བོད་ཁྲི་ཀ་རྫོང་མི་མང་ཁྲིམས་ཁང་གིས་ཚེ་རིང་མཚོ་ལགས་ལ་ཉེས་མེད་ཉེས་འགེལ་གྱིས་ལོ་གཅིག་ཁྲིམས་ཐག་བཅད་པ་ངོས་ལེན་མ་བྱས་པར་ཁུལ་འབྲིང་རིམ་མི་མང་ཁྲིམས་ཁང་ལ་གཏུགས་ཡོད་ཀྱང་དཀའ་ངལ་འཕྲད་བཞིན་ཡོད་འདུག
ཟླ་འདིའི་ཕྱི་ཚེས་ ༩ ཉིན་བོད་ཁྲི་ཀ་རྫོང་མི་མང་ཁྲིམས་ཁང་ཟེར་བས། བུད་མེད་ཡུལ་སྐོར་སྣེ་ཤན་པ་ཚེ་རིང་མཚོ་ལགས་ལ་སྤྱི་ཚོགས་འཁྲུག་རྐྱེན་བསླངས་བའི་ཉེས་མིང་གཡོགས་ཏེ་ལོ་གཅིག་གི་བཙོན་འཇུག་ཁྲིམས་ཐག་བཅད་ཡོད་པ་དང་། ཁྲིམས་ཆད་དེ་ཕྱི་ལོ་ ༢༠༢༥ ཟླ་ ༡༢ ཚེས་ ༩ ནས་བརྩིས་པའི་ལོ་གཉིས་ཀྱི་རྗེས་ནས་དངོས་སུ་ལག་བསྟར་བྱ་རྒྱུ་ཡིན་པའི་བཅད་ཁྲ་བཏང་སྟེ་བཟང་བཙོན་དུ་བཞག་ཡོད་པར་བརྟེན། ཚེ་རིང་མཚོ་ལགས་ཀྱིས་མཚོ་ལྷོ་ཁུལ་འབྲིང་རིམ་མི་མང་ཁྲིམས་ཁང་ལ་དྲང་བདེན་མིན་པའི་ཁྲིམས་ཆད་དེར་བསྐྱར་དུ་ཁྲིམས་བཤེར་དགོས་པའི་གཏུག་ཡིག་ཆ་ཚང་སྤྲད་ཟིན་ཡོད་ཀྱང་ཚུལ་བཞིན་ལག་བསྟར་མ་བྱས་པའི་དཀའ་ངལ་འཕྲད་བཞིན་ཡོད་འདུག
ཁྲི་ཀ་རྫོང་མི་མང་ཁྲིམས་ཁང་ཟེར་བས་བཅད་ཁྲ་བཏང་སྟེ་ཁྲིམས་ཆད་ལག་བསྟར་ཕར་འགྱང་བྱས་པའི་དུས་ཡུན་རིང་ངེས་པར་དུ་སྲུང་བརྩི་བྱེད་དགོས་པའི་གནད་དོན་ཁག་ཅིག་བཀོད་ཡོད་པའི་ནང་དུ། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དོན་ཚན་ ༧༥ པའི་ནང་གསལ་དང་པོ། བཅའ་ཁྲིམས་དང་སྲིད་འཛིན་སྒྲིག་ཁྲིམས་ལ་བརྩི་བཀུར་དང་། ལྟ་རྟོག་ལ་གཞོགས་འདེགས་དགོས་པ། གཉིས་པ། རྟོག་ཞིབ་ལས་ཁུངས་ཀྱི་གཏན་འབེབ་ལྟར་རང་ཉིད་ཀྱི་འགུལ་སྐྱོད་ཡར་ཞུ་བྱེད་པ། གསུམ་པ། རྟོག་ཞིབ་ལས་ཁུངས་ཀྱིས་གཏན་འབེབ་བྱས་པའི་འགྲུལ་བ་སྣེ་ལེན་བྱེད་ཕྱོགས་ལ་བརྩི་བཀུར་དགོས། བཞི་པ། རང་ཉིད་ཀྱི་སྡོད་གནས་གྲོང་ཁྱེར་དང་རྫོང་ཡང་ན་ས་གནས་ནས་གཞན་དུ་འགྲོ་བ་དང་སྨན་པར་བསྟེན་གཏུག་སོགས་བྱེད་པར་རྟོག་ཞིབ་ལས་ཁུངས་ཀྱི་ཆོག་མཆན་དགོས། གལ་ཏེ་གོང་གསལ་གཏན་འབེབ་ཁག་དང་འགལ་ཚེ། ཀྲུང་ཧྭ་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དོན་ཚན་ ༧༧ པའི་ནང་གསེས་ ༢ པ་ལྟར་ཐག་གཅོད་བྱ་རྒྱུ་ཡིན། ཞེས་བརྗོད་འདུག
ཚེ་རིང་མཚོ་ལགས་ཀྱིས་ཁྲི་ཀ་རྫོང་མི་མང་ཁྲིམས་ཁང་ཟེར་བས་ཁོང་མོར་སྤྱི་ཚོགས་དཀྲུག་རྐྱེན་བསླངས་བའི་ཉེས་མིང་བཀལ་བ་དེ་ངོས་ལེན་རྩ་བ་ནས་མ་གནང་བའི་སྐོར་ལ་ཁྲིམས་ཁང་གིས། འདི་ག་ཁྲིམས་ཁང་ནས་ཐག་གཅོད་བྱས་པ་དེར་ཁྱེད་ཀྱིས་གཞོགས་འདེགས་བྱས་མེད་སྟབས། ཁྲིམས་བཤེར་ཡིག་ཆ་རྣམས་ཁྲིམས་བཤེར་ཁང་གཉིས་པར་སྤྲོད་རྒྱུ་ཡིན། ཞེས་བརྗོད་འདུག་ཀྱང་། ཚེ་རིང་མཚོ་ལགས་ཀྱིས་རྒྱ་ནག་རྒྱལ་ཡོངས་མི་མང་ཁྲིམས་ཁང་ཞབས་ཕྱི་དྲ་བའི་ཐོག་ནས་མཚོ་ལྷོ་ཁུལ་འབྲིང་རིམ་མི་མང་ཁྲིམས་ཁང་ལ་ཁྲིམས་བཤེར་གཏུག་ཡིག་སྤྲད་ཟིན་པའི་སྐོར་ལ་ཁོང་མོས། ཁྲིམས་བཤེར་ཐེངས་གཉིས་པའི་ཆེད་དུ་དཔྱད་ཞིབ་ཡིག་ཚགས་དང་ཁྲིམས་བཤེར་དང་པོའི་གཏུག་བཤེར་ཡི་གེ་བཅས་ཡིག་ཆ་ཚང་མ་ཕུལ་ཡོད་ལ། ཁྲི་ཀ་རྫོང་མི་མང་ཁྲིམས་ཁང་གིས་ཁྲིམས་མེད་ལུགས་མེད་ཀྱིས་ང་ལ་ནག་ཉེས་ངོས་ལེན་བྱེད་དགོས་པའི་སྐུལ་འདེད་ཡང་ཡང་བཏང་བ་སོགས་ནི་རྒྱལ་ཁབ་ཀྱི་བཅའ་ཁྲིམས་སྣང་མེད་བཏང་བ་ཞིག་ཡིན་པས་ངས་ངོས་ལེན་རྩ་བ་ནས་བྱས་མེད། ཅེས་བྲིས་འདུག
མཚོ་ལྷོ་ཁུལ་འབྲིང་རིམ་མི་མང་ཁྲིམས་ཁང་གིས་ཁོང་མོའི་ཁྲིམས་གཏུག་ལ་ཚུལ་བཞིན་དང་ལེན་བྱེད་ཀྱི་མེད་པའི་སྐོར་ལ་ཚེ་རིང་མཚོ་ལགས་ཀྱིས། ཁུལ་འབྲིང་རིམ་མི་མང་ཁྲིམས་ཁང་གིས་རང་སྣང་གང་དྲན་གྱིས་ཁྲི་ཀ་རྫོང་མི་མང་ཁྲིམས་ལ་ངན་འབྲེལ་བྱས་ཚེ་རྒྱལ་ཁབ་ཀྱི་ཁྲིམས་དང་འགལ་ཡོད་ལ། ཁྲིམས་ལྟར་གཏུག་བཤེར་ཡི་གེ་ཁུལ་འབྲིང་རིམ་མི་མང་ཁྲིམས་ཁང་ལ་སྤྲད་པ་ལྟར་ངེས་པར་དུ་མཚོ་ལྷོ་ཁུལ་འབྲིང་རིམ་མི་མང་ཁྲིམས་ཁང་རང་ལ་ཁྲིམས་ར་འཚོགས་དགོས་ཀྱི་ཡོད་པ་མ་ཟད། ཁྲིམས་ར་འཚོགས་སྐབས་ཐད་གཏོང་བྱས་ཏེ་ངའི་ཁྲིམས་བཤེར་གྱི་བརྒྱུད་རིམ་ལ་ཚང་མར་བལྟ་རུ་འཇུག་དགོས་པའི་རེ་སྐུལ་བྱེད་ཀྱི་ཡོད། ཅེས་བརྗོད་འདུག
ད་ལྟ་རང་ལོ་ ༤༡ ཙམ་ཡིན་པའི་ཚེ་རིང་མཚོ་ལགས་ཀྱིས་ཞེད་སྣང་གང་ཡང་མེད་པར་ཕྱི་ལོ་ ༢༠༡༥ ཙམ་ནས་བཟུང་རྒྱ་ནག་ཉེན་རྟོག་པ་དང་ལས་བྱེད་པས་ཁྲིམས་མེད་ལུགས་མེད་ཀྱིས་བོད་མི་རྣམས་ལ་དབྱེ་འབྱེད་དང་། དམིགས་བསལ་དམ་དྲག་བཙན་གནོན་བྱེད་བཞིན་པའི་གནད་དོན་མང་པོ་ཐེར་འདོན་བྱས་ཡོད་འདུག་ལ། ཁོང་མོ་ནི་དུས་རྒྱུན་ཁྲིམས་ལྟར་བདེན་པའི་གནས་ལུགས་རྩོད་མཁན་ཞིག་ཡིན་འདུག
ཕྱི་ལོ་ ༢༠༢༣ ཟླ་ ༡༢ ཚེས་ ༡༩ ཉིན་ཚེ་རིང་མཚོ་ལགས་དང་ཁོང་མོའི་རོགས་པ་ཞིག་གིས་རླངས་འཁོར་བཏང་ནས་བོད་རང་སྐྱོང་ལྗོངས་ཟེར་བའི་སྦྲ་ཆེན་རྫོང་ཁོངས་སུ་ཕྱིན་སྐབས། ས་གནས་ཉེན་རྟོག་པས་བཀག་འགོག་བྱས་ཏེ་གང་བྱུང་ཞིབ་བཤེར་བྱས་པའི་གནད་དོན་བྱུང་བ་ཁོང་མོས་སྒེར་གྱི་སྤྱི་ཚོགས་དྲ་ལམ་དུ་སྤེལ་བར་བརྟེན། ཉེན་རྟོག་ཕྱོགས་ནས་ཁོང་མོས་ཞིབ་བཤེར་ལ་གཞོགས་འདེགས་བྱས་མེད་པ་མ་ཟད། གནས་ཚུལ་ལ་འཁྱོག་བརྗོད་དང་རྫུན་བཟོ་བྱས་པའི་བརྙན་ཐུང་མ་འདྲ་བ་གསུམ་སྤྱི་ཚོགས་དྲ་ལམ་དུ་བཏང་སྟེ་སྤྱི་མང་དང་དྲ་ལམ་གྱི་སྒྲིག་གཞིར་གཏོར་བརླག་བཏང་ཡོད་སྐོར་བརྗོད་དེ་བདུན་ཕྲག་གཅིག་ཙམ་རིང་བཀག་ཉར་བྱས་ཡོད་པ་རེད།
དེ་བཞིན་ཕྱི་ལོ་ ༢༠༢༢ ཟླ་ ༡༡ ཚེས་ ༡ ཉིན་ཏོག་དབྱིབས་རིམས་ནད་ཀྱི་བཀག་སྡོམ་ལ་བརྩི་བཀུར་མ་བྱས་པའི་ཉེས་མིང་འོག ལྷ་ས་གྲོང་ཁྱེར་ཉེན་རྟོག་པས་ཁོང་མོ་ཉིན་གྲངས་ ༡༠ ལྷག་རིང་བཀག་ཉར་བྱས། ཡང་དྲ་ལམ་དུ་རྒྱ་ནག་གཞུང་དང་ལས་བྱེད་པའི་སྐོར་ལ་གནས་ཚུལ་རྫུན་བསྒྲགས་བྱས་པའི་ཉེས་མིང་འོག ཕྱི་ལོ་ ༢༠༢༣ ཟླ་ ༡༠ ཚེས་ ༢༦ ཉིན་བོད་སྐྱེ་རྒུ་མདོ་གྲོང་ཁྱེར་ཉེན་རྟོག་པས་ཁོང་མོ་ཟླ་ཕྱེད་ཙམ་རིང་བཀག་ཉར་བྱས་ཡོད་པ་སོགས་སྔ་གཞུག་ཏུ་ཐེངས་ ༥ ཙམ་བཀག་ཉར་བྱས་མྱོང་ཡོད་འདུག
