༸རྒྱལ་དབང་སྐུ་ཕྲེང་བཅུ་གསུམ་པ་མཆོག་གི་དགོངས་རྫོགས་མཆོད་འབུལ་སྨོན་ལམ་འཚོགས།

དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་མཆོག་གིས་༸རྒྱལ་དབང་སྐུ་ཕྲེང་བཅུ་གསུམ་པ་ཐུབ་བསྟན་རྒྱ་མཚོ་མཆོག་ནས་བོད་རྒྱལ་ཁབ་དེ་རང་ཚུགས་པའི་རྒྱལ་ཁབ་ཅིག་ཆགས་རྒྱུའི་རྨང་གཞི་བཏིང་ཡོད་སྐོར་སོགས་གསུངས་སོང་།

དེ་རིང་སྟེ་ཕྱི་ལོ་ ༡༩༣༣ བོད་ཟླ་ ༡༠ ཚེས་ ༣༠  ཉིན་སྟེ་༸རྒྱལ་དབང་སྐུ་ཕྲེང་བཅུ་གསུམ་པ་རྒྱལ་དབང་ཐུབ་བསྟན་རྒྱལ་མཚོ་མཆོག་དགོངས་པ་ཆོས་དབྱིངས་སུ་འཐིམ་པའི་ཚུལ་བསྟན་ནས་མི་ངོ་ ༩༢ འཁོར་བའི་དུས་སྐབས་དང་བསྟུན། དགའ་ལྡན་ཕོ་བྲང་གི་བཀའ་དགོངས་བཞིན། རྒྱ་གར་ལྷོ་ཕྱོགས་མོན་གྷོ་རུ་རྟེན་གཞི་བྱས་པའི་དགའ་ལྡན་དང་འབྲས་སྤུངས་དགོན་དུ་དགོངས་རྫོགས་ཀྱི་མཆོད་འབུལ་སྨོན་ལམ་དེ་འཚོགས་སོང་།

དེའི་ཐད་འདི་གའི་གསར་ཁང་གི་གསར་འགོད་པས་དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་མཆོག་ལ་༸རྒྱལ་དབང་སྐུ་ཕྲེང་བཅུ་གསུམ་པ་ཆེན་པོ་མཆོག་གི་དགོངས་རྫོགས་ཀྱི་མཆོད་འབུལ་སྨོན་ལམ་གོ་སྒྲིག་གནང་དགོས་པའི་རྒྱུ་མཚན་དང་གལ་གནད་སོགས་ཀྱི་ཐད་ལ་བཀའ་འདྲི་ཞུས་པར། རིན་པོ་ཆེ་མཆོག་གིས། ད་ལན་༸གོང་ས་རྒྱལ་བ་རིན་པོ་ཆེ་མཆོག་མར་ཆིབས་བསྒྱུར་གནང་བའི་དུས་སྐབས་དང་བསྟུན། སྐུ་ཕྲེང་བཅུ་གསུམ་པའི་དགོངས་རྫོགས་མཆོད་འབུལ་འཚོག་རྒྱུའི་དུས་ཚོད་སྟབས་འཁེལ་བ་ཞིག་ལས། ཆེད་དུ་གོ་སྒྲིག་ཞུས་པ་ཞིག་མ་རེད། ༸གོང་ས་རྒྱལ་བ་རིན་པོ་ཆེ་མཆོག་ཆིབས་བསྒྱུར་གནང་བའི་སྐབས་སུ། ཐོག་མར་ཆིབས་བསྒྱུར་གནང་རྗེས་ཉིན་གཅིག་གཉིས་རྗེས་ལ་དགའ་ལྡན་ལྔ་མཆོད་འཁེལ་བ་དང་། སྤྱིར་བཏང་དགའ་ལྡན་ལྔ་མཆོད་སྐབས་འཁེལ་བའི་དུས་ལ་༸གོང་ས་རྒྱལ་བ་རིན་པོ་ཆེ་མཆོག་ཚོགས་ཕེབས་གནང་རྒྱུ་དང་ཐུགས་སྤྲོ་བོ་གནང་གི་ཡོད་རེད། ད་ལན་ཚོགས་མགོན་དུ་ཆིབས་བསྒྱུུར་བསྐྱངས་པ་དེའང་དེ་རེད། དེ་ནས་ཉིན་གྲངས་བཞི་ལྔ་ཡི་རྗེས་ལ་སྐུ་ཕྲེང་བཅུ་གསུམ་པའི་དགོངས་རྫོགས་མཆོད་འབུལ་དེ་འཁེལ་ཡོད་སྟབས། ཡིག་ཚང་གི་ངོས་ནས་མཆོད་འབུལ་ཞིག་ཞུ་ཐུབ་ན་དགེ་མཚན་འདུག་ཅེས་བཀའ་མོལ་བྱུང་ནས། མཆོད་འབུལ་ཞུས་པ་ཞིག་ཆགས་ཀྱི་ཡོད་རེད། མཆོད་འབུལ་སྨོན་ལམ་དེ་གོ་སྒྲིག་ཞུ་དགོས་པའི་དགོས་པ་རྒྱུ་མཚན་ནི། རྩ་བའི་རྒྱལ་མཆོག་བཅུ་གསུམ་པ་མཆོག་རྗེས་དྲན་ཞུས་དགོས་པ་དང་། ཁོང་གི་བཀའ་སློབ་ལམ་སྟོན་དེ་དག་རྗེས་སུ་དྲན་པར་བྱ་དགོས་པ་དེ་བོད་མི་སྤྱིའི་དོན་ལ་གལ་ཆེན་ཞིག་ཆགས་ཀྱི་ཡོད་རེད། ཁོང་གི་སྐུ་ཚེ་གང་གི་ནང་ལ་བོད་ཀྱི་ཆེད་དུ་ཕྱག་ལས་ཧ་ལས་པའི་མང་པོ་གནང་ཡོད་རེད། ཅེས་གསུངས་སོང་།

ཡང་རིན་པོ་ཆེ་མཆོག་གིས། ༸རྒྱལ་མཆོག་སྐུ་ཕྲེང་བཅུ་གསུམ་པ་མཆོག་གིས་དགུང་ལོ་གཞོན་ནུའི་དུས་སྐབས་ནས། ཆོས་སྲིད་ཀྱི་ཐུགས་འགན་བཞེས་ཡ་དེ་བྱུང་ཡོད་རེད། དགུང་ལོ་གཞོན་དུས་ནས་བཟུང་བོད་སྤྱི་ཡི་བསྟན་སྲིད་ཀྱི་ཆེད་དུ་ག་རེ་ག་རེ་གནང་འདུག་མཇལ་དུས། ཧ་ལས་པའི་ཐུགས་ཁུར་ཆེན་པོ་བཞེས་ནས་མཛད་པ་རླབས་ཆེན་མང་པོ་ཞེ་དྲགས་བསྐྱངས་ཡོད་པ་འདི། ཆོས་ཕྱོགས་དང་། དགོན་སྡེ་ཆེ་ཁག་གི་བསླབ་པ་སློབ་གཉེར། བསྟན་པའི་རྩ་བ་དགེ་ཚུལ་སློང་གི་སྡོམ་པ་འབོག་འཇོག་སོགས་བོད་དང་། སོག་པོ། དེ་བཞིན་འབྲེལ་བ་ཆགས་སའི་ཧི་མ་ཡ་ལའི་རི་རྒྱུད་ཁུལ་ལ་དགོངས་པ་དང་ཉམས་ཞིབ་དེ་དག་ཧ་ཅང་གི་གཏིང་ཟབ་པོ་རེད་འདུག དཔེར་ན། དགེ་བཤེས་ལྷ་རམས་པའི་རྒྱུགས་སྤྲོད་ཐོབ་ཐང་དམིགས་བསལ་གནང་རྒྱུ་དང་། གདན་སའི་སློབ་གཉེར་བ་རྣམས་ལ་དམིགས་བསལ་གྱི་མཐོང་དང་བརྩི་འཇོག་ཡོང་དགོས་རྒྱུའི་གནས་སྟངས་ཤིག་༸རྒྱལ་དབང་སྐུ་ཕྲེང་བཅུ་གསུམ་པས་གསར་གཏོད་དམ་ཆེད་དུ་སྲོལ་གཏོད་གནང་བ་ཞིག་རེད། དེ་བཞིན་སྤྱིར་བཏང་གི་སངས་རྒྱས་ཀྱི་བསྟན་པ་དང་ཚུལ་ཁྲིམས་ཀྱི་བསླབ་པ་དེ་གལ་ཆེན་པོ་ཡིན་ཙང་། འདུལ་བའི་བཅས་ཁྲིམས་ལ་དང་འདོད་གནང་བར་རྣམ་ཐར་དེ་དག་གི་ནང་ལ་མཇལ་ཐུབ་ཡ་ཞིག་རེད། དེ་བཞིན་བོད་སྤྱི་ཡི་བསྟན་སྲིད་ཀྱི་སླད་དུ་དགོངས་པ་རྒྱ་ཆེན་པོ་ཞེ་དྲགས་བཞེས་ནས། ཁོང་གི་ཉིན་རེར་གནང་བ་དེ་དག་མཇལ་དུས། བོད་དབུས་ལ་བཞུགས་གནང་གི་ཡོད་རེད་དེ། བོད་ཀྱི་མདོ་དབུས་ཁམས་གསུམ་གྱི་ས་ཁུལ་དང་། རྒྱ་ནག་དང་སོག་པོར་ཕེབས་དུས་ཀྱང་བོད་ལ་བང་ཆེན་ཡང་ནས་ཡང་དུ་བཏང་ནས། བོད་དོན་ཐུགས་ཁུར་བཞེས་པ་དང་རྒྱ་གར་དུ་ཕེབས་པའི་སྐབས་ཀྱང་ཀ་ལིམ་པུག་ལ་བཞུགས་ནས་བོད་མདོ་དབུས་ཁམས་གསུམ་ལ་བཀའ་ཡིག་བསྩལ་རྒྱུ་མཚོན་པའི་ཞེ་དྲགས་མང་པོ་ཞིག་གནང་འདུག ང་ཚོས་བཀའ་ཡིག་དེ་དག་རུབ་རུབ་བཟོ་དུས་ཉུང་ཉུང་ཞིག་རེད་མི་འདུག  ལྷག་པར་བོད་སྤྱི་ཡི་ཆབ་སྲིད་ཀྱི་ཐོག་ནས་བོད་རང་གི་ལུང་པའི་ཐུན་མོང་མ་ཡིན་པའི་ངོ་བོ་འཛིན་རྒྱུ་དང་། བོད་ཟེར་བ་དེ་རང་ཚུགས་པའི་ལུང་པ་ཞིག་ལ་ཆགས་རྒྱུའི་རྨང་གཞི་དེ་༸རྒྱལ་དབང་སྐུ་ཕྲེང་བཅུ་གསུམ་པའི་སྐབས་ལ་བཏིང་གནང་འདུག དེང་སྐབས་བོད་རང་བཙན་གྱི་སྐད་ཆ་བཤད་ནའང་ཁོང་གི་སྐབས་ལ་བཏིང་བའི་རྒྱ་བོད་བར་དང་། དབྱིན་བོད། བོད་སོག་སོགས་མང་པོ་ཞིག་དང་ཆིངས་ཡིག་བཞག་ཡོད། ད་ལྟའི་གནས་སྐབས་ལ་ཁྲིམས་ཀྱི་ཐོག་ནས་རྩོད་ན་གཞི་བཞག་ས་བརྟན་ཤོས་དང་ཆེ་ཤོས་དེ་ཁོང་གིས་བཏིང་མིན་འགྲོ་བསམས་པའི་ཚོར་བ་ཞིག་སྤྲོད་ཀྱིན་འདུག ཅེས་གསུངས་སོང་།

༸རྒྱལ་དབང་སྐུ་ཕྲེང་བཅུ་གསུམ་པ་མཆོག་ནི་ཆོས་སྲིད་གཉིས་ཀྱི་མཛད་འཕྲིན་རྒྱས་པའི་དབུ་འཁྲིད་ཅིག་ཡིན་པས། ཁོང་གིས་བོད་ཀྱི་ཆོས་སྲིད་གཉིས་ཀར་བཅོས་བསྒྱུར་དང་ཡར་རྒྱས་གཏོང་བའི་ཐུགས་འདུན་ཆེན་པོ་བཞེས་ཡོད། ཁོང་གིས་དབྱིན་ཇིའི་རྒྱ་གར་དུ་སྐྱབས་བཅོལ་ལ་ཕེབས་སྐབས་མིག་རྒྱ་བསྐྱེད་པའི་ཉམས་མྱོང་བྱུང་བ་དེར་བརྟེན་ནས། བོད་ནང་གི་སྤྱི་ཚོགས་དང་ཆབ་སྲིད་ལ་བཅོས་བསྒྱུར་ཆེན་པོ་གཏོང་དགོས་པར་བསམས་ཏེ། ཏར་འཕྲིན་དང༌། མ་ག་ཁང༌། བོད་ཀྱི་ཆེས་ཐོག་མའི་གློག་བཟོ་འཕྲུལ་ཁང་ཆུང་ངུ་ཞིག རྒྱལ་ཁབ་ཀྱི་དངུལ་ཊམ་དང་ཤོག་སྒོར་གྱི་པར་ཁང་བཅས་གསར་འཛུགས་གནང་ཡོད། དེ་བཞིན་ཆོས་ལུགས་དང་མ་འབྲེལ་བའི་དེང་རབས་ཀྱི་སློབ་གསོ་གལ་ཆེན་དུ་མཐོང་སྟེ་ཆེད་དུ་བདམས་པའི་བོད་ཀྱི་སློབ་ཕྲུག་འགའ་དབྱིན་ཇིའི་ར་གི་སྦད་སློབ་གྲྭར་སློབ་སྦྱོང་བྱེད་པར་བཏང༌། ཁོང་གིས་བོད་དམག་ལ་ལེགས་བཅོས་གནང་བ་དང༌། ཁམས་ཁུལ་དཔོན་རིགས་ཀྱི་ཕྲུ་གུ་རྣམས་ལྷ་སར་སློབ་སྦྱོང་དུ་བཀའ་འགུགས་གནང་ནས་གཞུང་གི་ལས་གནས་སུ་བསྐོ་གཞག་གིས་ཕྱིར་ལོག་གཏོང་གནང་བའི་མཛད་འཆར་ཡང་ཡོད། ཁོང་གིས་ཆུ་སྤྲེལ་ཞལ་གདམས་ནང་བཅོས་བསྒྱུར་ཆེན་པོ་མ་བཏང་ན་ཆོས་སྲིད་གཉིས་ལྡན་གྱི་ཞིང་འདིར་ཕྱི་ནང་གང་ས་ནས་ལྷགས་པར་ངེས་པས། རང་ས་མ་སྲུང་ན་བསྟན་འཛིན་གྱི་སྐྱེས་འཕགས་མིང་མེད་དུ་བཅོམ་ཞིང༌། བླ་བྲང་ཁག་དང༌། བསྟན་འཛིན་ཆོས་བྱེད་དགེ་འདུན་གྱི་སྡེའི་འཛིན་དབང་མཆོད་རྒྱུན་དང་བཅས་པ་རྩ་བརླག ཆོས་རྒྱལ་མེས་དབོན་རྣམ་གསུམ་གྱི་བཞེད་རྒྱུན་ཆབ་སྲིད་ཀྱང་མིང་ཙམ་དུ་ཉམས་དམས་ཐོག་འདི་གའི་ཞབས་འབྲིང་ཀུན་ཀྱང་ཁང་གཞིས་རྒྱུ་ནོར་རྩ་འཕྲོག་དགྲ་ཡའི་བྲན་དུ་དབང་མེད་དུ་འཁྱམས་ཤིང༌། ཡིད་ཅན་ཀུན་ཀྱང་མནར་གཅོད་འཇིགས་སྐྲག་གི་དུ་ཁཿཉིན་མཚན་མི་འཁྱོལ་བའི་དུས་ཤིག་འབྱུང་ངེས་པས། ཞེས་བཀའ་སློབ་སྩལ་ཡོད།

གསར་འགོད་པ་དཔལ་ལྡན་གྱིས་འབྲས་སྤུངས་སྒོ་མང་ཟུང་ཆུ་ཁང་ཚན་ནས་སྤེལ།