རྒྱ་ནག་གིས་བལ་ཡུལ་ནང་བོད་དོན་ལས་འགུལ་དང་རྒྱ་གཞུང་ལ་ངོ་རྒོལ་གྱི་ལས་འགུལ་རིགས་ལ་དམ་དྲག་བྱེད་དགོས་པའི་འབོད་སྐུལ་བྱས་འདུག
ཁ་སང་ཕྱི་ཚེས་ ༡༨ ཉིན་བལ་ཡུལ་གྱི་ཀ་ཐི་མན་ཌི་ཆ་འཕྲིན་གྱིས་གནས་ཚུལ་སྤེལ་བ་ལྟར་ན། བལ་ཡུལ་དུ་ཡོད་པའི་རྒྱ་ནག་གཞུང་ཚབ་པ་ཁྲན་སོན་ཟེར་བས། བལ་ཡུལ་གྱི་བར་བརྒལ་སྲིད་བློན་ལྕམ་སོའུ་ཤི་ཀར་ཀི་ལགས་དང་ཐུག་འཕྲད་ཀྱིས། བལ་ཡུལ་གཞུང་ནས་བལ་ཡུལ་དུ་ཡོད་པའི་བོད་མི་སྐྱབས་བཅོལ་བ་དང་བལ་ཡུལ་གྱི་བྱང་ཕྱོགས་རྫོང་ཁག་ཏུ་རྒྱ་ནག་ལ་ངོ་རྒོལ་ཡོད་པའི་ལས་འགུལ་སོགས་ལ་དམ་དྲག་བྱ་དགོས་པའི་སྐུལ་མ་བྱས་འདུག
བལ་ཡུལ་གྱི་བར་བརྒལ་སྲིད་བློན་ལྕམ་སོའུ་ཤི་ཀར་ཀི་ལགས་ཀྱིས་ཀྱང་། བལ་ཡུལ་གཞུང་གིས་རྒྱ་ནག་གཅིག་གི་སྲིད་ཇུས་ལ་ངོས་འཛིན་དང་རྒྱབ་སྐྱོར་ཡོད་པ་བཞིན། བལ་ཡུལ་གྱི་ས་ཐོག་ཏུ་ཁྱིམ་མཚེས་རྒྱལ་ཁབ་གཅིག་ལའང་ངོ་རྒོལ་སོགས་ཀྱི་ལས་འགུལ་སྤེལ་དུ་མི་འཇུག་པའི་ལན་འདེབས་བྱས་ཡོད་འདུག
བལ་ཡུལ་ནང་བོད་མི་སྐྱབས་བཅོལ་བ་ ༢༠༠༠༠ ཙམ་ཡོད་པ་དང་། རྒྱ་ནག་གཞུང་གི་གནོན་ཤུགས་འོག་བལ་ཡུལ་གཞུང་གིས་བོད་མི་སྐྱབས་བཅོལ་བ་རྣམས་ལ་སྐྱབས་བཅོལ་བའི་ཡིག་ཆ་མ་སྤྲད་པར་ལྷག་ཡོད་པ་རེད་ལ། བལ་ཡུལ་གྱི་བྱང་ཕྱོགས་ས་ཁུལ་མང་ཆེ་བའི་མི་རིགས་བོད་པ་ཡིན་པའམ་ཡང་ན་བོད་ཀྱི་མི་རྒྱུད་ལས་བྱུང་བ་ཡིན་ཞིང་། བོད་བརྒྱུད་ནང་བསྟན་ཉམས་ལེན་བྱེད་མཁན་ཡིན་པ་རེད། དེ་ལ་བརྟེན་ནས་ཐེངས་འདིར་རྒྱ་ནག་གཞུང་ཚབ་པས་ཆེད་དུ་བོད་མི་སྐྱབས་བཅོལ་བ་དང་བྱང་ཕྱོགས་ཀྱི་མི་རྣམས་ཀྱི་ལས་འགུལ་སོགས་ལ་དོགས་ཟོན་དང་དམ་དྲག་བྱེད་དགོས་པའི་སྐུལ་མ་བཏང་བ་ཞིག་ཆགས་ཀྱི་འདུག་ལ། བལ་ཡུལ་གྱི་བྱང་ཕྱོགས་སུ་དར་ཆུ་ལ་ (Darchula) དང་བཱ་ཇཱང་(Bajhang) ། ཧུཾ་ལ་ (Humla) དང་། དོལ་པོ་དང་གློ་སྨོན་ཐང་། གོར་ཁཱ་དང་ར་སུ་ཝ། ཤར་ཁུམ་བུ་སོགས་བོད་དང་ས་འབྲེལ་ཡོད་པའི་ས་ཁུལ་ཡིན་པ་རེད།
བལ་ཡུལ་གྱི་ཀ་ཐི་མན་ཌི་ཆ་འཕྲིན་གྱི་གནས་ཚུལ་ལྟར་ན། རྒྱ་ནག་གི་གཞུང་ཚབ་པ་ཁྲན་སོན་ཟེར་བ་དེས། བལ་ཡུལ་ནང་རྒྱ་གཞུང་ལ་ངོ་རྒོལ་གྱི་བོད་དོན་ལས་འགུལ་སོགས་ལ་དམ་དྲག་བྱ་དགོས་པའི་སྐུལ་མ་དང་ལྷན་དུ། བལ་ཡུལ་སྦོག་ར་གྲོང་ཁྱེར་གྱི་གནམ་ཐང་འཛུགས་སྐྲུན་ལས་གཞིའི་ཁྲོད་ལྐོག་ཟ་རུལ་སུངས་གྱོད་དོན་ནང་རྒྱ་ནག་མི་འཇུག་པའི་རེ་སྐུལ་ཡང་ཞུས་འདུག་ལ། དེའི་ཐད་བལ་ཡུལ་གྱི་སྲིད་བློན་གྱིས། ལྐོག་ཟ་རུལ་སུངས་ཀྱི་གྱོད་དོན་དེ་ནི་རང་དབང་ལྡན་པའི་ཞིབ་འཇུག་ཚོགས་ཆུང་གིས་ཞིབ་འཇུག་བྱེད་མུས་ཡིན་པས། སྲིད་བློན་ལས་ཁུངས་ཀྱིས་དེར་ཐེ་གཏོགས་བྱེད་ཐབས་མེད་པའི་ལན་འདེབས་བྱས་ཡོད་པ་དང་། སྦོག་ར་གྲོང་ཁྱེར་གྱི་གནམ་ཐང་འཛུགས་སྐྲུན་གྱི་ལས་གཞི་དང་འབྲེལ་ནས་རྒྱ་ནག་གཞུང་འབྲེལ་གྱི་འཛུགས་སྐྲུན་བཟོ་གྲྭ་ (China CAMC Engineering Company) དང་གན་རྒྱ་འཇོག་མཁན་སོགས་ཚུད་ཡོད་འདུག
ཀ་ཐི་མན་ཌི་ཆ་འཕྲིན་གྱི་གནས་ཚུལ་ལ་གཞིགས་ན། བལ་ཡུལ་དུ་ཡོད་པའི་རྒྱ་ནག་གི་གཞུང་ཚབ་པ་ཁྲན་སོན་ནི་ཕྱི་ལོ་ ༢༠༢༣ ལོའི་ཟླ་ ༡ པོའི་ནང་ལོ་གསུམ་བལ་ཡུལ་དུ་གཞུང་ཚབ་པའི་ལས་འགན་ཆེད་བསྐོ་གཞག་གིས་འབྱོར་ཡོད་ཀྱང་། ཟླ་འདིའི་ཕྱི་ཚེས་ ༢༨ ཉིན་ལས་མཚམས་བཞག་ནས་ཕྱིར་པེ་ཅིན་དུ་ལོག་གི་ཡོད་པ་དང་། ཁོའི་གོ་གནས་སྤྱི་ཁྱབ་དྲུང་ཆེར་སྤར་ཡོད་པ་ཙམ་ལས་གནས་ཚུལ་ཁ་གསལ་ཤེས་རྟོགས་བྱུང་མེད་པ་རེད།
གསར་འགོད་པ། སྐལ་བཟང་སྦྱིན་པ།
