བཀའ་བརྒྱུད་སྨོན་ལམ་ཆེན་མོ་ཐེངས་ ༤༠ འཚོག་བཞིན་པ།

ཟླ་འདིའི་ཕྱི་ཚེས་ ༢༢ ནས་ཕྱི་ལོ་ ༢༠༢༦ ཟླ་ ༡ ཚེས་ ༣ བར་གནས་མཆོག་རྡོ་རྗེ་གདན་དུ་བཀའ་བརྒྱུད་སྨོན་ལམ་ཆེན་མོ་ཐེངས་བཞི་བཅུ་པ་འཚོག་བཞིན་པའི་ཐོག་༸རྒྱལ་དབང་ཀརྨ་པ་མཆོག་ནས་ཐོས་བསམ་སྒོམ་གསུམ་གྱི་ཤེས་རབ་སྐོར་ལ་བཀའ་སློབ་གནང་འདུག

དེ་རིང་ཕྱི་ཚེས་ ༢༩ ཉིན་དྲ་ལམ་བརྒྱུད་༧རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་གིས། དེ་རིང་ཤེས་རབ་ཀྱི་སྐོར་གོ་བདེ་པོ་བྱས་ནས་ཞུ་ཡི་ཡིན། ཐོས་བསམ་སྒོམ་གསུམ་གྱི་ཤེས་རབ་དགོས་ཀྱི་ཡོད་པ་རེད། ཐོས་པའི་ཤེས་རབ་ནི་རང་ཉིད་ཀྱིས་གནས་ཚུལ་གང་ཡིན་པ་ཤེས་རྟོགས་དང་ངོས་འཛིན་བྱེད་ཐུབ་པ་བྱ་དགོས། དཔེར་ན། མི་གཞན་གྱིས་ཁྱེད་རང་ལ་ཁ་ཡ་མ་བྱས་པ་དང་ཡ་ལན་མ་བྱས་པར་བརྟེན་ཁོང་ཁྲོ་ལངས་པ་དང་། སོ་སོའི་ལས་ཀ་ཡག་པོ་ཞིག་བྱས་ཀྱང་། བསྔགས་བརྗོད་མ་བྱས་པར་བརྟེན་སེམས་ཕམ་པ་སོགས་ཡོང་གི་རེད། སྐབས་དེ་དུས་དམ་པའི་ཆོས་དང་དེ་དང་འབྲེལ་བའི་གནས་ཚུལ་མང་པོ་ཞིག་སློབ་སྦྱོང་བྱས་ཏེ། སེམས་འཁྲུག་པ་དང་བློ་ཕམ་པ་སོགས་གང་འདྲ་ཡོང་གི་ཡོད་པའི་ཐོག་སློབ་སྦྱོང་བྱས་ཏེ་སེམས་འཁྲུག་པའི་རྒྱུ་རྐྱེན་དེ་དག་ངོས་འཛིན་པ་བྱ་རྒྱུ་གལ་ཆེན་པོ་རེད། བསམ་པའི་ཤེས་རབ་ནི་གནས་ཚུལ་ལ་དབྱེ་ཞིབ་དང་བསྐྱར་ཞིབ་བྱ་རྒྱུ་ཞིག་རེད། དཔེར་ན། མི་གཞན་གྱིས་ཁྱེད་རང་ལ་མགོ་སྐོར་བཏང་བ་ཤེས་རྟོགས་བྱུང་སྟེ་ཁོང་ཁྲོ་ཟ་བའི་སྐབས། སོ་སོའི་སེམས་དེ་ཉོན་མོངས་པས་ཁེངས་ཀྱི་ཡོད་པ་རེད། དེར་བརྟེན་སོ་སོའི་སེམས་དེ་ཉོན་མོངས་པའི་དབང་དུ་མ་བཏང་བར་སོ་སོའི་སེམས་ཞི་ལྷོད་ཡོང་རྒྱུའི་ཐབས་ཤེས་བྱེད་དགོས་ཀྱི་ཡོད་པ་རེད། སྒོམ་པའི་ཤེས་རབ་ནི་གོམས་འདྲིས་བྱས་པའི་རིམ་པ་ཞིག་རེད། དེ་ཡང་ཉོན་མོངས་དང་པོ་སྐྱེས་པའི་སྐབས། སོ་སོའི་བསམ་བློ་གཏོང་སྟངས་ལ་འགྱུར་བ་གཏོང་དགོས་ཀྱི་ཡོད་པ་རེད། གཉེན་པོ་བསྟེན་སྟངས་དེ་སོ་སོའི་གོམས་གཤིས་དང་རང་བཞིན་དུ་འགྱུར་བ་བྱེད་ཐུབ་དགོས་ཀྱི་རེད། དེ་ཡང་གོམས་འདྲིས་སུ་འགྱུར་ན་སྔར་སོ་སོ་རང་ཉིད་ལ་སེམས་འཁྲུག་པ་དང་ཉོན་མོངས་པ་སྐྱེས་སླ་བའི་རང་བཞིན་དེ་ལ་འགྱུར་བ་འགྲོ་ཐུབ་པ་ཞིག་ཡོང་གི་རེད། ཅེས་གསུངས་སོང་།

ཡང་༧རྒྱལ་དབང་ཀརྨ་པ་མཆོག་གིས། སངས་རྒྱས་ཀྱི་གོ་འཕང་ཐོབ་པར་ཆོས་ཉམས་ལེན་བྱེད་དགོས་ཀྱི་རེད། དེ་ཡང་དད་པ་དགོས་ཀྱི་རེད། དད་པ་མེད་པ་ཡིན་ན་ཆོས་ལ་འཇུག་གི་མ་རེད། ཤེས་རབ་མེད་ན་འཁོར་བ་ལས་ཐར་ཐུབ་ཀྱི་མ་རེད། སྙིང་རྗེ་མེད་ན་སངས་རྒྱས་ཀྱི་གོ་འཕང་དོན་དུ་གཉེར་ཐུབ་ཀྱི་མ་རེད། སངས་རྒྱས་ཀྱི་གོ་འཕང་ཐོབ་པར་དེ་ཐོབ་འདོད་ཀྱི་བློ་སྐྱེས་དགོས་ཀྱི་རེད། སངས་རྒྱས་ཀྱི་གོ་འཕང་ཐོབ་པར་བྱང་ཆུབ་སེམས་དགོས་ཀྱི་རེད། བྱང་ཆུབ་ཀྱི་སེམས་སྐྱེས་པར་སྙིང་རྗེ་བསྒོམ་དགོས་ཀྱི་རེད། དེ་ཡང་སོ་སོའི་སེམས་རྒྱུད་ལ་བྱམས་པ་བཅོས་མ་མ་ཡིན་པ་སྐྱེ་དགོས་པ་དང་། དེ་ལ་བརྟེན་ནས་སྙིང་རྗེ་བཅོས་མ་མ་ཡིན་པ་སྐྱེས་ཐུབ་པ་དང་བྱང་ཆུབ་ཀྱི་སེམས་སྐྱེས་ཐུབ་ཀྱི་རེད། ཅེས་དང་། སྙིང་རྗེ་ཟེར་བ་དེ་སེམས་ཅན་གྱི་སྡུག་བསྔལ་ལ་དམིགས་ནས་སྐྱེས་པ་ཞིག་ཆགས་ཀྱི་ཡོད་སྐོར་དང་། སེམས་ཅན་ཆེ་ཆུང་ཅི་འདྲ་ཞིག་ཡིན་རུང་སྡུག་བསྔལ་གྱིས་མནར་བ་ཞིག་ཡིན་པར་བརྟེན། རང་དོན་གྱི་བསམ་པ་དོར་ནས་སེམས་ཅན་གཞན་གྱི་སྡུག་བསྔལ་ལ་སྣང་མེད་མི་གཏོང་བར་དོ་འཁུར་མང་ཙམ་བྱས་ཚེ། རིམ་པས་སྙིང་རྗེ་སྐྱེ་ཡོང་གི་ཡོད་སྐོར་སོགས་བཀའ་སློབ་གནང་འདུག

ལོ་རྒྱུས་ལྟར་ན། བཀའ་བརྒྱུད་སྨོན་ལམ་ཆེན་མོ་འདི་ནི་འཇིག་རྟེན་ཐོག་བྱམས་པ་དང་བརྩེ་བའི་ས་བོན་སྤེལ་བ་དང་། ཀུན་སློང་རྣམ་པར་དག་པའི་སྒོ་ནས་རང་གི་ནུས་པ་གོང་དུ་སྤེལ་ཏེ་འཇིག་རྟེན་གྱི་སྐྱེ་འགྲོ་ཀུན་ལ་ཞི་བདེ་དང་། བྱམས་པ། བདེ་སྐྱིད་ཕུན་སུམ་ཚོགས་པ་སྤེལ་བའི་ཆེད་དུ་དམིགས་པ་ཞིག་ཡིན་ལ། དུས་རབས་བཅོ་ལྔའི་ནང་༸རྒྱལ་དབང་ཀརྨ་པ་སྐུ་ཕྲེང་བདུན་པའི་སྐབས་ཐོག་མར་བྱུང་ཞིང།  ཕྱི་ལོ་ ༡༩༥༠ ནས་བཟུང་བོད་ནང་དུས་འགྱུར་རིམ་པ་བྱུང་རྐྱེན་བར་ལམ་སྨོན་ལམ་ཚོགས་མ་ཐུབ་པར་ལྷག་ཡོད་ཀྱང་། ༸གོང་ས་རྒྱལ་བ་རིན་པོ་ཆེ་མཆོག་གི་དབུས་བསྟན་བདག་བླ་ཆེན་རྣམས་བཙན་བྱོལ་ནང་ཕེབས་ཐུབ་པ་བྱུང་རྗེས། ཕྱི་ལོ་ ༡༩༨༣ ལོར་༸སྐྱབས་རྗེ་ཀ་ལུ་རིན་པོ་ཆེ་མཆོག་དང་འབོ་དཀར་རིན་པོ་ཆེ་མཆོག་རྣམ་གཉིས་ནས་རྒྱ་གར་ནང་བཀའ་བརྒྱུད་སྨོན་ལམ་ཆེན་མོ་བསྐྱར་གསོ་མཛད།  ཕྱི་ལོ་ ༢༠༠༤ ལོར་༸རྒྱལ་དབང་ཀརྨ་པ་མཆོག་ནས་སྨོན་ལམ་ཆེན་མོའི་སྒྲིག་གཞི་འདུལ་ཁྲིམས་དང་མཐུན་པར་བསྐྱར་བཅོས་མཛད་དེ་ལོ་ལྟར་ཚོགས་གནང་གི་ཡོད་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།