་ཡུ་གུར་བའི་སྐད་ཡིག་གཉིས་ཨ་རིའི་ཤེས་ཡོན་ནང་འཇུག་དགོས་པའི་འབོད་སྐུལ་དེ་ནི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་བའི་སེམས་འཚབ་ཅིག་ཆགས་ཀྱི་ཡོད་ཀྱང་། མངོན་འདོད་དེ་དངོས་ཡོད་དུ་བསྒྱུར་བར་དཀལ་ངལ་འཕྲད་ཀྱི་ཡོད་སྐོར་སོགས་བརྗོད་འདུག
ཌོ་ནལ་ཊོམ་ཕུའི་སྲིད་འཛིན་སྐབས་གཉིས་པའི་རིང་། ཨ་རིས་རྒྱལ་སྲིད་བདེ་འཇགས་ལ་ཉེན་ཁ་ཆེ་བའི་ངོས་འཛིན་འོག་རྒྱ་ནག་གཞུང་དང་འབྲེལ་བའི་ཚོགས་སྡེ་ཁག་དང་མཉམ་འབྲེལ་བྱེད་པར་དམ་དྲག་ཆེ་རུ་བཏང་སྟེ། རིག་གཞུང་བརྗེ་རེས་སོགས་ཀྱི་ལས་རིམ་ཁག་ལ་དབུས་གཞུང་གི་མ་དངུལ་གཏོང་རྒྱུ་ཇེ་ཉུང་དུ་འགྲོ་བཞིན་ཡོད་ཅིང་། ཨ་རིའི་ཨོ་པི་ཇིན་ཌལ་གོ་ལའི་གཙུག་ལག་སློབ་གཉེར་ཁང་གི་རྒྱ་ནག་སྐོར་གྱི་སློབ་དཔོན་ཆེན་མོ་པཱ་ཐག་ (Dr. Sriparna Pathak) ལགས་ཀྱིས། ཕྱི་ལོ་ ༢༠༡༣ ནས་ ༢༠༡༦ ལོའི་བར་ཨ་རིའི་སློབ་ཆེན་ཁག་ཏུ་རྒྱ་ཡིག་སྦྱོང་མཁན་གྱི་གྲངས་འབོར་མཐོ་ཤོས་སུ་བསླེབས་ཡོད། དེའི་རྗེས་ནས་ཨ་རིའི་སློབ་ཆེན་ཁག་གི་ཤེས་ཡོན་སྲིད་ཇུས་ནང་རྒྱ་སྐད་སློབ་གཉེར་བྱེད་མཁན་གྱི་གྲངས་འབོར་ཇེ་ཉུང་དུ་ཕྱིན་ཡོད། ཁུང་ཙི་སློབ་གཉེར་ཁང་སྒོ་བརྒྱབ་པ་དང་། ཐོངས་མཆན་སྲིད་བྱུས་དམ་དུ་བཏང་བ། དེ་བཞིན་རྒྱ་ནག་དང་འབྲེལ་བའི་ལས་རིགས་ཐོག་ལ་སློབ་མ་ཚོའི་བློ་འཚབ་ཇེ་ཆེར་ཕྱིན་པ་བཅས་ཀྱིས་མཐོ་རིམ་གྱི་ལས་རིམ་ལ་གནོད་སྐྱོན་ཐེབས་ཡོད། ཅེས་བརྗོད་ཡོད།
ད་ལྟའི་ཆར་ཨ་རིའི་སློབ་ཆེན་ཁག་ཏུ་རྒྱ་ནག་གཞུང་དང་འབྲེལ་བ་མེད་པའི་རྒྱ་ཡིག་སློབ་སྦྱོང་གི་ལས་རིམ་དང་མི་སྒེར་གྱིས་བཙུགས་པའི་ཟབ་ཁྲིད་ལྟེ་གནས་ཁང་། ཟུར་ཁྲིད་ཀྱི་ལས་རིམ་སོགས་ཇེ་མང་དུ་འགྲོ་བཞིན་ཡོད་པའི་ཁར། རྒྱ་ནག་གཞུང་དང་འབྲེལ་བ་མེད་པའི་ཐའེ་ཝན་གྱི་སྐད་ཡིག་གི་ཚོགས་སྡེ་ཁག་དང་མཉམ་ལས་ཀྱིས་རྒྱ་ཡིག་སློབ་ཁྲིད་མུ་མཐུད་བྱེད་བཞིན་ཡོད་པ་རེད་ལ། སློབ་དཔོན་ཆེན་མོ་པཱ་ཐག་ལགས་ཀྱིས། ཨ་རིའི་སློབ་གྲྭ་ཁག་གིས་རྒྱ་ནག་དང་འབྲེལ་བ་ཡོད་པའི་ཚོགས་པ་དང་འབྲེལ་བ་གཅོད་བཞིན་ཡོད་ནའང་། རྒྱ་ཡིག་གི་ལས་རིམ་འཕེལ་རྒྱས་གཏོང་ཐུབ་ཀྱི་ཡོད། ཐའེ་ཝན་གཞི་བཅོལ་བའི་མཉམ་ལས་ཚོགས་པ་ཚོས་ཆབ་སྲིད་ཀྱི་ཕྱོགས་ལྷུང་མེད་པ་དང་། སྤུས་ཚད་མཐོ་བའི་སློབ་ཁྲིད་མཁོ་སྤྲོད་བྱེད་ཀྱི་ཡོད་པ་མ་ཟད། ཞིབ་བཤེར་བྱེད་པའི་སེམས་ཁྲལ་ཡང་མེད། ཅེས་བརྗོད་འདུག
ད་ལན་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་སྙན་ཐོར་གཞིགས་ན། རྒྱའི་སྐད་ཡིག་དང་བོད་ཡིག དེ་བཞིན་ཡུ་གུར་བའི་སྐད་ཡིག་བཅས་ཨ་རིའི་ཤེས་ཡོན་སློབ་གསོའི་ནང་འཇུག་དགོས་པའི་དམིགས་ཡུལ་ནི། ཨ་རིས་རྒྱ་ནག་ལ་རྒྱུས་ལོན་ཆ་ཚང་ཞིག་ཡོང་བར་ཕན་ཐོགས་བྱེད་ཅིག་ཏུ་བརྩིས་པ་ལས། ཨ་རིས་རྒྱའི་སྐད་ཡིག་དང་རིག་གནས་སོགས་ཀྱི་སྐོར་ལ་ཤེས་རྟོགས་མེད་པར་སྲིད་ཇུས་འདྲ་མིན་འཛིན་བཞིན་པ་དེས། ཨ་རིས་རྒྱ་ནག་ལ་བཟུང་བའི་རྒྱལ་སྲིད་སྲིད་ཇུས་ཀྱི་ནོར་འཁྲུལ་དང་ཕམ་ཁ་ཞིག་ཡིན་པར་ངོས་འཛིན་གྱིན་འདུག
གསར་འགོད་པ། སྐལ་བཟང་སྦྱིན་པ།
