རྒྱ་ནག་གཞུང་གིས་བལ་ཡུལ་ནང་གསང་མྱུལ་ལྟ་ཞིབ་བརྙན་ཆས་སྟོང་ཕྲག་མང་པོ་བཙུགས་ཏེ་བོད་མི་རྣམས་ལ་སོ་ལྟ་དང་ལྟ་རྟོག་ནན་པོ་བྱེད་བཞིན་འདུག
ཁ་སང་ཕྱི་ཚེས་ ༢༡ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ད་ལྟའི་ཆར་རྒྱ་ནག་གཞུང་གིས་བོད་ནང་ཙམ་དུ་མ་ཟད། བལ་ཡུལ་དུ་ཡོད་པའི་བོད་མི་འདུས་སྡོད་ཀྱི་ས་ཁུལ་ཁག་གི་ཁྲོམ་གཞུང་དང་ཁང་ཐོག་སོགས་སུ་གསང་མྱུལ་ལྟ་ཞིབ་བརྙན་ཆས་སྟོང་ཕྲག་མང་པོ་བཙུགས་ཏེ་བོད་མི་སྐྱབས་བཅོལ་བའི་འགུལ་སྐྱོད་ལ་ལྟ་རྟོག་ནན་མོ་བྱེད་བཞིན་ཡོད་འདུག
གནད་དོན་དེའི་ཐད་རྒྱ་ནག་ཕྱི་སྲིད་ལས་ཁུངས་ཀྱིས། བལ་ཡུལ་ནང་བོད་མི་རྣམས་ལ་སོ་ལྟ་བྱེད་ཀྱི་ཡོད་སྐོར་བརྗོད་པ་ནི་ཀུན་སློང་ངན་པས་སྐུལ་བའི་རྫུན་ཡིན། དེ་ནི་བོད་དོན་ཁ་ལ་འཁྱེར་ནས་རྒྱ་ནག་གི་ནང་སྲིད་ལ་ཐེ་ཇུས་དང་། བལ་ཡུལ་དང་རྒྱ་ནག་བར་གྱི་མཉམ་ལས་ལ་དཀའ་ངལ་དང་དོ་ཕོག་བཟོ་ཐབས་བྱེད་པའི་དམིགས་ཡུལ་དེ་ནམ་ཡང་འགྲུབ་ཀྱི་མེད་ཚུལ་གྱི་ལན་འདེབས་བྱས་འདུག
ཡང་གནད་དོན་དེའི་ཐད་བལ་ཡུལ་དུ་ཡོད་པའི་བོད་མིའི་སྒྲིག་འཛུགས་ཀྱི་འབྲེལ་ཡོད་ལས་བྱེད་ཅིག་གིས། སྔོན་མ་ལོ་རེར་བོད་མི་སྟོང་ཕྲག་མང་པོ་བལ་ཡུལ་དུ་བྲོས་བྱོལ་ལ་ཡོང་གི་ཡོད་ཀྱང་། ད་ལྟའི་ཆར་བྲོས་བྱོལ་དུ་ཡོང་མཁན་གྱི་བོད་མི་རེ་ཟུང་ལས་མེད་པ་དང་། བོད་མིའི་སྒྲིག་འཛུགས་ཀྱིས། རྒྱ་ནག་གཞུང་གིས་ས་མཚམས་ཁག་ཏུ་དམ་དྲག་ཤུགས་ཆེན་བྱས་པ་དང་། བལ་ཡུལ་དང་རྒྱ་ནག་བར་གྱི་འབྲེལ་ལམ་ཡར་རྒྱས་ཕྱིན་པ། ད་དུང་དེ་སྔར་མེད་པའི་ལྟ་རྟོག་ཤུགས་ཆེན་བྱེད་ཀྱི་ཡོད་པ་སོགས་ལ་བརྟེན་ནས་བཙན་བྱོལ་དུ་ཡོང་མཁན་གྱི་བོད་མིའི་གྲངས་འབོར་ཇེ་ཉུང་དུ་ཕྱིན་ཡོད་སྐོར་ཨ་རིའི་གྲོང་ཁྱེར་ནེའུ་ཡོག་ཏུ་རྟེན་གཞི་བྱས་པའི་ཨེ་པི་གསར་ཁང་ (AP) ལ་བརྗོད་ཡོད་འདུག
གནད་དོན་འདི་དང་འབྲེལ་ནས། རང་ལོ་ ༤༩ ཡིན་པའི་བལ་ཡུལ་དུ་སྡོད་མཁན་བོད་དོན་ལས་འགུལ་བ་ཟུར་པ་བསོད་ནམས་བཀྲ་ཤིས་ལགས་ཀྱིས་ཨེ་པི་གསར་ཁང་ལ་བརྗོད་དོན། བལ་ཡུལ་ནང་རྒྱ་ནག་གི་གནོན་ཤུགས་འོག་ངས་བོད་དོན་ལས་འགུལ་སྤེལ་མཚམས་འཇོག་དགོས་བྱུང་སོང་ལ། ངའི་བུ་བལ་ཡུལ་དུ་སྐྱེས་ཡོད་ཀྱང་རྒྱ་ནག་གི་གནོན་ཤུགས་འོག་སྐྱབས་བཅོལ་བ་དང་བལ་ཡུལ་མི་སེར་གྱི་ཡིག་ཆ་གང་ཡང་སྤྲོད་དུ་བཅུག་མེད་སྟབས། ད་ལྟ་བལ་ཡུལ་ནང་དམ་དྲག་ཇེ་ཆེར་མ་ཕྱིན་སྔོན་ལ་བུ་བལ་ཡུལ་ནས་ཕྱིར་ལེན་ཐབས་བྱེད་བཞིན་ཡོད་ཅེས་བརྗོད་འདུག་ལ། བལ་ཡུལ་གཞུང་གིས་བོད་མི་འདུས་སྡོད་ཀྱི་ས་ཆ་གང་སར་བརྙན་མིག་འཕྲུལ་ཆས་བཙུགས་ཡོད་པས་བལ་ཡུལ་ནང་བོད་མི་རྣམས་ལ་བདེ་འཇགས་ཀྱི་འཚོ་བར་རོལ་བའི་མ་འོངས་པ་ཡོད་མི་སྲིད་པ་དང་། བལ་ཡུལ་ནང་གསུམ་བཅུའི་དུས་དྲན་དང་༸གོང་ས་མཆོག་གི་འཁྲུངས་སྐར་སོགས་སྲུང་གཙི་བྱེད་པར་དམ་དྲག་ཆེན་པོ་ཡོད་པའི་ཁར། ཕྱི་ལོ་ ༢༠༡༨ ཙམ་ནས་བལ་ཡུལ་གཞུང་གིས་བོད་མི་སྐྱབས་བཅོལ་བའི་ཐོག་དམ་དྲག་གི་སྲིད་ཇུས་ཤིག་བཟོས་ཏེ། བོད་མི་ཚོས་ལས་འགུལ་སྤེལ་བར་སྔོན་ཚོད་ནས་དམ་དྲག་གི་གྲ་སྒྲིག་བྱེད་བཞིན་འདུག
ད་ལྟ་བཀྲ་ཤིས་ལགས་ཀྱིས་གསུངས་པ་ལྟར་ན། བལ་ཡུལ་ནང་བོད་མི་རྣམས་ལ་སྐྱབས་བཅོལ་བ་དང་མི་སེར་གྱི་ཡིག་ཆ་ཚད་ལྡན་མེད་པའི་རྐྱེན་གྱིས་བལ་ཡུལ་ནང་ཡོད་པའི་བོད་མི་རྣམས་ནས་དངུལ་ཁང་སྒོ་ཕྱེས་མི་ཐུབ་པ་དང་། ཁྲིམས་མཐུན་གྱི་ཐོག་ནས་ལས་ཀ་བྱེད་མི་ཐུབ་པ། མཐའ་ན་རྒྱལ་ཁབ་གཞན་ལའང་འགྲུལ་བཞུད་བྱེད་ཐུབ་ཀྱི་མེད་པའི་དཀའ་ངལ་སོགས་ཀྱི་འཕྲད་ཀྱི་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་པ། སྐལ་བཟང་སྦྱིན་པ།
